EJEKIEL 1 - ASII LAKDAP Bible (BSI)

EJEKIEL RAQ SHIIKEAWE RAI SHAM RIICHHI PHA ( 1.1—7.27 ) Shiikeawe Hokham Ngacho

¹ Rawii roqtsam she angu na jipi lüblai liiwa rabiingi ngo ranaiq akhing riito. Ngi, ka ramwe jaqshamti. Iwe mang ka Buji. Kra akhing na ngi ka munglu shumwi ma atsuq wan Jehudinok rai Bebilon mung na, Chebar rai tan na sikang. Ramungtan ka atlin riikito. Kiimaq ngi raq riisham mak maq Shiikeawe ka chhikang.

² (Kriika Hokhamwe Jehoiachin ka munglu shumwi ma shea wan li maq rawii wiibiingi ngoja she riito.)

³ Kiijaq Bebilon mung na, Chebar Rai kii na, ngi raq Tatiwe ka ngi rai riibom taikang. Kiimaq ngi raq apaiq ningkun heng ka ikhum na asi sapkang.

⁴ Ngi raq ra nü na liikang kiimaq shekhu nü mung wa rathaiq saü wantlo chhikang. Phumda jonghea mong kiiwa rachhai raliip wa trang dongtlo chhikang. Kiimaq kra tro wa ra ka wiita ali aliim chhainyiinyii chhikang. Kra rachhai raliip raitlaq mong na, phanshi ra ka miiki ngam chhairai tlaq ikha achhai raitlo chhikang.

⁵ Kra rathaiq raitlaq among ba niika, ngi raq alii miika maiq sham ikha atra ngamkaütiim kaüblai jong ri chhikang.

⁶ Shatmaq kra ngamkaütiim blai ka atheaphi ka blailai jongri kiimaq akaü khumtek dü na arakong ka blailai riito.

⁷ Tsang hokpe thun ka rusansan, kiimaq tsangshiq hokphi thun kriika minsaü pongwe hokphi ikha ahoksan asi. Kriithun ka miiki aheawiq apanrea araq chhairaitlaq ikha chhai hea langlang riito.

⁸ Kriithaq niimin, tsang theaphi blailai kiimaq tsang rakong blailai kra khong na, tsangshiq loweatek khum na maiqjaq ka blai lai jongri asi, rakong ashi khong na maiqjaq ka ashishi asi riito.

⁹ Kaüshi rakong wiinai ka tiipii raqraq raüta, kra kaüblai jong ri rakong tsii thun ka triichehihi tiithan saqsaq na tapshok ikha siimblai ri maq atro na chapto. Raüta tsangshiq ka atiime raüla, adam maq tsangshiq khum kra ashi ikhli riiphea mak maq tiimetlo.

¹⁰ Kra atra ngamkaütiim loweatek theaphi ka kaüshi theaphi ka pong pong phanblailai theaphi riito: khaki nü wa theaphi ka maiq theaphi, jaqtsi nü siim wa theaphi ka hangsi theaphi, jaq pha nü siim wa theaphi ka minsaü pongwe theaphi, kiimaq tokkun nü wa theaphi ka liihawe theaphi riito.

¹¹ Ngamkaü ashi raq arakong wiinai ka tiipii raüta ra nü na dotlo. Raüta ratsii wiinai riika apaiq tho na ngamkaü ashi chaptlaq rakong tsii wiinai krai tiithan shat tiinapsaqsaq raüta chaptlo. Kiimaq tsang rakong ahinti anai kra miika, tsangshiq maiqmii khum kra pangsaq saq na khea asam ikha tiijoptlo.

¹² Ngamkaü aweatek raq siimblai ri na liishat riitlo. Krai mren tsangshiq ka wiikongtam maq kaüshi akhum ikhli siimblai ri na tsangshiq raq aroro kiina tsangtu ka siiqmak miili riitu shat maq khum hotlo.

¹³ Kra ngamkaütiim phong mong na waniitu nyaihea langlang makse chat-hit tsaqmak phan tiime wan ruq ashi asi. Kra waniitu kaü nyai raitlaq kiiwa wa ka rachhai wantlaq ikha chhailüptlo.

¹⁴ Kra ngamkaütiim ka konü siim maq riita konü siim na doqhaha rachhai ralüp ikha phiqhea achhai lüplüp doqsiqtlo.

