MALAKI 2 - ASII LAKDAP Bible (BSI)

¹ Tati Ningkun Ajong Pinthumwe raq ngutlo, “Riita ramwebi lei, ara aming arka namshiq miitu kuqtiikang:

² Namshiq raq ngi ka namshiq jaqsham maq shreng ratlo. Namshiq raq ibomchong taiman riihan la, ngi raq namshiq khuthaq na manson mitiisaüha. Namshiq ramwe jaqsham jaq maq hupsam lap tlan thaq na tüsaiqsaiq misonha. Riikhaqli miika ngi raq man ason kun she. Jamkhano ngukla, namshiq raq ngi aming shreng lanta lang man.

³ Liirong laq. Ngi raq namsetiim ka mitsat wanha. Kiimaq namtheaphi ka, nyamse honglu atakuq han daiq maq mimoq wan pha. Kiimaq namshiq ka nyamse daiq raübaiq kai chang hiq ba kiijaq mihit thüki ha.

⁴ Kra riiha jiitiq, namshiq raq ara aming arka ngi riidea akuqha nguta misap han. Krai mren ngi raq Lewi saüse phan ramwebi rai tongshong kang kra raükha ka tiipanki mak she miraq.

⁵ “Ngi raq tongshong ramkham tiibok kang akhing na, tsangshiq ma rilungke wan miitu nai hansang maq shongnga wan miitu ramram kuq kang. Ngi raq tsangshiq ma ramram kuqkang kriika, tsangshiq raq ngi mishreng laq nguta kuqkang. Kra pat na tsangshiq raq ngi ka shreng wanto. Kiimaq ngi ma haisong tsantsii thü wanto.

⁶ Tsangshiq raq riikhaqli lamphan kli shrinkuq wanto. Ajiq lamphan ka shrinkuq wan mak. Tsangshiq ka ngi rai tsanshi mongshi maq shongnga wanto. Tsangshiq maiqmii raq tingting jaqsham lamlam li ka riimak. Shatmaq nokmaiqse pahea ma abi, ashut jaqsham ka wiita tiithaq baiqto.

⁷ Ramwebi jaqsham ka riikhaqli maq nokmaiqse ma Shiikeawe tiisap wan shrinke wan kra riito. Nokmaiqse tsangshiq phana kitlaq kriika, ngi tiima tsantsii kra sapkai miitu kitlo. Jamkhano ngukla tsangshiq ka Tati Ningkun Ajong Pinthumwe kiimwebi.

⁸ “Shatmaq, ümchaü namshiq ramwebi ka tamlamlam maq, itri tingting lamphan kra jinbaiq wan lan. Lanta namshiq raq ajiq shrinkuq tlan kra lümaq, nokmaiqse pahea raq ajiq ashut klotlo. Ngi raq namshiq ma tongshong raü khakuq wan kang kra wiita she jin baiq wan lan.

⁹ Arkha na, ngi riimin, Israilnok tsantsii ka namshiq tiishummii wan miitu she mitiiphe baiq wan ha. Jamkhano ngukla, namshiq raq, ngi raq thapthi tiikang kra shamkuq man kiimaq, namshiq raq isenginok ma shrinkuq tlan na, nokmaiqse ka tarü makliishi maq liiman riitlan.”

Riishot Riishaq Kherü Lamphan Nai Chakmiim Wan Ka Ajiq

¹⁰ Nashiq tarü ka weshise li riimak shea? Nashiq phansang wanti Shiikeawe ka ashili riimak shea?. Ikhiijiika, nashiq liipan kiqkham raütu khatiikai ka jaram wa jintiikai, kiimaq Shiikeawe raq natitiim ma tongshong jaqkhaq raü tiipakuq wantaq kra jam nguto diibaiq tiikai?

¹¹ Juda mungti raq Shiikeawe ma kiqkham raüpot akhakuq wan ka wiita she panbaiq wanto. Raüta Jerusalem na nai Juda mung tlotli na phiiptsi chang ashut jaqsham wan tlo. Tsangshiq raq Tatiwe raq lungwiitlaq Shomjam ka wiita tiisheshi baiqto. Maiqwere raq pongmungti phra sumla noqti sheare lam wanto.

¹² Kiimaq Tatiwe raq akhnok maiq thun ka, Israilnok tu mong kiiwa alam mirbaiq laq. Kiimaq na mung raq Tati Ningkun Ajong Pinthumwe ma honglu kuq tiikai kiijaq, tsangshiq ka ümtiikiimin tlom dam raamak she.

¹³ Kiimahali namshiq ara ajiq kiimung ashi klo tlan ka ara. Namshiq ka aho asii hoq trang lanta, Tatiwe berong-wacha ka wiita tiipiim baiq tlan. Jamkhano ngukla, namshiq raq akuqhan honglu ka Tatiwe raq tao mak she.

¹⁴ Apaiq raq ümnaq honglu ka jam nguto tao wan mak she nguta waitlaü. Jamkhano ngukla apaiq raq asap, ümniiraq ümchak, man na jero ji na alam haü kiima ümkiqkham akhakuq haü kra apan she riibaiq laü. Apaiq ka ümjamti-nyung shatmaq, ümniiraq apaiq ma, ümkiqkham jaqkhaq raü atiipa kuq haü ka apan she riibaiq laü. Ümniiraq Shiikeawe man na apaiq rai pumshi hanshi she mishong wan ha nguta kiq akham haü kra jin wan laü.

¹⁵ Shiikeawe raq ümniika ümjamti-nyung rai han-ngam na kiimaq wenyi na pum ashi han ashi klokuq wanto riimak shea? Apaiq raq namnai tiishong nga wantaq arka jamlai miitu wa? Arka namsetiim ka riikhaqli Shiikeawe saüsetiim ma mija wan laq nguta atiishong wan. Arningkhan, namshiq liipan wa ju riimin, achak ma jaqkhaq raü atiipakuq kra, diibaiq maimak.

¹⁶ “Ngi raq achak miimbaiqti ka liiro mang,” nguta Israilnok Tati Shiikeawe raq ngutlo. “Namshiq phong wa maiq weshi ra raq achak miimbaiq chhiha jiila, ngi raq akhiismin liiro mang. Arningkhan, namshiq raq tsan na atsi dada maq thü ronglaq. Ümniiraq ümchak ma pumshi hanshi maq misi wan ha nguta kiqkham kuq laü ka tsapkapkap thü wan ratlo.”

Khapho Ranaiq Akhing Ka Ajelishe

¹⁷ Namshiq bomtsi kriimiili Tatiwe ni tiibiili bom tlan. Shatmaq namshiq raq, “Naishiq raq apaiq ni ka jamkho tiibiibaiq kai?” nguta ngutlan. Namshiq raq, “Tati Ningkun Ajong Pinthumwe miika ümchuwa ashut kloti wiita ka ahea siisaq. Riikhaqli miika, Tatiwe apaiq miika apeowiqli,” nguta ngutlan. Riimak la namshiq raq, “Riita, tingting Shiikeawe ka ümbano?” nguta bom lanta Tatiwe ni tiibii tlan.