JEPHANIA 2 - ASII LAKDAP Bible (BSI)

Shammiwe Raq Tsanklai Miitu Tsii Chongtlo

¹ Jeahü mungti, namtsii lam ronglaq.

² Namshiq ka tsamchhii rahai raq pan wan tlaq ikha; mipan wan shaq na, Tatiwe tsankhiq wanii tu ka, namshiq khuthaq na misaü shaq na; apaiq tsankhiq amokdungdung saüho tlaq kra; namshiq thaq na misaüho shaq na, namtsii sam ronglaq.

³ Tatiwe wokhong na jang rong laq. Namshiq tsannin woknin maq shongti, singmung maiqse lei; apaiq aming thun langtibi; tingting jaqkli sham ronglaq. Kiimaq Tatiwe makki na aran ma jaronglaq, jursap Tatiwe raq atsankhiq tiichhi tlaq ranaiq na, namshiq ka mipaükuq lo riila.

Israilnok Tro Na Siti Mungthun Mithen Wan

⁴ Gaja chela na maiq ashi min tiichong mak she miraq. Ashkelon chela ka hiqmii she miraq. Ashdod chelati ka shethiq liipan niili mijobaiq. Kiimaq Ekron chelati ka wiita mijobaiq.

⁵ Namshiq Philistainnok lei then lan she. Sammoktra chumkii na sitinok lei, Tatiwe raq namshiq ka ashra baiqwi she. Apaiq raq namshiq ka mishthenbaiq. Namshiq phongwa ashi min tiichong mak she miraq.

⁶ Namshiq hiqshong sammoktra chumkii wang ka, nyiim lung rü tan miishe mija wan; sku rümchang tiip phongli nai, sku shaqchang rukphongli she miraq.

⁷ Juda mungti abung atiichong kriiti riishe, nam mung ka jiiwan raüta misi wan. Tsangshiq raq kiijaq tsang skukong mirüm wan. Raüta Ashkelon chela na jam thun kiijaq mikon. Tatiwe tsang Shiikeawe ka, tsangshiq rai adam sishat miraq. Raüta tsangshiq ka thongshi hali, arong awinnok ma mitiija wan.

⁸ Tati Shiikea Ningkun Ajong Pinthum raq ngutlo, “Mob mungti nai Ammon mungti raq, isenginok ka khü atho maq phong raüta, ji maq nishishi shummii wan tlo; tsangshiq hiq shong ka; minyea wan hai nguta, jarap jirap hongla wanto, kra ngi raq taikang she.

⁹ Ngi ka tengteng atra Tati Israilnok Shiikeawe raq, tumkhamkok tolata ngutiikang, Mob nai Ammon mung ka, Sodom nai Gommora ikha mitiithenbaiq. Raüta shumkho bok thunli she mijawan. Kiimaq hiqmiq changkhü ma mijaki. Sangphii riili she milam wan; Isenginok jaqsong tiichongtlaqti raq, kra hiq thun kra jiiwan raüta, misiq wan.”

¹⁰ Mob nai Ammon mungti raq, tsangshiq shiikong kumrong tiichhi raüta, Tati Shiikeawe Ningkun Ajong Pinthumwe sengi, shummii wantaq thiitham jaq maq ka, ara moho arshe milap wan.

¹¹ Tatiwe raq tsangshiq ka, tiiphiip miijiip she mirwan. Apaiq raq mangjong hiq wa phra sumla thun ka, thiihü hiqtili miili she mitiija wan. Raüta mangjong maiqse tlotli raq, maiqmii mung maq, Tatiwe kli she mishomnoq wan.

¹² Tatiwe raq Sudan mungti kiimin, wiita thumthum mijiip baiq.

¹³ Tatiwe raq apaiq ningkun, jonghea rümtlaq kiimaq, Asiria mung ka mijiip baiq. Apaiq raq Ninewi chela ka, shaqmii shinriiq kumtsaiphii ma mitiijabaiq; khu akham min ahü hiq ma mitiijabaiq.

¹⁴ Kriiba na phanrap phanrii, ngamsaü ngiqseli she mitiibo wan; wukhuk kong ka jamriim na mida wan. Kitanpu thun kiimaq atsü angii mirwan. Khalakong ka kilam da na ngaraq raq, mitsüngii wan. Maisak pepen maq ahai thun min, wiitashe ümtiingoq wan.

¹⁵ Jarap jirap siwanti chela ka, maiqmii ningkun kiidea ajong nguta, shiikong mlong siti ka, kiimaq jamlai riimin chhechha lot mak nguta, tiimaseati ka akha mithenki. Kra chelati raq tsang chela kli, mangjong hiqraikhü na ajong pinthum nguta, tiimasiqtlo. Kriika hiqmiq changkhü miishe mijaki; kiijiika rumnyamsekong li she misi! Maiq loweatek kra lam maq khumti, kra chhi raüta phiip raq mitsai.