Hebrews 10 - ASII LAKDAP Bible (BSI)

¹ Jehudinok ma akuq Thungtri lang raüta, Shiikeawe shomnoq tlaq arka, ramungtan na sitlaq awongsii, Shiikeawe shomnoq wan lam kra tsaiji lamlam li. Arka jai maq saüho tlaq, chiisan tri lam phan raüta, Shiikeawe shomnoq wan chang lamphan kra sumla tsaiji. Wranaiqtek, Shiikeawe ma honglu takuq tlaq kriika, achü kli bliiqkiki raüta takuq tlo. Riita, ara Thungtri lamphan raüta, Shiikeawe ma rawiitek nyamse takuq tlaq kriiraq, maiqse ka Shiikeawe wokhong na siwan miitu asii maiqse miika jamkho mitiija lot?

² Riita, Shiikeawe shomnoqti ngarai ka ngohea dea tiisii baiq tlaq jiika, tsangshiq tsan mong na, maiqmii shutphit wantaq mra thun kriika, tsangshiq tsan mong na tiidoki mak she miraq. Krai mren, nyamse honglu na take kriika, atsaq she mirki wa.

³ Shatmaq, ara rawiitek nyamse takuq tlaq ara riika, maiqse ma tsangshiq ngarai ka khoi mak dea nguta bliiqkiki chongkuq tlo.

⁴ Ara jamkhano chongtiikai ngukla, minsaü pongwetiim tiijai nai chhechhi kong tiijai riika, ümkha riita jiimin maiqse ngarai ka tiisii he lot mak.

⁵ Riita, ara ningkhan tiina, man na Khristo ka mangjong hiq na pokai ho nini na, apaiq raq Shiikeawe ma akha bomtaq: “Ümniiriika nyamse takuq tlaq kra, nai ahin hupsam honglu na kuq tlaq kriika, dadü maü. Shatmaq, ümniiraq ngi miitu, khum ashi tiihong kuq laü.

⁶ Nyamse ta raüta wiipumtam maq, berongwacha na achaq ka, ümniiraq rariq maü. Ngarai miitu honglu na ataa nyamse kiimin, Ümniiraq dadü maü.

⁷ Kiijiishe, ngi raq ümbom ka akha tre kang, ‘O Shiikeawe lei, Ngi ka ajiilii, Ümniiraq athaü thaü jaqsham miitu. Ngi miitu Thungtri lak na waiqtaq, kra phanphan misham kang.’ ”

⁸ Arjaq kongkhu na Khristo bom tlang wankai kiijaq, Khristo raq Shiikeawe bom ka akha tre wanto, “Ümniiriika nyamse honglu na takuq tlaq nai ahin honglu kuq tlaq kriika dadü maü. Kiimaq maiqse ngarai tiisii miitu, honglu na wiipumtam maq berongwacha na chaqtlaq nai ahin honglu kuq tlaq kriimin lungwii maü,” nguta chongtlo. Khristo raq, ara chongtaq arka, honglu ümchuwa kuq tlaq kriika, Thungtri na chongtlaq kra phan phan kuq tlo shatmaq ngutaq chongtlo.

⁹ Kra ngojaitiq, Khristo raq Shiikeawe bom ka, “O Shiikeawe lei, Ümniiraq athaü thaü jaqsham miitu, ngi ka arjiilii,” nguta treto. Arjaq chong tlaq arai mren, Shiikeawe raq man na tongshong chü tri maq, honglu kuq tlaq kra tri ka no niishe tsuqbaiqto. Raüta, kra rii na, Khristo raq akhum honglu na takuqtaq kra miishe songto.

¹⁰ Shiikeawe raq Jesuq Khristo ma jamlai jaqsham wa thaütaq kra, Jesuq Khristo raq shamto. Krai mren, nashiq ngarai ka tiisii kuqto. Raüta, nashiq ka asii maiqsetiim, Shiikeawe wokhong na siwan miitu she pong na rai raüta tsea wanto. Arka, Khristo raq apaiq khum ka klang maq lakshi wa niili, pattup pat-sa miitu panthit honglu na kuqtaq kra lümaq, nashiq ara tiisii kuqto.

¹¹ Jehudinok thungtri maq, ramwebi loweatek raq, maiqmii ramwe jaqsham honglu kewan ka, shamchü kli, bliiqkiki sham tlo. Shatmaq, arthun nyamse honglu takuq tlaq ara riika, ngarai ka ümtiikiimin tiisii kuq lot mak.

