James 3 - ASII LAKDAP Bible (BSI)

Phungmaiqse Ka Mobombom Bom Raa Mak

¹ Lungwii Phungmaiqse phunainotiim lei. Ngi raq namshiq ma tsii chongkero ka ara. Namshiq phong wa maiq pahea raq, ashrinketi shrabi ma jawan hai jiilei ngutiika, manhii rat man ngu raü jiika ahea miraq. Ara jamkhano chongtiikang ngukla, namshiq tarü raq asaphan. Shiikeawe raq nashiq ashrinketi shrabi kha ka, nanok Phungmaiqse ahinti kha thaq na, tri atsin linlin maq mipho.

² Ara jamkhano chong tiikang ngukla, nashiq tarü raq pahea ashut klo tiikai. Na shut ka naq raq apako sap mai riitiikai. Shatmaq Phungmaiqse liipan na jurwa abom poshi min shut mak phan maq bom tlaq jiika, apaiq ka minhap she dea nguta ngo chang misi. Apaiq ka asii miikiimse ashi nguta, abom poshi achan bom mak phan miraq.

³ Nashiq raq kumrang shiipuq tiikai ira ngu i. Nashiq raq kumrang ka anübok na jinpo tiikaq laita shiipuq tiikai. Laita apaiq ka nashiq raq ümnü na tiikhum wan wa ro tiikai, kra phanphan tiikhum jamsha tiikai.

⁴ Kiimaq kiikhiisii hali, kham jahat mokkiitu kaü ira ngu i. Ashaq lii miikla, jonghea raham hiqham kaü. Li jiimin, rahai hai jong saü tlaq kiima tiithu wan raüta, kham thaq na tiikhum tlo. Riita, arka ajiiq chang samthu pen aranse, laimaita siim na atiihong asi. Lai jiiqti we pailot raq, mokkiitu ka ümnü na tiikhum wanro wa, kra phanphan she, samthu pense kra maq tru rap wiiq wan raüta, mokkiitu kaü ka tiikhum tlo.

⁵ Nashiq nü bok na, nashiq tili sitlaq armin, ara ümchaü kumrang maq thapthi tiikai akhiisii hali. Ashaq lii miika aranse. Mak min sukmak ngo chang khan. Shatmiitiq maiqse raq atili tsak tlaq kra phanphan, abom asa ka rapa hiqchin, atailot chang min ahü, bomrai tlo. Maiqmii tiitsaki seali. Namtsan na riiwea rongliita. Rum ka kunyung kinwe jonghea li ngu raü min, wakhat kiishi se miili kunyung kinwe tiikhiim chaq baiq wantlo!

⁶ Ara chongtiikai akhiisii, maiqse nü na atili sitlaq kiimin, wanii tu ikha. Maiqse khum na tili sitlaq arka, abi hokham weshi raq, mung langtlaq ikha. Ara abi hokham tili arka nashiq khum na sitlo. Raüta, nashiq khum ara wiipumtam na, abi kiimung maq mia raüta tiinyam wan tlo. Ara na tili armaq abi bomtsi bom laita, wamungtan wa wapü pan tlaq kra niq wan tlo. Raüta, nashiq rilung lam ara wiita wa maq tiikhiim chaq baiqtlo.

⁷ Maiqse riika rum ngamse ngu i, wushi ngu i, paüsang nyiqla ngu i, kiimaq jü mong na siti phan ngiq thun kra ngu i. Arthun wiita kunkun ka, mishpuq wanlot siisaq. Sha, riikhaqli maq liiwan raüka, maiqse riika phanrap ngamsaü ngiqse thun ka wiita kunkun she shiipuqto.

⁸ Shatmaq, ümchaü niitaq, maiqse angu raq maiqmii tili ka shiipuq lot mak shaq li sitlo. Tili ka abi. Ashpuq lot chang phan riimak. Tili na paü lai ikha liipu asi.

