John 8 - ASII LAKDAP Bible (BSI)

Sumrai Kha Na Alap Wan Nyung

¹ Raütiishe, tsangshiq tarü ka maiqmii jam niishe wawanto. Shatmaq, Jesuq ka Olip Pero Hiqlam na wawanto.

² Anap ranaiq miishe, ranap chu maq, apaiq ka Shomjam rinkea rukmong na kiho nongto. Kra akhing na maiq pahea ka apaiq tro na riitam ngato. Krai mren, apaiq min anga raüta tsangshiq ma Shiikeawe bomtsi shrinkuqto.

³ Kra akhing na, Phorisinok nai Thungtri shrinketibi raq maiqnyung ashi, tsangwe sishat maq maiq rai sethoq ja chhi raüta alap riiwanto. Tsangshiq raq kra nyung ka mungmaiqse khaki na tiichapto.

⁴ Raüta tsangshiq raq Jesuq ma bom ka akha waito, “Shrinketi we, arnyung ara awese sishat maq, maiq rai sethoq ja wa alap wan.

⁵ Riita, nashiq Thungtri na Mosheq raq akhnok kha tangti arka, long maq tiiq baiq raüta tsea baiq chang nguta aming kuq thüto. Riita, ümchaü min ümniiraq jamkho ngutlaü, chong liita?”

⁶ Tsangshiq raq ara bomtsi Jesuq ma waitaq arka, tsangshiq raq Jesuq ka tsangshiq thiikho na tiithap raüta tiishut haijaq nguta tiima raüta waito. Shatmaq, apaiq ka atok hiq nü na kushat lam maq, ajaqshi maq hiq na phanshi ra waiqto.

⁷ Riita, tsangshiq raq apaiq ma bom ka tiijangkiki wairuq wairuq she wairat hokiita, apaiq ka anga wa atiido raütiishe tsangshiq bom ka akhiishe treto, “Ikhiijiila ahea. Ümchaü min, namshiq phong wa maiq ümriiti riiwa, jangshi min ngarai ka tang mang nguta tiima tlaq, kriiti raq arnyung dü na long ka kongkhu mithong pha laq.”

⁸ Kra ngu raüta, apaiq ka hiq nü na kushat maq hali hiq na hali phanshi ra waiq nongto.

⁹ Kra tai raütiishe, tsangshiq phong wa nyungwe jong pinthumti we kriimaq pha raüta, tsangshiq ka weshi shi miishe wiita kiiwa pintrang wanto. Atiisup niishe, Jesuq nai jechaknyung kli she tiichong kito. Jechaknyung kiimin tsangshiq raq jamkho baiqthütaq kiikha chaptshat li riito.

¹⁰ Nokwe pinho lot ri she, Jesuq ka achap raütiishe jechak nyung kiima bom ka akhiishe waito, “Maiqnyung loi, tsangshiq ka ümbano? Ümniika tiishut baiq miitu ju min tiichong mak sha riita?”

¹¹ Kiijiishe, “Shiilang we lei! Jurmin ngi ka tiishut baiq mak dea,” nguta jechak nyung raq Jesuq bom ka treto. Kiijiishe, “Ahea, ikhla. Ngi riimin ümniika tiishut mang. Walaq, ümjam na. Laüta, ümchaü armiiphat sanha, ümniiraq ngarai ka naq klo kiq she,” nguta Jesuq raq kra nyung ma tsii ka chongkuq raütiishe apaiq ka tiiwa baiqto.

Jesuq Kata Mangjong Maiqse Ma Rawü Li

¹² Jesuq raq Phorisinok ma thongshi ri hali akha chongkuqto, “Ngi ahata mangjong maiqse ma rawü li. Juwa i puk na nyap tlaq kriiti raq rilung rawü milap wan. Kiimaq ümtiikiimin ranyaq mong na khum mak she miraq.”

¹³ Kra tairaüta Phorisinok raq apaiq bom ka akha treto, “Arka maiqmii tiitsaki bom li bom rai tlaü. Arka teng mak. Banbok mii.”

¹⁴ Kiijiishe, Jesuq raq tsangshiq bom ka akhiishe treto, “Kriika riimak. Ngi riika maiqmii tiitsaki bom li bom rai ha jiimin, ngi raq jamlai bom wa chong tiikang arka tengteng. Ara jamkhano chongtiikang ngukla, ngi dong chang chong ka ngi raq asap ha. Kiimaq ngi siwa chang hiqshong kiimin asap ha. Namshiq raq i dongchang chong kiimin sap man. Kiimaq ngi wawan chang hiqshong kiimin sap man.

