Acts 8 - ASII LAKDAP Bible (BSI)

¹ Kiimaq Saul riimin apaiq tseabaiq na pong damto Kra ranaiq miili she, Jerusalem wa Phungmaiqsetiim ka pinthum tiichamchao pha wanto, kiimwebi kli Jerusalem na sito. Phungmaiqse abiti thun ka, wiita Judia nai Samaria wang na, barap binrii na pongpin riipin pin wanto.

Saul Raq Phungmaiqse Tiichamchaoto

² Kamasham na arang aphatibi thun ka riitam raüta, Stephen maa ka pinthum shreng raüta, maaho maanyi maq saiqsamto.

³ Shatmaq Saul riika Phungtu kra shiithen baiqla nguta pinthum srurii heng wanto. Krai mren, apaiq raq Phungmaiqsetiim ka jamshi wa rithoho raüta, jechak maiqwe alap ho nguli raüta, tsangshiq ka phaqtek mong na shaqto.

Tsütsa Ahea Samaria Na Chongto

⁴ Shatmaq, Phungmaiqsetiim ümchuwa pin wantaq kra raq, barap binrii na khum wan wan raüta, Tsütsa Ahea kriishe chongkuq wanto.

⁵ Kiimaq, Philip ka Samaria wang na chela ajong pinthumti kiina wawan raüta, mungmaiqse ma Khristo tsütsa kra chongkuqto.

⁶ Philip raq traho bom chongkuqtlaq kra taitibi mungmaiqse ka pahea riiphong wanto. Tsangshiq raq awang chang jaqsham pahea shamtlaq kra chhi raüta, apaiq raq chongkuqtlaq bomtsi kiimin tsangshiq raq pinthum phaqchii nichii maq tiitsang taito.

⁷ Kiimaq abi winji kong kriika, maiq pahea khum wa, aho asii wa trang la, dongho raüta pintrangto. Kiimaq maiq pahea han amaa arki atsitibi nai makchuk jaqmiiti thun kiimin pahea tiihea kuqto.

⁸ Krai mren, kra chela na siti mungmaiqse ka pinthum khoqriiq shishiiq miishe shongnga wanto.

⁹ Kra chela na siti maiq weshi mang ka Simon. Apaiq ka along we ashi ajong dong kang nguta tiishomrasiqto. Kiimaq apaiq raq balashise ka mintin loqle jaqsham tiichhi kuq raüta, Samarianok mungmaiqse ka kai tiiwangto.

¹⁰ Krai mren, kra chela na siti mungmaiqse, ajong aran wiitarü raq, apaiq bomchong ka aheawiq maq tiitsang tai wanto. Raüta, “Notsam, apaiq arka Shiikeawe ningkun tu, ‘Ningkun Jonghea Rümti we’ nguta chongtlaq irshe dea pokito sham nya,” nguta tsangshiq liipan na bom ka riichongto.

¹¹ Apaiq raq mungmaiqse ka mintin loqle jaqsham maq tiibok raüta, rahiq luhea, tsangshiq ka kai tiiwang siqto. Kriikha maq, tsangshiq raq apaiq bomchong kiima kamwan raüta sito.

¹² Shatmaq, ümtiikiiwa Shiikeawe mungtan tsütsa ahea kra nai Jesuq Khristo tsütsa kra Philip raq tsangshiq ma chongkuq wantaq, krai mren, tsangshiq raq kra tsütsa kiima kamwanto. Krai mren, tsangshiq jechak maiqwe kamwantiiti thun wiita ma kham lamkuqto.

¹³ Simon apaiq riimin Jesuq miishe kamwanto. Kiimaq apaiq riimin kham lamto. Khamlam jai maq apaiq ka Philip rai napshnap miishe sito. Kiimaq Philip raq awang chang nai amao chang jaqsham pahea shamtlaq kra chhi raüta, apaiq ka pinthum awang riito.

¹⁴ Kiimaq, Jerusalem na siti kiimwebi riimin, Samaria na siti mungmaiqsetiim raq Shiikeawe bomtsi ma kamwanto nguta tsütsa ka taito. Krai mren, tsangshiq raq Petar nai Johan ka tsangshiq phana tiiwato.

¹⁵ Tsangshiq saü wan raütiishe, Shiikeawe bomtsi ma kamwantibi raq Asii Wenyi milap wan laq nguta tsangshiq raq achu jaü kuqto.

¹⁶ Tsangshiq raq Tati Jesuq mang na, kham ka alam wankun she. Shatmaq, tsangshiq khum na Asii Wenyi ka misaü shaqli riito.

¹⁷ Kriikha maq, Petar nai Johan raq tsangnai jaq ka tsangshiq dü na sham raüta, achu jaü kuqto. Krai mren, tsangshiq raq Asii Wenyi ka lapto.

¹⁸ Simon raq phungmaiqsetiim ma kiimwebi raq tsangshiq khum na jaq maq sham raüta achu jaükuq wan taq kra lümaq, Shiikeawe raq tsangshiq ma Asii Wenyi kewan kra chhito. Kra chhi raütiishe, apaiq raq Petar nai Johan ma kampho kuqto.

¹⁹ Raüta, “Ngi miimin ara ningkun ara kran kuq ronglaq. Ngi riimin maiq ju dü niiwa, i jaq maq sham tiikang, kriiti raq Asii Wenyi milap laq,” nguta apaiq raq Petar jaq wa jaüto.

²⁰ Kiijiishe, Petar raq, “Shiikeawe kongphiq Asii Wenyi ningkun ka ümkampho maq mirilot ha nguta ashut pinthum tiima tlaü kra ningkhan, ümniirai ümkampho thop kra wamungtan na mitiikhiim baiq kiiphaü!

