James 4 - ASII LAKDAP Bible (BSI)

Han-ngam Lam Na Siti Shiikeawe Raq Romak

¹ Namshiq phungtuti liipan na tatso wiinyi, riitsak riikaq sitlan kriika jamkhiibawo dong tla? Kriika namshiq tsan mong na, mangjong hanngam na poloseali lungwii tlan kriiwa dong tlo. Kra han-ngam lam phan na polosea tsii ramho sitlaq kra, nam mongjii na tatso wiinyi wa trang li sitlo. Kra sikha maq namshiq riitso nyi tlan.

² Namshiq raq phanrap hup asam ka laphai jiilei nguta, khutaüphei tin rit tlan. Shatmaq lap man. Kriikha miishe namshiq liipan na jasam piqsii she riise tlan. Namtsan mong na hup nai sam, tsiiq nai nyam lap hai jiilei nguta pinthum süram tlan. Shatmaq rit tlan ta awii thun ka lap man. Kiijiishe, namshiq liipan na tatso wiinyi she riilong liiq tlan. Namshiq raq Shiikeawe jaq wa achu jaü lam maq rit man kha maq, namshiq raq rit tlan tsiiq nai nyam ka lap man.

³ Kiimahali namshiq raq Shiikeawe jaq wa tsiiq nai nyam miitu achu jaü tlan. Shatmaq apaiq raq namshiq ma kuq mak. Apaiq raq namshiq ma tsiiq nai nyam ka jamkhano kuq mak, ngukla namshiq raq tsiiq nai nyam jaü tlan kriika, namshiq raq mangjong ngarai han-ngam polosea miitu jaü tlan. Kriika Shiikeawe maklii na ajiq. Kriikha na apaiq raq namshiq ma kuq mak.

⁴ Namshiq ka awese baiqthü raüta maiq rai srati nyung ikha! Mangjong maiqse rai silu riijati ka Shiikeawe rai wesang ngoka sap man sha?. Jurwa mangjong hiq rai silu riija lungwiitlaq, kriiti ka Shiikeawe rai wesang jakitlo.

⁵ Asii bomtsi na, “Shiikeawe raq nashiq mongjii na Asii Wenyi kuqto. Kra riika nashiq tsaiji rai tiipum tlii maq siwan ha jiilei nguta pinthum lungwii tlo,” nguta chong tlo, arka namshiq raq arot chongtlo sham nguta naq tiima rongkiq.

⁶ Maiqse ngarai sükha tsii ka henghea. Li jiimin, Shiikeawe kaphap mangchan tsii riiwe ka wiitarü ngarai ningkun thaq na aheng. Arkha maq tiina, Asii Bomtsi na, “Shiikeawe raq ra weahü maiqse ka romak. Shatmaq sobsob bombom maq siti miika, apaiq kaphap mangchan apa kuq tlo” nguta chong tlo.

⁷ Arningkhan, namshiq ka Shiikeawe wokhong na sanglili maq, ahea wiq maq si ronglaq. Lanta Shiikeawe wokhong maq Thawe ka, along lanta jobaiq ronglaq. Kra riihan jiika, apaiq ka namshiq tho wa aju she mirho.

⁸ Arkha maq, namshiq ka Shiikeawe wokhong na nyap wan tlo ronglaq. Raüla apaiq raq namshiq ka awokhong na mitiisi. Ai! ngarai maiqse kong lei! Namjaq ashe kra he wan tlo rong laq! Mongnam nok loi!

⁹ Ngarai kaq dea sitiikai nguta maaho maanyi, makphai khüshang riilanta mra tiidii rong laq. Anai trang ka aho trang miishe tiija rong laq. Hühü haha sitlan kriika, mun tiijuk-ram she riirong laq! Shiikeawe man na, munjuk mijuk maq mrong roq rong laq. Haü la Shiikeawe raq namshiq ka aki miikiim setiim miishe mitiija.

¹⁰ Shiikeawe puk na aranse ma ja lanta nyap ronglaq. Raüla, apaiq raq namshiq ka ajong ala miishe mitiijong luwan.

Phunaino Ma Abi Naq Bom Rongkiq

¹¹ Phunainotiim lei, namshiq liipan na maiqmii nai maiqmii ka naq riichongsiq rongkiq. Jurwa maiqmii kongti Phungmaiqse kra shaphaq tlaq, lo arewe ka ajiq nguta shin tlaq, kriiti riika Shiikeawe Thungtri kra sairan tlo ngushat. Kiimaq Thungtri raü ka sairan tlo ngushat. Riita namshiq raq thungtri she sairan han jiika, namshiq ka Thungtri wokhong na siti ka riiman she. Shatmaq thungtri sairanti miishe mija han.

¹² Shiikeawe kli Thungtri keti we kiimaq phowe. Apaiq kli maiqse rilung tiichhiiketi we kiimaq maiqse miisaq tiithum baiqti we. Arkha maq, ümniiraq ümphuno we ka ajiq alam nguta chechiip lot maü.

Naq Shiikong Rongkiq

¹³ Riita ümchaü min ngi raq namshiq ma ara tsii chongke ro. Namshiq phong na maiq wiijamti raq, “Ngi riika athi anap liipan niili mungshi ra na mikiho ha. Lata chela ashi na rawiishi tin misikiha. Lata kiijaq laopan ja, piikii miklo ha. Lata chiithe jong she mija ha,” nguta tiishomrasea ka namshiq nü na angam kaiwi she.

¹⁴ Shatmaq, anap rawüho haü jaq üm rilung ka jamkho jajiiq, kiimin sapphaq maü sitlaü! Üm rilung ka büse jaq na bangkham pose ikhli. Ümchaü asi, shatmaq athi heashise sijai niika ahü she.

¹⁵ Namshiq riika akha ngutli riibom han chang: “Tatiwe raq thikuq raüta, atra sihai jiika, apaiq wokhong maq, nashiq raq phanshi ra miklo rong i ahiq, nguta tiima laita sitiikai.”

¹⁶ Shatmiitiq, namshiq ka Phungmaiqse ngu raü, ashkong tam li sitlan. Jamlai jamla kiinang wiila miklo rong i nguta ra weahü bom tlan. Akha tiitsaki rai tlan arka, Shiikeawe man na ajiq, bintang.

¹⁷ Arkha maq, Phungmaiqse ashi raq jaqsham ahea sham chang asi nguta, sapshatshat taü maq sham mak raü ka, kriika apaiq ma ngarai miraq.