DANIEL 3 - ASII LAKDAP Bible (BSI)

Chaq Sumla Kra Noqraa Nguta Aming Kuqto

¹ Hokhamwe Nebukadnejar raq chaq maq maiq sumla ashi tloto. Adiilu nü na mitar roqnai ri mitar miishi. Ajong nü na mitar tsam tin riito. Raüta apaiq raq kra sumla ka Bebilon mung na Dura tan na tiinga shongto.

² Kra raütiishe, hokhamwe raq asengi thun ka tlotli, aki miikiimbi, wanghuptibi, wanghupti jaqthütibi, honghuptibi, kamphotiip khetibi, phowebi, thungtri shamtibi, kiimaq mung jaqshamti siihiipbi thun wiita adam na thungraa nguta aming kuqto. Tsangshiq ka Hokhamwe Nebukadnejar raq maiq sumla kaü shongtaq kra kiinongke wan thatsang poi kra lomdam raa nguta tiiheato.

³ Raüta ümtiikiiwa kra ajong alabi ka kra kiinongke wan poi kra lomkai thungtaq raüta kra sumla khaki niishe chaptaq,

⁴ kra akhing na, agilülü chiiriim raüta akha chongto, “Maiqmung wiitarü, maiqphan wiitarü, kiimaq maiqphan bom wiitarü!

⁵ Namshiq raq lerongtsü ka mitaihan, kra jai na tulu chü tsü, torokong tsü, torojong tsü, kiimaq phaqlamtoro thun tsü; kiimaq kra jai na tiijorot laihin atsü angii chang phan kriishe tsü trang mitaihan. Kra ashi ange tsütrang kriishe taihanla, namshiq ka Hokhamwe Nebukadnejar raq shongtaq chaq sumla khaki na bumrang lanta minoqhan.

⁶ Jurwa bumsaq raüta shomnoq mak riijiiq, kriiti ka tlothitli watum khok henghea tiinyai chaqje mong na mitiidea baiq.”

⁷ Krai mren, tsangshiq raq atsü angii trang kra tai raüta, maiq mung wiitarü, maiq phan wiitarü, maiqphan bom wiitarü raq bumrang riito raüta, chaq sumla Hokhamwe Nebukadnejar raq ashong kra shomnoqto.

Daniel Kongtitiim Wetsam Hokham Aming Jinto Nguta Shrato

⁸ Kra akhing na Bebilonnok maiq wiijamti raq Jehudinok tiishut miitu lamlu humto.

⁹ Krai mren, tsangshiq raq Hokhamwe Nebukadnejar ma chongto, “Chaü lei, rilung alu maq silaq!

¹⁰ Chaü lei, ümniiraq aming ashi kuqlaü, paimin toro tsütrangho raüla, maiq wiitarü raq hiq na bumrang raüta chaq sumlakaü kra shomnoq raa,

¹¹ kiimaq jurwa hiq na bum raüta shomnoq mak, kriiti ka watum kaü henghea nyairai tlaq mong na dobaiq raa nguta aming kuq laü ihata.

¹² Riita, ümchaü min, Jehudinok maiq wiijamti ümniiraq Bebilon mung thaq na tuwejongbi ma ashong haü, Shadrakh, Meshakh, kiimaq Abednego, tsangtsam raq, Chaü lei ümniiraq akuqhaü aming lang mak tleatlo. Tsangtsam raq üm phra ka shomnoq mak. Kiimaq ümniiraq ashong haü sumlakaü khaki na bum raüta noq mak.”

¹³ Kra tairaüta, hokhamwe tsankhiq ka wak chaq walüwa ikhiishe phok wanto. Kiimaq apaiq raq tsangtsam ka apaiq phana tiiheakai miitu aming kuqto.

¹⁴ Apaiq raq tsangtsam ma akha nguto, “Shadrakh, Meshakh, kiimaq Abednego, namtsam raq ngohea shaqshaq shea, iphra kaü ka shomnoq man kiimaq ngi raq chaq sumla phrakaü shongkang kra khaki na bumlantiimin noq man?

¹⁵ Riita, ümchaü min, namtsam raq lerong, tulu, torokong, torojong, phaqlamtoro, kiimaq laihin atsüngii chang phan thun tsütrang kra taihanla, hiq na bumrang lanta, sumla phrakaü ka noq ronglaq. Kra riiman hanla, jaqlo thitli, namtsam ka watum kaü henghea nyaitlaq mong na mitiidea baiq. Kra watum mong wa namtsam tiichhiiketi ashi ra shiikeawe ka asi ngutiisha tiimatlan?”

¹⁶ Kiijiishe, Shadrakh, Meshakh kiimaq Abednego raq treto, “Chaü lei, ara miitu ka naitsam raq maiqmii khum tiikhe bom chang ka ahü.

¹⁷ Riita, ümchaü min, naishiq raq shomnoq tiikai Shiikeawe raq, naishiq ka ara watum mong wa michhiilot, kiimaq ümjaq khon mong wa mitiichhii lot jiika, apaiq raq mitiichhiikuq.

