DANIEL 10 - ASII LAKDAP Bible (BSI)

Daniel Raq Taigris Raikii Maq Riisham Makchhi Ashi Chhito

¹ Sairas raq Parsia mung na Ajong Hokham jaqsham wanli maq, rawiitsam she angu na, Daniel ma riishammakchhi ashi tiichhikuqto. Apaiq ka Belteshajjar ngutiimin ngutlo. Kra riisham bomchong ka tengteng. Shatmaq liichum ka atak ma tsinhea. Kra liichum ka apaiq ma riisham makchhi maq chongkuqto.

² Kra akhing na ngi ka liipan tsam she makphai trok lata, aho anyi siwan kang.

³ Ngi raq asum atsu phaq nai sea ka inü na thii mang. Kiimaq ngam min phaq mang, che min nyang mang. Kiimaq liipan tsam kra mithum shaq wiiwii, ikhu kiimin thai mang maq sikang.

⁴ Rawii phawan jipi lüwa, raroq nairi rablai angu ranaiq na, ngi ka ajong alu Taigris Raikii na chapraü riikang.

⁵ Ngi raq ra nü na kisaq liikangta, maiqwe weshi ka raihi-nairai khea miirii samraü, kiimaq achhü na awongsii chaq shinket paraü chhikang.

⁶ Apaiq khum ka longseng chhaitlaq ikha chhainyiinyii. Apaiq theaphi ka rachhai wa trang ikha chhaihea langlang. Kiimaq amakpo wiinai ka watum nyairai tlaq ikha nyaihea. Apaiq jaq phum wiinai nai ahok wiinai ka miiki chhainyii nyiihea apan rea araq ikha. Kiimaq apaiq bomtsi riinya watrang ka, maiq muklung muksha rüriiq trang rai tlaq ikha amok dungdung.

⁷ Kra riisham makchhi chhiti ka ngilaq laq se li riikang. Kiijaq ngi rai maiq ahin sitlaq kra riika jam min chhimak riito. Shatmaq tsangshiq ka pinthum phiipraq tsaito. Raüta tiipaü rangrang ahin na juto.

⁸ Krai mren, ngi ka kiijaq ngi laqlaqseli she riikang. Lata kra awangchang riishammakchhi kra liisiq kang. Iningkun min ahü she ihü ihan jobaibai riidungtsok she ninkito. Itheaphi ka hamlak lak she mutkito. Maiq raq tiitsanglot chang min riimak she.

⁹ Ümtiikiiwa ngi raq apaiq bomtsi ka taikang, ngi ka hiq na sunghü tsiihü she bumkikang. Lata itheaphi ka hiq thaq na bumtlii bumki kang.

¹⁰ Kiijiishe maiqjaq ashi raq idü na shamto. Raüta ngi ka ijaq nai ilakü maq tiichapto. Ngi ka atiikhai rokshrokli riikang.

¹¹ Kiijiishe rase raq ngi ma nguto, “Daniel lei, Shiikeawe raq ümnaq lungwiitlo. Chap laq. Laüta ümchaü ngi raq jamlai bom wa chongkuq tiikang kra tiitsang dada tailaq. Ngi ka ümphana tiikito.” Ümtiikiiwa apaiq raq kra ngutaq, ngi ka achap she riikang. Li jiimin ihok ijaq thun ka tiikhai ruqli riito.

¹² Kiijiishe apaiq raq nguto, “Daniel lei, naqhaikiq. Ümra ranaiq akhing miishe wa ümniika aranse ma ja laüta, phanrap saptsin wan miitu, thapthi wan laü, kra ranaiq akhing miiphat she, Shiikeawe raq ümnaq achu jaü ka trekuqto she. Ngi saükikang arka ümnaq achujaü trekai saükikang.

¹³ Ngi ka Parsia munglangti rase hokham raq, raroq nai ri ranaiqshi ningtang hoto. Kiijiishe ajong rasetiim phong wa maiqla ashi, Maikel ka ngi phana kiraüta khrum kuqto. Jamkhano ngukla ngi ka Parsia mung na, ngi laqlaqse lishe tiichong kikang.

¹⁴ Ngi ümphana saükikang arka, rawiishiqwii namshiqnok ka jamkha jawan chang wa miraq kra ümniiraq sap wan miitu chongkekai kikang. Riita ara riishammakchhi arka rawiichii miitu tiichhi kuqto.”

¹⁵ Ümtiikiiwa apaiq raq ara ngutaq, ngi ka hiq nü na kusaq, bom asa min dongmak she, liirat kang.

¹⁶ Kiijiishe maiqwe ikha chaptlaq rase raq, ajaq ka tliisaq raüta, inübii na ajaq maq shamto. Ngi raq apaiq ma ngukang, “Shiilangwe, ara riishammakchhi ariiraq ngi ka ihü ihan wiitashe tiikhai kito. Ngi ka tiikhai mang she ngukang min, apaiq tiikhaikhai she tiikhai raitlo.

¹⁷ Ngi ka dise ashi atijongwe khaki na chaptlaq ikha chaptiikang. Ngi ka ümniirai jamkho mirbom damha? Ikhum na ningkun min ahü she. Kiimaq itsitsü min healot mang she.”

¹⁸ Jangshi ri hali apaiq raq idü na shamsaq sham nongto. Kiimaq ngi miimin ikhum na iriika phanshi ahong lin lin she riito.

¹⁹ Apaiq raq nguto, “Shiikeawe raq ümnaq lungwiitlo. Kra ningkhan ümniika jamlai miitu min naq chapa kiq. Kiimaq naqhai songkiq.” Apaiq raq ara ngojaishetiq, ngi raq ikhum na ningkun ka ahong lin she sapkang. Kiimaq apaiq ma akha ngukang, “Shiilangwe, ümniiraq ngi ma jamlai bom chongke chang wa kra chonglaq. Ümniiraq ngi ma ningkun min shoqkuq laü she. Ahea lin she.”

^20-21 Apaiq raq nguto, “Ngi ka ümphana jamlai miitu wa kikang kra asap haü sha? Arka Tengteng Lakdap na jamlai wa waiqthütaq kra ümniima tiichhikekai kikang. Ümchaü ngi ka ajang wan nongchang she. Lata Parsia mung liiti rase rai riikhat wan chang. Kra jai maq, Grik mung liiti rase kriishe misaüho. Ngi khrumti ka ahin jumin ahü, Israilnok liiti rase Maikel sitlaq kli.