Acts 4 - ASII LAKDAP Bible (BSI)

Petar Nai Johan Ka Rung Na Tiichapto

¹ Petar nai Johan raq mungmaiqse ma traho bom chongke ka mithum shaq liipan niili, ramwebi phong wa wiijamti, kiimaq shomjam kheti peta siihiipwe kiimaq Sadusinok wa maiq wiijamti ka shomjam na dongchhaq li saükito.

² Tsangshiq ka kiimwe nai raq mungmaiqse ma, Jesuq ka amaa wa dong wanto. Krai mren, maiqse ka atsaikai jai, amaa wa adong mirwan nong nguta, trahoke kra chhi raüta, pinthum akhiq riito.

³ Krai mren, tsangshiq raq tsangnai ka lap raüta, kharü maq khato. Kiimaq, kra ranaiq ka rashe acha she kha maq, tsangnai ka anap ranaiq na saüli phaqtek mong na shaq thüto.

⁴ Shatmaq, mungmaiqse phong wa maiq pahea raq, Petar nai Johan raq achongkuq traho bomchong kra tai raüta, Jesuq ma kamwanto. Krai mren, kamasham maiqse ka hingbiingi she pawanto.

⁵ Anap ranaiq miishe, Jehudinok mung welabi, shiilangbi, kiimaq Thungtri shrinketi shrabi thun ka, Jerusalem na ngongthun ngato.

⁶ Tsangshiq ka Ramwe Ajong Pinthum We Annas rai riihumto. Kiimaq Ramwe Ajong Pinthum we jamti welabi, Kaiaphas, Johan Alekjendar kiimaq tsangta wa maiq welabi ahinti sitlaq kriiti thun rai min riihumto.

⁷ Tsangshiq raq Jesuq kiimwe nai ka tsangshiq rungphung na tiichap raüta, “Namnai raq ara akü we ara jamkho tiihea kuq lan? Namnai raq ara ningkun ka jambawo lap lan? Ju ningkun mo ara tiihea kuq lan ara?” nguta tsangnai ma bom ka waito.

⁸ Kiijiishe, Asii Wenyi raq Petar khum ka kunli ama romto. Krai mren, apaiq raq tsangshiq bom ka akha treto, “Munglangti mungtubi nai shiilangbi lei,

⁹ Riita, ija, ümchaü ranaiq, namshiq ajong alabi raq, nainai raq ara akü we thatsi kra tiihea kuqkai, jaqsham ahea sham kai kra kha na, nainai ma kra jamkho tiiheakuq lan nguta, rung na tiichap tlan jiika, kechu jonghea.

¹⁰ Riita, ümchaü min namshiq tarü raq, Israilnok mungmaiqse tarü raq, ara bomtsi ara tiitsangdada sap ronglaq. Arwe arka thawe kharü mong wa, ümchaü phintsaqtsaq she, arot la arot she heakito. Raüta, ümchaü namshiq tarü makki na, phintsaqtsaq hea she chap raü chhi tlan. Ara heakitaq arka, namshiq raq atsatbaiq han, Najareth hiqti we Jesuq Khristo mang na ningkun asi; kriiwe ningkun maq heakito. Jesuq ka namshiq raq pumsongkham na tübaiq lanta tsatbaiq lan. Shatmaq, Shiikeawe raq apaiq ka amaa wiishe tiidong wanto.

¹¹ Asii Bomtsi na, Jesuq arka jamhai chang longkaü nguta chongtlo. Arka akha chongtlo: ‘Namshiq jamhaiti bi raq ara longkaü arka abi nguta tiithu baiq lan; kra kaü riiwe ka, ümchaü tarü thaq na araa pinthum longkaü ma jakito.’

¹² Maiqse chhiiti ka apaiq kli. Ra raq aham mangjong hiq raikhü na, Shiikeawe raq apaiq kli nashiq chhii wanti we nguta tiikito. Apaiq tlea raüta, ahin ka jumin ahü she.”

¹³ Ngongwebi thun welabi raq, Petar nai Johan ka thungtri saptsin wanti, tsüwe tsitwe min riimak, shatmaq ahai asong jam min ahü maq, tsangshiq man na, bom chongke kra chhi raüta, amaorai li she riito. Kra taksma bomtre kra chhi raütiishe, tsangshiq raq tsangnai ka Jesuq rai kongshi maq siwan damti kha maq, kiitin khan asung saptsin wantlo nguta bom ka tak wanto.

