Hebrews 13 - ASII LAKDAP Bible (BSI)

Shiikeawe Tsantsii Jamkho Mitiichochi Rong I

¹ Phungmaiqsetiim phunainobi rai, riilung riiwii maq shongnga ronglaq.

² Namshiq jam na wanwe dii tlaq kra shiililii ka naq laq rongkiq. Richü pat na, maiq wiijamti raq wanwe tao tiikai anguli, rasetiim taoratto. Tsangshiq riika, wanwe khla tao tiikai angu li, rasetiim tao wan ma jato.

³ Juwa phaqtek mong na sitlaq, kriiti miitu tsan na tiima ronglaq. Lanta khrum kuq ronglaq. Namshiq maiqmii kiimin tsangshiq rai phaqtek mong na siti ikha, riiwea ronglaq. Juwa chamchao litkot mong na sitlaq, kriiti miitu namshiq maiqmii kiimin, tsangshiq rai adam chamchao tlan ikha, tiima ronglaq.

⁴ Maiqta khan na, maiqlam poi ka wiitarü raq pinthum shreng chang. Ata awii ngutiishe sitlaq kriika, awesetiim nai atanyungtiim liipan na, pinthum riilung riiwii maq siwan raa tlo. Jurwa ashong angawi she maq, maiq ahinti rai sethoq jaki tlaq, kiimaq maiqchak maiqse rai sraki tlaq, kriiti ka, Shiikeawe raq thaq mak, kha mitiiho.

⁵ Kampho ma naq sü ramrai rongkiq. Kra rii na, namjaq na jamlai wa asi, kra sham lantli, chochikhiq maq si ronglaq. Jamkhano ngukla, Shiikeawe raq, “Ngi raq namshiq ka ümtiikii jiimin, amang ale maq tiichamchao mang. Ngi raq namshiq ka ümtiikii jiimin, tiishaü baiq mang,” nguta ngutlo.

⁶ Ningkun shoq laita akhiili ngu i na, “Ngi liiti Tatiwe ri asi, Ngi ka hai mang; Maiqse raq ngi ka jamkho miraq?”

⁷ Kiimahali, man niiwa shrabi, namshiq ma Shiikeawe tsütsa chongke wantibi ka, naq laq rongkiq. Samhea wiq tiima lanta, shin ronglaq. Tsangshiq ka atsai wan na saüli, Shiikeawe ma kamtsantsii pharang rang maq thü raüta siwanto. Krai mren, ümchaü namshiq riimin la, tsangshiq changkhü kra song lanta si rong laq.

⁸ Jesuq Khristo ka klaimak. Apaiq ka man niimin klaimak. Ümchaü min klaimak. Kiimaq rawiichii niimin klaimak.

⁹ Tsütsa Ahea na chongtlaq, tingting rilung lamphan tlan kiiwa, maiq ahinti raq, namshiq ma arot akiq bomtsi thun shrinkuq raüla, namshiq tiishon ron haü la, namshiq ka naqshon rongkiq. Shiikeawe kaphap mangchan wokhong maq, nashiq ka tsailam jilam sitiikai. Ahata nashiq ma ningkun tu. Shatmaq, aphaq asea lam na seng raüta, arphan arka phaq sea raa mak; arphan arka aphaq sea chang; arphan arka phaqsiq mai chang, apii phan nguta tlang kuq tlaq, kra bomtsi ka, nashiq ma aliip dong chang ahü. Akhnok tri lamphantibi miika jamlai achu min ahü.

¹⁰ Jehudinok shomjam na, Shiikeawe shomnoqti ramwebi riika, nashiq raq Shiikeawe shomnoq tiikai, nashiq berongwacha na honglu ngamrea kuq tiikai kra, wa nyiim wan dam miitu arang ahü.

¹¹ Jehudinok thaq na, Ajong Pinthum Ramwe sitlaq kra riika, nyamse honglu na ataa tiijai kra sham raüta, mungmaiqse ngarai tiikhoi miitu, Asii Thaq Asii Khok kiijaq, rawiitek kuq tlo. Shatmaq, honglu na akuq nyamse maa thun kriika, maiqhiq shong chii phai na chaq baiq ki tlo.

¹² Riita, ara chongtiikai arkha maq tiina, Jesuq min, maiqse ngarai ka apaiq tiijai maq tiisii hebaiq miitu, chela phai na tsaitaq.

¹³ Riita, arkha maq, ümchaü sanha, nashiq min apaiq pha na chii phai na kilaita, apaiq raq maiq thoda howan raüta tsaitaq kra, nashiq riimin riisha howan dam rong i na.