¹⁵ Namshiq riika maiqse han-ngam tri miili phanrap ka shin tlan. Shatmaq, ngi riika jumin maiqse han-ngam tri maq shin mang.

¹⁶ Shatmaq, ngi raq jamlai wa shin tiikang, kiijiika ajiq ngutiika ahü. Ara jamkhano chongtiikang ngukla, ngi ka i honhonse li ka riimang. Ngi tiikaiti i We ka ngi rai adam nong shiinong pongdam shat.

¹⁷ Riita, namshiq Thungtri na, kiimwe anai raq hakhi she kuq raüla, kra hakhi ka tengto dea ngushat nguta waiq thüto.

¹⁸ Krai mren, ngi riika ngi miitu saqse hakhi kuq tiikang. Kiimaq ngi tiikaiti we, i We riimin, ngi miitu saqse hakhi kuq tlo.”

¹⁹ “Riita, ikhiijiika, ümwe ka ümbano?” ngutiishe tsangshiq raq apaiq ma bom ka waito. “Namshiq riika ngi armin sap man. Kiimaq i We kiimin sap man,” nguta Jesuq raq tsangshiq bom ka treto. “Namshiq raq ngi ka juwa kra sap han jiika, i We ka juwa kiimin misap han.”

²⁰ Riita, ija, Jesuq raq ara mungmaiqse ma trahokuq wantaq thun arka Shomjam mong na aluke chang khok mong maq chongkuqto. Apaiq ningthoi akhing ka misaü shaq kha maq, apaiq dü na jurmin jaqkaiq maq sham lot mak riito.

Namshiq Wawan Lotman

²¹ Jesuq raq tsangshiq ma jangshi ri hali chongkuq nongto, “Ngi ka awa she mirwan ha. Ngi wawan jai na, namshiq raq ngi ka mirit han. Namshiq ka maiqmii ngarai raq mitsai han. Ngi wawan chang hiqshong na namshiq ka wawan lot man.”

²² Kra tai raütiishe, mung rümti Jehudinok welabi liipan na, “Apaiq wawan chang hiqshong na nashiq wawan lot mai nguta chongtlaq ahata. Riita, arkiitiq apaiq ka ajaq lii maq tiihaikai nang sha chongtla?” nguta tsangshiq liipan bom ka riiwaito.

²³ Kiijiishe Jesuq raq tsangshiq bom ka treto, “Namshiq dong chong ka ara mangjong hiq da. Shatmaq, ngi dong chang chong ka khuthaq ra kra. Namshiq ka phiija hiqshong rii nguta sitlan. Shatmaq, ngi ka phiija hiqshong rü ka riimang.

²⁴ Ara chong tiikang arningkhan tiina, namshiq ka namshiq maiqmii ngarai kho na dea lantli mitsai han nguta chongkuq tiipha ara. Namshiq raq ngi ka, ‘Ngi Santla Ngi,’ nguta tiichong tlaq we kriidea nguta kam man wiiwii, namshiq ka maiqmii ngarai mong niili mitsai han.”

²⁵ Kiijiishe, “Riita, ümniika ju wiita?” nguta hali tsangshiq raq apaiq ma bom ka wai nongto. Kiijiishe, Jesuq raq tsangshiq bom ka treto, “Ngi raq namshiq ma man na apha miiphü chongkuq pha ihata.

²⁶ Ngi raq namshiq miitu bom ka pahea dea chongke chang asi shaq. Kiimaq namshiq tiishut chang lam bom min pahea dea chong chang ka asi shaq li. Shatmaq, ngi tiikaiti we Shiikeawe ka tingting. Krai mren, ngi riimin mangjong maiqse miika apaiq raq jamlai wa ngi ma chong kuq wan tlaq kriili tlü chong kuq tiikang.”

²⁷ Jesuq raq tsangshiq ma kra bomtsi phanchan kuq tlaq kriika, Awe bomtsi chongkuqtlo. Shatmaq, tsangshiq raq kra bomtsi ka tak wan lot mak dea riito.

²⁸ Kriikha miishe, apaiq riili tsangshiq ma bomtsi ka akha tru chongkuq nongto, “Namshiq raq ümtiikiiwa, Maiq Se ka pumsongkham na mitübaiq han, kra ranaiqtiq namshiq raq ngi arka, ‘Ngi Santla Ngi,’ ngutliiwe kriidea ngutiishe misap han. Kra akhing niitiq ümchaü ngi raq namshiq ma ümchuwa jaqsham kuq tiikang arka, i tsiitsii maq asham ha riimak, shatmaq i We aming maq siisaq li dea sham tiikang nguta mitak han.