¹⁴ Kiimahali, maiqwe atsi wa aheakiwe kriiri, tsangshiq makki na, kiijaq Petar nai Johan rai adam na chapshat. Kriikha miishe, tsangshiq raq kiqkhii chang ka ahü she.

¹⁵ Kriikha miishe, mung welabi raq tsangtsam kriika, Rungkhok mong wa, kinphai na heashi tiiki baiqto. Raütiishe, tsangshiq mungwelabi liipan niishe, bom ka akha riiwaisoto,

¹⁶ “Riita, welabi lei, nashiq raq arwe nai arka, jamkha she wa miraq rong i? Jerusalem na siti nokmaiqse tarü raq, ara awang chang pinthum ashi jaqsham wantaq arka, tsangnai riidea tiihea kuqto ngutri asapwi siisaq she. Ümchaü nashiq riika, tiihea mak dea ngutri trotlot mai she,” nguta bom ka riichongto.

¹⁷ “Li jiimin, ara tsütsa arka, nanok maiq ahinti raq tai mak chang miitu, atiisang pat baiq chang. Arkha maq, nashiq raq arwe nai arma, tsangnai raq Jesuq mang ka chong raüta, maiq ahinti ma trahoke raa mak she ngutli tiihai chongkuq rong i,” nguta tsangshiq liipan na iiphoto.

¹⁸ Kra riiphotaq krai mren, tsangshiq raq Petar nai Johan ka Rungkhok na hali tiijang hea nongto. Raüta, tsangnai raq Jesuq mang ka chong raüta, maiq ahinti ju miimin trahoke maimak, kiimaq Jesuq mang na jamlai phan min shrinke maimak dongdii nguta aming kuqto.

¹⁹ Kiijiishe, Petar nai Johan raq, “Shiikeawe maklii na, apaiq aming tai raüta si kra sha ahea miraq, sha namshiq aming kra tai raüta siraü wa ahea miraq, kriika namshiq welabi raq tri ka shin rong laq.

²⁰ Ara jamkhano ngutiikai ngukla, naishiq raq maiqmii mak maq jamlai phan wa chhi kai, kiimaq maiqmii ni maq jamlai phan wa tai kai, kra chongke wan hü maq, kaiq shakshak ka silot mai,” nguta tsangshiq welabi bom kra treto.

²¹ Kra, tai nong raütiishe hali, Rung welabi raq, tsangnai ka tiiphiip miijiip raüta, kiq atsin maq hali, Jesuq mang na nanok ma trahoke maimak dongdii nguta, shiikeng miileng raütiishe, tsangnai kharü ka diibaiq raüta tiiwa baiqto. Jamkhano ngukla, tsangshiq raq tsangnai tiishut chang lam ka hum mak. Kiimaq, mungmaiqse tarü raq, “Shiikeawe raq awang chang shamto. Apaiq ka awangchang Shiikeawe,” nguta Shiikeawe tiitsam kamti siisaq.

²² Riita, ara chongtiikai, Shiikeawe raq awang chang jaqsham raüta, athatsi tiihea kuq tiiwe kriika, wiiroqblai pat maiq riito.

Phungmaiqse Raq Achu Jaüto

²³ Petar nai Johan ka tsangnai phaqtek mong wa tiidong ri li she, tsangshiq kongtibi phungmaiqsetiim pha na wa raüta, ramwe jongbi nai welabi raq tsangnai ka jamkhiiwa tiiphiip jiiptaq kra tsütsa ka tiitaito.

²⁴ Tsangnai nü wa kra tsütsa ka Phungmaiqsetiim raq tai raüta, tsangshiq tarü tsantsii ashi maq, Shiikeawe jaq wa akha achu jaüto, “Rakaü Hiq we Tatiwe lei, ra nai hiq phansangti, kiimaq sammoktra jü phansangti, kiimaq ra takiq na sitlaq tsitsü asi tarü phansang wanti we lei!

