Hebrews 9 - ASII LAKDAP Bible (BSI)

Mangjonghiq Na Shomnoq Nai Ramungtan Na Shomnoq

¹ Man na, apha na tongshongtaq kiijiika, Shiikeawe shomnoq miitu thung alai athü wan asi. Kiimahali, Shiikeawe shomnoq chang, maiq jaq maq ahaihun jolitiip min asi.

² Shiikeawe shomnoq chang ka tombu maq, jolitiip chan tlo. Kra tiip ka among na khok anai asi. Rin khokti kriika, Asii khok nguta ngutlo. Kra khok mong niika, piijongteng tochang nai ramwebi raq Shiikeawe ma honglu na akuq winsii thü chang chamrii thü tlo. Chamrii na winsii ka thü ruq phan.

³ Kra jai wa among na hali khok ashi asi. Kra khok ka kheathum ajong wiq maq chansaq raüta arai tuk thü. Kra tapmong khok kriika, Asii Thaq Niimin Asii khok nguta ngutlo.

⁴ Kra khok mong niika, chaq ngam maq lo raüta ajop, homseng win honglu chaq chang beongwacha asi. Kiimaq kiijaq Tongshong Tek kra thü tlo. Tongshong Tek kriimin chaq ngam maq ajop raüta ahai. Kra Tongshong Tek mong niika, chaq ngam maq ahai tsabum chü ashi asi. Tsabum mong niika man niiwa, mana athü asi. Kiimaq Aron nyeakii acham arki ka wiijaq tam maq athü asi. Kiimaq longpen kiimin anai asi. Kra longpen kaü nai niika, Shiikeawe raq akuq Aming Roqshi kra waiq raüta athü asi.

⁵ Kra Tek thaq niishe ka wrakong phan, achhai anyii khushü ngao cherubim sumla kaü nai asi. Kra sumla kaünai sitlaq kriika, Shiikeawe ka kiijaq asi dea nguta hakhi tiichhike miitu sitlo. Sumla kaünai rakong maq tiinyam pang tlaq ba tek kriika, Shiikeawe raq maiqse ngarai diike chang mangchan ngacho nguta ngutlo. Shatmaq ümchaü nashiq raq arthun ara wiita tiitho tiipha chongke akhing ka riimak she.

⁶ Riita, ara chongtiikai khok anai ri na phanrap ka tiihong tha je she thü tlo. Ramwebi ka wranaiqtek, ara chongtiikai jolitiip rinkhokti na, Shiikeawe shomnoq wa ramwe jaqsham walili riitlo.

⁷ Shatmaq, kra tapmong khokti niika, Ajong Pinthum Ramwe kli wa tlo. Kriimin, wiishi na jangshi lamlamse li wa tlo. Kra tapmong na watlaq akhing niika, apaiq maiqmii ngarai tiikhoi miitu nai nokwe raq sap mak lam maq ngarai tangtlaq thun kra tiikhoi miitu, Shiikeawe ma honglu na ataakuq ngam tiijai kra, ajaq na sham shat miishetiq watlo.

⁸ Riita, arjaq chongtlaq ramwebi raq jolitiip mong na mowa wamak phan arwa, Asii Wenyi raq nashiq ma akhek bomtsi ka ahea wiq maq tiichhikuq tlo. Ara liichum arka, ara tongshong chü pat wa jolitiip ara sishat wiiwii, ramungtan na sitlaq asii jolitiip mong na, Asii Thaq Na Asii Khok kiijaq nyap wan chang kilü ka midi kuq shaqli nguta chongtlo chhi tiikai.

⁹ Ara jolitiip maq shiiton raüta chongkuqtlaq arka, ümchaü pat na sitlaq ara miituli. Arka maiqse raq aphaq asea chang phan honglu hongtan kuq tlaq, kiimaq nyamse kra ta raüta kuq tlaq kra riika Shiikeawe shomnoqtibi tsan nai tsii ka kunkun siirairai ka tiisii kuq lot mak nguta chongtlo.

¹⁰ Arthun honglu kuq tlaq arka, aphaq asea chang phan, raipo wonglo, anyang chang phan phaq asea, kiimaq alam alam na seng raüta khuliiq tsaichhin wan, mrochhi phaq wan chang sitlaq thun kra nangnga li chongtlo. Arthun arka rakhü-tsiri na lang wan chang thungtri li. Arthun arka Shiikeawe raq maiqse rilung lamphan lamjong anye kra mitan kuq shaq pat na lang chang li.

