Hebrews 8 - ASII LAKDAP Bible (BSI)

Jesuq Ka Ajong Pinthum Ramwe

¹ Riita, ija ara naishiq raq rengkiq pinthum bomtsi chong tiikai kriika arshe. Ümchaü sanha, nashiq miitu, Ajong Pinthum Ramwe ka asi she. Apaiq ka ümchaü Ratsan Ramong nyang na, Shiikeawe ngachang hokham ngacho kra tiinap na, jaqtsi nü niishe nga tlo.

² Apaiq ka ümchaü, Asii thaq niimin Asii Khok siqlaitap niishe nga raüta, Ajong Pinthum Ramwe ma ja raüta, Shiikeawe shomnoq jaqsham tlo. Riita ara chongtiikai, ramungtan na sitlaq, Shiikeawe shomnoq chang chiisan jolitiip sitlaq kriika, Tati Shiikeawe raq ahai. Maiqse jaq maq ahai ka riimak.

³ Tongshong chü pat na, Shiikeawe raq ramwe ajongbi shongtaq kriika, ramwe ajongbi loweatek raq, Shiikeawe ma atake chang nyamse honglu nai laihin aphaq asea chang phan honglu kra kewan miitu shongto. Krai mren sii hali, nashiq ma Ajong Pinthum Ramwe riimin, Shiikeawe ma phanshi ra honglu ka kewan chang she raa tlo.

⁴ Riita, apaiq ka mangjong hiq niili sishat ngu raü jiika, apaiq ka ramwe ma jalot mak miraq. Jamkhano ngukla, ara chongtiikai Jehudinok Thungtri maq, Shiikeawe ma alu atan keti ramwebi ka pahea asi.

⁵ Riita, ara chongtiikai mangjong hiq na siti ramwebi raq, Shiikeawe shomnoq honglu hongtan kewan jaqsham tlaq arka, ramungtan na Shiikeawe shomnoq honglu hongtan kewan jaqsham tlaq kra tsaiji nai kra sumla achan ikhli sitlo. Shiikeawe raq, Mosheq miimin la akhiisii hali dea chongkuqto. Mosheq raq Tongshong Chü jolitiip kra mihai pha shaq na, Shiikeawe raq Mosheq ma, “Liilaq, ngi raq ümniima hiqlam maq jamkho jolitiip jam sumla ka tiichhikuq kang, ira phan phan sürii laüta hai laq,” nguta aming kuqto.

⁶ Shatmaq, ümchaü sanha, Shiikeawe raq Jesuq ka ramwe miishe shongto. Riita, ümchaü Jesuq raq ramwe jaqsham tlaq arka, Mosheq ma akuq aming thaq na seng raüta, ramwebi raq, ramwe jaqsham wantaq kriithaq na, araa kiimaq ahea pinthum she. Kiimaq Jesuq raq Shiikeawe nai Shiikeawe sengi liipan na, tongshong nye shongtaq kriimin, tongshong chü thaq na, ahea lin she shongto. Ara jamkhano chongtiikai ngukla, ara tongshong nye arka, Shiikeawe raq ahea lin sinkham thaq na seng raüta, kongphiq khakuqtaq kriithaq na seng raüta shongto.

⁷ Kiimaq man na, kongkhu lak na tongshongtaq kra bomkham na, wiita nyi li kupi wanto ngu raü jiika, ara jai na thongshi ri hali tongshong nong chang lamlu ka ahü she mirwa.

⁸ Shatmaq, Shiikeawe raq asengi nok khuthaq na atiishut wan bomtsi asi chong tlo chhitiikai. Asii bomtsi na akha bomthü raükha asi, “Jai maq akhing ashi na, Ngi raq Israilnok phan nai Judanok phan rai, tongshong anye miishe kha lata miri ram wan ha.

⁹ Kra tongshong anye shong nong tiikang kriika, man na tsangti tsangwitiim pat na, ngi raq tsangshiq ka I jaq maq hit wan lata, Ejip mung jaqkhon mong wa, tiidong shea wan kang ranaiq na, tongshong kang kiikhiika riimak she miraq. Ngi raq tsangshiq ka tongshong ramkham maq bat kang. Shatmaq tsangshiq raq tongshong bomkham ka shishe wanto. Kriikha na, Ngi riimin tsangshiq ka, I wura maq tiihamkuq mang she riikang.

¹⁰ Riita ija, ümchaü sanha, Ngi raq rawiichii ji na Israilnok ka, I tongshong anye miishe mitiiham nong ha. Arka, Ngi Tatiwe raq chongtiikang. Ngi raq I thungtri raütu thun ka, tsangshiq khutsai na mithii kuq ha, Kiimaq tsangshiq tsan mong na miwaiq kuq ha. Lata, Ngi ka tsangshiq Shiikeawe ma mija ha. Kiimaq tsangshiq ka I sengi ma mija.

¹¹ Tsangshiq phong wa jurmin, maiqmii hiqshongti ma, ‘Shiikeawe puk na nyap laq’ nguta, hon atsii chongke ngo min raa mak she miraq. Kra akhing na, tsangshiq tarü, ajong aran kunli, I wokhong niishe misi.

¹² Ngi raq tsangshiq ngarai wiita midii baiq ha, tsangshiq mra thun kra, tsan na akhiismin thü mang she mirha.”

¹³ Riita arjaq, tongshong anye shong nong chang ratlo nguta chong raüta, Shiikeawe raq apha na shongtaq kriika achü miishe tiijabaiqto. Kiimaq jamlai wa achü miishe jaki tlaq kiimaq ariim she riikitaq, kriika jaqlo lishe amo mirki.