Jona 1 - ASII LAKDAP Bible (BSI)

Jona Raq Shiikeawe Aming Tleato

¹ Ranaiqshi Tatiwe raq Amitai se Jona ma bom ka akha thaüto,

² “Ninewi chela jong kiina kilaq. Laüta tsangshiq raq ümtinkhan wa abi ngarai tangwan tlaq ka chongkuq kikiq. Tsangshiq raq ngarai klotlaq kra ini na amashe riiwanto.”

³ Shatmaq Jona ka Tatiwe wokhong wa angan nü na, lamjiq nü na khoti wawanto. Apaiq ka Joppa chela kiina kihoto. Raüta sangpholai ashi Spen mung nü na wawanti asi riito. Krai mren, apaiq raq Spen mung na wa miitu mokkiitu maq kuqto. Raüta dü wanto. Raüta mokkiitu jiiqti rai Spen mung nü na khamjong lam maq wa wanto. Kiijaq apaiq ka Tatiwe wokhong wa aluwiq niishe miraq.

⁴ Shatmaq, Tatiwe raq rathaiq henghea khamjong mong na tiisaüto. Raüta rathaiq heng riishe mokkiitu ka khamjong mong na khamtso wa raq kapbaiq namnam, pheram pherak akap atsea pherak wanto.

⁵ Kra kha miishe, mokkiitu jiiqtinok ka pinthum akii anyii she tsaihü jihü kiinyiihoto. Kiimaq tsangshiq ka maiqmiimii phra mang chongrang raüta, “Tiichhii kuq liidea,” nguta hoqsii trang wanto. Raüta mokkiitu mong wa piikii hupsam thun kriishe mokkiitu tiichhii ma, khamjong mong niishe rubaiq wanto. Shatmaq Jona ka Mokkiitu takiq jaishok khok na akon makaiq riito.

⁶ Phentuwe raq apaiq ka akon makaiq chhito. Raüta, apaiq tiisam lam maq akha seato, “Ümniika makaiq akon sea shea? Samlaq, laüta tiido laq. Laüta üm shiikeawe jaq wa achu jaü laq. Jursap, apaiq raq nashiq miitu atsan na mangchan mitiitsi laq. Kra shiikeawe raq nashiq arwa mangchan kuqjiiq riila.”

⁷ Kiijiishe, laijiiqtinok liipan na, “warong ra, atinkhan chamchao ka jamlai ngarai riiwa, nashiq raq sapli chang langlii rong i,” nguta riichongto. Krai mren, tsangshiq raq lang liikiita Jona dü na thaüto.

⁸ Kriikha niishe tsangshiq raq apaiq maq nguto, “Riita ümchaü min chong laq! Ara chamchao riihum tiikai ara miitu mra juraq ho chang wa? Ümniika arjaq jamlai riikai wa kilaü? Ümniika ümrii mungti wa? Ümniika ümra mung wa aki haü wa?” nguta waito.

⁹ Kiijiishe, “Ngi ka Jehudinok phan. Ngi ka ra nai hiq kiimaq sammoktra jü tiiq wanti Tati Shiikeawe shomnoqti,” nguta Jona raq treto.

¹⁰ Kiimaq Jona raq, “Ngi ka Tatiwe wokhong wa lamhin nü na juho tiikang,” nguta tsangshiq ma chongto. Kra tai raüta laijiiqtinok ka kai akii anyii haito. Raüta, “Ikhiijiika, ümniiraq ara phiiptsi chang pinthum jaqsham laü!” nguta apaiq bom ka treto.

¹¹ Kiimaq sammoktra jü mong na rathaiq ka henghea riiwan wan li riito. Kra ningkhan she, “Riita ara rathaiq ara tiitsang miitu ümniika ümkhiiwa mir i?” nguta apaiq ma waito.

¹² Kiijiishe Jona raq, “Namshiq raq ngi arka sammoktra jü mong na dobaiq rong laq. Raüla rathaiq arka asang she mirki. Ümchaü namshiq raq ara phiiptsi jiiptsi rathaiq mong na chamchao tlan arka ngi shut kha miidea,” nguta Jona raq treto.

¹³ Li jiimin, laijiiqtinok riika, lai ka tareko nü na jiiq wan miitu pinthum shiichaqto. Shatmaq rathaiq ka heng wan wan khoti riito. Tsangshiq raq tangmak she riito.

¹⁴ Kra kha niishe, tsangshiq raq, “O Tatiwe lei, naishiq ka arwe miisaq ningkhan na naq tiisumkiq. Naishiq ma mra ahü tiijai kha naqnyankiq. Tatiwe lei, ümniiraq ümkhiiwa misham haü krai mren shamlaq,” nguta achu jaüto.

¹⁵ Kra raütiishe, tsangshiq raq Jona ka sammoktra jü mong dobaiqto. Krai mren, rathaiq kiimin sangsaq li she sangkito.

¹⁶ Kiijiishe kiiwa maiqthun ka Tatiwe ma pinthum haisong raüta, tsangshiq raq Tatiwe ma honglu kuqto. Kiimaq tsangshiq raq Tatiwe minoq hai nguta sinkiitiqto.

¹⁷ Shatmaq Tatiwe raq ngiq jong kaü ashi Jona tiijok ma kiijaq tiije shat thüto. Krai mren, Jona ka ngiq wok mong na anaiq naiqtsam awa watsam sito.