DANIEL 4 - ASII LAKDAP Bible (BSI)

Nebukadnejar Raq Jangnai Ngoja Rawama

¹ Hokhamwe Nebukadnejar raq maiqmung thun ma, maiqphan thun ma, kiimaq maiq aphan bom thun, mangjong hiq na siti tlotli ma tsütsa ka akha tiiwanto: “Namshiq tarü ma khu asang mirlaq!

² Ngi ma Ajong Thaq Na Ajong Shiikeawe raq amao chang kiimaq awang chang jaqsham thun tiichhikuqtaq kra chong tiikang tai ronglaq.

³ “Shiikeawe raq amao chang jaqsham jonghea, nashiq ma tiichhikuqtlo! Apaiq raq awang chang jaqsham, ningkun henghea maq shamtlo! Shiikeawe kli pattup pat-sa miitu hokham, Apaiq riili pattup pat-sa mipeng wan.

⁴ “Ngi ka ihokham jamjong na chamtraq peokhiq chiithejong siwan kang.

⁵ Shatmaq ngi raq rawa ma ashi akon lam maq maiqphiip maiqjiip makang. Kiimaq riisham mak maq pinthum akiinyii chang chhikang.

⁶ Kra ningkhan, ngi raq isengi Bebilon mung wa hokham rung na tsii chongketi thun kunkun, ngi phana tiihea kang, tsangshiq raq ngi ma rawama liichum ka michongkuq laq nguta.

⁷ Krai mren, maiqjaq liitibi, mintin klotibi, along liitibi, kiimaq raiqsaiq jipi shammibi thun wiita iman na triitam kang. Lata ngi raq tsangshiq ma ima kra chongkang. Shatmaq tsangshiq raq ima liichum ka chongkuq lot mak riito.

⁸ Kiijiishe Daniel ka ipha na wato. (Apaiq mang ka Belteshajjar ngutiimin ngutlo, kriika iphra kaü mang.) Apaiq khum niika asii phrakaütiim wenyi asi. Kriikha na ngi raq apaiq ma ngi raq ima jamlaiwa makang kra chongkang. Ngi raq apaiq ma akha ngukang:

⁹ Belteshajjar, jaqliiti tarü thaq na ajong maiqlawe lei, ngi raq asapha asii phrakong wenyi ka ümkhum na asi. Kiimaq ümniiriika amao chang jaqsham wiita asap haü. Riita, ngi rawa ma ka ara. Kra liichum ka jamlai wa ngi ma chonglaq:

¹⁰ “Ngi ka ichang na akon riikang. Akon lam maq riisham mak maq akha chhikang. Mangjong hiq raikhü mong ba na, pechong jonghea ashi chhikang.

¹¹ Kra chongka jonghea luhea jongwanto. Achong mun ka ratsan na saüli riito. Kra chong ka mangjong hiq trotam maq, maiq wiitarü raq rashra chhi chang she riito.

¹² Ajaq aji shamhea shamjü, akü ako atsi ango hiq ma ra ma. Mangjong maiqse raq phaqsea rii hongli riito. Rumnyamse anyang mong na bumto, wushikong raq atsung mong na achü haitlo, atra nyamse phan wiita raq, atsi phaqsiqto.

¹³ “Ngi raq kra riisham makchhi kra shiwea sea bala niili, ngi raq rase ashi tsangrong tsangra ramungtan wa asatkai chhikang.

¹⁴ Apaiq raq tiihong raüta agilülü akha riimto: ‘Pechong ka daqbaiq laq. Laüta akü ako thun ka wiita tapbaiq laq; ajaq thun ka wiita tapbaiq laq. Laüta atsi thun ka wiita wanbaiq laq. Achongtong wa nyamse thun ka, tiipin jobaiq laq. Atsung mong na tiiti wushi kong ka, wiita tiipin jobaiq laq.

¹⁵ Shatmaq achongkhuk ka tiichapshat li thülaq. Jin nai koti maq alo jinraü maq ban laüta, hiq na sangphii rü thaq niili baiqthü laq. “ ‘Kiijaq apaiq ka rawa bangkham roktlaq kriiraq, jobaibai ümpiim laq. Raüta apaiq ka rumnyamsekong nai wushikong rai misi laq.

¹⁶ Kiimaq akhutsai ka wiimiishi na saüli, maiqse khutsai ka riimak she miraq, shatmaq rumnyamse khutsai miishe mijaki laq.