¹² Shatmaq, Khristo riika lakshi honglu kuqtaq kra riili she, maiqse ngarai ka, pattup tiisii ruq li she miraq. Kiimaq kra honglu kuqlot raütiishe, apaiq ka Shiikeawe ma jaqtsi nü na, pattup miitu she nga wato.

¹³ Riita, ümchaü sanha, apaiq ka kiijaq mongngam maq ngashat miili she, Shiikeawe raq ajaqtibi thun kra, apaiq jichong na ahok tiida chang hüda ma tiija tlii, miphong kuq shaq wiiwii, tsankhun miishe mikhe.

¹⁴ Riita, i ja, ara apaiq raq akhum ka, lakshi honglu na kuqtaq ara lü miili she, maiqse ngarai ka tiisii hekuqto. Raüta, tsangshiq ka Shiikeawe wokhong na siti, awongsii maiqsetiim ma tiijakuqto.

¹⁵ Kiimaq, ara chong tiikai ara miitu, nashiq ma Asii Wenyi riimin hakhi kuq tlo. Kiimaq Shiikeawe raq akha nguta chong tlo,

¹⁶ “Rawiichii akhing na, Ngi raq tsangshiq rai tong mishong ha. Lata, ngi raq I thungtri ka, tsangshiq khutsai na miwaiq kuq ha.”

¹⁷ Kra ngo jai she, Shiikeawe raq, “Ngi raq tsangshiq ngarai thun nai tsangshiq mra thun kra, I tsan mong na thü mang she mirha,” nguta ngutlo.

¹⁸ Riita, arjaq Shiikeawe raq maiqse ngarai ka diikuqto she nguta chongtlaq krai mren, ümchaü sanha, ramwebi raq maiqse ngarai tiisii miitu, Shiikeawe ma honglu ke chang jaqsham ka ahü she, raa mak she.

Shiikeawe Wokhong Na Sirongpha

¹⁹ Ikhiijiika, lungwii phunainotiim lei, ümchaü sanha nashiq ka, Asii Thaq Na Asii Khok mong na nyap wa miitu, jamlai phan tiibanbi chang min ahü she, jojuju she. Arka, Jesuq tsaitaq kra lümaq kilü ka dikuqto.

²⁰ Jesuq raq nashiq ka, Shiikeawe phana wawan miitu, lam anye ashi she, atra rilung lamshe tankuqto. Arlam tankuqtaq arka, apaiq han-ngam khum kheathum achan ka tan wan raüta, wawanto. Arka, apaiq khum ka honglu na kuq raüta tsaito. Raüta lam ka tankuqto.

²¹ Ümchaü sanha, nashiq ma ramungtan na sitlaq, Shiikeawe jam liiti we ramwe ajong pinthum we ri asi she.

²² Krai mren, ümchaü sanha, nashiq ka Shiikeawe wokhong niishe nyap tlo rong i. Tiima tsantsii siirairai maq, kiimaq kamtsantsii pharangrang maq, tsantsii ka ashe ashi wiita tiijai maq tiisii he laita, kiimaq nashiq khum ka asii kham maq jühe laitiishe, Shiikeawe wokhong na warong pha.

²³ Nashiq ka, jamlai mo ran tiikai arka poimak phan, milap rong i dongdii nguta tsankhun, mongngam maq si rong i. Ara jamkhano ngutiikai ngukla, Shiikeawe raq nashiq ma jamlai wa mikuq ha nguta kiqkham kuqtaq kriika tengteng.

²⁴ Weshi raq weshi miitu tiima laita si rong i. Riilung riiwii laita si rong i. Kiimaq weshi raq weshi ma, shamhea kaiwa shamkuq laita si rong i.

²⁵ Nanok maiq wiijamti shonbii tlaq kiikha, adam na riitam laita, Shiikeawe shomnoq kra nungpaq mai ngu raü ka ahea miraq. Kra thaq na, apa chat wan wan laita, weshi raq weshi tsaiji dokuq laita si rong i. Jamkhano ngukla, Tatiwe raq mangjong maiqse kha phoke Ranaiq akhing ka, ümchaü saü rai wanto she.

²⁶ Nashiq raq, tengman tlaq bomtsi kra, saptsin wan jai niishe min, ngarai ka jaqla maq tang wan ruqruq miili la si hai jiila, nashiq ngarai tiisii miitu honglu na ataake chang ka ahü she.

