Hebrews 11 - ASII LAKDAP Bible (BSI)

Richüwe Kamtsantsii

¹ Kamtsantsii rümti ngutlaq kriika, mak maq chhi mai li jiimin, na raq jamlai phan mo ranphan tiikai kra phan ka, poiki mak maq milap i dongdii nguta, tsankhun maq nga raüta sitlaq kra nangnga ngutlo.

² Tsangshiq kamtsantsii lümaq tiina, richü we raq, Shiikeawe bom lap wantaq.

³ Ara ra nai hiq sitlaq arka, Shiikeawe raq, apaiq kiq tiidea raüta, apaiq bomtsi lümaq dea phansangto nguta, nashiq raq kamtsantsii maq sap tiikai. Krai mren, ümchaü mak maq jamlai phan wa chhi tiikai arka, Shiikeawe jaq maq, mak maq chhi mai phan lümaq phansangto, nguta sap tiikai.

⁴ Kain raq akuq honglu nam ma, Abel raq akuq honglu ka athuk atsom lin riito. Abel riika Shiikeawe ma kamtsantsii lümaq kuqto. Apaiq raq, kamtsantsii maq honglu kewan kha maq, Shiikeawe raq, apaiq honglu kra taoto. Raüta, apaiq ka kechu maiqse dea nguta bom raito. Apaiq ka atsai kaikun she li jiimin, apaiq raq kamtsantsii lümaq, ümchaü niitaq nashiq rai riibom dam tlo. Jamkhano ngukla, apaiq jaqtho kiiwa, nashiq raq tsin wan chang tsütsa asi.

⁵ Enokh raq Shiikeawe ma kamtsantsii thü kha maq, apaiq ka tsai mak dea riito. Apaiq ka atsai kai la na, Shiikeawe raq, ramungtan na shea wanto. Krai mren, jurmin apaiq sham ka chhi mak she riito.

⁶ Kamtsantsii ahü maq, jurmin Shiikeawe tiichochi lot mak. Arkha maq, juwa Shiikeawe phana watlaq, kriiti raq Shiikeawe ka asi kiimaq apaiq rit wanti miika poksi mikuq dongdii nguta, kamtsantsii thü raa tlo.

⁷ Nowaq raq Shiikeawe ma kamtsantsii thü kha maq, Shiikeawe raq apaiq ma mak maq michhi shaqli, jai na saüho chang rathup jüjang tsütsa chongkuq taq kra taito. Raüta, apaiq raq Shiikeawe aming maq, laikaü ashi tato. Kra laikaü na ngawa raüta, apaiq nai achak ase tiim ka rathup jüjang mong wa tiichhiito. Krai mren, apaiq rilung na jaqsham wantaq kra lümaq, phiijawa ka shutto dea nguta, shra baiqto. Kiimaq Shiikeawe raq Nowaq dea kechu maiqse nguta pong na, rairiito. Arka apaiq kamtsantsii thütaq kha maq, Shiikeawe raq raikuqto.

⁸ Shiikeawe raq Abraham ma, mung ashi mikuq kang nguta kiqkham kuqto. Krai mren, Abraham raq Shiikeawe ma kamtsantsii thüto. Raüta, apaiq ka ümba na saüho chang wa, kriimin sap mak miili, ahiqshong arahai kra miimthü raüta, Shiikeawe raq shunshea tlaq kra phanphan, Shiikeawe raq akuq tachong hiqshong mung kiina kihoto.

⁹ Abraham ka kamtsantsii maq, Shiikeawe raq apaiq ma mikuq kang nguta, khamkuqtaq tachong hiqshong mung kiijaq, wansha we ikhli shongto. Apaiq ka tombu tiipsetiim chan raüta siwanto. Isak nai Jakob kiimin, Shiikeawe raq Abraham ma kiqkham kuqtaq kra, lap wan damti sii. Tsangnai riimin, tombu tiipsetiim chan wan raütli siwanto.