¹⁴ Ara jamkhano ngutiikai ngukla, nashiq ma ara mangjong hiq na, pattup sichang hiqshong chela ka ahü. Nashiq riika, rawiichii thenkimak phan chela ashi saüho tlaq, kra miitu khebom laita sitiikai.

¹⁵ Krai mren, ümchaü sanha nashiq raq wranaiqshe, Shiikeawe kli she shomra laita, si rong i. Nashiq raq Shiikeawe ka, Jesuq mang na shomra wan tiikai arka, nashiq raq Shiikeawe ma honglu kewan. Nashiq raq apaiq kiidea Tatiwe nguta shomnoq tiikai arka honglu kewan ashi.

¹⁶ Kiimahali, nashiq raq kongti kiimti ma khrum shan kewan jaqsham ahea ka, ümtiikiimin naq laq rongkiq. Ara kongti khrum tiikai jaqsham ahata, Shiikeawe tiichochi chang honglu ngamrea shaütu.

¹⁷ Kiimahali, namshiq ma lamsheatibi wokhong na, si lanta tsangshiq bomchong ka phaqchii nichii maq tai ronglaq. Tsangshiq raq namshiq ka, Wenyi rilung na tiichhan chhi wan miitu, naiqhü wasü hun nü wan tlo. Tsangshiq raq, Wenyi noboq jaqsham tlaq kra miitu, Shiikeawe ma heshap kewan chang asi. Namshiq ka tsangshiq wokhong na, phaqchii nichii maq tsangshiq bom tai lanta sihan jiila, tsangshiq raq shra jaqsham tlaq kra, chochikhiq maq misham. Namshiq raq tsangshiq bomchong tlea han jiila, tsangshiq ka tsan tiibishat lam miili, shra jaqsham ka misham. Kra raüka, namshiq ma jamlai achü shiiman lap chang ahü.

¹⁸ Naishiq miitu, namshiq raq achu jaükuq tlan kra, naq nungpaq rongkiq. Naishiq ka tiima tsantsii siirairai, khangriri rüm laita sitiikai. Jamkhano ngukla, naishiq ka wranaiqshe athuk atsom jaqsham wan kli lungwii tiikai.

¹⁹ Kiimaq, Shiikeawe raq ngi ka namshiq phana hali, jaqlo miili mitiijang shea wan nonglaq nguta akhek, tsan tiitsi lanta achü jaü ronglaq. Ara ngi raq, namshiq ma akhek bomtsi tiitai wan tiikang.

Bomshat Wan Achu Jaü

^20-21 Shiikeawe raq nashiq Tati Jesuq ka amaa wa tiidong wanto. Apaiq ka skukong Rümti Ajong Pinthum. Arka apaiq miisaq honglu na kuq raüta tsaito kriikha maq jawanto. Kra tsaitaq kra maq pattup pat-sa tongshong kra atiijai maq nei wanto. Raüta sil maq san wanto. Riita hansang Shiikeawe raq namshiq ma namshiq raq apaiq raq rotlaq kra phan phan athuk atsom jaqsham wan miitu phanrap ahea awa phan rong raa tlaq kra namshiq ma asho awo michom rom kuqlaq. Kiimaq apaiq raq Jesuq Khristo lümaq, nashiq khum na apaiq tiichochi chang jaqsham thun kra mishamlaq. Kiimaq Khristo miituli khushü chhainyii jonglu kra pattup pat-sa misilaq! Amen.

Bomshat Wan

²² Phunainotiim lei, ngi raq ara namshiq ma, tsaido jido kewan tsii chongke bomtsi waiq kang ara, tsan achhii maq tiitsang tai han jaq ahea miraq nguta, tiitai tiikang. Ngi raq namshiq ma, ara lak waiq kang arka, atoqse miili waiq kang.

²³ Na phuno we Timothi ka phaqtek mong wa tiidongto she. Ara ümchaü namshiq ma tiitai tiikang. Apaiq ka ngi phana jaqlo maq saü wan raüla, ngi namshiq phana watiikang na, apaiq min ngi rai mishea wan kang.

²⁴ Naishiq salam bomtsi ka namshiq shunsheati shrabi nai Shiikeawe sengibi tarü ma tiitai kuq han jaq ahea miraq. Itali mung na siti Phungmaiqsetiim phunobi riimin, namshiq ma salam bomtsi tiitai wantlo.

²⁵ Shiikeawe kaphap ka namshiq tarü rai misilaq.