¹⁵ Ngi raq kra ngamkaütiim blai kra liirat tiikang liipan niili, kra ajikom kaütiim ka jikom ashi ka tsangshiq ma siimko na ashi siimko na ashishi hiq na tiithantlo chhikang.

¹⁶ Kra ajikomblai kriika asham liima shamshi shi ikhli: Ajikom loweatek thun ka athii tsinhea phan longsengpo chhaitlaq ikha chhaitlo. Kiimaq ajikom blai kriika among tingting ba maq ajikom ashi shi hali tlatchhat rusansan triiwat saqsaq raüta ahai riito.

¹⁷ Krai mren, kra ajikom kaü tiim ka siimblai ri na, ümnüna kairo wa, kra phanphan, wiishak wiishoq akaiho nguli riitlo.

¹⁸ Kra ajikom kaütiim akii tro thun kriika amakpo tonglong maq adiim rat riito.

¹⁹ Ümtiikiiwa kra ngamkaütiim ka khum tlaq, kra ajikom kaütiim kriimin tsangshiq rai adam na khumrang rang khumdamtlo. Ngamkaütiim ka ra nü na tiido wan raüla, kra ajikom kaütiim kriimin, ra nü na tiido wan rangrang tiido wantlo.

²⁰ Kra ngamkaütiim ka tsangshiq raq aroro kiina akaiho nguli kihotlo. Kiimaq kra ajikom kaütiim riimin ngamkaütiim khumtlaq kra phan phan khumtlo. Jamkhano ngukla ngamkaütiim raq ajikom thun kra raptlo.

²¹ Kra ningkhan na, ngamkaütiim raq akhingtek na akhum riitlaq na, lo akhing riikitlaq akhing na, lo ra na tiido wantlaq akhing na lo, kra ajikom kaütiim ka ngamkaütiim raq athithi na khumtlo.

²² Kra ngamkaütiim khuthaq niika jamtam kaü wukhupong ka nyiimchhiipo kaü ikha kriika makse chathit chhaitlaq longseng maq aklo ikha chhaitlo.

²³ Kra jamtamkaü takiq na ngamkaütiim ka chap raq raq riito. Kiimaq tsang rakong wiinai ka tiipü raüta ratsii wiinai kriika adam na apaiq tho na siimhap ri na kaüshi shi chaptlaq rakong tsii wiinai kiijaq riithan saqsaq chaptlo. Kiimaq tsang rakong anai kriimiika tsangshiq maiqmii khum kra pang raq raq khea asam ikha samtlo.

²⁴ Ngi raq tsangshiq rakong maq abi sea lam maq trangraitlaq kra taikang. Kra trangwa trang ka khamjong chum tso blun wan raüjaq phiiptsi jiiptsi trang wan tlaq ikha amok dung dung trangtlo taikang. Kiimaq phenlabi pahea akong ada khum raüjaq hümok hiqmok wa wantlaq ikha trangtlo taikang. Kiimaq Ningkun Ajong Shiikeawe raq bom raüjaq amok dung dung hengtlaq ikha riito. Tsangshiq ka bimak she la khingki raüla, tsang rakong thun ka tsangkhum niishe kom thü baiqtlo.

²⁵ Shatmaq tsangshiq khuthaq na jamtam kaü khuthaq kriiwa atrang dongtlaq kriika trang ruqli trangtlo.

²⁶ Kra jamtamkaü thaq niika hokham ngacho ikha phanshi ra asi. Kra hokham ngacho ka saphir longseng maq alo. Kiimaq kra hokham ngacho thaq na ngatiwe ka maiqwe kaü ngochang chang ikha ngaraü riito.

²⁷ Kra maiqwe kaü ngochang chang kriika, akhum ka miiki watum mong na achaq henghea chhainyii nyii püraitlaq ikha riito. Kriika trotam na walü li wa ikha chaihea langlang chhairaitlo.

²⁸ Kra liliimtlaq kriika maitsai kaü na rong ümchuwa sitlaq kra thun kra chhaitlo. Kriika, Tatiwe asi nguta akhushü ngao liliim chhainyii tiichi riito. Ngi raq kra chhilata, ngi ka hiq na bumsaq bumkikang. Kiijiishe ngi raq maiqbom ashi raq