¹⁰ Jamkhano ngukla, Abraham riika Shiikeawe raq, apaiq jaq maq tiidakjok raüta süriitaq, raüta chela ashi tei wantaq kiijaq, siwan tlo ha jiilei nguta maklii khamthii maq siwanto. Kra chela ka pattup pat-sa siwan ruq li she miraq. Athenkai ngutiika ahü she.

¹¹ Abraham raq Shiikeawe ma kamtsantsii thü wan kha miitiina, ase humtaq kra. Apaiq ka tikiikaiq she riito. Kiimaq tsangnyung Sara kiimin wikaü she, ase humcho ka riimak she riito. Apaiq raq, Shiikeawe kiqkham ka poimak mikuq dongdii nguta kamto.

¹² Abraham han-ngam rilung ka, arümkai wishe ngo chang khan she riishatmaq, arwe lai ka puchi wan raüta, raham hiqham she pu wanto. Apaiq lai ala ka pu wan raüta, ra na raiqsaiq diim tlaq nai khamjong phii na, kumtsai riiphong tlaq ikha awea lot mai she pu wanto.

¹³ Ara chongtiikai richü wetiim raq, Shiikeawe ma kamshat maq tsai wanto. Shiikeawe raq tsangshiq ma mikuqha nguta kiqkham kuqtaq kriika, lap wan mak dea miili tsai wanto. Shatmaq, Shiikeawe raq khamkuq taq rawiichii pat na saüho tlaq kriika, tsangshiq riimin kamtsantsii maq, alu na asaüho chhithüto. Raüta khoqriiq shishiiq maq tao wanto. Krai mren, tsangshiq raq nanok ma tantan maq, tsangshiq ka ara mangjong hiq na wanshawetiim ikha sitiikai nguta chongkuq thüto.

¹⁴ Tsangshiq raq tantan maq, akha hakhi kuq raüta, phiijawa ma tsangshiq ka tsangmung ashi rawiichii na saüho tlaq kriijaq saüwan miitu khe wanti maiqse dea nguta hakhi kuqto.

¹⁵ Tsangshiq raq maiqmii hiqchü rachü miimbaiq thü taq kra miitu ka tsan na ranphan mak she riito. Tsangshiq raq hiqchü rachü kra lungwii shatli siwantaq ngu raüka, tsangshiq ka hiqchii na ajang mirwan nong wa.

¹⁶ Kra rii na, tsangshiq ka ramungtan na tsangshiq miitu hiqshong rahai, athuk atsom thü tlaq kiijaq saü tlo hai jiilei nguta maklii khamthii maq siwanto. Krai mren, Shiikeawe raq tsangshiq ka apaiq sengibi ma tiija wan dam miitu Shiikeawe ka jeasi mak. Kiimaq krai mren, Shiikeawe raq tsangshiq miitu tsangshiq siwan chang hiqshong rahai chela ashi tei kuqto.

¹⁷ Abraham raq Shiikeawe ma kamtsantsii thü wantaq kha ma, Shiikeawe raq apaiq ka maitai wantaq akhing ranaiq, apaiq raq ase Isak ka, Shiikeawe ma honglu na take wan miitu tiijeje maq sito. Abraham kata, Shiikeawe raq kiqkham kongphiq khakuqtaq kra lap wanti we. Kra taü maq dongdii min, apaiq raq ase sekhuq laqlaq se kra, honglu na take wan khekham riito.

¹⁸ Shiikeawe raq apaiq ma, kongkhuji maq akha nguta kiqkham akewi she riito. Shiikeawe raq, “Ngi raq ümniima, ümsaü ümse lai ka pahea mitiipu kuq kang nguta, kiqkham kongphiq khakuq kang irka, ümse Isak lümaq mipu wan,” nguta chongkuqto.

¹⁹ Kra akhing na, Abraham raq ase Isak ka amaa wa, Shiikeawe raq mitiijang lot nguta, atsan mong na kamto maq asi she riito. Riita, krai mren, Abraham ma ase Isak ka, amaa wa atiijang arkuq wan ikhli she dea taito.

