MALAKI 4 - ASII LAKDAP Bible (BSI)

Tatiwe Ranaiq Saühotlo She

¹ Tati Ningkun Ajong Pinthumwe raq ngutlo, “Liirong laq, kumrong kumraq maiqse nai abi ashut kloti thun wiita tsamkü shinphong wa na chaq tlaq ikha michaq baiq. Kra ranaiq tsangshiq ka wiita tiisii rai michaq baiq.

² Shatmaq namshiq ibom taitai siti miika, kra ranaiq na ngi tiichhii wan ningkun ka rashe kiitlaq ikha, namshiq khuthaq na mililiim wan. Raüta namshiq ma khusang maq siwan miitu rashekiili ikha mikii kiimaq rashekii chai ikha namshiq khum na ra miwiikuq. Kiimaq namshiq ka wase miishe mija han kiimaq khoqriiq shishiiq, minsaü setiim minsaütiip mong wa nyiim tiiphaq kai kilü dibaiq kiijaq riichunchea tlaq ikha michochi han.

³ Ngi raq ijaqsham wan tiikang ranaiq, namshiq raq ashut kiimungti ka mitang wan han. Krai mren tsangshiq ka namshiq hokphi takiq na botkhulai ikhiishe miraq.

⁴ “Ngi raq ijaqshise Mosheq ma Sinai Pum maq Israilnok tlotli raq lang wan miitu akuqha, thungtri raü, kiimaq aming thun ka tsan na tiitsang ronglaq.

⁵ “Shatmaq, liirong laq, kra Tatiwe ranaiq jonghea kiimaq phiiptsi chang ranaiq kra misaüho shaq na, ngi raq namshiq phana shammiwe Elija mitiikiliha.

⁶ Apaiq raq awetiim ka asetiim rai adam na hali mitriitam wan nong. Kra riimak nguraü ka, ngi saüho lata, nammung ka shiithenbaiq chang mijaki.”