Acts 28 - ASII LAKDAP Bible (BSI)

Paul Ka Malta Hiq Na Saüto

¹ Naishiq ka tareko na ahea khusang miishe saü wan jai niishe, kra khamjong mong hiq mang ka Malta hiq nguta sap kai.

² Kiijaq siti hiqshong maiqse ka naishiq rai abom anai aheawiq riito. Kiitiikaq ra hali junho nongto. Kiimaq rasong hea riito. Kriikha maq tsangshiq raq naishiq ma wa chaqkuq raüta, lungwii tsan- tsii maq naishiq ka taoto.

³ Paul raq chinthiq setiim ka hiq wa riichomto. Raüta apaiq ka chinkii setiim ka wa na phong chaq rea riito. Kra liipan bala, paüse ashi ka waketsi ma chinthiq mong wa dongki saq raüta, Paul jaq na dakho tlii maq kaqhoto.

⁴ Kriiwa, noktibi raq paüse ka Paul jaq na tiipaq raü kra chhito. Kiimaq kra chhi raüta, tsangshiq nai tsangshiq liipan na akha riichongto, “Arwe arkla maiqtseati matwe dea sham! Apaiq ka khamjong mong na tsai chang wa lunto. Shatmaq, Tingting phra kaü raq apaiq ka tiihang mak she sham arja wa,” nguta tsangshiq liipan na riibomto.

⁵ Shatmaq Paul raq paüse ka wa na khaüsaqli chaq baiqto. Kiimaq adü na jamlai tsisi min ahü riito.

⁶ Tsangshiq raq apaiq ka maklii liipan niili, achhang ajong she mirwan sham, raüta jaqlo chutli she mitsai sham nguta tiimato. Shatmaq, akhing ashaqpuq she sijai niimin, Paul ka sangkaq kaq li riito. Jam min ngusiq mak. Kra chhi raütiishe, tsangshiq tiima ka klaisaq she klai kito. Raüta, “Notsam apaiq arka phra kaü ashi ahata!” ngutiishe tsangshiq liipan na riibomto.

⁷ Kra hiq ba maq aje lin niili, maiq wakram ashi asi riito. Kra wakram ka kra, khamjong mong hiq kra pengti wela we wak riito. Apaiq mang ka Publias. Apaiq raq naishiq ka lungwii tsantsii maq tsangjam na tao wanto. Naishiq ka ranaiqtsam apaiq jam na hai wan kai.

⁸ Publias ma awe ka atsi chang na abum riito. Apaiq ka awok tsi achat nai tsidong riito. Riita, Paul ka tapmong na wato, raüta atsiti we dü na ajaq maq sham raüta, achu jaükuqto. Krai mren apaiq thatsi ka tiihea kuqto.

⁹ Kra chhi raütiishe, kra khamjong mong hiq na siti maiq atsi asiti thun ümchuwa sitlaq kra wiita, naishiq phana atsi tiiheawa miitu she warai wanto. Krai mren, Paul raq tsangshiq ma achu jaükuqto. Kiimaq tsangshiq thatsi kiimin wiita tiihea kuqto.

¹⁰ Kiimaq tsangshiq raq naishiq ma kongphiq jaqmiiq kiimin pahea kuqne wanto. Kiimaq naishiq ka kra hiq maq tiido wan akhing niishe, tsangshiq raq naishiq ma khamjong lam maq wawan na tungsea lamsii ümchu wa raa tlaq kra thun ka laijong na ho thü kuq kito.

Malta Maq Rom Na

¹¹ Naishiq ka kiijaq jipi lü tsam sithü laitiishe, Alekjendria chela wa awa laijong ashi amang ka “Phra chhop,” ngutlaq kiimiishe wawan kai. Kra laijong ka ralii bala kra Khamjong mong hiq Malta hong na khingto.

¹² Laita naishiq ka Sairakus chela niishe saü wan kai. Naishiq ka kiijaq ranaiq tsam hai wan kai.

¹³ Kriimaq hali naishiq ka laijong maq wawan nong laita, Rejiam chela niishe saü wan kai. Rejiam chela miimin laijong maq hali wawan nongkai. Kiimaq napjai ranaiq niika shemai nü maq rahai she wanto. Krai mren she, naishiq ka aphiq lin miishe wawan laita, ranaiq nai liipan niili Puteoli chela na saü wan kai. Puteoli chela ka laijong khing wa chang tru.

¹⁴ Naishiq raq kra chela na phunainotiim wiijamti asi riihum wankai. Tsangshiq raq naishiq ka tsangshiq rai chepat shi haithü ronglaq nguta tiiwinto. Kiimaq kra laitiishe naishiq ka Rom chela niishe saü wan kai.

¹⁵ Rom na siti phunainotiim raq naishiq watlo nguta tsütsa taito. Krai mren, tsangshiq ka Rom maq kiraüta Appijas Kejat thung nai Wanjaptiiptsam Hiq kiina saüli kiraüta naishiq ka humkito. Paul raq tsangshiq rai riihum raüta Shiikeawe ma kechu tumto. Kiimaq apaiq ma tsaiji kongtam puqshi she riito.