²⁰ Kiimahali, Isak raq kamtsantsii lümaq, asenai Jakob nai Esau miitu, rawiichii ji na Shiikeawe raq, achu mishman kuq laq nguta, achu jaükuqto. Kiimaq, apaiq raq achu jaükuqtaq kriika, Shiikeawe raq mikuq dongdii nguta kam wanto.

²¹ Kiimahali, Jakob raq kamtsantsii lümaq, Joseph senai, asaü nai ma, apaiq atsaiho miishe achu shiiman kuqto. Apaiq ka anyeakii maq tiishong raüta, Shiikeawe ka shomnoq wanto.

²² Kiimahali, Joseph riimin la, kamtsantsii maq, Israilnok ka Ejip mung wa alaü mirwan jo nguta chongkuq thüto. Krai mren, Israilnok ma apaiq maa ka jamkhii saiqsam chang wa, kra miitu tsii chongkuq thüto. Arka, apaiq atsaiho nini akhing niishe chongkuqto.

²³ Kiimahali, kamtsantsii maq, Mosheq nyungwe raq apaiq rawüchhi jai maq, jipi lü tsam na saüli, apaü raüta pü wanto. Tsangshiq raq, tsangse ka maiqlung ngamwii, shamhea shamjü se chhito. Kiimaq, tsangshiq ka hokham we aming tlea ma hai mak riito.

²⁴ Kiimahali, kamtsantsii maq, Mosheq raq apaiq ka norii we she jonglu tlaq akhing na, apaiq ka hokham we se, jechakse kra nyungse ka riimak nguta akhii riiwanto.

²⁵ Apaiq raq, alose miitu, Ejip mung na ngarai mong na peosea rilung kra baiqthü raüta, Shiikeawe sengi, Israilnok rai achamchao raüta siwan riiwe kra khoti lungwii wanto.

²⁶ Apaiq raq, Messia miitu chamchao litkot wan, maiq shummii bombi kiqsü howan riiwe ka, Ejip mung na chaq nai seng tum sitlaq, kra thaq na reng ma tiija wanto. Jamkhano ngukla, apaiq raq jai na poksi lap wan riiwe ka amiinu atsin nguta amak lii thü wanto.

²⁷ Kiimahali, Mosheq raq kamtsantsii maq, Ejip mung ka miimthüto. Apaiq ka, hokham we tsankhiq miimin hai mak maq, Ejip mung wa laü wanto. Apaiq raq, mak maq chhilot mai Shiikeawe ka, asham chhi shat ngo chang chang ikha, apaiq tsan ka jai nü na jangkai nong nguta akhiismin man mak she wawanto.

²⁸ Kiimahali, Mosheq raq kamtsantsii maq, Tiichhii wan Poi ka pha wanto. Apaiq raq, kamtsantsii maq, poi na ataa sku tiijai ka Israilnok jamki tek, kilam da na nei miitu, aming kuqto. Kriika, Maiqtseati Rase raq, Israilnok jamkitek wa, maiqwe se chhikhu setiim ka tsatmak mitiichhii kuq laq nguta neito.

²⁹ Kiimahali, kamtsantsii maq, Israilnok raq, khamshii Khamjong Rai ka, phiita thaq maq ajin wan ikhli jin wanto. Shatmaq, Ejipnok raq Israilnok jai jowan watiiti thun ka, jü raq lambaiq raüta, wiita jiimto.

³⁰ Kiimahali, kamtsantsii maq, Israilnok raq Jeriko chela peruk tiikom na ramiishi na saüli kom khumto. Raüta, ranaiq miishi she khum jai na, peruk ka tiitham baiqto.

³¹ Kiimahali, kamtsantsii maq sii hali, mephe nyung Rahab raq, Israilnok siwe wenai wataq kra, ahea wiq maq, siphu sino ikha shiikum pan kuqto. Kriikha maq, Shiikeawe kiqkhiiti, anok abin ümchuwa jiimtaq, kra rai jiimrai chang wa, apaiq ka tiichhiito.