¹⁷ Arka tsangrak maq khebomti rasetiim raq, khatan tri raütu ashat thü. Arka maiqse angu wiita raq, ratsan ramong nyang na siti, Ningkun Ajong Shiikeawe raq, mangjong maiqse kunli, hupkhangtlo nguta misap laq. Apaiq kli honyung hokham shongti, wepuq wese miili jiimin wela jaqshamke, apaiq raq thithi.’

¹⁸ “Ngi raq rawa ma ka ara ma kang,” nguta Hokhamwe Nebukadnejar raq nguto. “Riita, Belteshajjar lei, ümchaü min, ngi ma kra liichum ka chongkuq laq. Iwokhong na siti isengi ngi danhontibi raq jurmin ngi ma ara chongkuq lot mak. Shatmaq ümniiriika milot haü, jamkhano ngukla, ümkhum na asii phra kong wenyi asi.”

Daniel Raq Jangnai Ngoja Rawama Liichum Chongkuqto

¹⁹ Kiijiishe Daniel, apaiq ka Belteshajjar ngutiimin ngutlo, ka anü maq abom min donglot mak, akiinyii rai nai atiirai she riito. Kra chhiraüta hokhamwe raq apaiq ma nguto, “Belteshajjar lei, ara rawama kra tailaüta nai kra liichum ka chhilaüta, ümniika naq kiinyiikhiq.” Kiijiishe, Belteshajjar raq treto, “Chaü lei, ngi raq tiima kla ara rawa ma kra nai kra liichum ka ümnaq miitu riimak, ümjaqtibi miitu, nguraüjaq ahea riichang nguta tiima tiikang.

²⁰ Pechong kaü, jonghea ratsan ramong nyang na saülili, mangjong hiq tlotli maq maiqse wiitarü ma rashra tiichhitlo.

²¹ Ajaq thun ka aliisea ma tsomhea, kiimaq atsi ango ka atu alu, mangjong hiq na siti wiitarü khamli dunghiq wanli chang asi. Rumnyamse kong ka achongtong na bumsiqtlo. Kiimaq atsung mong na wushikong raq achü haitlo.

²² “Chaü lei, kra pechong ka ümnaq. Jonghea luhea kiimaq ningkun jonghea sitlaü. Ümniika jonghea pinthum she jong wan laüta ratsan ramong nyang na saüli she saülaü. Kiimaq ümningkun jonglu kiimin mangjong hiq wiita hamli she ham wanto.

²³ Chaü lei, ümniiraq kra pechongkaü ka liisea rea liipan niili, ramungtan wa rase ashi satki raüta akha nguto, ‘Pechong ka daqbaiq laq. Laüta wiita tiithen baiqlaq. Shatmaq akhuk ka hiq na tiichapshatli thülaq. Achongkhuk kiijaq jin nai miiki maq alo jinraü maq banthü laq. Laüta kra achongkhuk ka sangphii rü niili baiqthü laq. Raüta ra wa na bangrok tlaq kra arwe dü na misa laq. Raüta apaiq ka kiijaq nyamse kong rai wiimiishi ümsidam laq.’

²⁴ “Kra liichum ka ara. Chaü lei, arka ratsan ramong nyang na siti Ajong Thaq Na Ajong Shiikeawe raq, ümkhuthaq na khatan tri raütu shat thüto.

²⁵ Ümniika maiqse phong wa, ajoshe mirbaiq. Raüta ümniika rumnyamse kong rai she misidam haü. Rawii wiimiishi na saüli, ümniika minsaüpongwe ikha sangphii phaq laüta misihaü. Laüta hiqsii thung na mikon haü. Kiijaq ra wa bangkham ka ümkhum na mirok. Kiijiishetiq ümniiraq Ajong Thaq Na Ajong Shiikeawe riili dea, maiqse angu hokhambi mangjong na sitlaq kra pengtlo. Kiimaq mangjong hiq na hokham jaqsham ka apaiq raq ümriiti ma kewa lungwii tlaq, kriiti ma kuqtlo nguta misap haü.

²⁶ Rase raq pechong khuk ka hiq na kiikhiili thüronglaq nguta aming kuqto. Kra liichum ka ümra akhing niiwa ümniiraq ümtsan mong na, ara mangjong hiq tlotli arka Shiikeawe riidea rümtlo ngutiishe mitum haü, kra akhing niishetiq, Shiikeawe raq ümniika hokhamwe ma hali mishong nong.

