Hebrews 3 - ASII LAKDAP Bible (BSI)

Jesuq Ka Mosheq Thaq Na Ajong

¹ Shiikeawe raq ngi rai ahea wan damti, asii lungwii Phungmaiqse phunainotiim lei! Nashiq raq Shiikeawe ma kam tiikai lamphan na, nashiq shunshea wanti we, Jesuq ka Shiikeawe raq Ramwe Ajong Pinthum ma shong raüta tiikito. Apaiq raq nashiq ma Ramwe Ajong jaqsham kuq tlaq kra atsi dada maq tiima laita si rong i.

² Mosheq raq Shiikeawe jamkun na, jaqsham ka tsapsaü kapse maq shamkuqto. Kiikhiisii hali, Jesuq riimin, apaiq ma Shiikeawe raq Ramwe jaqsham kuqtaq kra, pinthum tsapkap raüta shamkuqto.

³ Maiq weshi raq jam ashi mihai ngu i na. Raüla, nanok raq apaiq raq jam haitaq kra tsom wa kra lii raüta, jam haitiwe ka kai mishreng siq. Arkha maq, maiqse raq Mosheq ma ümtinkhan wa anato shreng wantaq, kra thaq na kao raüta, Jesuq miika apa, ajong shreng wan chang she raa tlo.

⁴ Maiqse si chang jam sitlaq kriika, ahai ahunti atati ka asi siisaq. Krai mren, Shiikeawe ka phanrap sitlaq kra phansangti we.

⁵ Mosheq ka Shiikeawe jamkun na tsapkapkap setsang setsii jaqshise ashi siwanto. Krai mren, Shiikeawe raq apaiq ma rawiichii miitu, jamlai bomtsi wa chongkuqtlaq kra phanphan tsapkapkap maq Israilnok ma chongkuqto.

⁶ Shatmaq, Khristo ka Shiikeawe ma Ase. Krai mren, apaiq ka Shiikeawe sengi thun kra tsapkapkap maq rümti we. Nashiq raq Shiikeawe ma kamtsantsii rüm tiikai ara thaq mai phan maq, tsan tiijong laita, pharangrang maq sihai jiila, nashiq thun armin, Shiikeawe sengi nguta misi rong i.

Shiikeawe Sengi Ma Nü Tiitsak Chang Hiqshong Asi

⁷ Riita ara chongtiikai arai mren, namshiq ma Asii Wenyi raq akha ngutlo, “Namshiq raq Shiikeawe bom ka ümchaü ranaiq taihan jiila,

⁸ namtitiim pat na ikha, nilan ma naqja rongkiq. Tsangshiq raq Shiikeawe bom ka taimak tleato. Tsangshiq raq bintang jüngi kumtsaiphii binjü maq, Shiikeawe ka niqsiqto. Ikiikha namshiq riimin Shiikeawe ka naq niqsiq rongkiq.”

⁹ “Ngi raq tsangshiq ka wiiroq blai shiikumpan lata, shunshea wan kang, Kra chhi shatshat taü miimin, tsangshiq raq ngi ka niqsiqto, nguta Shiikeawe tiibot tlo.

¹⁰ Kriikha maq, ngi ka tsangshiq ma i tsan khiqhea riito. ‘Tsangshiq arka, wranaiqshe i kiq khii li I bom tai mak.’

¹¹ Ngi ka tsangshiq ma tsankhiq hea riikang. Kriikha maq, ‘Tsangshiq ka niitiitsak chang hiqshong ashi tiije kuq tiikang kiijaq ümtiikiimin siwan lumakshe miraq!’ ” nguta tumkham kongphiq khakuq kang.

¹² Lungwii Phungmaiqse phunainotiim lei, namshiq phong wa jurmin tiima tsantsii ka abi naq thü rongkiq. Tsantsii abi thüti nai angiim boqshat maq siti ka, atra Shiikeawe wokhong wa adong mirho. Shiikeawe wokhong wa dongho man chang miitu, honkam shat maq si rong laq.

¹³ Namtsantsii ka ngarai raq shonron ho raüta, wanshakshak nilan ma jaki mak chang miitu, namshiq maiqmii liipan na, weshi raq weshi tsaiji dokuq lanta si rong laq. Asii bomtsi na, “Namshiq raq Shiikeawe bom ka ümchaü ranaiq taihan jiila” nguta chongtlaq kriika, nashiq ara ngo nang ngutlo.

¹⁴ Ara chongtiikai akha, Shiikeawe ma apha na jamkho kamwan kai, kra tiimeshi mai phan maq atiisup na saüli kam hai jiila, nashiq armin Jesuq rai reraüshi maq, Shiikeawe jaqshamtibi ma mija rong i.

¹⁵ Asii bomtsi na akha chongtlo, “Namshiq raq Shiikeawe bom ka ümchaü ranaiq taihan jiila, namtitiim pat na ikha, nilan ma naqja rongkiq. Tsangshiq raq Shiikeawe bom ka tai mak tleato. Tsangshiq raq Shiikeawe kiqkhii wapat wa trang ikha, sruto.”

¹⁶ Riita ara chongtiikai, Shiikeawe bomchong kra taishatshat taü maq, taimak dea ikha, alam alat ngiim wanti thun ka juwiita? Tsangshiq ka Ejip mung wa Mosheq raq shea wan raüta adam na alaü wan damti siisaq kli ngok ngi raiwito.

¹⁷ Riita ija, Shiikeawe ka rawii roqblai ka jumo khiqriq rai ta? Ngarai tangti thun ma khiqriqto. Apaiq tsankhiq walü kra bintang jüngi kumtsaiphii binjü maq, apaiq kiq khü srutibi khuthaq na nyaito. Kriikha maq, tsangshiq ka kumtsaiphii binjü na jiim rai wanto.

¹⁸ Riita, Shiikeawe raq atsan khiqtsi ma, “Tsangshiq arka ngi raq tsangshiq miitu mungtan ashi tiije tiikang kiijaq nütiitsak siwa lumak miraq,” nguta tiibottaq kriika, ümriiti miitu wa tiibotta? Kriika apaiq kiq khü srutibi miitu chong tlo.

¹⁹ Riita, ümchaü arjaq chong tlaq arwiishe, nashiq raq chhi tiikai. Tsangshiq ka Shiikeawe raq, tsangshiq ma akuq Kanan hiqshong mungtan na saülu mak miili, lamkampii maq jiim rai wanto. Tsangshiq ma akuq maiqmii mungtan na saü mak dea jiim raitaq kriika, tsangshiq raq Shiikeawe bomchong kra taishatshat taü maq, lang mak ngiimtaq kriikha na tsaito nguta chong tlo.