DANIEL 8 - ASII LAKDAP Bible (BSI)

Daniel Raq Riisham Mak Maq Skupongwe Nai Chhepongwe Chhito

¹ Hokhamwe Belshajar raq munglang wanli maq wiitsam she angu na, ngi raq riisham mak maq thongnai ngoja shammi makchhi hali chhinong kang.

² Riisham mak maq tiihanghiiqli ngi ka Elam wang nyungchong trotam maq kiitelong maq aruk Susa chela mong na riikang. Ngi ka Ulai jürai kii na chap raü riikang.

³ Kiimaq kra jürai kii na skupongwe ashi ka, arong ka anaijong kiimaq aluluwiq chhikang. Kriiwa ashiti ka alulin kiimaq anyelinlin riito.

⁴ Ngi raq skupongwe raq arong wiinai maq shenyap nünü kiina, kiimaq shekhu nünü kiina, kiimaq shemai nünü kiina juraüta, thaüpakpak thaürat wan tlo chhikang. Apaiq ka jamlai phan ngam riimin shiikhing lot mak riito. Kiimaq apaiq raq thaü wan tlaq ningkun kriiwiika, jamlai phan riimin akhum ka tiiwong lot mak riito. Apaiq raq jamkho thimi tlaq, kra phanphan klo wanto, kiimaq apaiq ka pinthum shiikongkhiq she shiikong wanto.

⁵ Ngi ka kra chhilata, jamlai wa ahiq nguta awang rai rashi hiqwea tiima rai tiikang liipan niili, shenyap mung nü kiiwa chhechhi pongwe ashi ka, phiqhea langlang, ahokphi ka hiq na than mak miili, abi ali saü wanto. Apaiq makpo wiinai hea wea na ajongwiq kaü arong ashi asi.

⁶ Apaiq ka ngi raq kongkhu miiphü achhiha skupongwe jüraikii na chaptlaq kra kaü phanü kiina aningkun wiita shoq raüta doq wanto.

⁷ Ngi raq apaiq raq skupongwe thaü rea kra liisiq kang. Apaiq tsankhiq ka henghea riito. Kriikha maq, apaiq raq skupongwe ka peatamtam raüta, arong wiinai ka tiingoqra thaübaiqto chhikang. Skupongwe raq apaiq ka tang mak riito. Krai mren apaiq ka hiq na tiikii miilii raüta hok maq nishishi thaübaiqto. Kiimaq apaiq tiichhiiketi ka jumin ahü riito.

⁸ Kra chhepongwe ka alachong dokdok pinthum shiikong siq wanto. Shatmaq apaiq ningkun jonglu henghea bala liipan niili, arong ka angoq she riikito. Kra rongchü chamchang ba kiijaq, ajongjongwiq rongnye rongblai she chamto. Kra rongblai chamtaq kriika, arong tsii thun ka, siimblai ri na tiinyi raqraq riito.

⁹ Ara rongblai phong arwa, arong ashi thaq kiijaq, rongranse ashi she cham wan nongto. Kra rongkaüti ningkun ka shemai nünü kiina, kiimaq shedong nünü kiina, kiimaq Kiq Akhamkuq Mungtan nünü kiina khat wan raüta jiiwanto.

¹⁰ Kra rongkaüti ka ramungtan phenlabi thun kriimin khatlotli chang she ningkun henghea she jawanto. Kiimaq ra wa raiqsaiq thun kiimin khatto. Raüta raiqsaiq thun wiijam ka mangjong hiq na tiidea tsuqbaiqto. Raüta apaiq raq tsangshiq ka hok maq nishishi nibaiqto.

¹¹ Kiimaq kriiraq ramungtan na siti Hokhamwese phenlabi thun kra dongdii min teimak khat wanto. Kiimaq Hokhamse ma ranaiqtek nyamse honglu takuqtlaq kriimin wiitashe tiithaq baiqto. Kiimaq Shomjam kra wiitashe tiishe baiqto.

¹² Maiqse raq ranaiqtek honglu ka riikhaqli asii thungtri maq kuq wan mak she riito. Raüta ngarai tang wanto. Kiimaq tingting kamasham lamphan ka hiqtili ikhli she shishe wanto. Kra rongkaüti ka apaiq raq jamlai phan wa kiimung wantlaq, kra apaiq raq siisaq tang wanto.

¹³ Kiijiishe ngi raq rase ashi raq rase ashi ma bom ka akha waito taikang, “Riita ara riisham mak maq tiichhikuq tlaq mra pin arka, ümtincho na saüli wa mipin wan? Ranaiqtek honglu kewan jaqsham ka, atinkhan abi riiqkhiq ngarai jaqsham maq ümtincho na saüli wa milai baiq wan? Kiimaq ramungtan phenlabi nai Shomjam ka ümtincho na saüli wa hok maq nishishi mihaihii wan?”

