LEWI 27 - ASII LAKDAP Bible (BSI)

Tatiwe Ma Kongphiq Ke Thungtri

¹ Tatiwe raq Mosheq ma

² arthun thungtri ka Israilnok miitu kuqto. Ümtiikiiwa maiq ashi ra ka sinkham raüta Tatiwe ma kiinong kuqtlaq, kra sinkham mra shiikhoi miitu kampho kechang miraq.

^3-7 Kriika mung raq langtlaq kappe kra phan phan akha kechang: —maiqwe maiqla she wiiroq nai maq pha raüta wiiroq trok na saüli miitu ka: kampho ngamsii 50 —jechak maiqla she miitu ka: kampho ngamsii 30 —jero jong maiqwe, wiibiingi maq pha raüta wiiroqnai na saüli miitu ka: kampho ngamsii 2 —junrii jong jechak miitu ka: kampho ngamsii 10 —noshii maiqwese arawii wiibiingi takiq na kra miitu ka: kampho ngamsii 5 —noshii jechakse miitu ka: kampho ngamsii 3 —maiqwe arawii wiiroqtrok thaq niisheti miitu ka: kampho ngamsii 15 —jechak arawii wiiroqtrok thaq niisheti miitu ka: kampho ngamsii 10

⁸ Kiimaq sinkham kuqtiiqwe kriika miitsanhea kha maq sinkham kampho ka kuqlot mak raüla, jurwa akhum Tatiwe ma kiinong kuqtiiwe kriika ramwe phana shea wan chang. Raüta ramwe raq apaiq raq mikuq lot chang khan thiinin lin na seng raüta athii ka mimiitang kuq.

⁹ Kiimaq kra sinkhamtaq nyamse ka Tatiwe ma honglu na ke mimai phan nyamse jiila, jamlai wa mikuqha nguta khamtaq kriika Tatiwe ma asii kongphiq siisaq miraq.

¹⁰ Kra ningkhan jurwa kra sinkhamtaq apaiq raq kra laihin nyamse maq songke maimak she. Kiimaq apaiq raq kra nyamse ka ahin miishe la song raüla, kra nyamse wiinai ka anai wiita Tatiwe rii she miraq.

¹¹ Shatmaq sinkhamtaq kriika apii chang phan nyamse, Tatiwe ma honglu na take maimak phan jiila, apaiq raq kra nyamse ka ramwe phana milam wan.

¹² Raüla ramwe raq kra nyamse thii ka ümchu kechang wa kra mimiitang kuq. Kriika kra nyamse khum na shri ra lii raüta, ahea sha abiwa kra khan khan athii ka mimiitang kuq. Kriimaq kra tankuqtaq athii ka kriili she miraq. Jai na diimkai chang ahü she.

¹³ Kiimaq kriiwe raq kra nyamse ka apaiq raq riho nong rotlaq jiila, apaiq raq kra nyamse thii kra keraatlo. Kiimaq kriithaq na shishi khu na roqnai nai tliip raüta athii ka ke ratlo.

¹⁴ Kiimaq maiq weshi ra raq, apaiq jam ka Tatiwe ma kiinong kuq raüla, ramwe raq kra jam ka ahea abi wiita shri ra lii raüta jamthii ka mimiitang kuq. Krai mren kra jamthii ka kriili she miraq.

¹⁵ Kiimaq kra jam ka kiinongketi we raq, apaiq riili riho nong rotlaq jiila, apaiq raq jam thii ka kechang kiimaq kriithaq na aliip ka shishi khu na roqnai nai achan kuq raüta kra jam ka riho nong mimai.

¹⁶ Kiimaq maiq weshi ra raq awak wa hiq phu bashi ka Tatiwe ma kiinong kuq raüla, kra hiq phu thii ka kra hiq ba na jaili lai ka ümchu wan raü wa mihong kra shin chang. Raüta jaili lai ka kilogram roqnai na athii ka kampho ngamsii roqshishi na seng raüta hiq phu thii ka miitang chang.

¹⁷ Kiimaq apaiq raq kra hiq phu ka Ajangke Rawii jai maq tiijorot li la Tatiwe ma kiinong kuq raüla, kra hiq thii ka kunli kechang.

¹⁸ Shatmaq apaiq raq kra hiq phu ka Ajangke Rawii lea wan jai maq rawii ashaqpuq sijai niishetiq kiinong kuq raüla, ramwe raq, jai na saü wan tlaq Ajangke Rawii kra misaü shaq na ümchu rawii wa abung tiichongtlaq kra wea raüta, athii kampho ka atsap lin she miitang chang miraq.

