Colossians 1 - ASII LAKDAP Bible (BSI)

¹ Ngi, Paul, Shiikeawe raq Jesuq Khristo kiimwe ma ashong wan we raq, kiimaq naphunowe Timothi raq--

² Shiikeawe sengi Kolosia na siti, Khristo rai pumshi maq tsapkapkap siti naishiq phunainotiim ma: Na We Shiikeawe raq namshiq ka kaphap shat maq hansang maq mirümlaq.

Kechutum Achu Jaü

³ Naishiq raq namshiq miitu achu jaü kuq tiikai tek na, nashiq Tati Jesuq Khristo ma Awejong Shiikeawe ma kechutum wanruq maq sitiikai.

⁴ Arka naishiq raq namshiq kamtsantsii, Tati Jesuq Khristo ma thü tlan kra nai namshiq raq Shiikeawe setiim tarü rai lungwii tsantsii maq sitlan nguta tsütsa kra tai laita kechutum tiikai.

⁵ Riita man na, aphaji na, namshiq raq tengteng Tsütsa Ahea, namshiq ma achongkuq wan ira tai wan lan ihata. Kra tai wan lan akhing na, Tsütsa Ahea ma kamwan raüla, namshiq ma rawiichii ramungtan na alap wan chang asi miraq nguta chongkuqto ihata. Krai mren, namshiq raq ran tsantsii thü wan lan ihata. Riita ikra, rantsantsii thü wan tlan kriikha maq tiina, ümchaü namshiq raq kamtsantsii nai Shiikeawe sengi ma lungwii tsantsii rüm tlan kra. Arka namshiq rantsantsii tsingo she dong wan tlo.

⁶ Ara chongtiikai Tsütsa Ahea raq mangjong tlotli na nyam rat wanto she. Raüta mangjong maiqse pahea raq achu shiiman lap wan tlo. Arka man na namshiq phong na, aphaji na namshiq raq Shiikeawe kaphap mangchan ka atinkhan jonghea sitlo nya nguta sap lan ikha, raüta namshiq phong na nyam wantaq ikha, ümchaü min, nanok sang amang mung ahin liipan niishe nyam wan tlo.

⁷ Namshiq raq Shiikeawe kaphap mangchan tsii jong ka, naishiq kongti phunowe, naishiq rii na namshiq ma tsapkapkap maq jaqsham ketiwe, Jesuq Khristo dise, Epaphroditas raq tiitai kuq wantaq ihata. Kiiwa namshiq raq tai wan lan she.

⁸ Asii Wenyi raq namshiq tsan mong na, phunaino Phungmaiqsetiim ka lungwii wan miitu, lungwii tsantsii jonghea tiima kuq tlo nguta, apaiq raq naishiq ma chong hoto.

⁹ Ara chongtiikai, namshiq raq Shiikeawe mangchan sap wan lan thun ara ningkhan, naishiq raq namshiq tsütsa ahea kra tai kai ranaiq miiphat, namshiq miitu achu jaükuq wan ruq miili sitiikai. Naishiq raq Shiikeawe jaq wa, namshiq tsan nai mongjii ka apaiq raq jamlai wa tiima tlaq, kra poshi min tiikhea man maq, sap wan miitu anyan phaqchi ama asho awo mithü kuq laq nguta achu jaü tiikai. Kiimaq Asii Wenyi raq ümchuwa phaqchi jonghea rüm tlaq, kiimaq ümchuwa taksu tsii rüm tlaq, kra namshiq ma asho awo thap raüta miphea kuq laq nguta achu jaü tiikai.

¹⁰ Kra laphan jiitiq, namshiq Tatiwe raq namshiq ka jamkhii tiisinga wan wa lungwii tlaq, kiikha misi wan lot han. Kiimaq namshiq raq, ranaiqtek apaiq raq lungwii tlaq jaqsham kaiwa kra misham lot han. Krai mren, namshiq rilung na shamhea kaiwa ümchuwa sitlaq kra tsingo pahea she misi. Kiimaq namshiq ka Shiikeawe tiima tsantsii ka atsaü maq sap lanta mijong luwan han.