²⁷ Riita kra ningkhan, Chaü lei, ngi raq tsii chongtiikang ara lang laüta silaq. Ngarai naq tangkiq she. Tingting kappe kriili lang laq. Kiimaq miitsan maiqse ka mangchan laq. Kra klo haüla, ümniika chiithe arong awin ma tiija wan ruq miraq,” nguta Daniel raq nguto.

²⁸ Riita, arthun mra arka Hokhamwe Nebukadnejar rilung na wiita dea hongtha wanto.

²⁹ Jipi lüroqshi ri lünai jai miili, apaiq ka Bebilon mung na asichang hokhamwe kiitelong jam wukhu na akhumsea riito.

³⁰ Kiitiikaq apaiq raq akha nguto, “Liilaq! Bebilon mung ka ümtinkhan jongwa! Ngi raq ara Bebilon mung nyungchong ma tei wan kang. Lata iningkun jong nai iphen rung jong hongla kra tiichhikuq tiikang. Kiimaq ikhushü jonglu nai imangchong tsa jonglu kra tiichhi tiikang,” nguta tiishom ra siqto.

³¹ Apaiq nübok wa bomtsi ka mithum shaq niili, ramungtan wa maiqbom ashi akha saükito, “Hokhamwe Nebukadnejar lei, ngi raq jamlai wa ngutiikang ara tai liishaq! Ümchaü ümjaq wa hokham jaqsham arang ka nyeabaiqto she.

³² Raüta ümniika maiqse hiqshong wa ajoshe mirbaiq. Raüta rum nyamsekong rai she misi haü. Kiimaq minsaü pongwe ikha, rawii wiimiishi na saüli, rum wa sang kra phaq laü tiishe misi haü. Kiijiishetiq, ümniiraq Ningkun Ajong Shiikeawe riidea mangjong hiq raikhü na maiq mung ümchuwa diimtlaq kra rümtlo nguta misap haü. Kiimaq apaiq raq juwa lungwii tlaq, kriiti ka hokhamwe ma shongtlo nguta misap haü.”

³³ Riita kra khatan bomtsi ka tlothitli ku wanto. Nebukadnejar ka maiqse phong wa jobaiqto. Raüta apaiq raq minsaü pongwe ikha sangphii ka phaqto. Bangkham ka akhum na sato. Kiimaq akhubin ka liiha kaü bin ikha aluwiq riito. Kiimaq ajaq san thun kiimin wushi kong khang ikha aluwiq riito.

Nebukadnejar Raq Shiikeawe Tiitsamto

³⁴ “Rawii wiimiishi thumjai niishe,” nguta hokhamwe raq nguto, “Ngi raq ra nü na liikang. Kiimaq isung itsii ka atsangshe riiwan nongto. Krai mren, ngi raq Ningkun Ajong Shiikeawe ka tiitsamkam kang. Kiimaq ngi raq pattup pat-sa atra siti Shiikeawe ma akha shreng manto kiimaq khushü tiijong kuqkang: “Apaiq raq mangjong maiqse, pattup pat-sa milang wan, kiimaq apaiq hokham jaqsham, ümtiikiimin thummak phan.

³⁵ Apaiq maklii na mangjong maiqse ka, hiqtilise ikhli liitlo; ramungtan na siti rasetiim nai, mangjong hiq na siti maiqse, apaiq jaqkhon mong na thütlo. Apaiq raq jamlai wa thapthi tlaq, juwe riimin tangta lot mak, kiimaq jurmin apaiq ma wailot mak.

³⁶ “Ümtiikiiwa isung itsii ka tsangriri she tsang wan nongtaq, ngi ma shreng manto, imang chong jong, kiimaq imungtan jonglu khushü kra kunkun ngi ma hali jangkuq nongto. Iwokhong na siti, ajong alabi raq, kiimaq aki miikiimbi thun raq, ngi ka tao wan nongto. Raüta ngi ka hokham ngacho na hali tiinga nongto. Raüta ngi ma hokham ningkun nai arangho ka, kongkhu lak wa kriithaq na apalin she tiitsuq kuq nongto.

³⁷ “Riita, ümchaü sanha, ngi Nebukadnejar raq Sanseng Ramungtan na siti Hokhamwe kriili she tiitsam tiikang, shreng tiikang, kiimaq apaiq khushü kra tiijong tiikang. Jamkhano ngukla, Apaiq jaqsham kaiwa ka tingting, apaiq tri raütu kappe khaqkhaq, kiimaq apaiq raq kumrong kumraq maiqse ka, anun pinthum ma tiijabaiqtlo,”