Colossians 2 - ASII LAKDAP Bible (BSI)

¹ Ngi chongpha. Ngi raq namshiq miitu pinthum rokngoq riingoq jaqsham wan kang. Kiimaq Laodesia na siti Phungmaiqse miitu kiimaq nanok ahinti wiitarü, juwa ngi rai mang mirsap shaqti thun miitu kai hunnii wan kang.

² Ngi raq ara minshiiq wan tiikang arka, namshiq kiimaq tsangshiq ka kamasham na srea laqkong ma mija laq nguta sham tiikang. Kiimaq tsangshiq liipan na atsaü maq riimang riichan raüta misi laq nguta sham tiikang. Raüta tsangshiq tsan atsii na, Shiikeawe ma jamlai miitu wa kam wantaq, kra poimak maq milap wan rong i dongdii nguta, tsankhun maq si miitu sham tiikang. Arka tengtlaq bomtsi kra atsaü maq sap raütiitiq, tsangshiq tsan mong na akha mitak wan lot. Ara tak wan tlaq bomtsi ka, atsaü maq sap wan tlaq kra lü miishetiq, tsangshiq raq maiqse ma phaqchi tum ka Khristoli dea nguta misap wanlot.

³ Khristo apaiq kli Shiikeawe taksma anyan phaqchi tum tsiiqtiip kilü tala diketi we, Shiikeawe taksma anyan phaqchi apaü raüta athü ka ümchaü sanha Khristo riishe kunkun tiichhikuq wanto.

⁴ Ngi raq namshiq ma ara waiq tiikang arka, namshiq ka maiq ahinti arot shrabi raq lao liiho mak chang miitu waiq tiikang. Tsangshiq riika, ataisea miika asumwiq, thep miphanchan kuq kiiphan. Kra arot bom chongtlaq kra lümaq, namshiq ka lamjiq nü niishe misheaho.

⁵ Ngi ka namshiq rai bashi na adam simang li jiimin, tiima tsantsii maq namshiq rai kiqshi tsiimshi li sitiikang. Kiimaq ngi ka namshiq wiitarü kiq ashi maq, Jesuq Khristo ma kamtsantsii pharangrang maq chap tlan kra chhi lalata kai chochi tiikang.

Khristo Na Asho Awo Rilung

⁶ Namshiq raq Khristo Jesuq ka namshiq Tatiwe dea ngutiishe apaiq puk na nyap wan lan kata. Krai mren, apaiq rai tiipum lanta sirong laq.

⁷ Namshiq rang ka apaiq khum na atsaü maq cham rong laq. Kiimaq namshiq rilung jam ka apaiq khum na hai rong laq. Lanta namshiq ma jamkhiiwa tlang kuq wan kai, kiikha kamasham na ningkun ajong maq si ronglaq. Lanta tsan na kechutum aliim alei miili si ronglaq.

⁸ Riita ümchaü ka namshiq maiqmii tsii lamshat maq sirong laq. Mangjong maiqse phaqchi taksma, athii arii min ahü manphan jüche, ashi ra raq chongphanke wan tsütsit kra tai lanta, naq shonbiiho rongkiq. Kra tsangshiq raq phanchan kuq tlaq manphan ka, rawang win na siti abi winji hokhambi, ara ra nai hiq ara jamshati raq rom wan raüta achongkuq bomtsi jo. Kriika Khristo raq achongkuq manphan ka riimak.

⁹ Ara jamkhano chongtiikang ngukla, Khristo ka maiqse han-ngam khum na pokitaq kiijaq, ara han-ngam khum na Shiikeawe asii rilung rong arai nai apaiq asii phara ka, Shiikeawe apaiq khum na jamkho sitlaq, kiikha kunli asi.

¹⁰ Kiimaq namshiq ma asii rilung ka, Jesuq Khristo rai pumshi hanshi maq sitlan, kra lümaq kunli ama, athap raüta apheake wishe. Apaiq kli, phanrap winji ümtinkhan wa sitlaq kriithaq na ajong pinthum. Kiimaq arang hoti winji ümtinkhan wa sitlaq kra thun thaq na, apaiq ka ajong thaq niimin ajong pinthum.

¹¹ Jesuq Khristo rai pumshi hanshi she sitlan kra lümaq, namshiq khum na athohan ka hantoshe. Kriika han-ngam athohan thungtri maq ahan wan ka riimak. Shatmaq, Khristo raq namshiq khum na atho hankuqto she. Krai mren namshiq ka maiqmii pumdong han-ngam ngarai ramho kharü mong wa adaa wankun she.

¹² Ara jamkhano chongtiikang ngukla, namshiq raq ümtiikiiwa kham lam wan lan, kra akhing na namshiq ka Khristo rai maakho chiimshi na lap baiqto. Kiimaq kham lam lan na, namshiq ka Khristo ma namshiq kamtsantsii thü wan lan kra lümaq, amaa arki ikhiiwa tiidong wanto. Kriika Shiikeawe atra ningkun raq, Khristo ka amaa wa jamkho tiidong wantaq kiikhiisii hali tiidong wanto.

¹³ Namshiq ka akhing ashi na, namshiq ngarai na amaa silan. Kiimaq namshiq ka Pongnok phan maiqse kha maq, Thungtri wura maq tiiham mak dea riito. Shatmaq, ümchaü sanha, Shiikeawe raq namshiq ma Khristo rai tsitsü rilung she kuqto. Shiikeawe raq nashiq ngarai ka wiita diibaiqto she.