¹⁹ Kiimaq kra wak ba ka kiinongketi we raq apaiq raq ari nong tiima tlaq jiila, apaiq raq athii ka wiita kechang. Raüta kriithaq na shishi khu na roqnai nai tliip raüta athii ka kechang.

²⁰ Kiimaq apaiq raq kra hiq phu ka Tatiwe jaq wa kongkhu rimak dea miili, maiq weshi ra miila sha kuq raüla, apaiq raq jai maq kra hiq ka ari nong arang hotlaq kriika ahü lapmak she miraq.

²¹ Kra jai wa saü wan tlaq Ajangke Rawii akhing miishe ka, kra hiq phu ka pattup miitu Tatiwe tachong hupsam she miraq. Kra hiq phu ka ramwebi rii she miraq.

²² Kiimaq maiq weshi ra raq wak dam ashi ka maiq jaq wa ri raüta, Tatiwe ma kiinong kuq raüla,

²³ ramwe raq kra wak dam thii ka jai na Ajangke Rawii saü wantlaq kra akhing na saüli ümchu rawii wa tiichongtlaq, kra wea raüta athii ka miitang chang. Raüta kriiwe raq wak ri kampho ka kra ranaiqli keraatlo. Kra kampho ka Tatiwe rii she.

²⁴ Jai na Ajangke Rawii saü wantlaq akhing na, kra wak dam ka apha wa asha ketiwe waktatiwe kriima hali riimak la asaü asetiim ma jangke nong chang.

²⁵ Athii arii ümchuwa sitlaq kriika mung raq langtlaq kappe maq wea raüta siisaq tanlili riichang.

²⁶ Jam nyamse chhikhu nyungtlaq kriika Tatiwe rii dongdii. Kra ningkhan jurmin chhikhu nyung phati kriika maiqmii tsantsii honglu na Tatiwe ma kiinong kuqmak raüjaq ahea. Minsaü se ngu i, skuse ngu i, riimakla chhechhi se ngu i, wiita ka Tatiwe rii siisaq.

²⁷ Shatmaq ashe ashi phan nyamse chhikhu nyungtlaq kriika ari nong mimai. Kra thii ka mung raq langtlaq thii maq richang. Kiimaq kriithaq na shishi khu na aliip roqnai nai tiitsuq raüta kechang. Raüta richang. Kiimaq kra atatiwe raq tiijang rimak dea jiila, kriika maiq ahinti ma mung raq langtlaq thii maq shabaiq mimai.

²⁸ Jurwa pattup miitu she Tatiwe ma kiinong kuq baiqtaq hupsam ka, maiqse riitlo, nyamse riitlo, riimakla wak ajam riitlo, kriika asha phaq kai min maimak she, kiimaq ari kai nong min maimak she. Kriika pattup miitu Tatiwe rii she.

²⁹ Maiqse li jiimin, juwa Tatiwe ma kiinongtlii jai na bom biijit kaichang ahü maq kuq baiq raüla, adaa wan nong maimak she. Apaiq ka tiitsailaq tsea baiq chang dongdii she.

³⁰ Roqshi khu wa manshi ka wiitarü, wak wa dong man wantlaq phan kiiwa tü atsam lo, petsi wiq tsamlo ka Tatiwe rii.

³¹ Kiimaq maiq ashi ra raq jamlai phan wa ari wan nong rotlaq jiila, apaiq raq mung raq langtlaq thii kra kechang. Kriithaq na shishi khu na roqnai nai tliip raüta kechang.

³² Jam nyamse kong wa roqshi khu wa ashi ka Tatiwe rii. Ümtiikiiwa jam nyamse kong ka awea riitlaq, roqshi khuwa ashi ka Tatiwe rii.

³³ Atatiwe raq nyamse kong ka kongkhu tiihong raüta, ahan phin mak makti kra wea miitu tiihong mak raüjaq ahea. Kiimaq apaiq raq kra nyamse aroq khu na kuqtaq kriika nyamse ahinti maq songkuq mak raüjaq ahea. Kiimaq apaiq raq kra nyamse tseataq kra ahinti maq song raüla, kra nyamse kaü nai wiita ka Tatiwe rii she miraq. Kiimaq arikai nong mai mak she miraq.

³⁴ Ara aming raütu thun arka Tatiwe raq Mosheq ma Sinai Pum maq Israilnok miitu akuq.