DANIEL 2 - ASII LAKDAP Bible (BSI)

Nebukadnejar Rawama

¹ Nebukadnejar ka hokham jawanli maq wiinai she angu na, apaiq raq rawa ma ashi mato. Kra ama raq apaiq ka kai tiichapato kiimaq akon min tsimak she riito.

² Kriikha niishe apaiq raq asengi maiqjaq liitibi, mintin kloti, maiqwuqtibi, kiimaq along liitibi thun ka waraüta apaiq rawa ma liichum ka michongkuq laq nguta tiiheakito. Krai mren tsangshiq ka saüwa raüta hokhamwe man na chapto.

³ Kiimaq apaiq raq tsangshiq ma akha chongto, “Ngi raq rawa ma ashi makang. Kra miitu pinthum chapa tiikang. Kra liichum ka ngi raq sap rotiikang.”

⁴ Kiijiishe tsangshiq raq hokhamwe ma Arab bom maq treto, “Chaü lei, rilung alu maq silaq! Ümma ka naishiq ma chonglaq. Raüla naishiq raq kra liichum ka michongkuqkai.”

⁵ Kiijiishe hokhamwe raq tsangshiq ma nguto, “Ngi raq ikhutsai na bom ka ashatthü wishe, namshiq raq ima kra chongke ratlo kiimaq kra liichum ka jamlai wa, kra ngi ma chongke ratlo. Kra chongkuqlot man riihanla, ngi raq namkhum ka kholam kholiiq, pongpan riipan mitiichai baiqha. Kiimaq namshiq jamthun ka wiita botkhulai rai mishot baiqha.

⁶ Shatmaq namshiq raq ngi ma irawa ma kra jamkho makang, kiimaq kra liichum kla chongkuq han jiila, ngi raq namshiq ma poksi pahea mikuqha kiimaq shreng jonghea mitiichhiha. Riita ümchaü min, jamlai wa makang, kiimaq kra liichum ka jamlai wa kra chongke ratlo.”

⁷ Kiijiishe tsangshiq raq hokhamwe bom ka akha treto, “Chaü lei, ümma ka jamlai wa malaü kriili chonglaq, raüla naishiq raq kra liichum ka michongkai.”

⁸ Kiijiishe hokhamwe raq, akhiishe gihoto, “Ngi raq jamkho tiimakang! Kra phanphan dea namshiq raq rashe tiicha lamlu bom tlan. Jamkhano ngukla, ngi raq ikhutsai na athapthi wan wishe,

⁹ namshiq raq ngi ma jamlai wa makang kra chongkuq man riihan jiila, namshiq tarü ka khoshi niilishe mitsai han. Jamkhano ngukla, namshiq tarü ka kiqshi maq, ngi ma arot chongke ma nguta ari wishe. Namshiq raq rahiq ka akha lanta tlinphin wan hanla, ngi tiima ka aklai mirki nguta tiima tlan. Arningkhan jamlai wa makang kra chong ronglaq. Raüla kra liichum kiimin michongkuqlot han dea nguta misapha.”

¹⁰ Kiijiishe, tsiichongketibi raq treto, “Chaü lei, ümniiraq jamlai bom wa waitlaü, kra chongke lotti ka ara mangjong hiq na jumin ahü. Ju hokham riimin, ajong pinthumwe riimin, kiimaq pinthum ningkun rümtiwe riimin, asengi maiqjaq liiti, mintin kloti, kiimaq along liitibi ma atinkhan wiqwiq ka shiitep mak shaq.

¹¹ Chaü lei, ümniiraq jamlai bom wa waitlaü kriika tsinhea, maiqse raq khon lot chang ka riimak. Arka phra kong riili michongkuqlot. Tsangshiq ka maiqse rai simak.”

¹² Kra tai raütiishe, hokhamwe tsankhiq ka walüwa ikhiishe phok wanto. Raüta atsankhiq tsi ma Bebilon hokhamwe rung na tsü chongketibi thun ka wiita tseabaiq raa nguta aming tatto.

¹³ Krai mren, tsangshiq wiita tseabaiq wan miitu aming ka kuqto, Daniel nai akongtitiim kiimin romshaq na.

