James 2 - ASII LAKDAP Bible (BSI)

¹ Lungwii phunaino Phungmaiqsetiim lei, namshiq ka nashiq Tatiwe Jesuq Khristo, achhai anyii Tatiwe ma pharangrang maq kamwanti maiqsetiim nguta sitlan. Krai mren, namshiq raq maiqse ka rakhütsiri na, tsangshiq sham na liilanta, arka ajong, arka chiithe lüwa, kiimaq arka thümsaü litse nguta, naq tseatsiiq rongkiq.

² Bom shiiton ngu i, namshiq noqku lom akhing na, maiq ka wenai misaü wa. Weshi ka amii akhiiq min thepthep sam raü misaü wa. Kiimaq ajaqshi niimin chaq jaqtop pa raü miraq. Kiimahali weshi ka, miitsan maiqse. Apaiq miirii kiimin maiqtsai ngamhai, wunthaü riinaü.

³ Kra chhi lanta, namshiq raq chiithe we ka ahea wiq maq shreng lanta, namshiq phong wa weshi ra raq, “Shiilang we lei, ümniika ana shiilang ngachang ana ngawakiq na,” nguta mitao han ngu i. Kiimahali, weshi ra raq, miitsan we ma, “Ümniikla inniikiijaq chaplaq; riimak la, ara i ngachang, i jichong tho arjiili nga liina,” nguta mitao han ngu i.

⁴ Riita, namshiq raq maiqmii liipan na akha riitseatsiiq han jiika, maiq tiikhothiq ngarai tang tlan riimak sha? Akha maiq tiikhothiq tlan arka, maiq nai maiq liipan na tok ajiq maq shin lam niishe misupwa.

⁵ Lungwii phuno nyinotiim lei, ngi chongpha, namshiq raq samhea wiq maq tiitsang tairong laq! Namshiq raq asap han, thatsang maiqse raq miitsan miijan maiqse nguta shipoq raüta liitlaqti ka, Shiikeawe raq asengi miishe tsea wanto. Tsangshiq ka Jesuq Khristo ma kam tlaq krai mren, ümchaü sanha wenyi rilung na chiithe maiqse she. Shiikeawe raq apaiq lungwiiti asengi thun ka, awokhong na mitiisi ha nguta ramram kiqkham kuqto. Ara chongtiikai miitsan maiqsetiim thun min, ümchaü sanha, Shiikeawe wokhong niishe tiisi damtlo. Kra namshiq raq chhi man sha.

⁶ Namshiq riitiq nya, miitsan maiqse angu ka, ashummii riiho! Rung awang na namshiq hit-rottibi thun ka juwiita? Chiithe maiqse raq riimak sha!

⁷ Namshiq raq shreng tlan, Jesuq Khristo mang chong kra tiibi wanti ka tsangshiq kata.

⁸ Ara chongtiikai arkha maq, Asii bomtsi na chongtlaq, Ramungtan Thungtri aming ka namshiq raq lang lanta si han jiila, namshiq ka tingting maiqse ma mija han. Kra chongtiikai aming ka ara, “Ümniiraq ümkhum ka jamkho lungwii tlaü, kiikhiisii hali ümjam thoti chiiti kiimin lungwii laq.”

⁹ Shatmaq, namshiq raq nanok ka rakhütsiri na liilantli, tseatsiiq han jiila, namshiq ka ngarai tangtibi ma mija han. Thungtri raq namshiq ka tri jintibi nguta mitiishut.

¹⁰ Jurwa tri poshi jintlaq, kriika thungtri wiita jin miishe mija.

¹¹ Shiikeawe raq, “Maiqchak maiqse rai naq sra rongkiq” nguta aming kuqto. Kiimaq apaiq riisü hali, “Matwe ma naqja rongkiq” ngutiimin aming kuqto. Riita arkha maq, namshiq ka maiqchak maiqse rai sra kiman li jiimin, maiq miisaq la tanki han jiila, namshiq ka thungtri jinti she.

¹² Arningkhan, namshiq raq nanok rai riibom nyiim tao wan tlan akhing na, kiimaq nanok rai phanrap jaqsham tlan akhing na, athuk atsom maq sichang. Shiikeawe raq nashiq kha ka ngarai maiqse tiichhii wan chang Tsütsa Ahea tri maq shin raüta mipho kuq.

¹³ Shiikeawe raq khapho akhing ranaiq na, jurwa kongti ma mangchan tiichhi mak dea riitaq, kriiti miika apaiq riimin mangchan tiichhikuq mak miraq. Shatmaq jurwa nanok ma, mangchan tiichhi kuqtaq, kriiti miika Shiikeawe riimin mangchan mitiichhi kuq.

Kamtsantsii Nai Jaq Maq Sham Wan

¹⁴ Lungwii Phungmaiqse phunainotiim lei, Phungmaiqse weshi raq, Jesuq Khristo ma kamtiikang nguta, anübok miili tiitsaki raü jiika, apaiq raq kamtsantsii rümtlaq kra, apaiq jaqsham maq tiichhikuq mak jiika, apaiq kamtsantsii chongtlaq kriika, shaqmii li ngushat. Kiikhiinok kamasham riika apaiq rilung ka tiichhii wan lot mak.

