DANIEL 12 - ASII LAKDAP Bible (BSI)

Amaa Wa Dongwan Akhing

¹ Rase raihi-nairai khea sam raütise raq nguto, “Kra akhing na, namshiqnok kheti rase jonghea, Maikel kriishe misaüho. Kiijiishe, maiq mung thun phawantaq pat maq riita ümchaü pat na saüli, abi pinthum chamchao mungbrak henghea kriishe midong wan. Kra akhing saü wan raüla, namungti Shiikeawe lakdam na tsangshiq mang asiti thun ka mitiichhiikuq wan.

² Maiq pahea ümchuwa tsai wantaq thun ka, atra midong wan nong. Maiq wiijam ka pattup pat-sa atra she misi wan. Kiimaq maiq wiijam ka, pattup pat-sa jea ngaü raüta misi wan.

³ Taksu maiqse welabi thun ka ra na rakhang chhaitlaq kiikha michhaisiq wan. Kiimaq maiqse ma kechu rilung lamphan tlangkuq wantiiti thun ka, ra na raiqsaiq chhaitlaq ikha pattup pat-sa mililiim wan.”

⁴ Apaiq raq ngi ma nguto, “Riita, Daniel lei, kra lakdamkom ka, ümchaü akom laüta shaq thülaq. Laüta phangthum akhing misaüho shaq wiiwii, sil maq trap laüta phan thü laq. Kiimaq kra liipan na maiqse pahea raq, jamlai mra wa pin tlaq kra, sap wan haijaq nguta atu na phaqchi rit, kai mihun niiwan.”

⁵ Kiijiishe ngi raq maiqwe nai anai jüraikii na, siimkonairi na chapraq raq chhikang.

⁶ Kra chaptlaq wenai kiiwa, weshi raq rase ma jürai khu lamthaq linlin na chaptiwe kiima akha waito, “Riita ara awangchang jaqsham mra thun pin wan tlaq arka, ümtincho niishetiq wa mithum?”

⁷ Kiijiishe rase raq ajaq wiinai ka ra nü na doraüta, pattup pat-sa Shiikeawe mang na, ramkhamkok sham raüta, akha kiqkham kuqto. Apaiq raq akha nguto taikang, “Kriika wiitsam ri wiithiq miraq. Shiikeawe sengi tiichamchao wan jai maq, arthun mra arshe mipin wan.”

⁸ Apaiq raq jamlai wa chongtaq, kriika ngi raq taikang. Shatmaq kra liichum ka ngi raq taklot mang riikang. Kriikha niishe ngi raq, “Shatmaq shiilangwe lei, arka jamkho mithum wan?” nguta waikang.

⁹ Apaiq raq treto, “Daniel lei, ümniika ümchaü awa wan chang she. Jamkhano ngukla ara bomtsi thun arka phangthum akhing misaü shaq wiiwii maiq ahinti ma tiisap raamak, ahukse maq apaü raütli thüchang.

¹⁰ Maiqse pahea khum ka atiisii mirkuq wan. Abi maiqse thun raq arka sap wanlot mak miraq. Shatmaq tsangshiq ka pahea jabi wan wan khoti miraq. Taksu maiqsetiim riili arthun ka mitak wan.

¹¹ “Ranaiqtek honglu kewan kra tangtabaiq wan jai maq, kriika, Riikhiq Phiiptsi Chang Sumla Kaü shong wantaq kra ranaiq akhing nang nga ngutlo, kra ranaiq maq phawan raüta, ranaiq 1,290 ranaiq na saüli miraq.

¹² Kechu jonghea, jurwa ranaiq 1,335 ranaiq kra tlea wan li, tsapkapkap maq nin wan raüta siwan tlaq!

¹³ “Kiimaq Daniel lei, ümniika atiithum ranaiq na saüli tsapkapkap maq silaq. Kra laütiishetiq ümniika mitsai haü. Shatmaq ümniika amaa wa dong wan laüta ümniirii athü poksi kra phangthum ranaiq na milap haü.”