²⁹ Kiimaq, ngi tiikaiti we ka ngi rai nong shiinong sishat. Apaiq raq ngi ka ümtiikiimin tiishaü baiq mak phan. Ara jamkhano chongtiikang ngukla, ngi riika apaiq raq jamlai wa lungwii tlaq kriili wranaiqtek sham tiikang.”

³⁰ Jesuq raq ara bomtsi chongkuqtaq ara tai raüta, mungmaiqse pahea raq Jesuq ma kamto.

Kharü Raükha Chumti Tengteng Bomtsi

³¹ Kiijiishe, Jesuq raq apaiq ma kamti Jehudinok ma akha chongkuqto, “Namshiq raq i bomtsi ara namtsan mong na shaq lanta, lang han jiila, namshiq ka awongsii i jaqshisetiim ma mija han.

³² Krai mren, namshiq raq Shiikeawe ka juwa kra riikhaqli misap han. Kiimaq kra tengteng bomtsi sap tlan kriiraq, namshiq ka wasetiim miishe mitiija wan.”

³³ Kra tai raütiishe tsangshiq raq apaiq kiq ka akha khiito, “Naishiq ka Abraham lai ala setiim. Naishiq raq maiqti jong ka ümtiikiimin howan mai dongdii. Ümniiraq naishiq nangnga, ‘Wasetiim ma mitiija wan,’ nguta ngutlaü kriika, jamlai ngo wa ngutlaü?” nguta apaiq kiq ka khüto.

³⁴ Kiijiishe, Jesuq raq tsangshiq ma akha chongkuqto, “Ngi raq chongtiikang arka tengteng: Jurwa ngarai tang tlaq, kriiti ka ngarai dise.

³⁵ Dise ka atijong we seshaq miika jawan lot mak. Shatmaq, aseshaqti kli atapkun na awe pumsong wanti miraq.

³⁶ Krai mren, Ase raq namshiq ka daa wan raütiq, namshiq ka riikhaqli wasetiim ma mija wan lot han.

³⁷ Ngi raq namshiq ka Abraham lai ala phan wa ngutiimin asap ha. Kra taü maq dongdii min, namshiq raq ngi ka atsea baiq ma tankhan tlan. Arka namshiq raq, i bomtsi ara lang ro man kha miishe ngi tsea baiq tankhan tlan.

³⁸ Ngi riika, i We raq ngi ma jamlai sham akai wa tiichhikuq tlaq, kriili chongkuq tiikang. Shatmaq, namshiq riika, nam we raq jamlai phan sham akai wa chongkuq tlaq kriili sham tlan.”

³⁹ Kra tai raütiishe tsangshiq raq hali, “Naiti ka Abraham,” nguta apaiq kiq ka khiito. Kiijiishe, Jesuq raq tsangshiq bom ka treto, “Namshiq ka ngohea shaqshaq dea Abraham lai ala phan ngu raü jiika, apaiq ka jamkho shongnga wantaq, kiikhiisii hali namshiq min mishongnga wan han wa.

⁴⁰ Riita ngi riika ümchaü niitaq, ngi ma Shiikeawe raq tengteng bomtsi ümchuwa chongkuq tlaq, kriili namshiq ma tlü chongkuq tiikang. Akha taümaq dongdii min, namshiq raq ngi ka atsea baiq chang ngutli tankhan tlan! Abraham raq tengteng bomtsi chongke wanti ka atsea baiq chang nguta tankhan mak dea!

⁴¹ Riita, ümchaü namshiq raq jamlai wa klo tlan kriika, namwe raq jamlai phan wa sham wantaq, kriili namshiq riimin sham nong tlan.” Kiijiishe, “Naishiq ma Awejong ka Shiikeawe kli,” nguta tsangshiq raq apaiq bom ka treto. “Kiimaq naishiq ka apaiq ma aseshaq kong nguta sitiikai. Naishiq ka siqphinsetiim ri riimai.”

⁴² Kiijiishe, Jesuq raq tsangshiq bom ka treto, “Riita ngohea dea, Shiikeawe kiidea namshiq ma Awejong ngu raüka, namshiq raq ngi ka milungwii han wa. Ara jamkhano chongtiikang ngukla, ngi ahata Shiikeawe pha wa akiha. Lata, ümchaü namshiq rai sitiikang. Ngi ka i tsiitsii maq asaükiha ka riimak. Ngi ka apaiq raq atiiki.

⁴³ Riita, ngi raq namshiq ma bom chongkuq tiikang arka jamkhii riito namshiq ni na wamak? Arka namshiq raq i bom chong ara tai wan roman riitlan kra kha maq, namtsan mong na wamak.

