Hebrews 4 - ASII LAKDAP Bible (BSI)

¹ Riita ija, ümchaü min la, Shiikeawe raq nashiq ma nütiitsak raüta sichang hiqshong kra mikuq kang nguta kiq khamkuqto. Ara khamkuqtaq nütiitsak raüta sichang mungtan kriika, nashiq miitu. Riita nonai notsam lei, Shiikeawe raq namshiq phong wa maiq ka weshi min, ara chong tlaq niitiitsak chang mungtan na saü lot man miili, ajiq we nguta lamkam pii miili tiidea baiq mak chang miitu, hon atsii tiitsang tiitsang maq si rong laq.

² Jamkhano akha tsii chongkuq tiikai ngukla, Tsütsa Ahea ka tsangshiq raq jamkho taitaq kiikhiisii hali, nashiq riimin tai kai she. Tsangshiq raq Tsütsa Ahea ka taito. Kriika tengto. Shatmaq tsangshiq ma amet dong chang jam min ahü riito. Jamkhano ngukla, tsangshiq raq kra taitaq tsütsa kiima, Shiikeawe raq tsangshiq ma nü mitiitsak kuqha nguta kiq kham kuqtaq kriika, tengteng dea mikuq nguta, kam mak dea riito.

³ Riita nashiq ümchuro kam tiikaiti thun riika, Shiikeawe raq kiqkham kuq taq nii atsak rilung kra lap wan kai she. Riita arka Shiikeawe apaiq nü maq, jamkho chongkuq taq, kra phanphan she kuwanto. Apaiq raq nguto, “Ngi ka tsangshiq ma tsankhiq riikang. Kriikha maq, ‘Tsangshiq Ka niitiitsak chang hiqshong ashi tiije kuq tiikang kiijaq ümtiikiimin siwa lumaq she miraq!’” nguta tumkham kongphiq khakuq kang. Apaiq raq ara nii atsak rilung siwan chongtlaq arka, apaiq raq ra nai hiq tiiq wan jaqsham ka alot wishe shatmaq chong tlo.

⁴ Jamkhano akha chongtiikai ngukla, Asii lakdap jaqshi na, ramiishi ranaiq miitu bomtsi ka akha chongje asi, “Ramiishi ranaiq ngoja na, Shiikeawe raq apaiq joli minshiiq jaqsham wiita kra thaq raüta, niitiitsak ahai riito,” nguta chongtlo.

⁵ Riita ara niitiitsak rilung chong tlaq bomkhu tsishi kra siili, “Tsangshiq ka niitiitsak chang hiqshong ashi tiije kuq tiikang kiijaq ümtiikiimin siwan lumak miraq” nguta chongtlo.

⁶ Tsütsa Ahea kra kongkhu na tai wantibi raq, ara niitiitsak rilung ka lap mak dea tiikhea baiqto. Arka tsangshiq raq Shiikeawe ma kam mak dea kha maq tiikhea baiqto. Shatmaq, Shiikeawe raq maiq ahinti miika ara niitiitsak rilung ara kuq tlo chhi tiikai.

⁷ Arka Shiikeawe raq maiq jai na wati miitu, “Ümchaü ranaiq,” nguta rahiq akhing ka thüshat asi li nguta chongtlo kiiwa sap tiikai. Rawii pahea lea wan jai na, Shiikeawe raq Dawit lümaq asii bomtsi arjaq chong wan kai kiijaq chhi tiikai. Arjaq akha chong tlo: “Namshiq raq Shiikeawe bom ka ümchaü ranaiq tai han jiila, angiim ka naqngiim rongkiq.”

⁸ Riita, ija, Joshua raq mungmaiqse ma, Shiikeawe raq kiq akhamkuq niitiitsak rilung ka kuq wanto she nguraü jiika, Shiikeawe raq jai na ranaiq shi asi dea ngutiika ka chongnong mak she mirwa.

⁹ Shatmaq, Shiikeawe raq ra nai hiq tiiq wan lot jai, ramiishi ngoja ranaiq na niitiitsak haitaq kiikha, Shiikeawe sengi ma niitiitsak rilung ka milap wan shaq li nguta chongtlo.

¹⁰ Ara jamkhano chongtiikai ngukla jurwa ara Shiikeawe raq kiq akham kuq niitiitsak rilung arshe lapwan tlaq, kriiti riika apaiq maiqmii jaq sham wa niitiitsak raütiishe misiwan.

¹¹ Riita, ara chongtiikai arai mren, lo ümchaü min, nashiq wiitarü kunli raq, kra chongtlaq nii atsak rilung kra lap wan miitu tsapsaü kapse maq, kamasham lamphan na shiikut chaq wan ruq miili si rong i na. Kiikha si hai jiika, natitiim pat na tsangshiq kamtsantsii ajom kha maq, lamkampii miili chhan wantaq kiikha, nashiq ka chhan wan mai miraq.

¹² Shiikeawe bomtsi ka atra. Kiimaq jamlai phan na seng raütiiwa bomtaq, kra sham wan ruq phan. Aniq min sihea, khubinlo panthit. Bomtsi raq maiqse tsaiji kiimaq wenyi wiita riip wan tlo. Kiimaq maiqse khum na arok ariitsai sitlaq thun kra wiita kunli han wan tlo. Kiimaq maiqse tsan mong na, tiima tsantsii jamlai wa rüm tlaq kra thun wiita, kunli chechiiptlo.

¹³ Maiqse raq, Shiikeawe maklii wa apaü chang ka jam min ahü. Ramungtan na nai mangjong hiq na ümtinkhan wa diim tlaq thun kra, Shiikeawe raq achhi kiimaq asap siisaq. Nashiq tarü raq narilung ara miitu wiita apaiq ma heshap kewan chang miraq.

Jesuq Ka Ramwe Ajong Pinthum

¹⁴ Ikhiijiika, nashiq raq jamlai mo kamwankai kra, kamtsantsii raü kha kriika, phataq khonshat maq si rong i. Ramwe Ajong Pinthum we, Shiikeawe Se, Jesuq ka nashiq miitu Shiikeawe ngachang tiinap niishe nga wato.

¹⁵ Nashiq ma Ramwe Ajong Pinthum we riika, nashiq tiinan shan tiikai kamasham ningkun ajom si tiikai thun kriika, kunkun asap siisaq. Nashiq ma Ramwe Ajong Pinthum we ka nashiq raq maitai chamchao ümtinkhan wa riihum tiikai kriika, apaiq raq kunli asap siisaq. Apaiq ka nashiq jamkho tairai tlaq, kiikha Thawe raq tairaito. Shatmiitiina, apaiq raq jamkiq min shut mak riito.

¹⁶ Riita ümchaü sanha, nashiq ka tsan asang miishe, Shiikeawe wokhong na tiisot laita, nyap wan rong i. Apaiq raq nashiq ka, apaiq kaphap khoqramkii maq keishat rüm tlo. Kiijaq nashiq ka, tiihang mangchan kiimaq kaphap mangchan tiiwong niishe misi rong i. Nashiq ma raa tlaq phan ka Shiikeawe raq mikhrum kuq.