¹⁴ Kiijiishe rase ashiti raq, “Arka ranaiq 1,150 na saüli mitangta wan. Ara akhing bala na ranap nai raji honglu take wan ka tiikuq mak miraq. Kriijai miishetiq Shomjam na honglu ka mitiikuq wan,” nguta treto taikang.

Rase Gabriel Raq Riisham Makchhi Liichum Chongkuqto

¹⁵ Ngi raq kra riisham makchhi liichum kra jamlai wa riita ahiq nguta, rashi hiqwea chapa rai tiikang liipan niili, tiihanghiiq miili maiq weshi ikhaki na chapsaq chapkito.

¹⁶ Kiijiishe ngi raq Ulai rai reko maq maiqbom ashi raq akha riimtlo taikang, “Gabriel lei, apaiq ma ariisham mak maq jamlai wa chhitaq kra liichum ka chongkuq laq.”

¹⁷ Krai mren, Gabriel ka dongchhaq saüwato raüta itho na chapto. Kra chhilata ngi ka phiip raq tsaikang. Lata hiq na bumki tlii riikang. Apaiq raq ngi ma chongto, “Maiqse han-ngam hiqda lei. Kra liichum ka tak laq. Kra riisham makchhi ka phangthum wan akhing wa bom.”

¹⁸ Apaiq ka ngi rai riibomtlaq bala, ngi ka sunghü tsiihü she hiq na riwan kang. Shatmaq apaiq raq ngi ka ajaq maq kamsaq raüta tiidoto, raüta ihok maq tiichaptlii dokuqto.

¹⁹ Raüta nguto, “Ngi raq ümniima Shiikeawe tsankhiq tsingo ka jamlai wa miraq kra tiichhi kuq tiikang. Kra riisham makchhi kriika, phangthum akhing na seng raüta tiichhi kuqto.

²⁰ “Ümniiraq skupongwe khupo na arong anai chhilaü, kriika Media mungtan nai Parsia mungtan.

²¹ Kiimaq chhechhipongwe chhilaü kriika, Grik mungtan. Kiimaq amakpo wiinai liipan na arong ajong wiq ashi chhilaü kriika, Grik mung pengti aphashaqshaq hokhamwe kra.

²² Kiimaq aphashaqshaq acham arong kra tiingoq kai jai she, arong rongblai anye chamwan nongtaq kriika, kra Grik mung ka jaimaq, mungtan blai miishe mitiikhoki. Raüta hokham weblai riishe maiqmiimii mung she mipeng wan. Riita kra mungblai miishe tiikhokitaq kriika, apha na mung ashi maq siji na jamkho ningkun ajong riitaq, kiikhiika riimak she miraq. Tsangshiq ningkun ka ajom she miraq.

²³ “Kra mungtan thun ka then wan, akhing she saüwan raüla, tsangshiq ngarai ka ra ma hiq ma she miraq, tsangshiq raq mo ka hochang dongdii she miraq, kiimaq hokham weshi ka, atsan tsii wanshakshak, shotsan lumtsan, kiimaq laopha pinthum she midong wan.

²⁴ Apaiq ningkun phungchaq ka henghea miraq. Shatmaq apaiq ningkun miika riimak. Apaiq raq phiiptsi jiiptsi, maiqse kunkun mishthen baiq. Jamlai wa klotlaq kra, kunkun na miong wan. Apaiq raq ajong ala maiqse wiita, mishthen baiq. Kiimaq Shiikeawe sengi thun min, pahea mishthen baiq.

²⁵ Apaiq khonglaq mochii maq, laopha jaqsham jonghea mi ong wan. Apaiq ka ashkongtamli miraq, kiimaq achong aphan min ahü maq, maiqse pahea mitsat baiq wan. Apaiq raq hokham thaq na Hokhamwe kiimin, akhat riila nguta mingeng wan. Shatmaq apaiq ka mitsat baiq wan, Shatmaq maiqse jaq maq riimak.

²⁶ Riita ara ranap nai raji honglu kewan jaqsham riisham mak maq tiichhikuqto. Raüta chongkuqto. Arka tengteng miku wan. Shatmaq ümchaü ka apaü laütli thülaq. Jamkhano ngukla ara kupi wan miika rahiq luhea shaq dea asi.”

²⁷ Ngi ka rahiq ashaqpuq tsitsü min healot mang, tsaihü jihü sikang. Latiishe ngi ka tiido kang. Lata hokhamwe raq ngi ma jaqsham kuqtaq kriishe sham wan nong kang. Shatmaq ngi ka riisham makchhi kra tiima lata, rashi hiqwea, awang riikang. Kiimaq kra liichum ka tak lot mang riikang