DANIEL 1 - ASII LAKDAP Bible (BSI)

DANIEL NAI AKONGTITIIM RILUNG MANPHAN ( 1.1—6.28 ) Jehudinok Phan Jeroweblai Bebilon Mung Hokhamwe Rung Na

¹ Juda mung hokhamwe Jehoiakim raq mung lang wanli maq wiitsam she angu na, Bebilon mung Hokhamwe Nebukadnejar raq Jerusalem ka trotam maq kombaiqto. Raüta khatto.

² Tatiwe raq apaiq ma Hokhamwe Jehoiakim ka tlapto. Kiimaq shomjam wa tsiiq anyam wiijam kiimin trunto. Apaiq raq shumwikong wiijam ka apaiq rai, Bebilon mung na apaiq phra kong shomjam na tsuq wanto. Raüta sepat lopi tsiiq atsuq wan ka shomjam na hupsam thüchang khok thun kiijaq thüto.

³ Raüta hokhamwe raq apaiq jaqtreti siihiip jongwe Ashpenaj ma, Israilnok shumwikong phong kiiwa, maiq jerobi liisaü wasetiim nai aki miikiim setiim ka pong na tiidong tsea laq nguta aming kuqto.

⁴ Tsangshiq ka asham ahea, phaqchi maiqse, phanrap aheawiq shrinkeje, phanrap saptsin wansaqti, kiimaq akhum na amiphan ahüti riichang. Tsangshiq ka hokhamwe rung na jaqsham ma thektlaqti maiq riichang. Ashpenaj raq tsangshiq ma Bebilon mung bom ka aphat wan nai awaiq wan shrinke chang.

⁵ Kiimahali hokhamwe raq tsangshiq ma tü adung nai che ka, wranaiqtek hokhamwe rung na siti jamshiti ikha, apaiq raq phaqsitlaq kriiwa, tsangshiq miimin tiiphaq sea raa nguta aming kuqto. Wiitsam phaqchi shrinke lot jai miishe, tsangshiq ka hokhamwe man na chapwa chang miraq.

⁶ Kra tsea wantaq phong mong niika, Daniel, Hanania, Mishael, kiimaq Ajaria riito. Tsangshiq ka Juda phan wa.

⁷ Kra siihiipjongwe raq, tsangtsam mang ka anyeshe laikuqto: Belteshajjar, Shadrakh, Meshakh, kiimaq Abednego.

⁸ Shatmaq Daniel riika hokhamwe raq akuq apaiq rung wa dung nai che kra phaqsiq raüta, apaiq khum ka Shiikeawe maklii na tiisheshi mang nguta, atsan na atsidada maq thapthito. Kra ningkhan, apaiq raq Ashpenaj ma khrumkuq laq nguta tiipaiq tiinea raüta tiitaito.

⁹ Kiimaq Shiikeawe riimin, Ashpenaj tsantsii ka Daniel khrumke miitu atiinin riikuqto.

¹⁰ Shatmiitiina, Ashpenaj ka hokhamwe ma ahai riito. Kra ningkhan apaiq raq Daniel ma nguto, “Hokhamwe raq namshiq raq jamlai tü adung phaqsea chang wa kiimaq jamlai che nyang chang wa kra apaiq raq athimi wanwi she. Kra ningkhan apaiq raq ümniika jerobi ahinti kiikha phintsaqtsaq hea riimak chhiraü ka, apaiq raq ngi khata misebaiq.”

¹¹ Arningkhan she, Daniel ka Ashpenaj raq apaiq nai akongti wetsam kra liiketi kintsongtiwe shongtaq kriiwe pha niishe wato.

¹² Raüta, akha nguto, “Naitsam ka raroqshi miitu shrira liilaq. Naishiq miika dungtsap chang jücha weashaü nai anyang chang khamsang lamlamli kuqlaq.

¹³ Laüta, naitsam sham ka hokhamwe raq akuq tü adung phaqseati jerobi thun kriirai triingealaq. Laüta naitsam khum kra ümniiraq jamkho michhihaü, kra phanphan shetiq, ümniiraq jamlai thapthi chang wa kra thapthilaq.”

¹⁴ Krai mren, apaiq riimin tsangtsam miika raroqshi miitu kham nai jücha weashaü lamlamli kuqto.

¹⁵ Kra kiq riikhamtaq akhing thum jai she liikiita, tsangshiq sham ka nanok ahinti hokhamwe raq akuq phaqsea khamnyang phaqseati thaq na, tsangtsam sham ka phintsaqtsaq kiimaq ahong ala siisaq riito.

¹⁶ Krai mren she, kinkhetiwe riimin tsangtsam miika, hokhamwe raq akuq phaqsea kriika kuqmak maq, jücha weashaü kriili she kuqto.

¹⁷ Krai mren, Shiikeawe riimin kra jerobi weblai kiimiika, phaqchi kiimaq laktsin wan na taksutsii kiimaq rakaü hiqwe phaqchi kuqto. Kra thaq niimin, Daniel miika riisham bomchong nai rawa ma liichum chongke saptsin wan phaqchi kuqto.

¹⁸ Hokhamwe raq jaqsham tlangke wan akhing wiitsam kuqtaq kra thumjai na, Ashpenaj raq jerobi tlotli ka Nebukadnejar phana shea wanto.

¹⁹ Krai mren, hokhamwe raq tsangshiq tarü rai riibom damto. Raüta, nanok wiitarü thaq na Daniel, Hanania, Mishael, kiimaq Ajaria rai riibom ka apaiq ma pinthum mit-sitoli riito. Krai mren tsangshiq ka hokhamwe rung na jaqshamti miishe shongto.

²⁰ Hokhamwe raq jamlai phan bomli wairaü min, kiimaq apaiq raq jamlai phan mra khuthaq na bom wairaü min, tsangtsam weblai riika, maiqjaq liitibi nai mintin kloti amungtan na siti kra wiitarü kunli thaq na, manroqshi achan asap riito.

²¹ Kiimaq Daniel raq hokhamwe rung na jaqsham ka Parsia mung hokham ajongwe Sairas raq Bebilon mung ka khat raüta, mung peng wantaq pat na saüli shamto.