MALAKI 3 - ASII LAKDAP Bible (BSI)

¹ Tati Ningkun Ajong Pinthumwe raq tretlo, “Ngi raq itsasoqtiwe, ngi kai ma lamtanho, sinkhu na mitiikiha. Krai mren, namshiq raq ümchaü thenge liitlan Tatiwe ka tiihanghiiq miili apaiq Shomjam mong na misaüho. Ümchaü namshiq raq maklii khamthii khetlan kra misaüho. Raüta itongshong bomtsi kra chiiriim raüta michongkuq.”

² Shatmaq apaiq saükai ranaiq akhing kra juwero minin lot? Apaiq saüki raü jaq, asham ka juro miliilot? Richikhü wabun maq raihi kheathum alum ikha henghea miraq. Kiimaq jinpan ka khiwa na shu raüta jinpü tiikhiim tiiqbaiq tlaq ikha wa na tiike shu raüta mitiiq wan.

³ Apaiq ka, maiqse khaphokai miki. Apaiq raq kampho ngam ka khi wa na tiiqwe raq tiikhiim raüta tiijo tlaq, raüta abi ashe jinpü ka tiidoq bukbaiq tlaq ikha, maiqse kiimin michen wan. Kiimaq jatiiqti raq kampho ngam nai chaq ngam bu ka tiikhiim chaq tlaq ikha, raüta ashe ashi jinpü ka sintu maq tiihiip tiiqbaiq tlaq ikha Tatiwe kiimwe raq ramwebi ka mitiiq wan. Raüta asii ramwebi miishe mitiija wan. Kra tiisii tiiq wan tlaq krai mren ramwebi raq tsangshiq khum ka asii miishe Tatiwe ma asii honglu she mikuq wan.

⁴ Kiijiishetiq, Juda mung na siti mungmaiqse nai Jerusalem chela na siti nokmaiqse raq Tatiwe ma honglu kuq wan tlaq kriika, man na richüpat na kuq tlaq ikha athuk atsom tsan tiiheali chang she miraq.

⁵ Tati Ningkun Ajong Pinthumwe raq ngutlo, “Ngi ka namshiq phong na midongkiha. Lata namshiq kha ka miphoha. Mintin loqle kloti, maiqchak rai srati, rung na arot saqse keti, ningchang jaqmaq kuq mak haihiiti, kiimaq thümwaq manti-nyungre nanshanti, jechi-nomi kiimaq wanshawe haihiiti kha, kiimaq ngi ma shreng manto thüwan makti thun kha kra miphoha.

Aroqkhu Honglu

⁶ “Ngi ka Tatiwe. Kiimaq ngi ka klai mang phan. Arningkhan namshiq Jakob saüse phan ka thumli ka thumki mandea.

⁷ Namtitiim pat niimin la, tsangshiq ma ngi raq akuqha aming thun lang mak siwanto. Kra tiidada sii hali, ümchaü namshiq riimin ngi aming lang man, itri wokhong wa ahin na juho lan. Tri raütu ka lang man. Ümchaü min namshiq ka iphana jangwan rong rea. Raüla ngi min, namshiq phana mijang wan nongha. Shatmaq namshiq raq, ‘Riita naishiq ka jamkho ümphana mijang wan nong hai?’

⁸ Ikhla ngi raq namshiq ma waipha. Riita maiq weshi raq Shiikeawe laolii ka maitlo sha? Kriika riimak. Ajiq. Shatmaq namshiq raq ngi lao tlan. ‘Jamkho lao tiikai?’ nguta namshiq raq waitlan. Aroqkhu honglu nai alu ke na lao tlan.

⁹ Namshiq Israilnok wiimungtam raq ngi lao tlan kha na, wiimungtam ka manson mong niili she sitlan.

¹⁰ Namshiq aroqkhu honglu ümchuwa sitlaq kra, kunkun Shomjam na kuq ronglaq. Krai mren, kiijaq aphaq asea chang phan ka chamtraq ama miraq. Namshiq raq ngi maitai rong laq, ngi raq ramungtan kilü ka linham linhok lata miraü kuq ha. Phanrap phanrii achu shiiman phongtsoktsok she mikuq ha.

¹¹ Ngi raq namshiq wak wa, ajong ajii ma tü atsam ka tiiphaq mang she. Krai mren nam spiqro thun na atsi ango ka atu alu she miraq.

¹² Kiijiishe pongmungti thun tlotli raq namshiq ka kechu maiqsetiim dea ngutaq mirinwii wan. Jamkhano ngukla, nammung ka maiq siwan miitu mungpo mung ashi miishe mija wan.

Tsapkapkap Maq Kamwanti Poksi Milap

¹³ “Namshiq raq ngi ma ashut pinthum bom lan,” nguta Tatiwe raq ngutlo. “Shatmaq namshiq raq, ‘Naishiq ümniima jamkho shuttiikai?’ nguta waitlan.

¹⁴ Namshiq raq, ‘Shiikeawe shomnoq arka jamlai liip min ahü. Apaiq raq chongtlaq kra sham laita jamliip wa midong. Kiimaq, nashiq raq jamlai wa ajiq klo kai kra ningkhan, Tati Ningkun Ajong Pinthumwe man na, nashiq mra tiidii wan kiimin jamlai liip wa midong?

¹⁵ Jamkhano ngukla, shiikong miilong maiqse kra khoti, apeowiq polokhiq sitlo chhitiikai. Ashut aphit maiqsetiim kra khoti chiithe lüwa sitlo. Kiimaq tsangshiq raq ashut kiimung raüta, Shiikeawe raq anin wan tsii rüm tlaq kra tairai tlo. Kiimaq raüta juho tlo’” nguta tsütsit tlo.

¹⁶ Kiijiishe Tatiwe ma tiihai shat maq siti liipan na bom ka riichongto. Kiimaq Tatiwe riimin tsangshiq bom ka taito. Kiimaq tsangshiq raq jamlai wa chongtaq kra trekuqto. Raüta Tatiwe raq apaiq ma haisong tsantsii thüti, kiimaq apaiq shrengti miitu lakdam ashi na akha waiqthüto.

¹⁷ “Tsangshiq ka isengi miraq,” nguta Tati Ningkun Ajong Pinthumwe raq ngutlo. “Ngi raq ümra ranaiq wa kha pho wan tiikang, tsangshiq ka ise inoshaq miishe mija wan. Ngi raq tsangshiq ka, awe bomtaiti ase jamkho awe raq mangchan tlaq, ikhiishe mimangchan ha.

¹⁸ Isenginok raq thongshi ri hali, kechu maiqse nai ashut maiqse, jurwa ngi shomnoq tlaq kiimaq jurwa ngi shomnoq mak, kra liipan na ahea abi trairii wan tlaq kra tsangshiq raq mak michhi wan,” nguta Tatiwe raq ngutlo.