Hebrews 12 - ASII LAKDAP Bible (BSI)

Shiikeawe Ka Na We

¹ Riita, ija ümchaü sanha, nashiq trotam na, nashiq kamasham rilung na, nashiq ka jamkho shongnga tiikai, ara liiwanti, maiq hakhi bi ara chong wankai thun ara asi. Krai mren, ümchaü sanha, nashiq khum na tiibanbi chang ngarai, tiima tsantsii ümchuwa sitlaq kra thun ka wiita, chhut baiq thütlo wan rong i. Laita, kamtsantsii rilung na, ajong alu wan miitu, ümloq na saü li ju chang wa, kiijaq saü wanli chang miitu, shiikut laita ju rong i.

² Nashiq maklii ka, Jesuq theaphi na tiitsi rong i. Apaiq ka nashiq ara kamtsantsii rilung lam na shea wanti. Kiimaq apaiq riili, nashiq kamtsantsii rilung ara, atiisup na saüli awongsii ma mitiija wan lot. Apaiq ka pumsongkham na tsai ma hai raüta nashiq tiichhii wan jaqsham ka thaq baiq mak dea riito! Shatmaq, apaiq ka akhiismin tiime mak riito. Jamkhano ngukla, apaiq raq chochi jonghea lap wan chang asi nguta asap. Kriikha maq, apaiq raq pumsongkham na, maiqjea asi tsai wan kriika, akhiismin tiima wan mak riito. Krai mren, ümchaü sanha, apaiq ka Shiikeawe hokham ngacho maq jaqtsi nü na ngatlo.

³ Apaiq ka ümtinkhan wa, achong lot mai, chamchao walü mong maq lea wantaq, kra tiima rong laq. Ngarai maiqse raq, apaiq ma achong lotmai ngeng seng wanto. Raüta, tiichamchaoto. Kriithun ka wiita anin riiwanto!

⁴ Jamkhano ngukla namshiq raq ngarai rai riikhat lam maq, namshiq maiqmii miisaq thumli ka riilong liiq man shaq li.

⁵ Namshiq ma, Shiikeawe raq asetiim ma tsii chongke, tsaijido bomchong kuq tlo kriika, laq baiq man khata? Apaiq raq akha tsii chongkuqtlo, “I se lei, Tatiwe raq ümniima tsii chongke tsatson phaüla, ümphaq ümni ka tiitsii shat maq tiitsang tai laq. Kiimaq apaiq raq ümni ka thak raüla, tsaiji naq tran kiq.

⁶ Jamkhano ngukla, Shiikeawe raq juwa lungwii tlaq, kriiti ka atsea ason raüta, trantsii tlo. Juwa Ase she nguta awokhong na tiisi tlaq, kra tarü atsea ason riiwan tlo.”

⁷ Riita krai mren, nam we raq tsatson raüta, atiitsii miitu, mo tiiho tlaq kriika, tsan tiibum lanta, anin rii rong laq. Namshiq chamchao tlan kriika, Shiikeawe raq namshiq ka asetiim nguta wea wan tlo nguta, sap chang. Awe raq tsatson mak, tsii chongkuq mak maq jonglutlo nguta maiqse ka asi sha?

⁸ Riita, namshiq ka Shiikeawe raq asetiim, nanok ahinti jamkho tsatson tlaq kiikha tsatson mak jiika, namshiq ka aseshaq ka riiman, siqphin setiim nguta sap chang miraq.

⁹ Riita, nashiq ma han-ngam na, nanyungwe riiminla trantsii tsatson tlo kata. Krai mren, nashiq raq tsangshiq shreng tiikai. Ikhiijiika, nashiq raq nashiq ma Wenyi We sitlaq kra wokhong na pinthum phaqchii nichii maq si chang kata!