¹¹ Shatmaq, Khristo ka Ajong Pinthum Ramwe ma ja raüta, nashiq ma ahea awa, rahea phan kra lamho raüta, arjaq saükito she. Kiimaq ümchaü apaiq ka athuk atsom, aku ari wiq maq ahaihun jolitiip mong kiijaq nga raütiishe, Shiikeawe ka shomnoqtlo. Ara jolitiip arka, maiqse jaq maq ahaihun ka riimak. Arka, ara ra nai hiq ariirai atiiq wandam ka riimak.

¹² Khristo ka ara chongtiikai jolitiip mong na pattup pat-sa siwan tlii miitu she honglu kewa nguta nyapwato. Raüta apaiq ka Asii Thaq Na Asii Khok mong niishe nyap wato. Kra nyap wantaq akhing honglu kewan chang chhechhi tiijai nai minsaü pongsetiim tiijai ka sham wan mak dea. Nyamse tiijai rii na, apaiq maiqmii tiijai kra sham raüta, ramungtan jolitiip mong kiijaq nyap wanto. Raütiishe, apaiq raq nashiq ka, kharü mong wa klang maq lakshi wa niili panthit, pattup pat-sa miitu dokdaa kuqto. Raüta, pattup thumki mak phan rilung tsitsü she kuqto.

¹³ Riita, ija, Shiikeawe tri jinti ka Shiikeawe rai sham riichhi lot mak she, apii tiishang kitlo. Kriiti mra shiikhoi baiq miitu ka, chhechhi ataa tiijai, kiimaq minsaü pongsetiim ataa tiijai, kiimaq minsaü saüpongse ta raüta, wa na honglu na achaq wan, kra berongwacha wa, wabun kra lam raüta, kra wabun maq tsangshiq khum na bat tlo. Ara bat jai shetiq, tsangshiq khum ka Thungtri maq apii ashe ashi sitlaq kriika, tiishi kuq kai she nguta, tsangshiq ka Shiikeawe shomnoq wan, jolitiip mong na, nokwe rai she lom wan dam tlo.

¹⁴ Riita ija, akha mrochhi raüta mra ka tiisii kuq tlaq jiika, Khristo raq, akhum ka honglu na kuq raüta, atiijai raübaiqtaq kriika wiitarü thaq na araa pinthum she! Apaiq raq akhum ka pattup pat-sa Shiikeawe Wenyi sitlaq kra lümaq, asii pinthum honglu she kuqto. Apaiq tiijai raq nashiq hon atsii, nashiq mong nai jii ara thiihü, thatsang tri kharü mong wa, apii ashan lang tiikai thungtri kharü mong wa tiisii kuq tlo. Arka nashiq raq, atra Shiikeawe ka tiima tsantsii khangriri maq shomnoq miitu she tiisii kuqto.

¹⁵ Riita, ara chongtiikai arkha maq, Khristo ka tongshong anye arthaq na kiimwe miishe jawanto. Shiikeawe raq ara tongshong nye ashi shongkuqtaq arka, apaiq raq mangjong maiqse ümchuwa apaiq wokhong na tiisi miitu hea wan tlaq, kriiti ma tachong rilung achu shiiman pattup pat-sa rilung mikuq ha nguta kiqkham kuqtaq kra kewan miitu she shongkuqto. Riita, ara maiqse raq tachong achu shiiman lap tlaq arka, Khristo tsaitaq, kriikha maq maiqse ka tongshong chü pat na ngarai tangtaq kra, achü tri raq ngarai ka tiikhoi kuq lot mak dea riito, kiiwiishe tiichhii kuqtlo.

¹⁶ Atsai kai jai na, apaiq tachong wiira hupsam kra ju raq lap chang wa miraq, kra bomkham raüpot athüthü ka asi riichang. Kiimaq atati we ka, tsaikito she dea nguta hakhi sichang.

¹⁷ Riita, tachong hupsam pheake bomkham raüpot ka, bom khaketi we kra mitsai shaq wiiwii, tachong hupsam thun kriika riiphea lot mak. Bomkham keti we kra tsaikai jai shetiq, apaiq hupsam kra jumiiwa kuqtaq, kriiti raq mirphea lot.

¹⁸ Ara chongtiikai akhiisii hali, man niiwa tongshong chü bomkham raükha kiimin, tiijai tiidong raütiitiq, Shiikeawe jam na dü wan tlo.

