DANIEL 7 - ASII LAKDAP Bible (BSI)

DANIEL RAQ APAIQ RIISHAM BOM CHONGTLO ( 7.1—12.13 ) Daniel Raq Riisham Mak Maq Ngamthaiq Kaüblai Chhito

¹ Bebilon mung langti hokhamwe Belshajar raq hokham jaqsham wan apha rawii na, ngi raq rawa ma ashi makang. Kiimaq kra rawa ma riisham mak maq rawa na phanshi ra chhikang. Kra ngi raq lak na waiqthükang. Kra rawa ma maq jamlai wa chhikang kra awaiq riithükang. Kra waiqthükang raüpot ka

² arthun ara riito: Rahai ka trotam maq haiwanto. Raüta sammoktra chum ka wiita brakshaq wanto.

³ Sammoktra chum mong wa jongheahea ngamthaiq kaüblai dong wanto. Kra kaüblai ka pongphan riiphan siisaq.

⁴ Apha shaqshaq kaü ka, hangsikaü sham ikha. Shatmaq liiha kaü ikha arakong asi. Ngi raq liirat tiikang bala liipan niili, arakong thun ka chatbaiqto. Raüta ngamthaiq kaü ka ado raüta maiq ikha tiichapto. Raüta apaiq miika maiqse khutsai she thiikuqto.

⁵ Kaünai ngojati ka chapbikaü ikha, awühok wiinai maq chap raü riito. Anübok niika, maiqsiim rii atsam kamraü. Kiimaq maiqbom ashi raq apaiq ma akha thaüto, “Bakphaq laq! Ngam ka ümchu phaq wa rotlaü phaq laq!”

⁶ Ngi raq kra liirea bala niili, ngamthaiqkaü ashi hali dong wan nongto. Kriika chiqwaiq kaü ikha. Shatmaq araikhü niika wushi rakong ikha, arakong blai asi. Kiimaq akhupo ka blai jong ri. Kiimaq apaiq miika arang akuq asi riito.

⁷ Ngi raq ara liirat tiikang liipan na hali, ngamthaiq kaüblai ngoja kra dong wanto. Kra kaü ningkun ka jonghea, liibi, kiimaq maiqkii maiqnyii. Awi thun ka jinwi. Ajong min jonghea. Kriimaq atra phan nyamse ka tiibun miilak kaqphaq tlo. Kiimaq ahok maq nishishi tsatbaiqtlo. Apaiq ka ngamkaü ahin kiikhiika riimak. Akhu na arong roqshi asi.

⁸ Ngi raq arong thun ka liirat tiikang liipan niili, ara arong phong mong na, arong aranse ashi hali cham wanto chhikang. Kra arongse raq, kongkhu wa arong phong kiiwa, atsam ka arangchong maq chatbaiqto. Ara rongti ka maiqmak ikha, amakpo min asi. Kiimaq anübok miika pinthum shiikong miilong bomtlo.

Rathup Raphawe Rung Na Chapto

⁹ Ngi raq liishat imakki na, hokham ngacho phong tiihongto. Rathup Raphawe ka, ngacho phong wa ashi na ngato. Apaiq dü na asam khea thun ka, tsak-hiiq ikha lüdiidiihea riito, kiimaq akhubin ka chiisan skurai ikha, lüdiidii hea riito; Apaiq hokham ngacho ka, watu jikom thaq na shongto, watum nyaitlaq ikha nyaitlo,

¹⁰ kiimaq kiiwa wa raisetiim thun ka phoktlo. Kiijaq apaiq shiililiiti maiq ahing amun, kiimaq apaiq rung na, maiq amun aseng chaptlo. Rung na khapho pha wanto, kiimaq lakdam kom phong pahea linto.

¹¹ Ngi raq kra liirat tiikang liipan niimin, arong aranseti riika tiitsaki ruqli kiimaq jaqrap jirap doqdit seali taikang. Ngi raq liirat tiikang bala niili, kaüblai ngojati ngamthaiqkaü ka tsatbaiqto. Raüta amaa ka watum na dobaiqto, raüta tiikhiim chaqbaiqto.

¹² Kiimaq ngamthaiqkaü ahinti ningkun ka anyea riihoto. Shatmaq tsangshiq ka akhing phanshi ri tiisi nong miitu atrali thüto.

¹³ Kra rawa ma riishammak maq chhitiikang liipan niili, Ngi raq maiqse ikha, apaiq ka phumda mong na, ngi phana akai rai chhikang, raüta apaiq ka pattup pat-sa sitiwe phana wato, kiimaq apaiq ka kriiwe phana shea wanto.

