Hebrews 7 - ASII LAKDAP Bible (BSI)

Ramwe Melkijedek

¹ Riita, ara chongtlaq Melkijedek ka Salem chela na hokham jati we riito. Kiimaq apaiq ka Ratsan Ramong nyang na siti Ajong Shiikeawe shomnoqti ramwe we. Abraham ka hokham weblai khat kai kito. Raüta hokham weblai nai tsangshiq sengi thun ümchuwa kra wiita khat raüta tangto. Rekhat tang raüta, rejang wa, lam na awarai riito. Kiijaq Melkijedek ka ki raüta, Abraham ka humkito. Raüta Abraham ma Shiikeawe mang na ramram kuqto.

² Kiimaq Abraham riimin Melkijedek ma, rewa tsiiq anyam, sepat lope ümchuwa Apaiq raq tsuq wantaq kriiwa, aroq khu wa manshi manshi lam raüta, Melkijedek ma honglu na kuqto. Melkijedek mang liichum kriika, “Kechu jaqshamti Hokham we,” nguta ngo. Kiimahali apaiq ka Salem chela hokham we. Kra liichum ka “Khusang Hokham we,” nguta ngo.

³ Asii bomtsi na, Melkijedek ma anyung nai awe ka juwa, lo atitiim ka juwa kriika waiq thü mak dea. Kiimaq apaiq rawüchhi, lo apaiq langpit tsütsa bomtsi kiimin, jam min waiqthü mak. Apaiq ka Shiikeawe Se sitlaq kra niq riri, pattup pat-sa miitu ramwe ma jaraüta sitlo.

⁴ Riita, ara chongtiikai arwiili she, ümchaü namshiq raq, Melkijedek ka pinthum ajong aluwe dea riito nguta, sap chang sitlo. Nati Abraham mangjong ka ratsa hiqtsa ikha riito. Nati Abraham riishe Melkijedek ma, rewa tsiiq, sepat lope ümchuwa tsiiq wantaq, kriiwa phanrap wa tiikham raüta, manroqshi khu wa manshi manshi ka, Melkijedek ma honglu na kuqto nguta chongtlo.

⁵ Kiimaq Shiikeawe raq, Mosheq lümaq akuq thü thungtri aming miika, Lewi saüse phan raq ramwe jaqsham tlo. Raüta, tsangshiq ramwebi raq, Israilnok raq tsangshiq raq ümchuwa lap tlaq kiiwa, manroqshi khu wa manshi manshi ka, Shiikeawe ma honglu na kuq tlo. Kra honglu ka ramwebi raq jaütlo. Riita, kriika tsangshiq maiqmii nok jaq wiili jaü tlo. Riita, tsangshiq Israilnok kriika Abraham lai ala wa apu wan siisaq riishatmaq jaü tlo.

⁶ Lewi ka Melkijedek ma ati ka riimak. Shatmaq apaiq raq Abraham jaq wa aroq khu wa honglu akuq wa kra taoto. Raüta Abraham ma achu shiimanke, ramram kuqto. Abraham ka Shiikeawe raq sinkham kongphiq thun khakuqtaq kra lap wanti we.

⁷ Riita, nashiq wiitarü raq asap i, jurwa ramram kuqtlaq kriiwe kriika, jumiiwa ramkuqtaq kriiwe thaq na ajong.

⁸ Riita, aroq khu wa manshi alu na akuq phaqseati thun, Lewi saüse phan ramwebi ka, rilung sung jai atsai riiwan tlo. Shatmaq Asii bomtsi na chongtlo, aroq khu wa alu jaüti we, Melkijedek ka ümchaü min atrali sitlo nguta chongtlo.

⁹ Kiimahali, ümtiikiiwa Abraham raq, aroq khu wa manshi honglu kra Melkijedek ma kuqtaq, kra akhing na Lewi (Jai na pat niishe aroq khu wa manshi honglu hiti weraü) riimin Abraham pum lümaq, Melkijedek ma aroq khu wa manshi honglu ka ake wan dam wishe ma jatlo.

¹⁰ Kra akhing na, Lewi raq rawü riiwe kla michhi shaq li. Li jiimin, Abraham raq Melkijedek rai riihumtaq akhing na, Lewi ka ati Abraham puk na asi.

¹¹ Riita, Israilnok ma Thungtri kuqtaq kriika, Lewi weraü raq ramwe jaqshamtaq kriithaq na seng raüta kuqto. Kiimahali, Lewi weraü raq ramwe jaqshamtaq kra kunli, minhap dea, jamlai phan niimin kojo ahü, kunkun nyi wanli siisaq ngu raü jiika, arthaq na pong linlin ramwe weshi hali, Melkijedek ramwe we jijai na, ramwe weshi hali pokai nong ka raa rai mak li she mirwa.

¹² Riita, ümtiikiiwa ramwe we kriishe klai baiq tlaq, ramwe jaqsham thungtri kriimin alai baiq chang she jaki tlo.

¹³ Riita, ara chongtiikai arai mren, nashiq Tatiwe manphan ka, Asii bomtsi na chongtlo chhi tiikai. Apaiq ka pong weraü wa. Apaiq weraü wiika jurmin ramwe jaq ka sham wan mak dea.

¹⁴ Riita, apaiq ka Juda weraü phan ta na rawü chhikito nguta, wiitarü raq ra tsa ikha asap siisaq. Shatmiitiq, Mosheq raq ramwebi jaqsham chong tlaq kiijiika, Juda weraü wa ramwe jaq misham dam ngutiika chong mak dea riito.