¹⁸ Shatmaq, apaiq raq naishiq ka tiichhiikuq mak li jiimin, Chaü lei, naishiq raq ümphrakaü ka shomnoq mai. Kiimaq naishiq ka hiq na bum laita, ümniiraq chaq sumla shong laü kra khaki na bum laitiika noqmai.”

Daniel Kongti Wetsam Ka Atsea Chang Nguta Kha Tanto

¹⁹ Kiijiishe Nebukadnejar tsankhiq ka, amok riidungli phokto. Kiimaq Shadrakh, Meshakh, kiimaq Abednego ma atsankhiqtsi ma atheaphi ka ashiila anyaq liishe riito. Krai mren, asengi ma watum ka rahinjaq chaq tlaq kriithaq na lakmiishi achan aheng tiike chaq ronglaq nguta aming kuqto.

²⁰ Kiimaq asengi phenlabi phong wa kuila jongbi kiima tsangtsam ka raümaq tep tiikhato. Raüta watum nyairaitlaq nübok kiina dobaiq ronglaq nguta aming tatto.

²¹ Krai mren, tsangshiq raq tsangtsam ka, miirii samtong, samtongjong kaütiim, kiimaq khuphok thun kriimin wiita samraq chhaq miili raümaq khabaiqto. Raüta tsangtsam ka watum henghea nyaitlaq kra mong niishe dobaiqto.

²² Riita, hokhamwe raq aming ka tsinhea ke kha maq, watum kriimin pinthum henghea tiike chaqto. Kriikha na, watum mong wa walü lap henghea nyaitlaq kriiriili, maiq wetsam ka watum mong na dobaiqti kintsongtibi ka wa raq wiita khiim baiqto.

²³ Kiimaq, Shadrakh, Meshakh, kiimaq Abednego kiimin raü maq tiikha shatmiili watum nyairai tlaq wacha mong na dea wanto.

²⁴ Kiijiishe tiihanghiiq miili, Nebukadnejar ka akii anyii lam maq chaphiiq tiidopot chapkito. Raüta apaiq raq asenginok siihiipjongbi kiima, “Riita nashiq raq maiq wetsam ka raü maq tep khalaita watum nyairai tlaq mong na dobaiq kai riimak shea?” nguta waito. Tsangshiq raq treto, “Chaü lei, tengto, Nashiq raq raü maq khalaita dobaiqkai.”

²⁵ “Riita ikhiijiika, ngi raq maiq weblai jongri watum mong na akhumsea chhitiikang ahata?” nguta apaiq raq waito. “Tsangshiq ka khahü. Kiimaq tsangshiq khum na wakhiim tsi min ahü. Kiimaq weblai ngojawe ka rase ngochang chang ikha tiichhitlo.”

Tsangtsam Ka Tiidong Raüta Mungtubi Ma Shongto

²⁶ Kiijiishe, Nebukadnejar ka watum khok nyairaitlaq kilü kiina ra na wato. Raüta tiihong raüta, “Shadrakh! Meshakh! Abednego! Ajong Pinthum Shiikeawe sengi! Kinphai na dongki rongkiq!” nguta heato. Kiimaq tsangtsam ka watum mong wa donghosaqli dongkito.

²⁷ Kiijiishe, hokhamwe sengi aki miikiimbi, wanghuptibi, wanghuptibi jaqthüti kiimaq ahinti siihiipbi thun wiita adam na riitam raüta, wa raq khiimmak dea, maiq wetsam khum kriishe liito. Tsangtsam khubin kiimin ralang min khiim mak, tsangtsam khea thun kiimin khiim mak, kiimaq tsangtsam khum na ralang wakhuk tsang min ahü riito.

²⁸ Kiijiishe, hokhamwe raq nguto, “Shadrakh, Meshakh, kiimaq Abednego Shiikeawe kli tiitsam ronglaq! Apaiq raq arase tiiki raüta, apaiq shomnoqti kiimaq apaiq ma kamti, arwetiim ara tiichhiikuqto. Tsangtsam raq, ngi aming ka jinto. Raüta tsangshiq miisaq ka maiqmii jaqphi na chiim raüta, tsangshiq Shiikeawe kra tlea raüta, laihin phra khaki na bum mak riito kiimaq noq mak riito.

²⁹ “Riita, arningkhan, ümchaü sanha, ngi raq aming kuq tiikang, ümra mungti riiwa, junok phan riiwa, lo junok phan bom riiwa, Shadrakh, Meishakh, kiimaq Abednego Shiikeawe ka shreng mak maq bomjiiq, kriiti ka ahok ajaq pongpan riipan, chaiham chaihea tseabaiq ratlo. Kiimaq apaiq jam ka botkhulai rai shotbaiq wantlii, shiithen baiq ratlo. Jamkhano ngukla, atinkhan tiikhup wongketi ahin shiikea phra ka ahü!”

³⁰ Kiimaq, hokhamwe raq Shadrakh, Meshakh, kiimaq Abednego ka Bebilon mung na kongkhuwa kriithaq na ajong miishe shongto.