^11-12 Apaiq raq namshiq ka, apaiq ningkun achhai anyii rüm tlaq kriimaq, srea laqkong miidea mija laq nguta naishiq raq achu jaü kuq tiikai. Kra raütiq, namshiq raq phanrap haikaiq haike ümchuwa saü tlaq kra wiita minin wan lot han. Kiimaq namshiq raq chojong chise maq, Awejong Shiikeawe ma kechutum ronglaq. Shiikeawe raq jamlai wa tiije wantaq, apaiq phan amaq maiqse thun miitu, rawü mungtan na thü tlaq kra lap wan dam miitu namshiq ka seshaq ma tiija kuq wanto she.

¹³ Ümchaü sanha, apaiq raq nashiq ka ranyaq kharü mong wa da wanto she. Raüta, apaiq raq mangchan tlaq, Ase mungtan na kiqkap jaqshap miishe shunshea wanto.

¹⁴ Apaiq pum lümaq nashiq ka ngarai jaqkhon mong wa daa wanto she. Raüta nashiq ngarai thun wiita aroqke wan kun she.

Jesuq Khristo Apaiq Pum Nai Apaiq Jaqsham

¹⁵ Khristo ka nashiq makhea maq chhi lotmai Shiikeawe sham niq riri. Apaiq ka phanrap Shiikeawe raq ümchuwa phansangtaq kra wiitarü thaq na Chhikhu we.

¹⁶ Shiikeawe raq Khristo lümaq ramungtan na ümchuwa sitlaq kiimaq ara mangjong hiq na ümchuwa diim tlaq kra tiiqto. Kiimaq maiqse raq mak maq chhi tiikai phan kiimaq mak maq chhilot mai phan ümchuwa sitlaq thun wiitarü ka tiiqto. Ramungtan na siti nai mangjong hiq na siti winji hokhambi, winji tuwebi, kiimaq winji welabi ka Shiikeawe raq, Khristo lümaq siisaq phan sangto. Shiikeawe raq ara ra nai hiq thun ara apaiq lümaq siisaq tiiqto. Kiimaq apaiq miitu nguta tiiqto.

¹⁷ Khristo ka rapha hiqwa min mishaq niiphü asi dongdii. Krai mren, ara ra nai hiq liipan na, phanrap ümchuwa sitlaq kriika, Khristo wokhong na, maiqmiimii singa chang tiihongkuqtaq kriijaq, tiisuk rangrang siraütiq, maiqmii rilung thii ka riikhaqli maq mikuwan.

¹⁸ Apaiq ka apaiq khum phungtu khupo. Apaiq kli apaiq khum phungtu ma tsitsü raü chong. Apaiq ka Shiikeawe Se chhikhu pinthum. Apaiq ka amaa wa tiidong wanto. Apaiq amaa wa tiidong wantaq ka, wiitarü thaq na, apaiq kli Shiikeawe jamkun na chhikhu pinthum sitlo nguta tiichhike miitu tiidong wanto.

¹⁹ Arka Shiikeawe apaiq tsantsii maq lungwii raüta Ase khum na, Shiikeawe apaiq rong arai ka kunkun tiipo kuq wanto.

²⁰ Riita ara chongtiikai krai mren, Shiikeawe raq Ase pum lümaq, ara ra nai hiq wiita apaiq wokhong na tiinyap wan nong ma nguta tri raü ka shatto. Krai mren, Shiikeawe raq arka, Ase pumsongkham na tsaitaq kra lümaq, ra nai hiq wiita ramungtan kiimaq mangjong hiq na ümchuwa sitlaq thun ka apaiq rai wehea miishe tiijato. Raütiishe awokhong na asengi miishe tiija wanto.

