DANIEL 11 - ASII LAKDAP Bible (BSI)

¹ Apaiq ka ngi khrumketi kiimaq ngi tiikhup wongketi.

² Kiimaq ümchaü ngi raq ümniima jamlai bom wa chong tiikang arka tengteng.” Rase raq nguto, “Hokham wetsam raq hali Parsia mung ka misiq wan nong. Kra jai maq hokham weblai ngoja raq mung ka misiq wan. Apaiq ka anok tarü thaq na chiithe lin miraq. Kriiwe raq apaiq ningkun aheng pinthum bala nai chiithe pinthum jong tlaq bala, apaiq raq Grik mungti hokhamwe rai she mirkhat wan.

Ejip Mung Hokham Nai Siria Mung Hokham

³ “Kiijiishe sreajong pinthum hokham weshi she midong wan. Apaiq raq peng wantlaq mungtan ka jonghea she miraq. Kiimaq apaiq raq aroro she miklo wan.

⁴ Shatmaq apaiq mungtan ka pinthum ajong alu, ahong ala siwan tlaq bala, apaiq mungtan ajong ka mungtan blai miishe mitiikhoki. Raüta kra mungtan blai hokhambi ka apaiq lai ala phan riimak, maiq pongphanti raq mung ka misiq wan. Shatmaq tsangshiq ningkun ka apaiq ningkun jong khan ka riimak miraq.

⁵ “Riita Ejip mung hokhamwe ningkun ka ajong miraq. Shatmiitiina, apaiq sengi phentubi phong wa, weshi ka anok abiti thaq na ahong kiimaq ajong hali midong wan. Raüta mungtan ka ajong lin she mipeng wan.

⁶ Rawii ashaqpuq siwan jai miishe, Ejip mung hokhamwe raq Siria mung hokhamwe rai silu mirja, raüta reraüshi she mipong wan. Kiimaq ase jechakse ka Siria mung hokhamwe ma mitiiwa. Shatmaq kra reraüshi riija pongtaq kriika alu tsing mak miraq. Kra hokham nyung kra, tsangwe kra, hokham nyung se kra, kiimaq apaiq rai ajaqshisetiim ümchuwa wadamtaq thun ka wiita mitsatbaiq.

⁷ Kra jai maq, jaqlo miili, kra hokhamnyung ma tanyangseno phong wa maiq weshi ka hokham ma mija. Raüta apaiq raq Siria hokhamwe phentiip thun kra mikhat. Raüta tsangshiq phentiip kiitelong ruk thun kra mitiibun khat. Raüta apaiq raq tsangshiq ka mitang.

⁸ Raüta apaiq raq tsangshiqnok phra sumla thun nai tsangshiq sumla phra shomnoq chang, chaq nai kampho maq alo tak apin thun kra wiita Ejip mung na mitsuqho. Kra jai maq rawii ashaqpuq mungtsing maq sijai na,

⁹ Siria mung hokhamwe raq Ejip mung ka mikhatki. Shatmaq apaiq raq tangmak miraq. Raüta tsangmung na hali mijang wan nong.

¹⁰ “Siria mung hokhamwe setiim thun raq rekhat kai miitu chiqchap rechap she misürii wan. Raüta phenlabi ka hiq ma rama pahea mirchom. Asetiim phong wa weshi ka, nolajong pinthum miraq. Apaiq raq maiqmung thun ka jüjong rai chhang saü wan tlaq ikha mikhat kiimaq rewe phong ka achhelot chang riimak kiitelong ruk ikha kriimin wiita mikhat wan.

¹¹ Kra chhiraüta, Ejip mung hokhamwe ka atsankhiqtsi ma, Siria mung hokhamwe kra mikhat wan. Raüta Siria mung hokhamwe phenlabi ka pahea rewa shumwi ma milap wan.

¹² Apaiq raq rekhat tang raüta kiimaq rewe phenlabi pahea tsatbaiq wantaq kra miitu, jarap jirap alachongwa lishe, mishkong siq. Shatmaq apaiq raq rekhat ka tangwan ruq tang mak miraq.