⁹ Nashiq raq armaq, nashiq Tatiwe kiimaq nashiq ma Na Wejong Shiikeawe ma kechutum achü jaü tiikai. Kiimahali, Shiikeawe raq apaiq sham ikha, naphan namaq maiqse ngusaq kra phansangto. Tsangshiq ma nashiq raq manson kiqsü bom tiikai.

¹⁰ Maiqse riika, anü pushi miili, kechutum ke bomtsi min bomtlo. Kiimaq maiqmii kongti ma, manson kiqsü bomtsi kiimin bom tlo. Lungwii phunainotiim lei, ümchaü sanha, nashiq Phungmaiqse nübok miika, akha bom mai she riichang!

¹¹ Jüserai kuk ashi wiili ka, kham ka khangriri hea, anyang miimin sumhea, hüphin hanphin kiimaq shumtai maq ashot kham, maiq raq anyang maimak ka dong mak.

¹² Kiimahali, lungwii Phungmaiqse phunainotiim lei, laqngiiq chong niika phupmup ka tsimak phan. Kiimaq, phupmup chong niika, shepe ka tsimak phan. Kiimahali, shumchum raikuk wiika khamsang khangriri hea, anyang ma asum wiq, hüphin hanphin ka dong mak phan.

Ramungtan Wa Akuq Taksu Tsii

¹³ Namshiq phong na taksu maiqse, kiimaq anyan phaqchi rümti sitiikai nguta tiingoti weshi ra asi sha? Sitlan jiila, apaiq raq, apaiq ka taksu maiqse kiimaq anyan phaqchi rümti we dea nguta, apaiq rong arai ka ahea rüm raüta, nanok ma tiichhike chang. Kiimaq maiq rai sobsob bombom maq riibom nai tlaq kiimaq tiichhike chang. Nok abin ma athuk atsom jaqshamke ka tsapkapkap maq sham raüta misi laq.

¹⁴ Shatmiitiina ümtsan mong na, nanok ma makshu rashe tsii rüm tlaü, maiq ngeng tlaü jiila, kiimaq jamlai phan niili jiimin, maiqmii ma jamlai wa ahea raüla hong jiiq ngu tla tiima tlaü jiika, phanrap asap atsinha we nguta, naq shiikong kiq. Kriika ümniiraq tengteng bomtsi tri ka jin tlaü ngushat. Kriika ümniima ngarai tangphaq li miraq.

¹⁵ Ara chongtiikai akhnok taksu tsii arka, Shiikeawe raq akuq ramungtan wiika riimak. Arka mangjong hiq wa hon atsii, ngarai han-ngam wa adong. Kiimaq thawe shinrii raq akuq ngushat.

¹⁶ Jamkhano ara ngutiikai ngukla, Phungtuti liipan na ümtiikiiwa ara chongtiikai ngarai phoqngeng tsii rümti nai maiqmii raq jamlai phan wa lungwii tlaq, kriili dongdii tiihong tha raa nguta tiima tsantsii ka siraü jiila, phungtuti liipan na, kiq ripo wan mak she, kodang koda she miraq. Raüta Phungmaiqse raq abi ati jaqsham, shamki mak chang phan thun pahea misham.

¹⁷ Shatmaq, kamasham na, Shiikeawe raq akuq taksma tsii rümti maiqse rilung ka siirairai miraq. Apaiq ka kechu maiqse. Apaiq ka nokwe rai ari aram maq siti. Nanok rai sobsob bombom maq siti. Kiimaq apaiq ka nanok rai riilung riiwii maq siti. Kiimaq nanok ma shamhea kaiwa jaqsham kewan niili arilung ka mitiisung wan. Apaiq riika shiikong tsii ka thü mak. Kiimaq mongnam tsii min thü mak she miraq.

¹⁸ Ara chongtiikai, phungtuti liipan na hansang maq nai kaütak rishi maq shongnga wan miitu, jurwa phumram khamkok doshat maq ramram jaqsham wantaq, kriiti ma achu shiiman khusang rilung misi.