⁴⁴ Nam we ka Tha kaü. Namshiq ka thasetiim. Krai mren, nam we jaiphan li lungwii tlan. Apaiq ka man na miiphü dongdii matwe tsawe. Arilung na jangshi min tingting rilung lamphan ka tiima mak dongdii. Ara jamkhano chongtiikang ngukla, apaiq tsantsii ka tingting riimak. Krai mren, apaiq ma arot akiq bomchong ka maiqmii aphara jaqsham. Ara jamkhano chongtiikang ngukla, apaiq ka arot we. Apaiq ka arot akiq dong chong.

⁴⁵ Shatmaq, ngi riika tengteng bomtsi kli chong kuq tiikang. Kriikha maq, namshiq raq i bomchong ma kam man.

⁴⁶ Riita ümchaü min, namtsam phong wa juwero, i khum na ngarai asi nguta hakhi ka mikuqhan? Ngi raq tengteng bomtsi chongkuq tiikang jiika, namshiq raq i bomchong ma kam man ka jam nguto?

⁴⁷ Juwa Shiikeawe pha wa aki, kriiti riili Shiikeawe bomtsi ka tiitsang tai tlo. Shatmaq, namshiq ka Shiikeawe setiim ka riimak. Kriikha maq, namshiq raq apaiq bomtsi ka tai roman.”

Abraham Michii Shaq Niiphü Asi Dongdii

⁴⁸ Kiijiishe, Jehudinok raq Jesuq ma waito, “Naishiq raq ümniika Samaria phan, kiimaq ümkhum na abi winji asi ngutiikai arka tengto dea ahata?”

⁴⁹ Kiijiishe, “I khum na abi winji ka ahü,” nguta Jesuq raq tsangshiq bom ka treto. “Ngi raq i We shreng tiikang. Shatmaq, namshiq raq ngi ka shummii tlan.

⁵⁰ Ngi raq i mang jong ka rit mang. Shatmaq, i mang tiijong wanti ka weshi ra asi. Kiimaq apaiq riika ngi loplop niili tri raü ka shamtlo.

⁵¹ Ngi raq chongtiikang arka tengteng: Jurwa i bomchong ara lang tlaq, kriiti ka ümtiikiimin tsai mak she.”

⁵² Kiijiishe, tsangshiq raq apaiq bom ka tre nongto, “Ahata! Ümkhum na abi winji asi ngutiikai ka tiisapshat she dea! Abraham ka atsaikai kun she. Kiimaq shammibi thun kiimin atsaikai kun she. Jamlai jiq ngu kai! Ümbom chong kra lang wanti ka tsai mak she miraq ngukai?

⁵³ Naiti Abraham ka atsaikai kun she. Ümniika Abraham nam ma ajong ngutiika tiingo maü sham na? Sha tiingo tlaü wa?”

⁵⁴ Kiijiishe, Jesuq raq tsangshiq bom ka tre nongto, “Riita, ija, ngi raq maiqmiili tiishom raa rai ha jiika, kriika thiihü li dea mirna. Shatmaq, ngi shomra wanti we ka i We asi. Namshiq nga, apaiq ka namshiq Shiikeawe nguta chong tlan.

⁵⁵ Shatmaq, namshiq riika, apaiq ka juwa kra sap man dongdii sitlan. Shatmaq, ngi raq apaiq ka juwa asap ha. Ngi raq apaiq ka sap mang nguta tiingo ha jiika, ngi armin namshiq rai khoshi na kaiti siili, arot we ma mijaki damha wa. Shatmaq, ngi raq apaiq ka juwa asap ha. Kiimaq ngi ka apaiq aming kra lang lata apaiq wokhong na sitiikang.

⁵⁶ Namti Abraham raq, ngi ka mangjong hiq na saükai akhing ka riisham mak maq chhithüto. Raüta, apaiq ka kai khoqriiqto.”

⁵⁷ Kiijiishe, tsangshiq raq apaiq ma bom ka akha waito, “Riita, ümrawii ka wiiroq biingi santla misaü shaq li, ümniiriisha Abraham rai sham riichhi laü ngu kai?”

⁵⁸ Kiijiishe, Jesuq raq tsangshiq bom ka treto, “Ngi raq chongtiikang arka tengteng: Abraham ka michii shaq niiphü, ngi ka asi dongdii riikang.”

⁵⁹ Kiijiishe, tsangshiq raq apaiq ka long maq thong ma nguta longpo tsun rang riito. Shatmaq, Jesuq ka atiipaü riikito. Raüta kra Shomjam wa ahin niishe kihoto.