DANIEL 5 - ASII LAKDAP Bible (BSI)

Belshajar Raq Phaqsea Poi Jonghea Kloto

¹ Rawashi Hokhamwe Belshajar raq phaqsea poi Jonghea kloto. Raüta kra phaqsea lomdamti aki miikiimbi hingshi tiiheato. Kiimaq tsangshiq wiitarü adam maq che nyangto.

² Tsangshiq ka che nyang lam maq, Belshajar raq awe Nebukadnejar raq Jerusalem Shomjam wa chaq nai kampho maq alo kok thun, nai nüchhong winpin kaütiim thun ahowan kra, lamwa rongkiq nguta aming kuqto. Hokhamwe raq kriithun tlamwataq kriika, asengi aki miikiimbi, kiimaq achaktiim, kiimaq achak nyungthap nyungre thun raq che tsümnyang ma nguta tlam wato.

³ Krai mren, tlothitli, chaq kok thun kiimaq nüchhong winpin thun kra lamkuq wato. Raüta tsangshiq tarü raq che ka kiijaq tsüm raüta nyangto.

⁴ Raüta chaq maq alo, kampho maq alo, miiki maq alo, jin maq alo, pe maq ahai, kiimaq long maq ahai phra sumla thun kra tiitsamkamto.

Khechong Na Awaiq

⁵ Kra liipan na tiihanghiiq miili, maiqjaq ashi ka hokhamwe jam khokmong khetuk na longnin win maq alorat kiijaq, lemtem thun nyaitlaq walü li raq chhainyiinyiihea tiichhishat ba kiijaq maiqjaq kriiraq lak waiqrea chhito. Kiimaq hokhamwe raq kra maiqjaq raq lakwaiq rattlaq kra chhito.

⁶ Kra chhiraüta athea ka lütaitai she mutkito. Kiimaq apaiq ka, kai akii anyii phiip raq atsai she riito. Alakü ka tiikhai rokrok she riito.

⁷ Apaiq ka agilülü she ashi ra raq mintin klotibi, along liitibi, kiimaq raiqsaiq jipi shammibi thun heaki rongkiq nguta siito. Kiimaq tsangshiq thun ka saüwa kiita, hokhamwe raq tsangshiq ma nguto, “Jurwa ara lakwaiq ara phat raüta, ngi ma liichum kra chongkuq lot jiiq, kriiti ka hokhamwe miirii samtongjong kaü mintiitii kra mitiisam kuq, kiimaq adang na shreng khushü chaq laktum mitlak kuq, kiimaq imungtan na mung langti aranghoti lombot tsam chaoki na mitiinga.”

⁸ Kiijiishe, hokhamwe danhonti thun ka kiijaq wato. Shatmaq tsangshiq phong wa jurmin kra awaiq ka phatkuq lot mak kiimaq hokhamwe ma liichum ka chongkuqlot mak riito.

⁹ Kriikha niishe, Hokhamwe Belshajar ka achapa tsi ma achu anü hamlak lak, atheaphi ka jajuk wan wan she riito. Kiimaq asenginok aki miikiimbi thun riimin apaiq ka khrum kuqlot mak, ümkhii ijasiq she riito.

¹⁰ Hokhamwe ma anyung jong raq, hokhamwe nai asengi aki miikiimbi riiriiq trang raitlaq kra taito. Raüta, apaiq kiimin phaqsea poijong klo tlaq khok kiijaq nyap wato. Raüta apaiq raq nguto, “Chao lei, rilung alu maq silaq! Ümniika akhü langlang ka naq kiinyiikhiq. Kiimaq ümchu ümnü hamlaklak ka naq chapakiq.

¹¹ Ara ümmungtan arjaq maiq weshi asi. Apaiq khum na asii phra tiikea kong wenyi asi. Man na ümwe hokham pat niiphü, apaiq ka atsii asi, phanrap saptsinti, kiimaq phra kong ikha anyan phaqchi sapti. Kriikha na, ümwe Hokhamwe Nebukadnejar raq, apaiq ka jaqliitibi, mintin klotibi, along liitibi, kiimaq raiqsaiq jipi shammibi khuthaq na akhupo ma shongto.

¹² Jamkhano ngukla, apaiq hon atsii ka tsaühea; kiimaq anyan phaqchi sapti; kiimaq rawama liichum chongke na asap atsin; kiimaq shiiwang bomtsi tiikho chongke saptsinhea; kiimaq amao chang jaqsham tru chongke na taksma. Apaiq mang ka Daniel; apaiq ka tiiheakikiq; hokhamwe raq apaiq ka Belteshajjar nguta mangto. Kiimaq apaiq raq kra liichum ka ümniima michongkuq.”

Daniel Raq Lakwaiq Liichum Chongkuqto

¹³ Kiijiishe, Daniel ka hokhamwe rungkhok na tlothit tiishea wato. Kiimaq hokhamwe raq apaiq ma nguto, “Riita, iwe hokhamwe raq, Juda mung wa Jehudiwe munglu shumwi ashea wanwe Daniel ka ümniidea shea?

¹⁴ Ngi raq ümkhum na phra kong wenyi ka asi; kra ningkhan ümniika phanrap na asap atsin haü siisaq; kiimaq phanrap phaqchi nai anyan phaqchi ka asap haü siisaq nguta taikang.

¹⁵ Ngi raq danhontibi, kiimaq mintin klotibi thun ka ara maiqjaqwaiq kra phatkuq ronglaq lanta kra liichum ka ngi ma chongkuq ronglaq nguta tiihea wakang. Shatmaq tsangshiq raq kra liichum ka humlot mak.