²¹ Ümtsan ümtsii ka Shiikeawe man na riikhaqli riimak. Krai mren, ümniiraq naishiq rai jaqsham na lom chang ahü she.

²² Riita, ümchaü min ümtsan tsii ka klaitlo laq. Laüta, ara ajiq ngarai tsantsii kra tiisii miitu Tatiwe jaq wa achu jaü laq.

²³ Ngi raq ümtsan mong ka anyaq phoqngeng tsii raq ama chhi tiikang kiimaq ümniika ngarai kharü raütu maq tiikha shat chhi tiikang,” nguta Petar raq nguto.

²⁴ Kiijiishe, Simon raq, “Phuno we nai lei, mangchan lanta, ngi miitu Tatiwe jaq wa achu jaükuq ronglaq. Ümchaü namnai raq jamlai wa chong lan kra manson ka i dü na nimak chang miitu,” nguta Petar nai Johan ma chongto.

²⁵ Tsangnai raq nokmaiqse ma Jesuq Khristo miitu hakhi kuq lot raüta nai Tatiwe Tsütsa ahea kra chongkuq lot raütiishe, Petar nai Johan ka Jerusalem na hali jangho nongto. Tsangnai ka ajangho lam maq, Samaria wang na maiqhiq shong pahea na Tsütsa Ahea kra chongkuq wanto.

Philip Nai Ethiopia Wa Ajong Weshi

²⁶ Kra akhing na, Tatiwe rase ashi raq Philip ma, “Tiije laq. Laüta shemai nü kiina kilaq. Jerusalem maq riita Gaja chela nü na kai lam kiina kilaq,” nguta thaüto. (Maiq ka ümchaü arlam maq khum mak she.)

^27-28 Krai mren, Philip ka tiijesaq raüta kihoto. Riita, kra akhing na Ethiopia mung hokham nyung kampho tum kheti siihiip ajong weshi, alai lambaiqje we ka, ahiq na jangho lam na akai rai lohoto. Apaiq ka Jerusalem na Shiikeawe shomnoq wa awa, tsangshiq na jangho she, kumrang leng thaq na chao raüta akairai riito. Apaiq ka akhum lam maq Isaia shammi we raq awaiq lakdap kra phat rea lohoto.

²⁹ Asii Wenyi raq Philip ka, “Kra kumrang leng tho kiina kilaq. Laüta, apaiq thotho maq khumlaq,” nguta thaüto.

³⁰ Krai mren, Philip ka juju she kito. Raüta, Ethiopia we raq Isaia lakdap phat rea kra taito. Philip raq, “Phuno we ümniiraq phat tlaü kra liichum ka tak wan tlaü sha?” nguta apaiq ma bom ka waito.

³¹ Kiijiishe, siihiip jongwe raq, “Ngi ma ashi ra raq chongkehü miika, ngi raq jamwo misap?” nguta apaiq bom ka treto. Kiimaq apaiq raq Philip ka, apaiq rai leng na ngawakiq nguta hiato.

³² Apaiq raq phattaq asii bomtsi ka ara riito: “Apaiq ka skuse ataaphaq ma hitho tlaq ikha, aho ariiq min ahü sheahoto. Skuse abin sikiijaq phephiiq mak ikha, apaiq raq bom poshi min bom mak riito.

³³ Apaiq ka pinthum shiinüm shaito, apaiq ka khahü na tiishut baiqto. Apaiq lai ala kiimin maiq raq sapmak miraq. Mangjong hiq wa apaiq rilung ka thumkito.”

³⁴ Kra phat raütiishe, “Riita, ara shammi we raq chongtlaq arka ju bom wa chongtla? Apaiq raq maiqmii miitu sha chongtla, sha nanok ahinti miitu wa tiithaitla? Kra liichum ka ngi ma chongkuq laq,” nguta siihiip jong we raq Philip ma waito.

³⁵ Kiijiishe, Philip raq ara phat wantaq lakdap kiimaq phaho raüta, asii bomtsi wa Jesuq manphan Tsütsa Ahea kra tiitho tiipha she chongkuqto.

³⁶ Tsangnai ka lamphan phan akaiho nguli kihoto. Tsangnai ka akai rai lam maq, bashi na khamchum ashi chhito. Kra chhi raütiishe, siihiip jong we raq Philip ma chongto, “Riita, ümchaü arjaq kham min asi ahata. Ngi raq khamlam miitu ka pahea rangra rai chang min asi sha?”

³⁷ Kiijiishe, “Ümniiraq ümtsan tsii wiita maq kamwan tlaü jiika, ümchaü li khamlamke wan mimai,” nguta Philip raq apaiq bom ka treto.

³⁸ Krai mren, siihiip jong we raq apaiq leng ka shiikhingto. Raüta, Philip tsangnai ka khamchum mong na kiraüta, Philip raq apaiq ma kham ka lamkuqto.

³⁹ Kra lot raüta, tsangnai ka khamchum mong maq takii na dong wan ri li she, Philip ka Asii Wenyi raq, ahin nü na shea wan saq she shea wanto. Siihiip jong we raq Philip ka chhi mak she riito. Shatmaq, apaiq ka kai pinthum chojong chise miishe tsangmung na kihoto.

⁴⁰ Philip raq apaiq ka Ashdod hiq niishe saüwa raütiitiq, saüwa kang she khana nguta takto. Kra chela miishe hali, apaiq ka Sisiria chela niishe wawanto. Lam na awa wan lam maq, apaiq raq Tsütsa Ahea ka chelatek na trahokuq wan wan riito.