¹⁵ Bom shiiton ngu i, namshiq phong na, Phungmaiqse phuno nyinotiim wiijamti ka, akhu akhea min ahü. Kiimaq amang ale, songtsi ramtsi chamchao misi.

¹⁶ Riita, tsangshiq ma akhek raa tlaq ka, tsangshiq khum tiikhe chang samtong kiimaq tsitsü triichüm chang, ranaiq miitu dungja dase riiwe ka kuqsiq man miili, namshiq raq tsangshiq nangnga, “Shiikeawe ka namshiq rai asijo! Han tlam ma khea samhea samlanta si ronglaq. Kiimaq wok phetaktak phaqsiq lanta, si rong laq!” nguta bomke ka jamlai liip wa misi?

¹⁷ Ara chongtiikai akhiisii, kamtsantsii rüm ngutlaq kiimin kata. Maiq weshi raq kamtsantsii ka rümtiikang ngu raü, ajaq sham maq tiichhikuq mak jiika, apaiq kamtsantsii ka thiihü, amaa.

¹⁸ Shatmaq Phungmaiqse liipan wa weshi ra riika, “Phungmaiqse liipan na maiq wiijamti riika kamtsantsii rümtlo. Kiimaq maiq wiijamti riika jaqsham wantlo” nguta bom ka mikhii ngu i. Ikhla ngi riishe kriiwe bom ka akhiishe tre pha. “Ahea, ikhiila, ümniiraq ngi ma mitiichhi kuq lot haü jiika jam raa mak. Ümniiraq ngi ma, Phungmaiqse weshi riika kamtsantsii mirüm. Shatmaq ahea awa jaqsham miiriiwe ka tiichhi kuq lot mak min miraq ngu tlaü? Shatmaq, ngi riikla, i kamtsantsii ka asi dea rümtiikang nguta, i jaq sham maq mitiichhikuq lot ha.

¹⁹ O raq, ngi riimin asapha. Ümniiriika Shiikeawe ka ashi li dea nguta kamtlaü. Kriika thukto dea! Shatmiitiina, ümniiraq sap chang asi: Thakong riimin la, Shiikeawe ka ashili dea nguta kamtlo. Raüta, tsangshiq haisi tsi ma atiikhai rokrok haitlo.

²⁰ Ai, angi we loi! Kamtsantsii ka jaqsham maq tiichhikuq wan mak raü ka, shaqmii nguta chongtlaq kra ümniiraq sapmaü sha?

²¹ Shiikeawe raq nati Abraham ka, kechu maiqse dea nguta jamkho rairii wanta? Kriika Abraham raq, apaiq jaqsham maq tiichhike kha na, apaiq ka kechu maiqse she nguta rairii wanto. Apaiq raq ase Isak kra Shiikeawe ma honglu na takuqto.

²² Riita, ara chongtiikai arwa, ümniiraq chhi tlaü she riimak sha? Abraham raq Shiikeawe kiqkham raüpot ma kamto. Raüta ajaqsham maq Shiikeawe aming ka tai raüta tiichhi kuqto. Apaiq raq Shiikeawe bomtsi ma kamwantaq kriika, apaiq jaqsham miishe Shiikeawe aming kra tai raüta tiichhikuqto. Krai mren, apaiq kamtsantsii rüm tlaq kriika, awongsii dea nguta jaqsham lü miishe tiichhikuqto.

²³ Krai mren she, Asii bomtsi na, ‘Abraham raq Shiikeawe kiqkham ma kamto. Krai mren, Shiikeawe raq apaiq ka kechu maiqse she nguta rairii wanto’ nguta chongtlaq bomtsi kriishe kuwato. Krai mren she, Abraham ka Shiikeawe ma aluwe shaq she dea nguta, Shiikeawe raq ajaq khaqkuqto.”

²⁴ Riita, ija, Phungmaiqsetiim lei, ara chongtiikai arwiishe, nashiq raq chhi tiikai. Shiikeawe raq maiq ashi ka kechu maiqse she dea nguta, rairii wan tlaq kriika, apaiq raq Shiikeawe ma kam tlaq kra thaq na seng raüta, ajaq sham miishe hali tiichhi kuq wan tlaq, kriikha maq, kriiwe ka kechu maiqse she dea nguta, Shiikeawe raq rairii wantlo nguta chongtlo.

²⁵ Ara chongtiikai akhiisii hali, mephe nyung Rahab rilung manphan kiimin riito. Rahab raq Israilnok rewa siwe anai kra, apaiq jam na tao wan raüta, tiijapto. Kiimaq tsangnai ka ponglam miishe tiiju baiqto. Apaiq raq tsangnai tao wantaq kra, apaiq raq Shiikeawe ma kamtaq kra jaqsham maq tiichhikuqto. Kriikha maq, Shiikeawe raq apaiq ka kechu maiqse she dea nguta, apaiq khoqramkii miishe rai rii wanto.

²⁶ Riita, ara chongtiikai arai mren, Phungmaiqse ashi raq, kamtsantsii ka rümtiikang ngu raü, apaiq raq ajaq sham maq tiichhikuq mak jiika, apaiq raq rüm tlaq kamasham kriika achhii, awong ka ahü. Kriika maiq maa ashi bumrai tlaq ikhli miraq.