Shiikeawe Raq Daniel Ma Rawama Liichum Tiichhikuqto.

¹⁴ Kiijiishe Daniel ka maiq thun tseabaiq miitu aming kuqtiiqwe, hokhamwe kheti phentu ajongwe Ariokh phana wato. Raüta abomtsi ka aheawiq tiima raüta,

¹⁵ apaiq raq Ariokh ma, hokhamwe raq kiitinkhan aming tsinhea ka jamkhano kuqta nguta bom ka tiitsang waito. Kiijiishe Ariokh raq Daniel ma jamlai mra wa pintaq kra chongkuqto.

¹⁶ Krai mren, Daniel ka jaqlo thitli hokhamwe phana waraüta, apaiq raq hokhamwe ma rawama liichum kra chongke miitu rahiq tluke aming jaüto, raüta lapto.

¹⁷ Raütiishe, Daniel ka ajam na wawanto. Raüta akongtitiim Hannania, Mishael, kiimaq Ajaria ma jamlai mra wa pintaq kra chongto.

¹⁸ Raüta apaiq raq tsangtsam ma, ratsan ramong nyang na siti Shiikeawe jaqwa apaiq tiihang mangchan mikuq laq, kiimaq apaiq raq kra amao chang jaqsham kra liichum ka tsangtsam ma chongkuq laq, kiimaq tsangshiq kiimin Bebilon mungti tsii chongketibi rai tsatbaiq makchang miitu achu jaü ronglaq nguta chongto.

¹⁹ Krai mren, kra rawali kra amao chang bomtsi ka riisham mak maq, Daniel ma tiichhikuqto. Krai mren, apaiq raq ratsan ramong nyang na siti Shiikeawe ka akha tiitsam kamto:

²⁰ “Shiikeawe ka taksma kiimaq ningkun tu! apaiq kli pattup pat-sa tiitsam ronglaq.

²¹ Apaiq ka rahiq jipi thapthi wantiwe! Jurai liirai tiihongtiwe! Hokhambi shongti min apaiqli, hokhambi runbaiqti min apaiqli. Apaiq kli anyan phaqchi keti, kiimaq taksu tsii keti.

²² Apaiq raq tsaühea hupsam, kiimaq apaü arthü kra tiichhikuq tlo; apaiq raq ranyaq mong na paütlaq kra asap, kiimaq apaiq tro niika rawiili wali.

²³ Ngi raq ümnaq tiitsam tiikang, kiimaq shreng tiikang, ititiim Shiikeawe lei. Ümniiraq ngi ma anyan phaqchi kuqlaü, kiimaq ningkun kuqlaü; ümniiraq ngi achujaü trekuq laü, kiimaq hokhamwe ma jamlai chong chang wa, kra naishiq ma tiichhikuq laü.”

Daniel Raq Hokhamwe Ma Rawama Nai Liichum Chongkuqto

²⁴ Krai mren Daniel ka hokhamwe ma tsii chongketibi tseabaiq miitu aming kuqtiiwe Ariokh phana wato. Raüta apaiq ma akha nguto, “Ümniiraq tsangshiq ka naqtsat baiqkiq. Ngi ka hokhamwe phana shea wan laq. Raüla ngi raq apaiq ma, apaiq ma liichum kra michongkuqha.”

²⁵ Krai mren, tlothit, Ariokh raq Daniel ka Hokhamwe Nebukadnejar man na shea wanto. Raüta hokhamwe ma akha chongto, “Ngi raq Jehudinok shumwi phong na, maiq weshi humkang. Chaü lei, apaiq raq ümma liichum ka ümniima michong kuqlot.”

²⁶ Hokhamwe raq Daniel (apaiq ka Belteshajjar ngutiimin ngutlo) ma nguto, “Riita ümniiraq ngi raq jamlai wa makang kiimaq kra liichum ka michongkuq lot haü shea?”

²⁷ Daniel raq treto, “Chaü lei, ümniiraq jamlai wa malaü kra chongke lotti ka jumin ahü. Along liiti, mintin kloti, jaq liiti, riimakla raiqsaiq jipi shammibi raq juwe riimin chongkuq lot mak.