¹⁰ Nashiq ma han-ngam na awetiim raq, nashiq ka jaqlose miituli tsatson tlo. Kriika tsangshiq maklii na, jamlai wa ahea nguta tiima tlaq, kra khuthaq maq tsatsontlo. Shatmaq, Shiikeawe raq trantsii tlaq arka, nashiq raq Shiikeawe, apaiq asii arai rilung kra riisha lap dam miitu tsatson tlo.

¹¹ Riita, ümtiikiiwa Shiikeawe raq, nashiq son ngu tlaq, kiitiikaq nashiq tsan tiibi chang tsatson tlo nguta tiima tiikai. Achochi chang ka ahü ikha tiima tiikai. Shatmaq, kra jai miishe, tlu niishetiq, maiqse ümchuwa akha trantsii raüta jonglu wan taq, kriiti raq asii arai tingting, kiimaq kiqkap jaqshap rilung poksi kra lap wan tlo.

Tsii Chongke Nai Honkam Wan Bomchong

¹² Lo ta, namjaq namji ka naq tiibakbat rongkiq she. Atiihong rii lanta si rong laq. Nam lakü ninrai tlaq kriika, atiihong she rii chang! Nam lakü ka naq tiidandok rongkiq she. Ningkun ka shoqwiishoq lanta, shiichaq rong laq.

¹³ Lanta, rusansan lamjong kra phanphan she, khum rong laq. Lamlü lam kra phanphan khum han jiika, namhok ka ninrai mak miraq. Kiimaq, akü ashiiti sitlan kiimin, ahea she mirki.

¹⁴ Wiitarü rai, ari aram maq si miitu, shiikut ronglaq. Kiimaq, asii arai, kechu rilung, jamlai kiqjiq ahü maq si ronglaq. Kechu rilung siwan hümiika, juwe riimin, Tatiwe rai sham ka riichhi lot mak.

¹⁵ Namshiq ka, Shiikeawe kaphap wokhong nyang wa, lamjiq na kiho man chang miitu, tsii lam shat maq si ronglaq. Namshiq phong wa, jumin akhap atsuwiq pechong ma, naqja rongkiq. Kra chong jonglu wan raüta, nanok miatsii baiq wan ka raa mak.

¹⁶ Namshiq phong wa, jumin Esau kiikha ashe sethoq naq jaq rongkiq. Kiimaq, Wenyi hupsam ka thiihü ma naq tiija rongkiq. Esau riika, apaiq chhikhu we arang achu shiiman ka, aramtsi ma dungja dase miitu shaphaq baiqto.

¹⁷ Kra shaphaq baiqjai she, maalam jai niitiq, apaiq raq awe jaq wa chhikhu we rii achu shiiman ka kuqlaq nguta, ümtinkhan wa hoqsiito. Shatmaq, apaiq miika kuq mak she riito. Jamkhano ngukla, apaiq raq jamlai wa shut lam tantaq kra, tiitanglot mak she riito. Apaiq ka makphai trok raüta rit wan nongto. Shatmaq, hum mak she riito.

¹⁸ Namshiq ka Shiikeawe shomnoq wa watlan pum kriika, Israilnok raq Shiikeawe shomnoq wantaq Sinai pum kiikha ka riimak. Tsangshiq ka Sinai pum na wataq akhing na, Sinai pum kaü ka walü mong na anyai rai chhito. Kiimaq rathup ranyaq watrang, nyaq wanto. Kiimaq, rathaiq rahai, ramok watrang, rachhai ralüp wa trang la chhito.

¹⁹ Tsangshiq raq lerong tsü trang henghea, kiimaq Shiikeawe bomchong ka ramok wa trang ikha, amok dung dung taito. Israilnok raq, Shiikeawe bomchong riinya wan kra tai raüta, tsangshiq raq apaiq bomchong ka henghea tai lot mai, nguta tiipaiqneato.

²⁰ Tsangshiq raq, kra tiipaiqnea bomtaq kriika, Shiikeawe raq, “Nyamse raq dongdii min, ara pumji chong na, aji maq ni wa mai mak. Kiijaq khum wa raüla, long maq tiinamtok tiiqbaiq raa dongdii,” nguta aming kuqto. Kriikha maq, tsangshiq ka hairaito. Kiimaq phiip raq tsaito.