³² Riita, akha chong wan ruq li sha michong siq hata? Akhli chongruq chong wan hajiika, Gedion, Barak, Samson, Jeptha, Dawit, Samuel, kiimaq shammibi thun jaqsham phanchanke miitu, ngi ma akhing ka ahü, rashe tiina micha. Athum chang ri riimak.

³³ Tsangshiq raq, kamtsantsii maq, ara maiqmung ümchuwa sitlaq ka khat wanto. Raüta, tang wanto. Tsangshiq raq, jamlai wa tang tlaq lamlu ka, klo wanto. Krai mren, Shiikeawe riimin, tsangshiq jaqsham ka thukto dea nguta tre wanto. Kiimaq, apaiq raq jamlai wa mikuq ha nguta sinkham kuqtaq, kriika kuqto dea. Tsangshiq ka hangsi kong nübok kiidea min, aphup riibaiqto.

³⁴ Tsangshiq raq, walü henghea kiimin tiimat baiqto. Kiimaq, maiq raq tsangshiq ka asebaiq chang wiishe min, atiichhii riiwanto. Tsangshiq ka, han-ngam na ningkun ajom riito. Shatmaq, srea nola ma jawanto. Tsangshiq ka, srea nola ma jawan raüta, pongmungti chiq se rewe thun ka wiita, kunkun khat wanto, raüta tangto.

³⁵ Kiimahali, kamtsantsii lümaq, jechakre raq, tsangshiq ma tanyang senobi ka, atsea arbaiq wa, amaa wa, atra tiijang wanto. Raüta, tsangshiq raq khoqriiq shishiiq maq tao wanto. Wiijamti riika, atra sinam ma, maiqjaq khon mong na chamchao raüta, tsai riiwe ka ahea nguta tsaito. Kra tsai wantaq kriika, tsangshiq raq amaa wa dong wan jai, rilung ahea lap wan miitu tsaito.

³⁶ Maiq wiijamti ka, maiq raq pinthum tho ariiq maq phong tsoktsok, shummii haihii wanto. Kiimaq, sintsang maq pheram pherak hihut tsat wanto. Kiimaq, wiijamti ka jinraü kharü maq kha raüta, phaqtek mong na shaqto.

³⁷ Tsangshiq ka long maq tiiqbaiqto. Kiimaq, laklü maq khonai ma tiikho han baiq wanto. Tsangshiq ka, ja maq lüpbaiq wanto. Tsangshiq ka, khu akhea min ahü, kha maq sku khü nai chhechhi khü sam raüta, miishmii, barap binrii na miitsan miijan, amang ale miili chamchao wanto. Kiimaq, phanrap na haibi hiiti maq wiita haihii raüta, tiichamchao wanto.

³⁸ Riita, tsangshiq ma ara mangjong hiq arka hiqtlili, thiihü ikhli siwanto! Tsangshiq ka munglu maiqse ikha, bintang jüngi bok na, ku akin na, chongkhong longsha bok na, kiimaq hiqkho bok na, miishmii siwan raüta, tsangshiq rilung ka tiisung wanto.

³⁹ Riita, ara chongtiikai thun kamtsantsii rüm wanti, srea nolabi arka, Shiikeawe raq tsangshiq ka maiqshaq dea nguta, somra raüta tao wanto! Shatmaq, tsangshiq raq dongdii min, Shiikeawe raq mikuq ha nguta, sinkham kongphiq kuqtaq kriika, lap wan mak dea riito.

⁴⁰ Jamkhano ngukla, Shiikeawe riika, tsangshiq ma kiqkham kuqtaq kra thaq na, nashiq miika araa lin hali she, mikuq ha nguta kiqkham kuqto. Arka, tsangshiq nai nashiq ma nguta kuqto. Krai mren, tongshong chü pat wa, Shiikeawe ma kam wantibi ka nashiq rai adam miishetiq, awongsii Shiikeawe setiim ma tiija wan miitu, Shiikeawe raq bomtsi ka shat wanto.