MALAKI 1 - ASII LAKDAP Bible (BSI)

¹ Arka Tatiwe tsütsa shammiwe Malaki lümaq Israilnok ma atiichongho.

Israilnok Miitu Tatiwe Mangchan

² Tati raq asenginok ma ngutlo, “Ngi raq namshiq wranaiqshe lungwii wan kang.” Shatmaq tsangshiq raq, “Ümniiraq naishiq ma lungwiitsii ka jamkho tiichhikuq laü?” nguta waitlo. Kiijiishe Tati raq tretlo, “Esau nai Jakob ka siphu. Shatmaq ngi raq Jakob nai asaü asetiim ka lungwii wan kang.

³ Kiimaq Esau nai asaü asetiim ka ashulii riiwan kang. Ngi raq Esau hiqshong ku akin ka tiithenbaiq wan kang. Lata tsanghiqshong rahai kra miikakoi ma kuqbaiq thükang.”

⁴ Kiimaq Esau saüsetiim, Edom mungti raq, “Naishiq hiqshong chela thun wiita shiithen baiq wanto. Shatmaq naishiq raq atiihea mirnong hai,” nguta tsangshiq raq mingu. Kiijiishe, Tatiwe raq hali mitre nong, “Tsangshiq raq bamtiihea laq. Ngi raq tsangshiq chela thun ka thongshi ri hali mirun baiq nongha. Kra chhi raüta nanok ahinti raq, ‘Armungti ka abi. Tsangshiq rai ka Tatiwe tsankhiq ka pattup siruq li miraq,’ nguta mirchong.”

⁵ Ara mra pin ka Israilnok raq tsangshiq maiqmii mak maq michhi wan. Raüta tsangshiq raq, “Tati jaqsham ka Israil mung hiqrai tlea raüta min, hengtlo,” nguta mingu.

Tatiwe Raq Ramwebi Sonto

⁶ Tati Ningkun Ajong Pinthumwe raq ramwebi ma chongtlo, “Ase raq awe shrengtlo. Kiimaq ajaqshi se ka atijongwe ma haitlo. Riita ngi ka namwe jong. Namshiq raq ngi ka jamto shreng man? Ngi ka namtijongwe. Namshiq raq ngi ka jam nguto shreng man? Namshiq raq ngi ka shummii tlan. Kra riilan tiishea, ‘Naishiq raq ümniika jamkho shummii kai?’ nguta wai tlan.

⁷ Namshiq raq ngi ka athii ahü phaq nai sea honglu berong-wacha na kuq lanta shummii tlan. Kra riilanta nangshea, ‘Naishiq raq ümniika jamkho shreng mai riikai?’ nguta wai tlan. Ngi chongpha, namshiq raq ngi ma honglu kewan chang berong-wacha ka shreng man maq ashe ashi honglu kuq wan lanta berong-wacha ka tiisheshi tlan.

⁸ Namshiq raq ngi ma nyamse ka, makchuk hokkü lamwan lanta honglu na kuq tlan, kra namshiq nga jammin raamak ngutiisha tiima tlan? Akhnok nyamse ka namshiq raq, wanghuptiwe ma kuqki rongkiq na! Kra riihan jiika wanghuptiwe ka namshiq ma khoqriiqkhiq shea miraq? Raüta namshiq raq jamlai khrum wa jaü tlan kra mikuq shea?” nguta wiitarü ma Tatiwe raq ngutlo.

⁹ Ümchaü, ramwebi lei. Namshiq raq Shiikeawe jaq wa, apaiq ka nashiq ma tsii ahea mithü laq, nguta apaiq jaq wa achu jaü rong liishaq. Apaiq raq namshiq achu jaü ka tremak miraq. Kriika namshiq jiq.

¹⁰ Tati Ningkun Ajong Pinthumwe raq ngutlo, “Namshiq phong wa weshi ra raq Shomjam kilü thun ka shabaiq raüjaq ahea riichang wa nguta tiima tiikang. Kra nguraü ka namshiq raq athii ahü honglu thun ka iberongwacha na chaqki man mirhan wa. Ngi ka namshiq ma itsan heamak. Namshiq raq honglu kuq tlan ka tao mang.

¹¹ Mangjong maiqse shedong maq riita shenyap mung na saüli raq, ngi shrengtlo. Tsangshiq raq barapse maq ngi ma homseng honglu athuk atsom kuqtlo. Tsangshiq tarü raq ngi shrengtlo!

¹² Shatmaq namshiq raq, iberongwacha ka asii riimak nguta ngutlan, kiimaq phaqsea ashe ashi kra kuq lanta shummii tlan.

¹³ Namshiq raq, ‘Ara ramwe jaqsham arka atuli, maiqdam atsi li hunnii tiikai!’ nguta ngutlan. Lanta, nammak lü ka ngi ma shipotpot maq liitlan. Krai mren, namshiq raq ngi ma nyamse honglu kuq tlan kriimin, ahuk arot hupsam kuq tlan. Riimakla, akü ashii, riimakla, atsi asi nyamse kuq tlan. Namshiq raq ngi ma akhnok kuq tlan arka, ngi raq mitao ngutiisha tiima tlan?

¹⁴ Jurwa anyamse kong wa, ahea awa nyamse ashi honglu na mikuq ha nguta, ngi ma kiqkham keje she taü maq, ara arot akiq laopha hupsam wa laplu raüta, kuq tlaq, kriiti miika, imanson homa klishe misi! Jamkhano ngukla, ngi ka ajong pinthum hokhamwe. Kiimaq ra raq aham mangjong maiqse kunli raq ngi ma haisong tsantsii rümtlo.”