Hebrews 2 - ASII LAKDAP Bible (BSI)

Tiichhii Wan Jonghea

¹ Ara chongtiikai arkha maq, nashiq raq tai kai tengman tlaq bomtsi ka, tsan na tiitsang shat maq rüm laita lang rong i. Akha si riihai jiika, nashiq rilung na jamlai phan rathaiq rahai saü raü min, nashiq ka tiimeshi lot mak miraq.

² Natitiim nawi pat na rasetiim lümaq, Shiikeawe raq jamlai tsütsa wa chongkuqtaq, kriika khaqkhaq, bomtsi poshi min poimak maq kuwanto. Kiimaq jurwa Shiikeawe kiq tleataq, kra shut wantibi thun ka tarü, Shiikeawe raq tsangshiq maiqmii raq shuttaq kra phanphan, kha alaiq achü kra shin raüta, tsangshiq ma mo tiihoto.

³ Riita, rasetiim lümaq atiichongkuq tsütsa bomtsi kra shishe wantibi thun wiita raq, Shiikeawe sintsang ka hophaqtaq jiika, ümchaü Shiikeawe raq nashiq ma tiichhii wan jonghea kilü dikuq wantaq, kra tsütsa ahea kra nashiq raq tai mai shishe hai jiika, Shiikeawe mo howan mai maq milun lot rong i sha? Kriiwa nashiq ka hangki lot mai miraq. Ara tiichhii wan tsütsa jonghea arka, Tatiwe apaiq raq akiq maq atiidea bomtsi. Kiimaq ara tsütsa tai wantibi tarü raq, arka poimak phan tengteng bomtsi dea nguta, nashiq ma hakhi kuqtlo.

⁴ Tsangshiq raq kuqtlaq hakhi thaq kiijaq hali, Shiikeawe raq kao raüta awang chang nai phiiptsi chang jaqsham ka pahea sham wan ruq miili, nashiq ma khangriri hea maq tiichhikuq nongtlo. Ara chongtiikai, Asii Wenyi kongphiq ningkun thun arka, Asii Wenyi raq maiqse loweatek ma jamkhii kewan wa lungwii tlaq, kra phanphan kuq tlo.

Nashiq Ma Tiichhii Wan Rilung Kewanti We

⁵ Shiikeawe raq rasetiim ma, jai na maiq pat anye saüho tlaq kra peng miitu arang ka kuq mak dea. Ara naishiq raq maiq pat anye misaüho nguta chongtiikai kra peng wan miitu rasetiim ma arang ka thaq mak dea.

⁶ Shatmaq kra rii na, Asii lakdap bashi na, akha nguta waiqto: “O Shiikeawe lei, maiqse nguta sitlaq kriika, ümniiraq broriiki li chang min asi sha? Maiqse miinu ka jam min ahü ikhli ahata? Kriika ümniiraq shümükai chang min riimak ikhli?

⁷ Ümniiraq maiqse ka jaqlose miitu, rasetiim thaq na anun lin miili thü laü, Shatmaq, krai jai maq, ümniiraq apaiq ka, tarü thaq na ajong maiqse, khushü jonghea hoti ma shong laü.

⁸ Laüta, ümniiraq apaiq ka, ra nai hiq wiita kunkun peng wanti we miishe shong laü.” Ara chongtlaq Asii lakdap jaq niika, “Shiikeawe raq maiqse ka mangjong hiq na sitlaq phanrap kra rümti we miishe shongto” nguta chongtlo chhi tiikai. Shatmiitiq nashiq raq mak maq rashra kaü chhi tiikai, maiqse raq phanrap ka ümchaü niitaq awokhong na tiishang lot mak shaqli.

⁹ Shatmiitiina, nashiq raq, Jesuq ka alose miitu, rasetiim nam miimin anun ma tiijato chhikai. Kra anun ma tiijataq kriika, apaiq raq Shiikeawe kaphap mangchan wokhong maq, maiqse angu tarü miitu mitsai laq nguta atiiki. Raüta, apaiq raq maiqse miitu tsaitaq krai mren, Shiikeawe raq apaiq ka wiitarü thaq na ajong alu miishe shongto. Apaiq khushü ngao ka achhai anyii she kuqto chhi tiikai.