Ramwe Weshi Hali Melkijedek Ikha

¹⁵ Riita, ümchaü sanha, ngi raq namshiq ma jamlai wa chong tiikang arka, alam rashra she. Lewi weraü raq ramwe jaqsham wantaq kra lü miika, maiqse ka Shiikeawe wokhong na shunshea wan lot mak dea riito. Kriikha miishe tiina, Shiikeawe raq Melkijedek kiikha, ramwe weshi hali she shong nongto.

¹⁶ Apaiq ramwe ma shongtaq kriika, Thungtri raq chongtlaq kriithaq na seng raüta, apaiq ka arta arwiidea shong chang raa tlo nguta, ramwe ma ashong ka riimak. Shatmaq, apaiq ka thenki mak phan rilung ningkun maq ashong.

¹⁷ Ara jamkhano chong tiikai ngukla, Asii bomtsi na, “Ümniika Melkijedek kiikha, pattup pat-sa ramwe miishe mija haü,” nguta chong tlo.

¹⁸ Riita, ara chong tlaq arai mren, thungtri raütu achü kra lam raüta athü she riibaiqto. Jamkhano ngukla, thungtri raü chü kriika ningkun ahü, jamlai phan jaqsham kaiwa min lot mak she.

¹⁹ Ara jamkhano shiithu baiqta ngukla, Mosheq raq akuq thü thungtri riika, maiqse rilung ka minhap ma tiija lot mak. Kiimaq ümchaü sanha, nashiq ma aran phan chang lam ka, samhea linlin she tankuqto. Ara lam tankuqtaq armaq, wawan laita nashiq ka Shiikeawe wokhong na misaü lot rong i.

²⁰ Riita, ara chongtiikai nashiq ma aran phan chang lam, samhea linlin she tankuq taq arthaq na hali, Shiikeawe raq apaiq sinkham maq tiipha khakuq nongto. Maiq ahintibi ramwe ma shongtaq akhing na, Shiikeawe raq apaiq sinkham ka khamkuq mak dea riito.

²¹ Shatmaq, ümtiikiiwa Shiikeawe sinkham lümaq, Jesuq ka ramwe miishe shongtaq, kra akhing na, Shiikeawe raq Jesuq ma akha nguta sinkham bom chongto: “Tati Shiikeawe raq sinkham raüta, ümniima kiqkham kuq tlo, ara kiqkham arka paiho mak she: ‘Ümniika pattup pat-sa miitu, ramwe miishe mija haü.’ ”

²² Riita, ara Shiikeawe raq Jesuq ka ramwe ma shongtaq akhing na, sinkham raüta shongto. Arningkhan, Jesuq ka ahea lin tongshong khamchong miishe jawanto. Jesuq ka tongshong nye thaq na, rukwe kiimwe miishe jawanto. Kriikha maq, tongshong nye na jamlai bomtsi wa khamtaq, kriika poiki mak phan she. Arka kongkhu pat na, Mosheq lümaq shongtaq, tongshong chü kra nam ma ahea lin she.

²³ Kiimahali, ara tongshong chü nai tongshong nye liipan niika, bomrai wan chang asi hali. Tongshong chü pat na, ramwe jaqshamti ka, ramwebi ka apawiq raq shamto. Weshi pat ka thum jai na, ramwe anye weshi raq song wan wan raüta shamto. Weshi riili pattup pat-sa, Shiikeawe shomnoq ramwe jaqsham ka, sham lot mak dea riito.

²⁴ Shatmaq, Jesuq ka pattup pat-sa atrali she sitlo. Krai mren, apaiq ramwe jaqsham kiimin, maiq ahinti ma laike nong chang min ahü she.

²⁵ Kiimaq, apaiq ka pattup pat-sa atrali she sitiwe. Kriikha maq, ümchaü sanha, maiqse angu ümchuwa Shiikeawe wokhong na, Jesuq mang chong raüta wawan tlaq ti thun kra, apaiq raq tiichhii kuq wan ruq lishe miraq. Ara jamkhano ngutiikai ngukla, apaiq ka ümchaü Shiikeawe man na, maiqse miitu kiimwe miishe jawanto.

²⁶ Riita, arningkhan, Jesuq ka nashiq miitu, Ramwe Ajong Pinthum we miishe thüto. Kiimaq, nashiq ma jamlai phan wa raa tlaq kra, apaiq raq wiita liikuq tlo. Apaiq ka Shiikeawe tiichochiti we. Apaiq khum na ashut aphit nguta jam min ahü, siirairai. Kiimaq, akhum na jamlai ngarai min ahü. Shiikeawe raq apaiq ka ngarai maiqse phong mong wa, pong na raithü wanto. Raüta ratsan ramong nyang na, tsaühea niishe tiinga wanto.

²⁷ Apaiq ka nanok ahinti ramwebi sitlaq kiikha ka riimak. Apaiq riika nanok ramwebi ahinti raq ikha, wranaiqshe, apha na maiqmii ngarai tiisii miitu kongkhu, Shiikeawe ma honglu takuq raütiq, nokwe ngarai tiisii miitu she, honglu takuq tlaq ikha, honglu take wan ngo min raa mak. Apaiq raq akhum ka Shiikeawe ma honglu na lakshi takuqto, kriili she. Kra takuqtaq kriika, pattup pat-sa miitu she takuqto.

²⁸ Mosheq lümaq akuq Thungtri riika, maiqse ka minhap kechu maiqse miika tiija lot mak. Riita, ningkun ka ajom li jiimin, tsangshiq raq ramwe jong bi ma maiqse ka shong chang thung she raa kito. Shatmiitiq, Thungtri ka kewan jai miishe, Shiikeawe raq sinkham maq ramram raüta, tongshong wantaq, kra thungtri riika, Ase, phanrap na minhap maq jaqsham keti we kriishe, pattup pat-sa ramwe jongwe miishe shongto.