¹³ “Siria mung hokhamwe ka tsang mung na hali mijang wan nong. Raüta aphenlabi ka kongkhulak wa kriithaq niimin achan pahea she hali mirchom nong. Raüta akhing hongtoshe angu na, apaiq raq asengi phenlabi ka kongkhulak na sheahotaq kriithaq na apa, pahea she sheaho raüta, kiimaq rekhat chang hupsam chamtraq hoho raütiishe rekhatkai mijangki nong.

¹⁴ Kra akhing na Ejip mung hokhamwe wokhong na siti, maiqmung pahea raq, apaiq wokhong wa dongho miitu mirkhat wan. Kra akhing na, O, Daniel lei, nammung wa maiq wiijam tsan tsuheati raq riisham bomchong kuwan akhing saüto she nguta mungmaiqse ka mung lap ma riikhat rong i nguta mitiishon. Shatmaq tsangshiq raq rekhat ka tang mak miraq.

¹⁵ Kra ningkhan, Siria hokhamwe raq chela ashi kiitelong ruk mong na siti kra mikhat wan. Raüta mijii wan. Ejip mung phenlabi raq re ka khatruq khat makshe miraq. Tsangshiq phong wa srea nolajongbi thun kiimin ningkun ka ajom she miraq.

¹⁶ Kra akhing na Siria mung wa aki nolawe raq tsangshiq khuthaq na jamlai klo wa rotlaq kra phanphan hok maq nishishi li she mishthen baiq wan. Apaiq tangtati ka jumin ahü she miraq. Apaiq ka Kiq Akhamkuq Mung kiijaq michap. Raüta kra mung ka ajaqkhon mong niishe mithü wan.

¹⁷ “Siria mung hokhamwe raq apaiq phenlabi thun wiita shea raüta maiqmung ka mikhat. Kra raütiishe ajaqtiwe hokhamwe mungtan kra shiithen baiq miitu, apaiq raq kriiwe rai silu mirja. Raüta ase jechakse ka apaiq ma mitiiwa. Shatmaq apaiq raq thapthi wan tlaq kriika hongwa mak miraq.

¹⁸ Kra jai miishe apaiq raq maiqmung thun sammoktra chumkii binjü na siti thun kriishe mikhat wan. Raüta maiqmung pahea mitang wan. Shatmaq pongmungti hokhamwe ashi raq, apaiq ka khat raüta mitang. Raüta apaiq shiikong ka mitiithumbaiq. Apaiq raq Siria mung hokhamwe shiikong ka apaiq khuthaq niishe miphongkuq.

¹⁹ Kra hokhamwe ka amung na phentiip kiitelongruk mong kiiniishe mijang wan. Shatmaq apaiq ka re raq mitang wan. Kriishe apaiq rilung thum miraq.

²⁰ “Riita apaiq jai na maiq hokham weshi hali midong wan nong. Raüta apaiq mungtan tsiiq tum kra tiipa wan miitu, asengi siihiip weshi tiiwa raüta, mungmaiqse jaq wa, phunta ka apapa hiwan raa nguta mungmaiqse ka mishtep wan. Shatmaq jaqlo liipan niili hokhamwe ka atsea mirbaiq. Shatmaq mungmaiqse makki na riimak kiimaq rekhat lam maq min riimak.”

Abi Pinthum Siria Mung Hokhamwe

²¹ Kiimahali rase raq akha chongkuqto: “Kra jaiwa Siria mung hokhamwe shongtlaq kriika abi pinthum she miraq. Apaiq ka hokham ja thek mak. Shatmaq apaiq raq lule klo raüta jurmin tiima chhimak miili, hokham ngachang ka minyea. Raüta kra mung ka mipeng.

²² Jurwa apaiq kiqkhii jiiq, kriiti ka apaiq raq tiikaiqshak lambaiq wansaq li miraq. Shiikeawe Ramwe Ajong Pinthum kriimin, wiita atsea mirbaiq wan.

²³ Apaiq raq pongmungti hokhambi rai silu riija tongshong raüta, maiqmung thun ka milao wan. Apaiq raq peng wan tlaq mung ka aranse li jiimin, apaiq ningkun ka jajong wan wanli miraq.

