Hebrews 6 - ASII LAKDAP Bible (BSI)

¹ Lo ta, ikhiijiika, nashiq ka sinkhu na wawan ruq li warong i. Laita maiqla raq phaqsea chang, atsaü bomtsi kriishe phaqsi laita si rong i. Man niiwa, nashiq Phung na shang pha wa, atiicham pha chang, Phungmaiqse rilung tsütsa tai kai kriika, ümchaü bliiq chongki nong mang she. Namshiq riimin kra apha wan chang hiqkhu phishi kiijiili ka naq nga rai rongkiq she. Ra na dü wan chang. Ümchaü nashiq riika apha wan tsantsii klai wan laita, thiihü rilung jaqsham ka miimthü kai she. Laita Shiikeawe wokhong na nyap wan kai she.

² Khamlam wan kai kra liichum kiimaq jaq ka maiq dü na sham raüta, achu jaüke liichum, bomtsi kra chongke wan kiimaq maiq ka amaa wa dong wan nai wamungtan na khiim wan liichum chongke kiijiili, nga ruq ka ngarai mai she.

³ Nashiq ka arthun ara lea wan kai she. Ümchaü sanha, wenyi na maiqla she jawan rong phiina! Shiikeawe raq lam dikuq raü jiika, nashiq ka sinkhu na wawan ruq mijong luwan rong i!

⁴ Juwa Shiikeawe wokhong wiishe kinphai na dongho nong tlaq, kriiti ka thongshi tiijang sheaki lot mai she. Tsangshiq tsantsii ka klai wan lot mak she. Tsangshiq ka Shiikeawe rawii li na si raüta, asum atei wishe. Tsangshiq raq sanseng ramungtan wa Shiikeawe raq akuq, kongphiq sum kra asap wishe. Kiimaq nanok rai adam maq, Asii Wenyi ka lapto.

⁵ Tsangshiq raq, maiqmii tsan mong na, Shiikeawe bomtsi ka asum dea nguta atei wishe. Kiimaq tsangshiq raq, Shiikeawe ningkun wokhong na si peo rilung sum kriika, atei wishe.

⁶ Kiitinkhan ningkun rilung sum kra tei jai shetiq sha, tsangshiq raq Shiikeawe ma kamwan lam kra miimbaiq thü tla! Akhiiti raq, tsangshiq mra ka thongshi hali ka tiidii wan lot mak she miraq. Jamkhano ngukla, tsangshiq raq Shiikeawe Se ka pumsongkham na thongshi ri hali, tübaiq nongtlo. Raüta tsangshiq ngarai lümaq, Jesuq ma nokwe man na jea tiingaü nong tlo.

⁷ Shiikeawe raq ra tiijun raüta, hiqngam ka awin wiq ma tiija tlo. Raüta petsi wiqtsam ahea wiq tiidong man tlo. Krai mren, petsi ka maiqse ma aphaq asea chang chamtraq tiidong man kuq tlo.

⁸ Shatmaq, hiq phu ba kriika, shukrü nai sangphii riili long wan lili raü jiika, kra ba hiq phu ka jam riichang min riimak she. Kra she ngu raü ka, Shiikeawe manson hophaq chang li she miraq. Raüta kra ba ka, wa maq chaq baiq changli she miraq.

⁹ Riita, lungwii phunainotiim lei, ngi raq namshiq ma akha bomtsi atsin wiq maq waiq wan ha jiimin, ngi ka namshiq miitu tsankhun maq sitiikang. Ngi raq asapha, namshiq ka ümchaü lam niishe, tiichhii wan lamphan phan wa tlan.

¹⁰ Shiikeawe raq maiqse ka tiishaü tiiji raüta kappe maq shin mak. Namshiq raq Shiikeawe jaqsham tlan kriika laqbaiq mak. Namshiq raq Shiikeawe mang na, Phungmaiqse ma khrum kuq lan. Kiimaq namshiq raq, ümchaü min shiikum pan kuq ruq riitlan kriika, Shiikeawe raq laqbaiq mak.

