James 5 - ASII LAKDAP Bible (BSI)

Chiithe Maiqse Ma Honchong

¹ Riita, ümchaü ka namshiq chiithe laopanbi miishe chongkuq pha, tai ronglaq. Samhea tiitsang tai rong laq! Namshiq ma waqkhü kham nyang akhing she saü wan tlo!

² Namtsiiq namnyam tum ka arümkai kun she. Kiimaq namkhu namkhea kiimin sap raq aphaq wan kun she.

³ Namtsiiq tum chaq nai kampho tum towan tlan kriika, ümchaü chhii raq aphaq wan kun she. Ara chhii raq aphaq rat, namtsiiq namnyam tum towan tlan kriili she, Phangthum khapho ranaiq na, namshiq ka ashut maiqsetiim dea nguta saqseng hakhi mikuq. Kra riili she namrilung na awum abi, kiimaq lapphaq lusiq siwan lan nguta hakhi mikuq. Kiimaq namtsiiq tum riili she namkhum ka mitiikhiim chaq baiq. Namshiq raq namtsiiq tum ka ümchaü phangthum wan pat na riichom lanta phong thü tlan.

⁴ Namshiq raq namwak na ningchang tham phaqti, tsamhan jaq maq kampho ka kuq man maq haihii lan. Tsangshiq raq aholülü maq tiipaiqnea jaü tlaq kra tai man sha! Tsangshiq hoq trang tlaq kra Tatiwe, Ajong Shiikeawe raq taito she.

⁵ Namrilung ka ara mangjong hiq maq, wok phetaktak, tiipong tiipii, namwok triim lanta siwan lan. Namkhum ka minsaü pongsetiim apü wiq, ataa phaq ma rüm tlaq ikha, Phangthum Khapho Ranaiq na, Shiikeawe rung na chap wan miitu she tiije thü wan lan.

⁶ Namshiq raq jam min sap makti, maiqsangti ka shaphaq baiq wan lan ihata. Kiimaq wiita atsea riibaiq wan lan ihata. Kiimaq tsangshiq raq namshiq jaq ka towan lot mak riito.

Tsanbum Maq Achu Jaü Ronglaq

⁷ Phuno nyinotiim lei, nashiq Tatiwe ka misaüki shaq wiiwii, litkot chamchao ümtinkhan wa riihum wan tlan kra, tsan tiibum lanta nin wan ruq miili si rong laq. Liimanta, wak shamseati we riimin la, awak wa tsam ka midong man shaq wiiwii, tsan tiibum raüta, khekham maq khe tlo. Apaiq raq jurai liirai rajun saü tlaq kra, kheshat maq sitlo.

⁸ Kra niq riri sii hali, namshiq riimin la, tsankhun maq, nin wan ruq maq khe chang li. Tatiwe ka misaüki dongdii. Apaiq saükai jipi rahiq hong wan miika ajeje lishe. Kriikha maq, apaiq saükai khe kamto maq si rong laq. Atheingei ka naq theingei rongkiq. Namshiq tsaiji ka naq tran rongkiq.

⁹ Phuno nyinotiim lei, namshiq raq chamchao litkot riihum tlan akhing na, riithu riisi lanta, weshi raq weshi ma naq tiishaü rongkiq. Nashiq raq kongti ka khühü na tiishut wan raa mak. Ara chongtiikang arka, Shiikeawe raq namshiq ma kha nyan mak chang miitu chongtiikang. Phowe jong ka ümchaü aje niishe. Mangjong maiqse kunli kha phokai saüho tlo she.

¹⁰ I phu i notiim Phungmaiqse kong lei, Tatiwe tsütsa chongketibi ra shammibi rilung ka nashiq ma lam sheaketi. Tsangshiq riimin la nashiq chamchao wankai akha, ümtinkhan wa litkot chamchao wamong maq lea wan raüta Shiikeawe tsütsa ka chongkuq wanto.

¹¹ Nashiq raq tsangshiq ka kechu maiqsetiim dea nguta shreng tiikai. Jamkhano ngukla, tsangshiq raq chamchao walü wiita nin wan raüta siwanto. Job raq phanrap chamchao nin wanto. Krai mren, atiisup na Shiikeawe raq, apaiq ma pinthum achu shiiman kuqto. Kra bomtho ka namshiq raq asap han. Shiikeawe raq maiqse ma mangchan tsii rüm tlaq kriika, nashiq raq nü maq achong lot mai sitlo.

Atiitum Lanta Kiq Naqkham Rongkiq

¹² Lungwii Phungmaiqse phunainotiim lei, ara chong tiikang bomtsi arka akhek pinthum ashi. Namshiq raq ümtiikiiwa bomkham kongphiq raü kha tlan na, ra mang chong lantiimin naq kham rongkiq, kiimaq hiq mang chong lantiimin naq kham rongkiq. Kiimaq bom achan min naq tiitsuq rongkiq. Namshiq riika, “Ngi raq kiq kham tiikang arka misham ha dongdii,” riimak la, “Ngi raq sham mang ngutiikang arka, ümtiikiimin sham mang dongdii,” ngutli bom ronglaq. Kra bom kham kongphiq kha tlan krai mren, akhing hongto angu na, kongphiq raükha ka dii wan ra tlo. Akha ating arai maq sihan jiila, Shiikeawe raq namshiq ma kha ka tiiho mak miraq.

Phungtuti Raq Achu Jaü

¹³ Namshiq liipan na, maiq ashi ra acham achaoti asi sha? Apaiq raq achu mijaü laq. Ashi ra acho achiti asi sha? Apaiq raq tiitsam shi mishilaq.

¹⁴ Ashi ra atsi asiti asi sha? Apaiq raq phungtuti maiqlare ka tiihea kai chang. Tsangshiq raq apaiq miitu achu mijaükuq kiimaq akhum na olip tel maq Tatiwe mang na minyat kuq.

¹⁵ Ara kam raüta achu jaükuq tlaq ariiraq atsi ka ahea mirki. Tatiwe raq apaiq athatsi ka mitiihea kuq. Kiimaq apaiq raq ngarai thun tangtaq kriimin adii mirkuq.

¹⁶ Kriikha maq, namshiq ngarai thun ka weshi raq weshi ma tiidii rong laq. Kiimaq weshi raq weshi miitu, achu jaü kuq rong laq. Kra riihan jiila, namshiq tsisi kriimin mitiihea kuq. Maiqshaqti raq achu jaü ka ningkun ajong tiidoq ra miraq.

¹⁷ Elija ka nashiq akhnok maiqse siili riito. Apaiq raq kam raüta, atsi dada maq, ra naq tiijunkiq nguta achu jaüto. Kiimaq wiitsam ri wiithiq Israilnok mung na ra jun mak riito.

¹⁸ Kiimaq jangshi ri hali, apaiq raq achu jaüto. Krai mren, ra ka düthaü she deato. Raüta mung na rongboq tsam lapto.

Ashutti Ma Tsii Chongke

¹⁹ Iphu inotiim lei, namshiq phong wa, weshi ra ka tengteng lam phan wa lamjiq na moho tlaq jiila, kiiwa weshi ra raq apaiq ka tiijang shea wan nong raüla,

²⁰ ara tsan na tiitsang ronglaq: Jurwa ngarai maiqse ashi ka lamjiq na akiho kiiwa tiijang shea wan tlaq, kriika ngarai tangti we tsaiji ka atsai kai chang wa tiichhii kuqto ngushat. Kiimaq ngarai pahea tiidii kuqto ngushat.