²⁵ Ümniiraq ümdi ümmase naiti Dawit ka, Asii Wenyi ma trom laüta, apaiq ma akha riisham bom tiichong kuq laü ihata. ‘Jamlai nguto walü nyai wa ikha, Pongnok phan maiqse thun ka khiq riq tla? mung welabi raq wotshong weshong, atu na thiikho jaram wa thu tla?

²⁶ Honyung hokhambi thun, chiqchap rechap thung wanto. Mung welabi thun adam na thung raüta, Tati Shiikeawe nai apaiq Khristo ka khat wan, kumpa lanlii wiita she shong wanto,’ nguta chong tlo.

²⁷ Ara chongtlaq arka riikhaqli she dea teng wanto. Herod nai Pontias Pilat ka ara chela na Pongmung maiqse nai Israilnok welabi rai, adam na reraü shi maq pong raüta, ümbom taiti asii ümluqkhapse Jesuq, ümniiraq apaiq ka Khristo ma shong laü we kra ngeng seng wanto.

²⁸ Tsangshiq raq ümtinkhan wa kiimung wantaq kriika, ümningkun ajong maq nai ümniiraq athithi na tiihong tha miitu, ümniiraq tri raü ka, kongkhu ji miiphü dongdii shat je she athü wan kra, tiikupi wan miitu tsangshiq ka hongla wanto.

²⁹ Riita, ümchaü min, Tati Shiikeawe lei, tsangshiq raq naishiq ka atsea ata ma tankhan raüta, tiiphiip jiip tlaq ara ümniiraq liikuq laq. Ümniiraq naishiq, ümdisetiim arma, ümbomtsi ka khangriri hea maq, kiimaq haisong mai maq chongke miitu, naishiq ma ningkun kuqlaq.

³⁰ Kiimaq, asii üm Luqkhapse Jesuq mang na, pinthum awang chang nai amao chang jaqsham ka, atsi asiti ka tiihea kuq laüta, ümningkun jong kra tiichhi kuq laq,” nguta achu jaüto.

³¹ Krai mren, tsangshiq raq ara achu jaü lot ri, tsangshiq riitam ngachang ba ka hiqjong mu raq bai tlaq ikha, atiikhai riiban li she tiimeto. Kiimaq tsangshiq tarü ka, Asii Wenyi raq ama chhaq rom wanto. Krai mren, tsangshiq raq Shiikeawe bomtsi ka khangriri hea, haihii songhü miishe chongkuq wanto.

Phungmaiqsetiim Takshi Pinshi Maq Phaqsiqto

³² Kra Phungmaiqse kong ka tsangshiq tarü, tiima tsantsii ashi maq siwanto. Tsangshiq tarü loweatek raq, jurmin apaiq jaq na jamlai phan hupsam wa sitlaq, kriika apaiq rii li nguta tiima mak riito. Shatmaq, tsangshiq tarü raq maiqmii jaq na jamlai wa asi, kriika kongtibi rai takshi pinshi maq riiphea riinyin phaqsiq raüta shongnga wanto.

³³ Kiimaq, kiimwebi raq ningkun ajong maq, “Tati Jesuq ka amaa wa dong wanto she,” nguta mungmaiqse ma, saqseng hakhi kuwanto. Krai mren, Shiikeawe raq tsangshiq tarü ma, achu shiiman achong lot mai jonghea asho awo thap raüta, raükhokkhok kuqto.

³⁴ Tsangshiq phong na jumin phaq nai sia na nyi mak dea nguta ju min chamchao mak. Ju jaq niiwa wak lo, jam lo asi, kriiti raq maiqmii tachong hupsam kra asha riito. Raüta, kra sha kampho ka lam wan raüta,

³⁵ kiimwebi jaq na kuq wantlo. Krai mren, kiimwebi raq kra kampho ka maiq loweatek ma, jamlai wa raa tlaq, kra phanphan mren mra chhaq maq phea kuqto.

³⁶ Riita, ija, ara chongtiikai akhiisii hali, Lewi saüse phan wa maiq weshi, Saipras mung na sitiwe asi riito. Apaiq mang ka Joseph. Kiimwebi raq apaiq ka Barnabas nguta mangto. (Barnabas ngutlaq ka “Tsaiji doketi” nguta ngo).

³⁷ Apaiq riimin, ahiq phu bashi shato. Raüta, kra hiq sha kampho ka kiimwebi jaq na kiinong kuqto.