DANIEL 6 - ASII LAKDAP Bible (BSI)

Daniel Tsea Miitu Thiikho Thuto

¹ Derias raq amungtan hamli na wanghuptibi shishi ri roqnai shong chang nguta thapthito.

² Kra tiitsuq ma, apaiq raq wanghuptibi tsii chongke miitu kiimaq hokhamwe jaqsham kra liiwan miitu, Daniel nai akongti wenai ka ngongwetiim ma shongto.

³ Krai mren, Daniel raq jaqlo liipan niili, akongti ngongwenai kiimaq wanghuptibi thaq na, ajaqsham ka pinthum athuk atsom sham raüta tiichhi kuqto. Apaiq ka anok thaq na pinthum asap atsin kra chhiraüta, hokhamwe raq apaiq ka amungtan hamli na ajong pinthum ngongwe ma shong wan miitu atsan na thapthi wanto.

⁴ Kiijiishe ngongwebi nai wanghuptibi raq Daniel tiideabaiq miitu, apaiq raq mung peng wan jaqsham tlaq kiijaq apaiq tiishut chang lampu she ritto. Shatmaq tsangshiq raq hummak dea. Jamkhano ngukla Daniel ka maiqkam sea chang kiimaq apaiq raq jamphan niimin shutphit mak kiimaq arot akiq klomak phan.

⁵ Kra ningkhan she, tsangshiq liipan na akha riibomto, “Nashiq raq Daniel ka apaiq Shiikeawe shomnoq tlaq kra tlea laita, apaiq shra chang lamlu ahin ka humlot mai.”

⁶ Kra ningkhan, tsangshiq ka hokhamwe rai riihum wa wawanto. Raüta akha nguto, “Hokhamwe Derias lei. Chaü lei, rilung alu maq silaq!

⁷ Naishiq tarü, ümmungtan kra pengti ngongwebi, wanghuptibi, wanghupti jaqthütibi, kiimaq ahin siihiipjongbi tarü kiqshi maq rilaita, bom ka akha riichong kai. Chaü lei, ümniiraq aming ashi tat laq. Laüta kra aming ka atsin maq mungmaiqse tarü raq lang raa nguta aming tat laq. Raroqtsam liipan na ümniika tlea raüta, maiq juwe riimin laihin phra shiikea jaq wa riimakla, maiq ahinti juwe jaq wiimin, achu jaü maimak. Jurwa ara aming jin jiiq, kriiti ka hangsikong bumchang khok mong kiijaq tiidea baiq ratlo.

⁸ Kra ningkhan, Chaü lei, ümniiraq aming ka kuqlaq. Laüta kra aming na khat laq. Krai mren, kra aming ka Medi mung na nai Parsia mung na tri raütu akhek ma tiija raatlo. Kra tri ka jurmin lai lot mak she miraq.”

⁹ Krai mren, Hokhamwe Derias raq kra aming ka khatto.

Daniel Ka Hangsikong Khok Na Tiideato

¹⁰ Riita, Daniel raq kra aming ka khatto she nguta tho lapto. Apaiq ka ajam na wawanto. Raüta apaiq jam rathong khok na kitanpu thun kilü tlinshat asi riito. Kra kitanpu thun ka Jerusalem chela nü na tiinyi raqraq riito. Kitanpu thun tlin shat kiijaq walili raüta, rahinjaq ratili na jamkho achu jaütlaq kiikha, ranaiqshi na jangtsamtsam kaütsrong na nga raüta Shiikeawe jaq wa achu jaüto.

¹¹ Riita Daniel ngengtibi raq apaiq raq Shiikeawe shomnoq rea kra chhito.

¹² Krai mren tsangshiq tarü ka kongshi maq hokhamwe phana Daniel shokwa wawanto. Raüta tsangshiq raq nguto, “Chaü lei, ümniiraq raroqtsam liipan na ümnaq tlea raüta, jurwa laihin phra tiikea jaq wa achu jaü jiiq, lo riimak la, maiq jaq wa achu jaü jiiq, kriiti ka hangsi kong sichang khobok mong kiijaq tiidea baiq raa,” nguta aming suhi laü ihata. Kiijiishe, “Tengto. Tri atsin maq aming akuq wan asi. Kriika Medi mung na nai Parsia mung na akhek tri raütu ashi she. Kriika jurmin klailot mak,” nguta Hokhamwe raq treto.

¹³ Kiijiishe tsangshiq raq, “Juda mungwa munglu shumwi ashea wan phong wa, Daniel raq, Chaü lei ümniika shreng mak. Kiimaq ümniiraq akuq haü aming kriimin lang mak. Apaiq raq ranaiqshi na thongtsam achu jaütlo,” nguta hokhamwe ma shokto.

¹⁴ Riita, ümtiikiiwa hokhamwe raq kra taitaq, atsan ka kai bito. Kiimaq apaiq raq Daniel ka tiichhiike miitu lamlu ka kai shiikut raüta ritto. Apaiq raq raji rashe nyap wan na saüli, lamlu ritto.