¹⁶ Shatmaq ümniiriika phanrap apaü raüta athü liichum michongkuq lot haü; kiimaq amao chang jaqsham kra michongkuq lot haü nguta taikang. Ümchaü min, ara tiiwaiqtlaq kra phat laüta, liichum ka chongkuq haü jiila, ümniima hokham miirii amin samtong jong kra mitiisamkuq, kiimaq ümdang na shreng ajong chaq laktum kra mitlak kuq; kiimaq ümniika ara imungtan arjaq, ijaqtakiq na ajongwe lombot tsam ngachang niishe mitiingaha.”

¹⁷ Kiijiishe, Daniel raq treto, “Ümkongphiq thun ka, ümniiriili thülaq, riimakla kriithun ka maiq ahinti ma kuqlaq. Ngi raq Chaü ma kra jaqwaiq ka miphatkuq kang. Lata liichum ka ümniima michongkuq kang.

¹⁸ “Ajong Thaq na Ajong Shiikeawe raq ümwe Nebukadnejar ka wiitarü thaq na ajong pinthum hokham ma shongto. Raüta apaiq kharü kiimaq angao jonghea kuqto.

¹⁹ Apaiq ka pinthum jonghea kha maq, mangjong hiq wa maiq mung thun, maiqphan thun, kiimaq maiq aphan aphan bomti thun tarü ka apaiq ma ahai rakrak kiimaq pinthum phiipkhiq siisaq sito. Apaiq raq juwa atseabaiq tiima tlaq, kriiti ka tsatbaiqto; kiimaq apaiq raq juwa atra tiisi lungwii tlaq, kriiti ka atra tiisi wanto. Apaiq raq juwa ashreng rotlaq, kriitika shreng wanto. Kiimaq apaiq raq ümriiti wa ashummii chang nguta tiima tlaq, kriiti ka shummii wanto.

²⁰ Shatmaq, apaiq ka shiikonghea she, wanshakshak, kiimaq maiq ka ji maq nishishi haihü wanto; kriikha niishe apaiq ka hokham ngachang wa lambaiqto. Raüta apaiq khushü jong ka mokito.

²¹ Raüta, apaiq ka maiqse phong wa ajoshe riibaiqto. Raüta apaiq tsantsii ka ngamtsii miishe jakito. Apaiq ka rumnyamse kumtoq kong rai she sito. Raüta minsaü pong we ikha nyiimjaq phaq raüta sito. Kiimaq hiqsii thung niilishe bumto. Kiimaq bangkham sa wa akhum tiikhe chang khea min ahü maq sito. Atiisup niishe, apaiq raq Ajong Thaq Na Ajong Pinthum Shiikeawe riili dea mangjong hiq wa maiqse angu honyung hokhambi thun kra pengtlo; kiimaq apaiq raq juwe ma kero wa, kriiwe ma hokham jaqsham kuqtlo ngutiishe sapto.

²² “Shamtaq, ümniika ase kra taü miidea min, kiimaq krii thun mra pin wantaq kra sapshatshat taü miimin, ümtsii chhi laüta aran ma jamaü riitlaü.

²³ Ümniiraq ramungtan na siti Shiikeawe shummii tlaü! Laüta apaiq Shomjam wa alam wan kok nai nüchhong winpin thun kra tlam wa laü. Laüta ümnaq nai ümsengi aki miikiimbi, ümchaktiim, kiimaq ümchakliip nyungtiim raq, kra kok thun kiijaq che tsüm nyang lanta, sumla phra kong; chaq maq alo, kampho maq alo, miiki maq alo, jin maq alo, pe maq ahai, kiimaq long maq ahai sumla phra thun; amak maq chhimak; ani maq taimak; kiimaq jamlai min sap mak thun kra tiitsam kamtlan. Shatmaq, ümtsitsü phansangketi, ümtsitsü raü shamti, ümniiraq jamlai wa klo wantlaü kra kunkun peng raüta thapthiketi Shiikeawe ka shreng maü riilaü.

²⁴ Arningkhan tiina, Shiikeawe raq maiqjaq ashi tiiki raüta ara bomtsi tiiwaiq kitaq ara.

²⁵ “Kra bomtsi ka akha waiqto: ‘MENE, MENE, TEKEL, kiimaq PARSIN.’

²⁶ Kra liichum ka ara: MENE, Shiikeawe raq ümmungtan rahiq ka weaje she. Raüta tiithum baiqto she;

²⁷ TEKEL, ümniika kappe maq shinje she kiimaq tok ka ngin maü dea ajom;

²⁸ PERES, ümmungtan ka atiikhoke wishe, raüta Medis mungti nai Parsia mungti ma achumke wishe.”

²⁹ Kiijiishe, Belshajar raq asenginok ma aming kuqto, krai mren Daniel ma samtongjong mintiitii kra tiisamkuqto, kiimaq adang na chaq sairaütum kra tlak kuqto, raüta apaiq ka amungtan na hokham ngacho lombot tsam na tiingato, raüta chiiriim raüta mungmaiqse ma tiitai ronglaq nguta aming kuqto.

³⁰ Kra rawa akhing niili, Bebilon mung hokhamwe Belshajar ka re raq tsatbaiqto.

³¹ Kiimaq Medi mungti hokhamwe Derias, apaiq ka kra akhing na arawii wiiroqtrok ri wiinai she kriiraq hokham ngachang ka jiiwanto, raüta mung ka lang wanto.