Hosea 1 - ASII LAKDAP Bible (BSI)

¹ Arka Tatiwe raq Bari se shammiwe Hosea ma riisham bom maq atiichongki. Ara riisham bom chong arka Hosea raq, Juda mung rümti hokhambi Ujjia, Jotham, Ahaj kiimaq Hejekia pat na chongkuqto. Krapat na Israil mung rümti hokhamwe ka Jehoash se Jeroboam riito.

Hosea Tanyung Nai Asetiim

² Tatiwe raq Israilnok ma Hosea lümaq aphashaq shaq bomphahotaq akhing na, apaiq raq Hosea ma akha nguto, “Kilaq. Laüta ümchak ka lamkikiq. Ümjamti nyung ka mephe-nyung ma mija. Kiimaq ümsetiim kiimin anyung kiikhiisii miraq. Kra niqriri sii hali Israilnok kiimin iwokhong na simak, ipuk wa ahin niishe dongkito,” nguta Hosea ma nguto.

³ Krai mren, Hosea raq tsangnyung ka lamkito. Tsangnyung mang ka Gomar. Awe mang ka Diblaim. Tsangnai se chhikhuse ka humto. Ase chhikhuwe hum jai na

⁴ Tatiwe raq Hosea ma akha nguto, “Apaiq ka ‘Jejreel’ nguta mang laq. Jamkhano ngukla rahiq aje sijai niili, ngi raq Israil mung hokhamwe ka apaiq ma ati hokhamwe Jehu raq, Jejreel hiqthung na maiq pahea tsatbaiq wantaq, kra kha na, apaiq kha ka pholata mitiichamchaoha. Ngi raq Jehu weraü ka chongthum mitiija baiqha.

⁵ Kra akhing na ngi raq Israilnok rewe ningkun ka, Jejreel Hiqthung Tan maq re ma tiikhat lata, chongthum mitiija baiqha.”

⁶ Kriijai maq, Gomar raq ase ashi hali hum nongto. Ara lak niika jechakse she humto. Tatiwe raq Hosea ma, “Ümse mang ka ‘Lungwiimak’ nguta mang laq, jamkhano ngukla, israilnok ma lungwiitsii ka thümang she. Kiimaq tsangshiq mra ka diikuq mang she.

⁷ Shatmaq ngi raq Juda mungti miika lungwiitsii mitiichhikuqha. Ngi tsangshiq Tati Shiikeawe raq tsangshiq ka mitiichhiikuq wanha. Shatmaq kra tiichhii wan jaqsham ka re tiidong lata jasam piqsii lata tiichhiike wan ka riimak. Ko aliq miika riimak. Kiimaq kumrang thaq chaoti sreabi kong lümiika riimak,” nguta Shiikeawe raq ngutlo.

⁸ Kra jai maq, tsangnyung Gomar raq ase jechakse ka chhanchhi wan jai she, apaiq ka wiihan hali riito. Kiimaq ase ka maiqwese hum nongto.

⁹ Kiijiishe Tatiwe raq Hosea ma, “Ümse ka ‘Isengi Riimak’ nguta manglaq nguta chongto. Jamkhano ngukla Israilnok ka isengi riimak. Kiimaq ngi ka tsangshiq Shiikea riimak,” nguta chongto.

Shiikeawe Raq Israilnok ka Awokhong Na Mitiisi Wan Nong

¹⁰ Israilnok ka puchi wan raüta khamjong phii na kumtsai riiphong tlaq ikha miraq. Awealot chang riimak miraq. Riita ümchaü ka Shiikeawe raq tsangshiq ma, “Namshiq ka isengi riimak” nguta ngutlo. Shatmaq akhing ashi misaü wan, “Namshiq ka atra Shiikeawe setiim!” nguta apaiq raq tsangshiq ka mihea wan.

¹¹ Juda mungti nai Israil mungti ka adam niishe mipong wan. Raüta nokshi hiqshiti miishe mija wan. Raüta tsangshiq raq tsangshiq khuthaq na mungtuwe weshi she mishong wan. Krai mren tsangshiq ka jangshi ri hali mipuchi wan nong. Raüta chiithe lüwa ajong ala miishe mija wan nong. Tengto, Jejreel wangti ka pinthum ajong ala wang miishe mija wan!