¹⁴ Apaiq ma arang, shreng, kiimaq hokham jaqsham ningkun kuqto. Krai mren maiqmung thun, maiqphan thun, kiimaq maiq phan phan bomti thun, wiita raq apaiq kli she minoq wan. Apaiq arang ka pattup pat-sa thummak miraq, kiimaq apaiq mungtan ka, ümtiikiimin thummak miraq.

Riisham Makchhi Liichum Chongkuqto

¹⁵ Ngi raq riisham mak maq kriithun ka chhilata, ngi ka ihai sito. Kiimaq kai chapa kang.

¹⁶ Ngi ka kiijaq maiq chaptlaqti phong kiina walata, weshi ma bomtsi liichum thun ka wiita chongkuq laq nguta waikang. Krai mren, apaiq raq ngi ma liichum ka chongkuqto.

¹⁷ Apaiq raq nguto, “Ara jongheahea ngamthaiq kaüblai arka, hokham ajong ajong weblai mangjong hiq na midong wan. Raüta mangjong hiq ka milang wan.

¹⁸ Kiimaq, Ajong Thaq Na Ajong Shiikeawe sengi raq, hokham jaqsham ningkun milap wan. Raüta mung ka pattup pat-sa misiq wan.”

¹⁹ Kiijiishe, ngi raq ngamthaiq kaüblai ngoja, kra kaü ka anok ikha riimak, aliilot chang riimak phiiptsi jiiptsi, kra kaü riika ngam thun ka akhang miiki khang, awi ka jin wi, kriimaq phiimsaqsaq bunlak buncha kaqphaq hotlo. Raüta arok arii tiibun miilak raüta ahok maq nishishi kaqphaq hotlo, kra liichum ka samhea sapha jaq nguta ritkang.

²⁰ Kiimaq ngi raq, akhupo na arong roqshi sitlaq kra, kiimaq jai maq apong wan, arong ashiti kriiraq, arong roqshi phong wa, rongtsam ngok baiqtaq kra samhea sap wan rokang. Kra rongti ka amakpo min asi, kiimaq anübok min asi. Kiimaq anübok maq pinthum shiikong tsütsittlo. Kra rongti ka arong ahinti thaq na phiiptsi jiiptsi chang riito.

²¹ Ngi raq liirat tiikang liipan niili, kra rong raq Shiikeawe sengi thun ka khat wanto. Raüta tsangshiq ka tangto.

²² Kiijiishe pattup pat-sa atrali sitiwe ka ki raüta, kha ka Ajong Thaq Na Ajong Shiikeawe sengi tlop na phokuqto. Shiikeawe sengi mungmaiqse raq Shiikeawe jaq wa hokham ma jawan aming lap wan akhing she saüto.

²³ Ngi ma kra liichum ka akha chongkuqto: “Ngamthaiq kaüblai ngojati ka, mangjong hiq na hokham jonghea blai ngoja midong, kra mungtan ka ahinti kiikha riimak, pong lin lin miraq. Kra hokhamwe raq mangjong tlotli, tiisiirai mishthen baiq, bunlak buncha hiqrai mishotbaiq.

²⁴ Arong roqshi liichum ka, hokham weroqshi midong. Raüta kra mungtan ka mipeng wan. Kiijiishe hokham weshi hali midong wan; apaiq ka kongkhu lak wa hokhambi, thaq na pong she midong. Kiimaq apaiq raq hokham wetsam kra mitiidea baiq.

²⁵ Apaiq raq Ajong Thaq Na Ajong Shiikeawe kra mishummii. Kiimaq Shiikeawe sengi wiita, hok maq nishishi mitiichamchao. Apaiq raq tsangshiq Shiikeawe, shomnoq thunglai nai poi tri thun ka, laibaiq wan mitan khan. Kiimaq Shiikeawe sengi ka, apaiq raq wiitsam ri wiithiq mijam sha wan.

²⁶ Kiijiishe ramungtan wa rung ka minga, Raüta apaiq kha ka mipho. Raüta apaiq ningkun ka anyea mirbaiq, raüta apaiq ka tiimiqchup mishthen baiq.

²⁷ Mangjong hiq wa mungtan thun ningkun, kiimaq tsangshiq jonglu thun ka, Ajong Thaq Na Ajong Shiikeawe, sengi miishe mikiinong kuqbaiq wan. Tsangshiq hokham jaqsham ningkun ka, ümtiikiimin thumki mak she. Kiimaq mangjong hiq wa hokham wiita raq, tsangshiq puk na nyap raüta, tsangshiq ka mishli wan.”

²⁸ Arshe riishammakchhi bomchong raüpot cheke thum. Ngi ka phiipraq tsaikang. Ithea ka lütaitai kiinyii kang. Kiimaq phanrap chhitai wan kang thun ka itsan mongniili shaq thükang.