¹⁵ Kiijiishe kra maiqwere kong ka hokhamwe phana hali wanongto. Raüta apaiq ma akha, “Chaü lei, ümniiriiri asap haü. Medi mung na nai Parsia mung na hokhamwe raq aming jangshi she kuqtii miiphat, kriika klai baiq lot mak she,” nguta bom ka tiitsa nongto.

¹⁶ Krai mren she hokhamwe raq Daniel lapwa miitu aming kuqto. Raüta apaiq ka hangsikong khok mong kiijaq tiidea baiqto. Apaiq raq Daniel ma akha nguto, “Riita ümniika ümniiraq apaiq rai tiipumtlii laüta shomnoq tlaü Shiikeawe riitiq she dea mitiichhiikuq laq.”

¹⁷ Kra raütiishe, longkaü ashi maq kra khobok nüki ka sukbaiqto. Raüta kra longkaü pangchang thaq na, hokhamwe sil nai asengi aki miikiimbi sil kriimaq sanbaiqto. Krai mren, Daniel ka kra thiikhobok mong wa, maiq ahinti juwe riimin tiichhiikuq lot mak chang she longsha kilü ka sanbaiqto.

¹⁸ Kra raütiishe, hokhamwe ka apaiq sichang hokhamwe jam niishe jang wanto. Raüta kra rawa ka rawa waru akon min konmak riito, kiimaq jamlai phan min phaqsiq mak, kiimaq laihin polosea chang phan kiimin klo mak maq riito.

Daniel Ka Hangsikhok Wa Tiichhiito

¹⁹ Anap ranap chumiishe, hokhamwe ka tiidoto. Raüta khobok kiina taülaükhiq juto.

²⁰ Apaiq ka kiijaq saü wa raütiishe, kiinyiikhiq maq, “Daniel, atra Shiikeawe jaqshise lei! Ümniiraq apaiq rai tiipumtlii laüta shomnoq tlaü Shiikeawe raq ümniika hangsikong nübok wa tiichhiikuqto dea nya?” nguta Daniel ma riimto.

²¹ Kiijiishe Daniel raq treto, “Chaü lei, rilung alu maq silaq!

²² Shiikeawe raq arase tiiki raüta hangsikong nübok ka wiita phupbaiqto. Krai mren tsangshiq raq ngi ka kaqlot mak riito. Apaiq raq akha tiikhup wongkuqtaq arka, apaiq raq ngi ka maiqsang nguta asap. Kiimaq Chao lei, ngi raq ümniima jammin ashut klo mang.”

²³ Hokhamwe ka pinthum khoqriiqto. Kiimaq Daniel ka khobok mong wa tiidong hitlo ronglaq nguta aming kuqto. Krai mren tsangshiq raq apaiq ka khobok mong kiiwa ra niishe tiidong hitto. Raüta tsangshiq raq akhum na liikiita jamlai ami atsi min ahü riito. Jamkhano ngukla apaiq raq akhum ka Shiikeawe ma kiinong kuqto.

²⁴ Kiijiishe, hokhamwe raq Daniel ma kha nyantibi maiq thun ka wiitarü lap wa rongkiq nguta aming kuqto. Raüta tsangshiq ka tsangshiq chak asetiim wiita nongnong miishe lapho raüta, hangsikong raq ama sitlaq khobok mong kiiniishe dobaiqto. Tsangshiq ka hangsikhok shamong hiq na misaü shaq liipan kiiwiili, hangsikong raq phiim rang raüta, arok arii bunlak buncha kaqphaq hoto.

²⁵ Kiijiishe Hokhamwe Derias raq lak ashi waiq raüta, mangjong hiqraikhü na siti, maiqmung tlotli ma, maiqphan tlotli ma, kiimaq maiq aphan aphan bom tlotli ma, tiiho wanto. Lak ka akha waiqto: “Khu asang maq sirong laq!

²⁶ Ngi raq ara imungtan na siti mungmaiqse wiita ma, Daniel Shiikeawe kiima haisong tsantsii thü raa, kiimaq apaiq ka shreng raa nguta aming kuq tiikang: “Apaiq ka atra Shiikeawe, kiimaq apaiq riili pattup pat-sa, mung mipeng. Apaiq mungtan ka pattup thenki mak phan, kiimaq apaiq ningkun ka ümtiikiimin thummak phan.

²⁷ Apaiq raq khupwongtlo kiimaq chhiikuqtlo; Apaiq raq ramungtan na nai mangjong hiq na, amao chang nai awang chang jaqshamtlo. Apaiq raq Daniel ka hangsikong nübok wa, tiikaq mak tiichhiikuqto.”

²⁸ Krai mren, Daniel ka Derias raq mung langtaq pat na, kiimaq Parsia mung hokhamwe Sairas raq mung langtaq pat na pinthum chetchito.