ASHICHONG 1 - ASII LAKDAP Bible (BSI)

¹ Ashi ange wiita thaq na peohea pinthum Solomon shi.

Atiipha Shi Jetu nyung Raq

² Lungwii tiichhi ithea na shuptlaü ka ngi ma peohea. Ümnaq lungwii ngi ma thütlaü ka, ngi ma spiqtai sumhea thaq niimin sumhea.

³ Ümmang chongsum ngiqkai ngu ikha, Ataisea ma ni na washasha hea. Jeture raq tai ma sumhea.

⁴ Ngi shunshea laq wapha nanai bashi ra na, Nanai honhonli juho phiina. Ümniika ihokham jalaq. Nanai jam na shongnga wanpha. Rilung pattup chojong chise si ma. Nanai honhon tapmong nyang na, Lungwii spiqtai nyanglaita, Tapshok phataqtaq maq si ma. Junriire wiita raq ümnaq lungwii tlo ka awang chang riimak!

⁵ Jerusalem sheare lei, isham ka anyaq dea. Shatmaq aliiseachang tsomhea. Kumtsaiphii bin jü na, Kedar hiqshong tombu jamsetiim ikha. Atam alam setiim. Shatmaq aliisea ma tsomhea. Solomon hokham jam kitanpu na, kheachan tsomhea ikha.

⁶ Nyinore lei, ngi ka ngamnyaq nguta, naqshummii rongkiq. Jaqsham minshiiq chumtsi shekii, ihü ihan nyaqriiqriiq. Iphu inotiim ka ngi ma akhiq, Kriikha na ngi ka spiqro na minshiiq tiiko. Ikhum tiijutjü akhing ahü.

⁷ Itsanrowe lei, ümskukong ka ümbano mirümki haü? Ranaiq shethung rakiitsi na ümbano mitiibum haü? Riita ngi raq ümniika ahin skukong rümti, phong mong niika jaram miliikiha?

Jerowe Raq

⁸ Wuriise khan tsomhea tsanro nyung lei, ümniiraq isku rümchang nyiimlung ba chhimaü shea? skukong jai phanphan liiho laq. Laüta ümchhechhi thun kra rümho laq. Sku rümti ngachang jolitiipsetiim thotho kiijaq.

⁹ O, nyino nyung lei, ümshamhea ka tsomhea. Kumrang kaüshiise sham tsomhea chhiraüta, Ejip mung hokham kumrangleng hitti kumrang pongwetiim, doqtrang tlaq ikha jerobi tsantsii phetrangtlo.

¹⁰ Ümkhudap tei jan jangjang janghea kumrang maibong ikha. Dang na lakshiitum alak ikha wanrang wiira tsomhea,

¹¹ Shatmaq naishiq raq chaq raü kampho tum mitlak kai.

Jetunyung Raq

¹² Ihokham chang na akon, Kiimaq idü wa homseng tsang raq tapmong mongtlo

¹³ Ngi lungwiitiwe ka homseng ikha homhea, ikhuk na wetlo.

¹⁴ Ngi tsanwa ikongtiwe, Egendi bagan wa, pepü homtsang ikha homhea.

Jerowe Raq

¹⁵ Tsomhea tsanro nyung lei, ümsham ka alüsea ma tsomhea, rum wa pepü tu ikha. Ümmak liina lungwii tsii ka tsihea!

Jetunyung Raq,

¹⁶ Ümsham pinthum tsomhea, roriiwe lei, Ümniika ngi chochi tsanhea! Nanai changdü rensang phiirü waijuju.

¹⁷ Nanai jam haichang maisak pelü, Chüjung haichang mrao pelü.