¹⁹ Kra pat na, Mosheq raq nokwe kunli ka jolitiip rinkea na tiithung tlo. Raüta, nokwe ma, Shiikeawe thungtri aming raü thun kra, araü araü maq phankuq wan wan riitlo. Kra phanke lot jai shetiq, apaiq raq minsaü pongwetiim ataa tiijai, kiimaq chhechhi kong ataa tiijai kra, kham rai nyiim tlo. Raüta, kra tiijai kiimaq Shiikeawe Thungtri lakdam kom thaq na bat tlo. Raüta, nokwe thung tlaq kra khuthaq niishe bat tlo. Riita, ara bat tlaq arka, khoqramkii ikha hissop pecham wa, ahii tu kra lam raüta, kra nyiimhii tu kiijaq, skurai raishii lotu kra wiiwottsaitam ikha, kra paq dam raüta bat tlo.

²⁰ Apaiq raq kra bat lam maq akha nguta ramram bom ka bom tlo, “Arka Shiikeawe raq namshiq ma tongshong taq kra nei chang ramram kok tiijai, kiimaq namshiq raq tongshong kiqkham aming thun ka milang laq nguta kuq tlo,” nguta anü maq abom lam maq bat tlo.

²¹ Ara chongtiikai akhiisii hali, Mosheq raq, kra chongtiikai tiijai maq tongshong jolitiip kiijaq min bat tlo. Kiimaq, Shiikeawe shomnoq na lang chang, hup asam ümchuwa sitlaq thun wiita thaq na, tiijai maq nei tlo.

²² Riita, riikhaqli maq liiwan kiijiila, Thungtri na chongtlaq krai mren, phanrap na tiijai maq nei raütiitiq tiisii tlo chhi tiikai. Kiimaq, maiqse ngarai kiimin tiijai raü hü wiiwii maq, ngarai ka siimak phan nguta chongtlo.

Khristo Tsaitaq Kra Lümaq Ngarai Hebaiqto

²³ Riita, ara ümchaü chong tiikai, Tongshong Chü tri maq, Shiikeawe shomnoq chang sitlaq arka, ramungtan na, jamlai wa arang chong sitlaq kra sumla. Arthun arka, akha tiisii hewan chang dongdii. Shatmaq, ramungtan na sitlaq thun kra lap wan miitu she kriika, athii atsin, ahea awa, araa ariq phan honglu kuq raütiishe tiq, noqpi chang sitlo.

²⁴ Krai mren, Khristo ka maiqse jaq maq ahaihun jolitiip, Asii khok mong kiijiika wamak dea. Maiqse raq, jaq ma ahaihun jolitiip kriika, ramungtan na chiisan jolitiip sitlaq kra sumla li. Shatmaq, Khristo ka lakshi miili ramungtan na wawanto. Raüta, ümchaü ka apaiq, Shiikeawe man na ngatlo. Raüta, nashiq khrum kuq tlo.

²⁵ Jehudinok phan wa Ajong Pinthum Ramwe ka, honglu kewa rawii shi na jangshi, nyamse tiijai ka sham raüta, Asii Thaq Na Asii khok mong na nyap wa tlo. Shatmaq, Khristo riika, apaiq khum ka honglu na kewa miitu, jang pahea ka nyapwa mak dea.

²⁶ Kra ngu raü jiika, apaiq kiimin, ra nai hiq tiiq wan li miiphat ka, tiithongkiki chamchao wan chang midongki wa. Kra rii na, apaiq ka, ara maiqpat pahea lea wan jai she, ümchaü ara phangthum wan pat saüho tlo angu niishetiq, pattup pat-sa miitu maiqse ngarai homa thun kra klang maq lakshi wa niili hutjok tiisii rai, apaiq khum ka honglu na tiitaa wantaq kra lümaq tiikhoi kuqto.

²⁷ Maiqse angu ka, khumtek lakshi ka atsai chang dongdii. Kra jai miitiq, Shiikeawe raq apaiq kha ka mipho kuq.

²⁸ Arkha maq tiina, Khristo raq maiqse ngarai kra tiisiike miitu, klang maq lakshi wa niili panthit akhum ka Shiikeawe ma honglu na kuq raüta tsaitaq. Apaiq ka jai na lakshi hali misaüki nong. Kra saüki tlaq kriika, ngarai homa hokai miitu ka riimak she. Shatmaq, apaiq saükai kheti, maiqse ümchuwa sitlaq kra tiichhiike kai miituli she miki nong.