JEPHANIA 3 - ASII LAKDAP Bible (BSI)

Jerusalem Chelati Raq Ngarai Tangto

¹ Jerusalem chela ka thento she, mungrüm kappe sham tsin mak, Shiikeawe bom taimak chelati, senaino mungmaiqse shaphaqti.

² Chelati raq Tatiwe bom, taimak tleato. Kiimaq apaiq tsii chong sintsang min, taimak riito. Apaiq raq Tatiwe ma kammak riito, kiimaq apaiq khrum min jaümak riito.

³ Apaiq sengi aki miikiimbi ka, hangsikong ikha ahok aho watrangli. Aphowebi ka shekong aramtsi khumtlaq ikha, süramhea ngamrii ka, anap ranap miitu min tiichong mak she phaqtlo.

⁴ Shammibi ka maiqkamsea chang riimak, banbok mii. Ramwebi raq asii sham akai wiita, tiisheshitlo. Raüta Shiikeawe thungtri ka, atu anong tsangshiq ma amet tiidong ma, khoti rapwiiqtlo.

⁵ Shatmaq Tatiwe ka chela na asi; apaiq raq tingting jaq shamtlo. Ajiq ka ümtiikiimin klomak phan. Apaiq raq ranaptek tiikhea mak maq, asengi ma kha ka tingting phokuqtlo. Shatmaq ashut kloti ka jeasi sapmak, ashut kiimung kli klotlo.

⁶ Tatiwe raq ngutlo, “Ngi raq pong mung thun tiithum baiq kang. Tsangshiq chela thun runbaiq kang she. Tsangshiq peruk thun nai kongmong chong thun, tiibun baiq kang she. Chela thun ka hiqmiq changkhü she; Chiiheawea lam thun ka shaqmiishe. Maiq ka jumin ahü she.

⁷ Ngi raq arthun klowan kang arka, isenginok raq ngi ma mishreng wan sham, nguta tiima wan kang. Kiimaq tsangshiq ma nithak lata, tsii chongkuq tiikang kra mitai sham, nguta tiima wankang. Ngi raq tsangshiq ma shrinkuq wan kang ka, ümtiikiimin laqbaiq mak miraq ahiq, nguta tiima wan kang. Shatmaq tsangshiq ka jaqlo liipan niilishe, man na sitaq kra thaq na, naolaqhea jabi wan wan khoti riito.

Mangjong Maiqse Chamchao Raüta Tsantsii Miklai

⁸ “Kherong liishaq” nguta Tatiwe raq ngutlo, “Khe ronglaq ngi raq maiqmung thun, shrawan akhing ranaiq kra miitu. Ngi raq maiqmung thun nai mungtan thun kra, adam na riichom wan miitu, itsan na thapthi wan kang she. Kriika tsangshiq ma itsankhiq walü nyaitlaq, kra heng kriimaq tiike wan miitu. Mangjong hiqhraikhü tlotli ka, tsangshiq wa maq chaq lata, wiita mitiikhiim baiqha.

⁹ “Kra lata ngi raq mangjong maiqse kunli, tsan nai tsii kra wiita miklai wanha. Tsangshiq kunli raq ngi li she mishom noq wan. Ahin phra ka shomnoq wan mak she miraq. Tsangshiq tarü kunli, iwokhong niishe misi wan.

¹⁰ Isenginok luhea Sudan mung na siti, riinyin riishin siti riimin, ngi ma honglu milam kuq wan,

¹¹ Kra akhing na isenginok namshiq ka, ikiq khii lantea ngarai tang wan lan, kra miitu tiijeasi chang ahüshe. Jamkhano ngukla, ngi raq ibom taimak shiikongti, namshiq phong wa, achum she mirbaiq wanha. Kiimaq namshiq ka asii ihiqlam na, ikiq tlea man she mirhan.

¹² Kiijaq ngi raq aran se ma ja raüta, sobsob bombom maq sitibi, iwokhong na khrum ritti ka, mitiisi wanha.

¹³ Tiichongtaq Israilnok raq, jumiimin ajiq kiimung mak she miraq. Arot min chong mak she miraq. Kiimaq lapphaq lusiq lule tsii, thü mak she miraq. Tsangshiq ka arong awin she miraq. Kiimaq jurmin tiitsüngii mak she miraq. Ahaisong chang min ahü she miraq.”

Khoqriiq Shishiiq Shinge Ronglaq

¹⁴ Chochikhiq maq arü ariiq shinge rong laq, O, Israilnok lei! Ümtsan mong maq chochi laq, Jerusalem lei!

¹⁵ Tatiwe raq ümmo tiiho ka, tiithumto she. Apaiq raq ümjaqti thun wiita tiisiirai, lambaiqto she. Tatiwe Israilnok hokhamwe ka, ümniirai asi. Ümchaü ka ümnaq haisong chang, lamlu jam min ahü she.

¹⁶ Akhing saü wantlo she, tsangshiq raq Jerusalem ma, “O Jajon chela lei, naqhaisongkiq! Ümjaq wiinai ka naq tiibatkiq she! nguta mingu.

¹⁷ Tati üm Shiikeawe ka, ümniirai asi. Apaiq ningkun jong maq ümniima, rekhat mitiitangkuq. Tatiwe ka ümniima michochi, Kiimaq apaiq lungwii wokhong maq, ümniima rilung anye she mikuq. Apaiq ka ashi ange miraq, kiimaq ümniima pinthum michochi,

¹⁸ Kra chochi ka poi na chochi tlaq ikha miraq.” Tatiwe raq ngutlo, “Ngi raq ümnaq tiithumbaiq, nguta kha tankang kra, lambaiq kang she. Kiimaq ümnaq tiijeasi tlaü kriimin, lambaiq kang she.

¹⁹ Akhing ka saü wantlo she! Ngi raq ümnaq tiichamchaoti thun ma, imo she mitiihoha. Ngi raq skukong akü ashiiti thun, wiita michhii wanha. Kiimaq pong mung na atiipin arbaiq ka, jam na mitriitam wanha. Ngi raq tsangshiq jeasi arhum ka, shreng manto miishe mitiija wanha. Krai mren mangjong tlotli raq, tsangshiq she mishom ra wan.

²⁰ Akhing ka saü wantlo she! Ngi raq ümsengi pongmung na, amo miirai kiiwa, jam niishe mitsuq wanha, Ngi raq ümniika mangjong tlotli na, ajong pinthum she mitiijaha. Lata ümniika thongshiri hali, chiithe jong ma mitiija wanha.” Arka Tatiwe raq ngutlo.