²¹ Akhing ashi na namshiq ka Shiikeawe wokhong wa luhea na kiho lanta siwan lan. Kiimaq namshiq ka apaiq rai wesang ralii maq siwan lan. Kriika namshiq raq abi ngarai ümchuwa tang wan lan, kiimaq hongtha mak phan abi ati tiima tsantsii pahea rüm wan lan kra ningkhan riito.

²² Shatmaq ümchaü sanha, Ase ka han-ngam khum na tsaitaq kra lümaq, Shiikeawe raq namshiq ka apaiq khi alu miishe tiija wanto. Arka namshiq khum ka asii, chiisan kiimaq jamlai shutphit min ahü maq apaiq wokhong na tiisi nga wan miitu she dokdaa wanto.

²³ Krai mren ümchaü sanha, namshiq ka kamtsantsii tiipha chang Tsütsa Ahea bomtsi thaq na pharangrang maq jaq riiwiiq lanta sirong laq. Riita man na, namshiq raq Tsütsa Ahea tai wan lan akhing na, jamkhiiwa pharangrang maq kamwan lan, kriiwa akhiismin naq tiimeshi rongkiq maq sirong laq. Riita ngi Paul ka, ara Tsütsa Ahea, mangjong hiq wiita na chongkuq wantaq ara chongke miitu jaqshise miishe jawankang.

Paul Ka Phungtuti Jaqshi Ma Jaraüta Jaqsham Tlo

²⁴ Riita ngi ka ümchaü sanha, namshiq miitu chamchao tiikang arkha maq, chochi khiq li sitiikang. Ara jamkhano chongtiikang ngukla, ngi i khum na chamchao tiikang ara lümaq, Jesuq Khristo raq apaiq khum phungtu miitu, apaiq chamchao chang ümchuwa tiichong tlaq jaqthiq ka tiinyi wan miitu jaqsham holai ka riisha howan dam tiikang.

²⁵ Kiimaq ngi arka, Shiikeawe raq phungtu miitu jaqshise ashi nguta shongto. Riita ara minshiiq chang arka, Tsütsa Ahea ka tiitho tiipha maq nokwe ma chiiriim wan lata chongke miitu kuqto.

²⁶ Riita ara tsütsa arka, Shiikeawe raq man na pat achat ümchuwa lea wantaq akhing niika, mangjong maiqse tlotli makki wa, apaü raüta thü wanto. Shatmaq, ümchaü akhing niishe Shiikeawe raq aphan amaq maiqse ümchuwa sitlaq kriima atiichhi she riikuqto.

²⁷ Shiikeawe raq kra apaü raüta athü wan ka, ümchaü sanha asengi ma, aphoq kechang she nguta akiq tiideato she. Riita ara achong lot mai rahea phan, achhai anyii tsiiqchong nyamchong rümtlaq arka, wiitarü miitu rümtlo. Riita ara chongtiikai apaü raüta athü bomtsi ka, Khristo ka namshiq khum niishe sitlo nguta chongtlo. Kra liichum ka, namshiq riimin Shiikeawe achhai anyii khushü jonglu kra milap wandam han she nguta ngo ahata.

²⁸ Arkha maq tiina, naishiq raq Khristo Tsütsa Ahea ka maiqse angu wiitarü ma chongkuq tiikai. Naishiq ma anyan phaqchi ümchuwa raükuq tlaq, kriimaq naishiq raq maiqse achhi kiima trap tru maq sungkhu tsii lam ka chongkuq tiikai. Kiimaq shrin kuq tiikai. Riita ara shun shea wan tiikai arka, maiqse pumsii awea maq, Shiikeawe jichong na Jesuq Khristo pum na pumshi hanshi maq siwan rilung na maiqla tiija wan laita sheake wan miitu hunnii tiikai.

²⁹ Riita Phungmaiqse thun tiichhanchhi wan ha jiilei nguta, ngi ranaiq rawa, Khristo raq akuq ningkun ajong i khum na sitlaq kra holata, rokpan riipan hunnii lata jaqsham tiikang ahata.