Hebrews 5 - ASII LAKDAP Bible (BSI)

¹ Shiikeawe ma nokwe ngarai miitu honglu take nai alu atan kewanti ramwe ajongwe ka tsangshiq ramwe weraü phan wa shongtlo.

² Riita, ramwe ajong we apaiq kiimin la, phanrap lam phan na ningkun ajom sitlaq kha maq, nanok ahinti raq ashut aphit klo wan kra chhi raüla, apaiq mangchan tsantsii ka asi thü tlo.

³ Kriikha maq apaiq riika nokwe ngarai miitu lamlamli ka riimak, shatmaq apaiq maqmii ngarai miitu min, honglu kuq tlo.

⁴ Ju riimin ramwe ajong jaqsham ka maiqmii raq rit mak phan. Shiikeawe raq Aron ka jamkho shongtaq kiikhiisiitiq shong chang.

⁵ Krai mren sii hali Jesuq riimin ramwe jaqsham ka apaiq tsiitsii maq sham wan mak dea. Shiikeawe riitiq, apaiq ka ramwe ajong we ma shongto. Shiikeawe raq apaiq ma akha nguto “Ümniika I Se, Ümchaü ranaiq miishe ngi ka üm We,”

⁶ Shiikeawe raq Asii lakdap bashi na hali, “Melkijedek ka ramwe ma shong kang kiikha, ümniika pattup miitu ramwe ma shong tiikang,” nguta chong tlo.

⁷ Jesuq ka mangjong hiq na siji na, achu jaü maq siwanto. Apaiq tsan mong na tiima tsantsii atsin maq, apaiq ka atsai chang wa tiichhii lotti, Shiikeawe jaq wa achu jaüto. Kiimaq makphai trok raüta, ajong maq hong raüta, Shiikeawe ma tiitaito. Apaiq ka Shiikeawe wokhong na phaqchii nichii maq siti kha maq, Shiikeawe raq apaiq achu jaü bomtsi thun kra tre kuqto.

⁸ Apaiq ka Shiikeawe Se, li jiimin, chamchao walü mong maq lea wan raüta Shiikeawe aming thun ka phaqchii nichii maq taito.

⁹ Apaiq raq ajaqsham wan chang ümchuwa sitlaq kra, kunkun tiinyi sham wan kha maq, apaiq ka minhap maiqse ashi miishe jawanto. Krai mren apaiq ma kamwantibi ma apaiq ka tiichhiiwan tsitsü raüchong miishe jawanto.

¹⁰ Kiimaq Shiikeawe raq, apaiq ka ramwe ajong Melkijedek jaqsongti we liijo nguta, tri ka phoq kuqto.

Khristo Ma Kamwan Ka Naq Thaq Rongkiq

¹¹ Naishiq raq namshiq ma Melkijedek raq ramwe jaqsham wantaq kiikha, Khristo riimin ramwe jaqsham tlo kra, bomtsi thaq na atsaü dea chong kewa chang asi shaqli. Shatmaq namshiq ma phanchanke miika ahawiq. Namshiq raq maiq bom chong kra samhea tiitsang tai tsüman sitlan.

¹² Ümchaü sanha, namshiq ka maiqla she, nanok ahinti ma Shiikeawe lamphan bomtsi chongketi, ashrinketi miishe jawan han chang wa. Jamkhano ngukla, namshiq ka Phung na shang wan li maq, rawii luhea she lea wan lan. Shatmiitiq, namshiq ka ümchaü min, nosere li riishatshat sitlan. Nanok raq namshiq ma, kamasham lamphan tiichap wan chang, tsütsa bomtsi se kriili chongke chang ma jatlan. Namshiq raq ümchaü sanha, kamasham bomtsi ka chungkaq dung kriishe sea han chang wa. Shatmaq, namshiqtiq ümchaü min, nyakpü kli nyang ruq nyang tlan. Namshiq ka ümchaü min, noshiisetiim ikhli sitlan.

¹³ Ümchaü niitaq juwa nyakpü li nyangtlaq, kriiti ka noshiise li riishatshat. Apaiq ka atsii min miku shaqli. Apaiq riika ajiq alam jam min sap mak shaq li.

¹⁴ Dung chungkaq seati kriika maiqla she ngushat. Kriika maiqmii rilung na, Shiikeawe bomtsi kra lang raüta, Shiikeawe maklii na, jamlai wa ajiq nai alam kra tseatsiiq wan angam she. Kiimaq atsin she ngushat.