²⁸ Shatmaq ramungtan na siti Shiikeawe asi. Apaiq riili amao chang hupsam thun kra tiichhi kuqtlo. Apaiq raq, Chaü lei, rawiishiqwii pat achat na, jamlai phan hongtha wan chang wa kra ümniima tiichhi kuqto. Riita ümchaü ngi raq ümniima ümma maq, riisham makchhi maq jamlai wa chhilaü kriishe chongkuq pha.

²⁹ “Chaü lei, ümniika akon lam maq rawiichii pat na hongtha wan chang machha malaü; kiimaq amao chang hupsam tiichhiketi Shiikeawe raq, rawiichhii akhing na jamlai hongtha wan chang wa kra ümniima tiichhikuqto.

³⁰ Riita, ara amao chang bomtsi ngi ma tiichhikuqtaq arka, ngi ka nanok thaq na asap atsin riilatiika riimak. Shatmaq Chaü lei, ümniiraq ümma liichum kra mitak laq, laüta ümtsan mong na jamlai tiima wa saütaq thun kra misap laq nguta tiichhikuqto.

³¹ “Chaü lei, riisham mak maq, ümkhaki na maiqwekaü sumla jonghea, achhai anyii chhaihea langlang, kiimaq aliilot chang riimak maiqphiip maiqjiip chhilaü.

³² Kra sumla khupo ka ahea pinthum chiisan chaq maq alo; akhuk nai ajaq wiinai ka kampho maq alo; achhü nai ahüko thun ka miiki maq alo.

³³ Ahok wiinai ka jin maq alo; kiimaq ahokphi wiinai ka jin nai hamlii hiq shot raüta alo riito.

³⁴ Ümniiraq kra sumlakaü ka liirat tlaü bala liipan niili, longraqkam khu wa longkaü jonghea ashi, maiqjaq maq jurmin shamhü miili tiikoq wanto, raüta sumla kaü hokphi wiinai jin nai hamlii hiq maq shot raüta alo ba kiijaq tiiqbaiqto. Raüta wiita tiibun baiqto.

³⁵ Maklii liipan niili, jinbu thun, hamlii hiq thun, miiki thun, kampho thun, kiimaq chaq thun ka, bunlak buncha bunkito. Raüta rajuji na khaolüm phong nichang ba, botkhulai riiphongtlaq ikhiishe jakito. Raüta rahai raq wiita tiisiirai pan wanto. Hiq na jamlai min tiichong mak she riito. Shatmaq kra longkaü ka jongwan raüta, pumkaü jonghea miishe jakito. Raüta mangjong hiq ara hamli she bumkito.

³⁶ “Rawama ka ara malaü. Riita Chaü lei, ümchaü kra liichum kriishe chongkuq pha.

³⁷ Chaü lei, ümniika hokhambi wiita thaq na ajong pinthum. Ramungtan na siti Shiikeawe raq ümniika ajong pinthum hokham ma shongto. Raüta ümniima ningkun, phenla ningkun, kiimaq khushü kuqto.

³⁸ Apaiq raq ümniika ara mangjonghiq raikhü na maiqse sitlaq kra pengti, kiimaq rumnyamse, kiimaq peshap wushi wiita kra pengti ma shongto. Kra chaq maq alo khupo ka ümnaq riilaü.

³⁹ Ümnaq jai niishe, mangjong hiq na, ajong pinthum hokham weshi hali mishong wan. Kriiwe ka ümhokham jong khan ka jongmak miraq. Kiimaq kra jai miishe ka hokham ajong pinthum wetsam, ngoja kriishe mishong wan. Kriika miiki maq alo kra miraq. Kriiwe riimin mangjong hiq ka hamli mung milang wan.

⁴⁰ Kiimaq kra jai miishe, ajong pinthum hokham weblai ngoja hali mishong wan. Kriika jin jamkhiiwa atsin, kiikha ahong ala, jinraq jamkhiiwa phanrap tiihop mra tiibun tlak tiiqbaiq tlaq ikha ningkun aheng maq mung misiq wan. Jin maq buk raüjaq jamkhiiwa phanrap ka bunlak buncha bunki tlaq, ikha, kriiwe riimin apaiq ma sinkhu na hokhambi thun siwan tlaq kriika wiita notshotshot mikhat wan. Raüta mijam sha wan.