¹¹ Ngi raq, i tsan mong na atsi maq shiwea siq tiikang, namshiq tarü loweatek raq maiqmii tsantsii ka, atsi dada maq jamlai miitu wa ran tiikai, kra lap li chang, lamphan kra tiinyi wanli shiikut raüdea ahea miraq nguta, riichopi siq tiikang. Krai mren, namshiq raq jamlai lap wan miitu wa, tsankhun maq kherat tlan kra, lap wan tlii miitu shiikut chaq ruq si ronglaq.

¹² Ngi raq namshiq ka, roknin riishin ma tiija ka romang. Shatmaq ngi raq namshiq ka, Jesuq ma kamti maiqsetiim dea nguta, kamasham lamphan na, jaqkhon tiipha tiipha maq siti ma jawan kra lungwii tiikang. Raüta, Shiikeawe raq mikuqha nguta, kiqkham raüpot khakuqtaq kongphiq kra lap wantiiti bi, kiikha namshiq min si ronglaq nguta tiitai tiikang.

Shiikeawe Kiqkham Ka Poimak Phan

¹³ Shiikeawe raq ümra akhing niiwa, Abraham ma phanshi ra mikuq kang nguta kongphiq khakuqtaq, kra akhing na, Shiikeawe raq sinkham raüta kiqkham kuqto. Shiikeawe apaiq thaq niiri ajong ala nguta jumin ahü she kha maq, Shiikeawe raq, apaiq maiqmii mang kra chong raütli, Abraham ma sin kham kuqto.

¹⁴ Shiikeawe raq Abraham ma, “Ngi raq ümniima kiqkham kuq tiikang, ngi raq ümniima achu shiiman jonghea mikuq kang kiimaq ümlai ümla ka pahea, hiq ham ra ham she mitiipu kuq kang,” nguta kongphiq khakuqto.

¹⁵ Krai mren, Abraham raq, pinthum maklii khamthii maq, Shiikeawe bom ma kam raüta, kongphiq kra lap miitu khewanto. Raüta, Shiikeawe raq akhamkuq kongphiq kra, apaiq raq lapto.

¹⁶ Maiqse nai maiqse liipan na bomtsi rengkiq riikham tlaq akhing na, maiqmii ma ajong ala juwa sitlaq, kriiti mang chong raüta, kiq ka riikham tlo. Krai mren, bomkham keti we raq ra tam raüta, sinkham kuq tlo. Raüla, bom ka kiijiishe tiithum tlo. Riikhii kimak she tiisup tlo. Khamkuqtaq kriika, mikuq dongdii ngushat she.

¹⁷ Shiikeawe riika jumo, apaiq raq phanshi ra mikuq ha nguta bomkham tlaq, kriika poimak phan she, nguta chongke rii na, kriiti tsantsii tiisangke miitu, apaiq kiqkham kongphiq thop ka, apaiq raq sinkham bomtsi maq hali tiipat raüta tiipha khakuqto.

¹⁸ Riita, arjaq chongtlaq, bomtsi ka anai. Shiikeawe raq mikuq ha nguta kiqkhamtaq kra nai apaiq raq sinkhamtaq bomtsi anai kra riito. Shiikeawe bomkham ngutlaq kriika, ümtiikiimin poiki mak phan. Krai mren, nashiq apaiq wokhong tiiwong na sitiikaitibi miika, tsailam jilam she sitiikai. Kiimaq nashiq raq alap chang sitlaq kriika, milap rong i dongdii nguta, ran tiikai. Laita kamto maq khe tiikai.

¹⁹ Nashiq rilung lai shiikhing wa chang, jinkhaiq kong bu ikha sitlaq kriika ara. Ara jinkhaiq kong bu arjaq riiwiiqtibi ka, ahai song chang jam min ahü. Kriiti ka jamlai rahai riimin chhi mak. Nashiq tsan ran chang jinkong bu ka Jesuq. Apaiq ka ramungtan na sitlaq shomjam mong kiijaq, asii thaq niimin asii pinthum siqlaitap sitlaq kra mong niishe wawanto.

²⁰ Jesuq ka nashiq miitu, nashiq ma sinkhu na, kiijaq awa wan kun she. Raüta apaiq ka kra khok na nga raüta, pattup pat-sa miitu, ramwe ajong we miishe jawanto. Apaiq ka ramwe Melkijedek jaqsong miishe nga wato.