¹⁰ Riita, arka riikhaqli dea. Shiikeawe ka nashiq Tiiqtiwe. Kiimaq phanrap rümtiwe. Apaiq raq Jesuq ka, chamchao walü mong maq chen wanto. Raüta apaiq puk na nyap wantibi maiqse pahea ma, tiichhii wan lam tanketi we miishe tiijato. Arka Shiikeawe raq, Jesuq pum lümaq, maiqse angu thun tarü ma, apaiq achhai anyii khushü rilung ngao kra, triishake wan miitu tiikuri kuqto. Ara jamkhano chongtiikai ngukla, Jesuq ka tsangshiq tiichhiiketi we miishe tiijato.

¹¹ Apaiq raq maiqse ka, tsangshiq ngarai boqtham chum na arnyat rai wa, tiisii hekuq tlo. Apaiq nai apaiq raq tiisii hekuqtaq maiqse angu thun tarü miika, Awe ka ashi li. Tsangshiq tarü ka Weshi setiim siisaq she jawanto. Ara ningkhan tiina, Jesuq raq tsangshiq ka anotiim nguta hea wan ma, apaiq ka tiijeasi mak she.

¹² Apaiq raq Shiikeawe ma tsangshiq miitu bom ka akha chongtlo: “Ümniiraq jamlai jaq wa shamkuq laü kra, ngi raq, I notiim ma michong kuq ha; ngi ka tsangshiq phong na nga lata, ümniika mishom raa ha.”

¹³ Apaiq raq akhmin chongtlo, “Ngi ka Shiikeawe wokhong niili misiha.” Kiimaq apaiq raq, “Ngi ka Shiikeawe raq ngi ma akuq asetiim rai adam niishe shonga tiikang,” ngutiimin chongtlo.

¹⁴ Riita, Shiikeawe raq tsangshiq ka asetiim she nguta awura maq tiiham wanto. Tsangshiq ka mangjong maiqse tiijai han-ngam khum na siti siisaq. Kra ningkhan, Jesuq apaiq kiimin tsangshiq jamkho tiijai han-ngam khum na sitlaq, kiikhiisii hali maiqse khum na poki raüta, tsangshiq kiikha shamshi ngamshi siwan damto. Apaiq raq ara maiqse han-ngam khum na pokitaq arka, Thawe raq maiqse angu kra, atsai ningkun kharü maq kha raüta rüm tlaq kiiwa, apaiq tsaitaq kra lümaq Thawe ningkun tu kra, tiibun baiq kai miitu pokito.

¹⁵ Jesuq tsaitaq kra lümaq, maiqse angu wiita tsangshiq rilung wiilü, Thawe raq atsai kharü mong na ashaq baiq wa daakuqto. Raüta tsangshiq ka wasetiim miishe tiijato.

¹⁶ Apaiq ka rasetiim khrumkai aki riimak nguta chongtlo. Asii bomtsi na akha chongtlo, “Apaiq riika Abraham saü ase phan kra khrum kuqtlo.”

¹⁷ Riita, ara chongtlaq arai mren, apaiq ka mangjong maiqse ikha, tiijai han-ngam na shamshi ngamshi pokai chang dongdii she raa kito. Apaiq maiqse han-ngam na akha pokitaq arka, apaiq ka tsangshiq miitu, tsapsaü kapse mangchan tsantsii jonghea maq, tsangshiq thaq na Ramwe Ajong Pinthum we ma jawan miitu pokito. Raüta apaiq ramwe jaqsham lümaq, Shiikeawe tsankhiq ka tiishi wanto. Krai mren, Shiikeawe raq tsangshiq ngarai kra diikuqto.

¹⁸ Apaiq ka maiqse ma pokitaq kriikha miitiina, ümchaü maiqse angu ümchuwa, chamchao litkot maitai walü riihum tlaqti thun kra, apaiq raq khrum kuq lot tlaq kra. Jamkhano ngukla, apaiq riimin maitai chamchao walü thun kra wiita riihum wanto. Raüta kra thun haikaiq haike wiita tang wanto she.