⁴¹ Kiimaq ümniiraq sumla hokphi wiinai nai ahokshi thun ka, bashi ka hamlii hiq kiimaq bashi ka jin maq alo chhilaü. Kra mungtan ka khotham khothiq mungtan miraq. Hokham wiijam ka jin ikha ningkun ka aheng miraq, jamkhano ngukla kriika jin ka hamlii rai shot raüta loto.

⁴² Kiimaq hokshi thun ka bashishi ka jin maq alo kiimaq bashishi ka hamlii maq alo riito. Kra liichum ka kra ajong mungtan pengti hokhambi ka wiijam ka ningkun aheng, kiimaq wiijam ka ningkun ajom maq mipeng wan.

⁴³ Kiimaq ümniiraq sumla ka jin nai hamlii hiq maq shot raüta alo chhilaü. Kra liichum ka kra akhing na hokhambi ka kherü lam phan raüta, hokhamwe weshi raq hokham weshi tajam wa achak milam. Raüta tsangta liipan na kherü lam phan maq adam na pong wan miitu mishkut. Shatmaq jin ngam nai hamlii hiq ka adam na riishot lot mak ikha, tsangshiq ka adam na kiqshi tsiimshi maq riwan lotmak miraq.

⁴⁴ Kra hokhambi raq mung lang wantlaq akhing niishe, ramungtan na siti Shiikeawe raq mungtan ashi she mishong wan. Kra mungtan ka pattup pat-sa thenki mak phan she miraq. Kra mungtan ka hokham ahinti juwe riimin khat lot mak she miraq. Shatmaq kra hokhamwe raq mungtan ahin thun ka wiita tiithumpak mikhat wan. Raüta apaiq mungtan kriili she pattup pat-sa thummak miqmak miishe mung ka misiq wan.

⁴⁵ Ümniiraq longraqkam khupo wa longkaü ashi ka apaiq tiikoqkoq, maiqjaq maq jurmin shamhü maq tiikoq wan raüta, kra sumla kaü jin, nai miiki, hamlii hiq, kampho, kiimaq chaq maq alo sumla ka, tiibunlak tiiqbaiqtaq chhilaü. Arka ajong Shiikeawe raq, chaü lei, ümniima rawiichii pat na jamlai mra pin wan chang wa kra chongkuqtlo. Ümniiraq jamkho malaü kra ngi raq chongkuq kang. Lata kra liichum ka riikhaqli chongkuq kang.”

Hokhamwe Raq Daniel Ka Ajong Miishe Shongto

⁴⁶ Kiijiishe, Hokhamwe Nebukadnejar ka hiq na bumsaq riito. Raüta Daniel ma honglu thun nai homseng honglu thun keraa nguta aming kuqto.

⁴⁷ Kiimaq hokhamwe raq nguto, “Üm Shiikeawe ka phra wiitarü thaq na ajong pinthum, hokhambi tarü thaq na Tatiwe, kiimaq apaiq ka maiqse ma amao chang hupsam thun tiichhiketi. Ara jamkho sapkang ngukla, ümniiraq ngi ma ara amao chang bomtsi kra chongkuq laü.”

⁴⁸ Kra raütiishe apaiq raq Daniel ka ajong miishe shongto. Raüta apaiq ma phanrap phanrii, araa ariq phan kongphiq thun kuqto. Raüta apaiq ka Bebilon mung pengti tuwejong miishe shongto. Raüta apaiq ka hokhamwe rung na tsii chongketi aki miikiimbi thaq na akhupo miishe shongto.

⁴⁹ Kiimaq Daniel raq tiipaiqnea wantaq kra phanphan, hokhamwe raq Shadrakh, Meshakh, kiimaq Abednego kiimin Bebilon mung kra liiwan miitu tuwebi ma shongto. Shatmaq Daniel riiwe kla hokhamwe rung niili ngato.