²⁴ Apaiq raq maiqmung chiithejong jong mungti ka, tiihanghiiq hiiq miili mikhat. Raüta atitiim raq klo mak phan ashut miklo wan. Raüta kra mungwa tsiiq nai nyam sepat lopi tsuq wantaq kra, asengi liipan na mipheakuq. Apaiq raq phentiip kiitelong maq aruk thun kra khat wan miitu chiqchap rechap misürii wan. Shatmaq apaiq ma akhing ka atiitoq she mirbaiq.

²⁵ “Apaiq raq phentiip ka shiichaq raüta pahea miphoq wan. Raüta Ejip mung hokhamwe ka mikhatki. Shatmaq Ejip mung hokhamwe riimin, aphentiip pahea phoq raüta, ningkun aheng maq Siria mung hokhamwe rai mirkhat. Shatmaq Ejip mung hokhamwe ka maiq ma atlao miraq. Raüta rekhat ka tangmak miraq.

²⁶ Apaiq ma tsanwa danhontibi raq apaiq mishthen baiq. Asengi phenlabi pahea mitsai. Krai mren apaiq phenlabi ka wiita tiisiirai mijiip baiq.

²⁷ Raütiishe kra hokhamwenai ka adam na chamrii ashi na ngaraüta dung misiq. Shatmaq tsangnai tsan mong niika ka abi thüshat miraq. Krai mren, weshi raq weshi ma arot michong. Krai mren, tsangnai raq jamlai wa rittlaq kriika lapmak miraq. Jamkhano ngukla, kra akhing ka misaüshaqli.

²⁸ Siria mung hokhamwe raq sepat lopi ka atum atum maq tsuq wan raüta, tsangmung niishe mijang wan. Tsangmung na jang wan lam maq, Shiikeawe sengi raq Shiikeawe shomnoqtlaq kra shiithen baiq miitu atsan mong na khekham miraq. Krai mren, apaiq raq athithi, mishthen baiq. Raütiishe tsangmung na mijang wan.

²⁹ “Kra jai miishe, apaiq raq Ejip mung ka mikhat kinong. Shatmaq kra lak niika, mung ka pongshe miklaiki.

³⁰ Roman phenlabi ka mokkiitu pahea maq kiraüta, apaiq rai she mirkhat. Krai mren, apaiq ka ahaisi she miraq. “Kra ningkhan apaiq ka atsankhiq walüwa ikhiishe miraq. Raüta rejang wan lam maq, Shiikeawe senginok raq Shiikeawe shomnoq tlaq lamphan kra shiithen baiqla nguta mitan khan. Apaiq raq kra lamphanti phongwa, Shiikeawe lamphan baiqthü raüta ahin lam na kihotaq kriiti raq apaiq ma tsii chongkuq tlaq kra phan phan miklo.

³¹ Apaiq phenlabi wiijamti raq Shomjam ka mitiishe baiq. Raüta tsangshiq raq Shomjam na ranaiqtek honglu kuq tlaq kra atiithaq mirbaiq. Raüta Riikhiq Phiiptsi Chang Sumlakaü she mitiinga shong.

³² Hokhamwe raq laopha monglap tsii maq, Shiikeawe shomnoq lamphan miimthütibi thun ka apaiq rai pongtibi miishe mitiija wan. Shatmaq Shiikeawe ma kamwantiiti thun raq rewebi ka mikhat wan.

³³ Anyan phaqchi rümti welabi raq nanok ahinti mungmaiqse rai tsii ka mirchong. Shatmaq jaqlo liipan bala tsangshiq phong wa, maiq wiijamti ka re na mitsai. Kiimaq wiijam ka atra maq wa na michaq baiq. Kiimaq maiq wiijam ka tsangshiq tsiiqchong nyamchong ka wiita re raq mitsuq wan. Raüta kealokshe miraq. Kiimaq maiq wiijam ka re raq shumwikong ma milap wan.

³⁴ Kra re raq maiq jiipbaiq wan tlaq akhing na, Shiikeawe sengi raq khrum ka ralangse li milap wan. Li jiimin tsangshiq khrumti maiq apako riika, maiqmii wokpo miitu tiima raütli mikhrumkuq wan.