¹⁴ Apaiq raq nashiq kha ma, abi raüpot thun ümchuwa sitlaq kra, wiita diibaiqto. Kiimaq arthun diibaiqtaq arka, jai na jamlai bom dong chang ahü she nguta kha shiithum bomshat wan ikha. Raüta pumsongkham na nashiq tiishut chang thungtri raü tu kiimin nong nong adam maq tsamjong chü tübaiqki tiikai ikha, nashiq ngarai tsantsii jong thun kra wiita tiisiirai tübaiqto.

¹⁵ Kiimaq Khristo raq pumsongkham na apaiq tsaitaq kra akhing na, apaiq khum na thawe winji hokhambi nai winji tuwebi raq arang athü kra thun ümchuwa sitlaq kra, wiita runbaiqto she. Raüta akhum ka tsangshiq kharü wa tiidii wanto she. Raüta apaiq raq thawe winji hokhambi thun kra shumraü kharü maq kha raüta, apaiq raq mungmaiqse man na, rejang wa na shumwi kong chiihong chiiha hitsiq raüta shea wan tlaq ikha hit wanto she.

¹⁶ Ara chongtiikang Khristo raq thawe kharü ka adii baiq kun she kha maq, ümchaü sanha, maiq raq namshiq ma arphan arka aphaq asea mimai, arphan arka aphaq asea maimak, apii chang nguta tri raü arun baiq wishe kra thongshiri hali, namshiq ma khakuq tlaq kriika, naq tiikha nong rongkiq. Rahiq jipi kiimin, arka jihea ranaiq, arka jibi ranaiq nguho. Kiimaq Jinye Dong Poi ka alang chang nguho. Asii Niitiitsak ranaiq ka alang chang maa nguho.

¹⁷ Arthun chongtiikai thun thungtri arka, jai maq asaü hochang sitlaq kra tiiji atiichhikuq wan. Arka miinan, atsaiji tiichhike lamlamli. Shatmaq, riikhaqli awongsii ardea nguta ngo chang ka, Khristo khum sitlaq kli she.

¹⁸ Namshiq ka, maiq arot akiq shrabi ma, naq tlao rongkiq. Tsangshiq riika, rasetiim ka riisham mak maq chhi tiikai. Krai mren, tsangshiq ka nanok shammibi ahinti thaq na shammi jong sitiikai nguta tiishomra tlo. Tsangshiq ka arot, rakhütsiri na nanok thaq na kechu lin sitiikai nguta achu jaü tiichhi siq tlo. Kiimaq rasetiim kriimin shomnoq chang nguta shiichut tlo. Akhnok maiq arka, atiishomra rai chang min riimak chang niili, tiishomra siq tlo. Apaiq riika, mangjong han-ngam tri miili shin tlo.

¹⁹ Kiimaq krai mren, tsangshiq riika Khristo ma kam mak she. Tsangshiq raq phungtu ma akhupo Khristo miika kam mak she. Khristo raq apaiq wokhong na siti, apaiq khum phungtu ka, apaiq raq tiichhan chhi tlo. Kiimaq apaiq riili Phungmaiqse sitlaq kunli kra, atsiq akiq maq, arok arii thun kra triiche raüta, atra Jesuq Khristo khum na riitu raüta, Shiikeawe raq thi tlaq kra phanphan tiijonglu tlo.

Khristo Rai Tsai Nai Apaiq Rai Adam Maq Siwan

²⁰ Namshiq ka Khristo rai chiimshi na tsailan she. Kiimaq krai mren, ra nai hiq liipan na siti thawe winji ümchuwa sitlaq kra kharü mong wa adaa wankun she. Akha shatmaq, namshiq ka ümchaü min, ara mangjong hiq na siti, mangjong maiqse ikhli ka jam nguto sitlan? Namshiq raq ara mangjong hiq wa thungtri ka jaram wa lang tlan.

²¹ “Arlai phan phaqsea ka naq shan shiiq rongkiq; kra phan phaqsea ka nü na naq thü rongkiq; kiimaq kra phanhin phaqsea sitlaq kra ri tiika, jaq maq asham min naq manki rongkiq,” nguta tri chongkuq tlaq kra jaram wa lang tlan?

²² Arthun thungtri, phaq nai sea khuthaq na sitlaq kriika, akhoi kai chang. Aphaq asea chang jamlai wa sitlaq kra, wok niishe thiilot raü jiika, thumsaq she. Arka maiqse raq athü wan thung nai lai.

²³ Riita, arthun langtlaq tri raü arka, maiqse han-ngam phaqchi thaq na seng raüta aming athü wan. Tsangshiq raq nanok ma, rasetiim ka shomnoq raa dongdii ngu, kiimaq amang maq siraüta, kiimaq maiqmii khum ka pinthum jaqla maq tiichamchao raüta, Shiikeawe ka shomnoq chang nguta tlang kuq tlo. Ara chongtlaq tri raü thun arka, maiqmii han-ngam khushü tiijong rit wanti miirii li. Shatmaq, arthun tri raü ara lang raüta, maiqse ngarai han-ngam abi ramho sitlaq kriika, maiqse khum wa tiisii lot mak.