²⁷ Kiikhiiti riika, saüho tlaq Khapho Ranaiq kra, haisi rasong mong na siraütli she mikhe! Kiimaq, Shiikeawe rai riilongliiqti kra tiibun chaq baiq chang, phiiptsi jiiptsi walü henghea sitlaq kra khe raüta si chang li she miraq!

²⁸ Mosheq raq akuq thü Thungtri jinti, ashut we kha ka apho riikuq tlo. Khapho ranaiq hakhibi wenai nai wetsam raq lo, kiimaq apa lin riilo, chap raüta, apaiq ka shutto dea nguta hakhi she kuq raüla, apaiq ka tiihang mak she, miisaq tiithum tlii kha tan tlo.

²⁹ Ikhiijiika, Shiikeawe Se ka ji maq nishishi raüta saisi tlaq, kriiti ma kiiha? Shiikeawe tongshong khamchong ram chang tiijai kok, apaiq maiqmii ngarai khum ka tiisii he chang tiijai ka, apii ashi min ngu mak, shishe tlaq, kriiti ma kiiha? Tiima rong liita, akhnok maiqse miika, Shiikeawe raq ümtinkhan heng mo tiihoke chang she wa miraq!

³⁰ Nashiq raq asap i, Shiikeawe raq akha nguto, “Ngi raq I phuk ka milam ha dongdii. Lata tsangshiq ka mitiichamchao ha dongdii.” Kiimaq nashiq raq, “Ngi raq I sengi kha ka mipho ha dongdii,” nguta bomti we ka juwa, kriimin asap i. Arka Shiikeawe raq ngutlo.

³¹ Riita, arthun ara ningkhan, atra Shiikeawe jaqkhon mong na dea wa ngutlaq kriika, pinthum haisi chang!

³² Man na, namshiq jamkho shongnga lan kra tiima rong liina. Namshiq ka Phung na shang wan pha ji na, kiitin choji, namshiq raq phanrap phanrii litkot chamchao riihum wan lan ihata. Kiitin khan chamchao wan lan taü miimin, chamchao wa raq namshiq ka tang mak dea riito.

³³ Namshiq ka akhing khing na, maiqse raq nokwe man na shummii wanto. Kiimaq haihii wanto. Kiimaq namshiq raq kongtibi, juwa shummii wan tlaq, kriiti rai reraüshi maq shummii thoda ka adam na howan dam lan ihata.

³⁴ Namshiq ka phaqtek mong na chamchaoti rai adam chamchao wan lan ihata. Kiimaq maiq raq namshiq hup asam thun ka, wiita runho raüta lamhotaq akhing niimin, namshiq raq kra sumrum lan thun ka aninli riiwan lan ihata. Kiimaq tsaiji tran man maq, chochi khiq li silan ihata. Jamkhano chochi lan ngukla, namshiq raq asap han, Shiikeawe raq namshiq ma jamlai wa mikuqha nguta kiqkham kuqtaq kriika, tsiiq nai nyam sum lan kra thaq niimin rahea phan. Kriika, namshiq jaq na asi she. Kriika pattup pat-sa hupsam nguta asap han.

³⁵ Riita, ara ningkhan, namshiq ka awongsii Phungmaiqse she dea nguta, jamkho silan, kra taqtaq li si rong laq. Namshiq ka akha shiichaq wan ruq, nungpaq man maq si han jiila, namshiq raq poksi jonghea milap han.

³⁶ Shiikeawe raq thikuq tlaq kra jaqsham ma jiila, namshiq ka tsankhun maq, tsan tiibum lanta, jaqsham shiichaq wan ruq chang li. Kra riihan jiitiq, Shiikeawe raq mikuq ha nguta kiqkham kuqtaq poksi kra milap han.

³⁷ Riita, Asii bomtsi na akha nguta chongtlo: “Aloseli she misi, heashi se sijai, saühoti we kriishe misaüho. Alu ka tiijai rai mak she miraq.

³⁸ I sengi, asii maiqsetiim sitlaq thun riikla, kamtsantsii mithü, raüta atra misi. Shatmaq, tsangshiq phong wa ashira raq, I jai phan mak she tsaqki raü jiika, Kriiti miika, I tsan hea mak miraq.”

³⁹ Shatmaq, nashiq ka jai na janghoti, raüta tsailam phanhoti ka riimai. Shatmaq, kamtsantsii rümti setiim nguta sitiikai. Kiimaq, Shiikeawe ma kamtiikai. Krai mren, nashiq ka apaiq raq tiikhup wongkuq shat maq sitiikai.