³⁵ Kra welabi phong wa anyan phaqchi sapti maiq wiijam ka re raq mitsatbaiq. Shatmaq kra ningkhan, Shiikeawe sengi ka asii maiqsetiim miishe mija wan. Riita arka Shiikeawe raq atiithum akhing tiihongtaq kra misaü shaq wiiwii re ka dong wan ruqli miraq.

³⁶ “Siria mung hokhamwe raq, apaiq raq athithi kli miklo wan. Apaiq raq apaiq ka phra thun thaq niimin, ajong nguta mitiishom rasiq. Apaiq ka Ajong Thaq Na Ajong Shiikeawe thaq niimin ajong nguta mitsütsitsiq. Apaiq raq ara abi kiimung arka, Shiikeawe raq apaiq ma mo tiiho akhing ranaiq na saüli miklo wan. Shiikeawe riika apaiq raq jamkho thimi wantaq kra phanphan miklo wan.

³⁷ Hokhamwe riika atitiim raq shomnoq wantaq sumla phrakaü kiimin wiita mishipoq wan. Kiimaq jechakre raq lungwiitlaq phrakaü kiimin amiimshe mirbaiq. Apaiq raq phanrap phra kaü thun ka wiita mimiimbaiq. Jamkhano ngukla apaiq raq, apaiq ka kra phrakong thaq na ajong nguta mitiima.

³⁸ Raüta apaiq raq chela tro peruk tiikhup wongketi phra kaü kra mishreng. Raüta apaiq riika atitiim raq amang ara min taimak, shomnoqmak phan sumla phrakaü ma, chaq, kampho, longseng thun kiimaq laihin athü tsinhea kongphiq thun ka, honglu na mikuq wan.

³⁹ Apaiq chela thun ruk kra tiiwongti srea nolabi ka, pong mung phra shomnoq wantibi kra mishong wan. Raüta apaiq kiidea hokhamwe nguta awokhong na apaiq bom taitaiti thun kriima, apaiq raq pinthum shreng manto mikuq wan. Raüta tsangshiq thun ka ajong ala, mungtu shiilangbi ma mishong wan. Raüta apaiq raq tsangshiq ma poksi na hiq ka pahea michumkuq wan.

Phangthum Wan Akhing

⁴⁰ “Riita Siria mung hokhamwe ma, apaiq ningthoi she saüwanto angu na, Ejip mung hokhamwe raq apaiq ka mikhat. Kiijiishe Siria mung hokhamwe raq asengi phenlabi ka ra ma hiq ma tsuq raütiishe, apaiq ningkun wiita shoq raüta, kumrang leng thun, kumrang thun, kiimaq mokkiitu pahea riichom raütiishe, Ejip mung hokhamwe ka mikhat. Kiimaq apaiq raq maiqmung thun pahea ka, raju jüchhang watlaq ikha mikhat wan.

⁴¹ Kiimaq apaiq raq Shiikeawe Kiqkham Mung kriimin mikhat wan. Raüta maiq ka ahing amun mijiip baiq wan. Shatmaq Edom mungti, Mob mungti, kiimaq Ammon mungti rejaqsong atiichong thun ka, ara re wa jaq mong wa mitiichhii wan.

⁴² Apaiq raq ara maiqmung thun khat wan tlaq akhing na, Ejip mung kriimin tiihang mak mikhat wan.

⁴³ Apaiq raq Ejip mungwa apaü raüta athü chaq, kiimaq kampho tum thun kiimaq Ejip mungti raq tsiiqchong nyamchong ara ariq phan athü ka wiita mihophaq wan. Apaiq raq Libia mung nai Sudan mung kiimin mikhat wan. Raüta mijii wan.

⁴⁴ Kiijiishe shedong mung niiwa nai shekhu nü mung nüwa, tsütsa ka apaiq raq mitai. Kra tai raüta, apaiq ka ahaisiwa liishe miraq. Krai mren, apaiq ka henghea sruwan wan raüta, khutaüphei wa ikhiishe, rekhat mishchaq wan. Raüta apaiq raq maiq ka pahea mitsat baiq wan.

⁴⁵ Kiimaq apaiq raq apaiq hokham tombutiip thun jonghea ka khamjong raikii nai Shomjam haichang hiqlam liipan na mihai. Shatmaq apaiq ka re na mitsai. Apaiq khrumti maiq ka jumin ahü she miraq.”