²¹ Kiijaq, Shiikeawe raq jamlai wa tiichhikuqtaq thun kriika, mak maq jang nai liilot mai chang henghea riito. Maiqphiip maiqjiip. Kriikha maq, Mosheq raq, “Ngi ha akii anyii rai nai aphiip ajiip rai la tli she, kiinyii raiho kang!” nguta bomto.

²² Shatmaq, ümchaü sanha, namshiq ka Jajon pum na, kiimaq atra Shiikeawe sichang chela ramungtan Jerusalem na, ahing amun rasetiim sitlaq, kiijiishe saü wan tlan.

²³ Namshiq ka, ümchaü sanha, Shiikeawe setiim, chhikhu se kong sitlaq, kra triitam hea tlaq akhing poi ajong ranaiq lom dam ngutiishe saü wan tlan. Kiijaq watlaqti mang ka, ramungtan na awaiq thü wishe. Namshiq ka ümchaü sanha, maiqse angu kunli khaphoketi we, Shiikeawe wokhong niishe sitlan. Kiimaq man na, tsaitaq phong wa maiqshaq shaqti ka, Shiikeawe raq kechu maiqsetiim miishe tiija wanto. Namshiq ka tsangshiq rai adam misi wan han.

²⁴ Namshiq ka, Jesuq phana she saü wan lan. Apaiq raq tongshong anye shongkuqto. Kiimaq Abel tiijai nam ma araa, apaiq tiijai maq nei kuqto. Raüta ümchaü sanha, araa phan mikuq ha nguta kiqkham kuqtaq kriiwe phana niishe saü wan lan!

²⁵ Ümchaü sanha, phaq tiitsii ni tiitsii lantiishe, tai ronglaq. Shiikeawe bom chong ka, naq tlea rongkiq she. Shiikeawe tsütsa achong kuq, tai mak, shishetibi, ara mangjong hiq na siti maiqse ka, tiihang mak maq tsat wanto. Riita, ikhiijiika, ümchaü nashiq raq, ramungtan maq ki raüta, tsiichong keti we bom kra, tlea hai jiika jamkhii riita jiimin, hangki lot mai she miraq!

²⁶ Man na, apaiq bomchongke akhing na, mangjong hiq ka atiikhai banban tiimeto. Shatmaq, kra thaq na ümchaü ka, apaiq raq akha hali kiqkhamto asi, “Ngi raq lakshi ri hali mangjong hiq ara mitiikaü lak baiq nong ha! Mangjong hiq ara lamlam li min riimak, ramungtan kiimin miphai baiq nong ha,” nguta chongtlo asi.

²⁷ Riita, arjaq bomtsi “lakshi ri hali,” nguta bomkham thütaq arka, ara ra nai hiq na ümchuwa atiiq arwan diim tlaq, phanrap ka lakshi ri hali mibrak baiq nong nguta chong tlo. Kiimaq asiiq mirbaiq nong nguta tsangriri hea maq chong nong tlo. Kra jai miishe tiq, jamlai phan wa atiimeshi chang riimak phan sitlaq, kriishe jai na mitiichong.

²⁸ Riita, ümchaü sanha, Shiikeawe ma pinthum kechu tum rong i. Apaiq raq nashiq ma ramungtan ka kuqto she. Nashiq ka apaiq sengi she. Ara mungtan kuqtaq arka, ümtiikiimin thenki mak phan she. Arkha maq, ümchaü sanha, nashiq raq Shiikeawe ma khoqriiq shishiiq maq, kechutum wan lili rong i. Laita, apaiq tiichochi miitu, apaiq raq lungwii tlaq kra phanphan, apaiq ka kai shreng laita, shomnoq rong i.

²⁹ Jamkhano ngukla, nashiq Shiikeawe ka bunlak buncha khiim chaqti watu.