Rom Na Trahoto

¹⁶ Kiimaq naishiq ka Rom chela niishe saü wan kaita, Roman hokham raq Paul ka apaiq honhon jam ashi niishe tiisito. Kiimaq apaiq ka phenla weshi miili tiikhe raüta tiisito.

¹⁷ Kiijaq saü wali maq, ranaiq tsam sijai na, Paul raq kiijaq siti Jehudinok welabi ka adam na triitam hea raüta ngato. Tsangshiq ka apaiq phana riitam saüki kiitiishe, apaiq raq tsangshiq ma bom ka akha ngutiishe chongkuqto, “I phan i maq Israilnok phunainotiim lei, ngi raq nashiq nok mungmaiqse ma abi ati jamlai phan min sham wan mang. Kiimaq natitiim raq nashiq ma akuqthü thungtri thaq niimin jamlai kiqjiq wan mang. Shatmaq, tsangshiq raq ngi ka Jerusalem maq shumraü kharü maq kha raüta, Roman hokham jaqkhon mong na kuqbaiqto.

¹⁸ Krai mren, Roman hokham raq i kha ka phoke wan jai, ngi ka adi baiq chang nguta photo. Jamkhano ngukla tsangshiq raq i dü na, i miisaq thumli chang mat atsa khü akha jam min ahü nguta asap.

¹⁹ Shatmaq, Jehudinok raq ngi ka tiidong baiq raa mak dongdii ngutiishe ningtang hoto. Kriikha miishe, ngi raq i mung i man khu thaq na jamlai phan khü akha nyan mang li jiimin, Roman Hokham we ma i kha ka ashok chang she jakito.

²⁰ Riita, arthun mra pintaq arkha maq, ngi raq namshiq rai riihum ma nguta namshiq ka tiihea wan kang. Riita ngi raq ara kharü hotiikang arka, Israilnok raq ju miiwa tsangshiq tsantsii ran wan tlaq, kriiwe mang na hotiikang,” nguta tsangshiq ma bom ka chongkuqto.

²¹ Kra tai raütiishe, kiijaq Rom na siti Jehudinok welabi raq treto, “Ahü la, naishiq riiha ümkhu thaq seng raüta, Judia wang wa lak awe jam min lap mai la. Kiimaq nashiq nok kiinü mung maq awati jurmin, ümnaq tsütsa ka naishiq ma tiitai chong wan mak dea. Kiimaq ümkhu thaq na abi ati bom jamlai min chong wan mak, ahü taishan wan mai dea.

²² Shatmaq naishiq riimin, ümnaq shang wan dam laü phungnok tsütsa kra kiitiina atai wan ka ro tiikai dea. Ara jamkhano chongtiikai ngukla, barap binrii na, nanok raq arphung ara ngengseng wanti siisaq chhi tai wan tiikai,” ngutiishe tsangshiq raq Paul bom ka treto.

²³ Krai mren she, tsangshiq raq Paul rai ngakai miitu ranaiq akhing ka tiihongto. Kiimaq kra ranaiq tiihongtaq akhing na, tsangshiq maiq pahea kra Paul sitlaq kiijaq kito. Krai mren, Paul raq ranap chu maq phaho raüta, raji ranyaq na saüli she, tsangshiq ma Shiikeawe Mungtan tsütsa kra phanchan chongkuqto. Kiimaq apaiq raq Mosheq Thungtri na awaiq thü nai shammibi lak na awaiqthü thun bomtsi kriika, Jesuq rilung nai apaiq raq jaqsham wantaq kiijiishe kuwanto nguta tsangshiq ma tsan tiinin li chang khan she, tiitho tiipha raüta chongphan kuqto.

²⁴ Kra tai raütiishe, tsangshiq phong wa maiq wiijamti riika Paul raq traho bomtsi chongkuqtaq kriidea tengto nguta kamto. Shatmaq, maiq abiti riika kam mak dea riito.

²⁵ Krai mren she, tsangshiq liipan na arkhii rai she riito. Raütiishe tsangshiq ka wawanto. Shatmaq tsangshiq miwa wan shaq na, Paul raq tsangshiq ma apaiq traho bom chongke ka ara bomtsi armiishe shatkuqto: “Asii Wenyi raq shammi Isaia lümaq namtitiim ma chongkuq thütaq kriika amak na khaqshkhaq she dea hongtha rai wanto!

²⁶ Apaiq raq riisham bom maq akha tiithai chongthüto, ‘Kilaq, laüta arnok ma akha chongkuq kikiq: Namshiq riika tairuq tairuq tai tlan, shatmaq tak man; namshiq riika liiruq liiruq lii tlan, shatmaq chhi phaq man.

²⁷ Ara jamkhano ngutiikang ngukla, arnok sung atsii ka alamlatkai wishe; kiimaq tsangshiq ni ka alankai wishe. Kiimaq tsangshiq mak ka amiikai wishe. Kiikha riimak ngu raü ka, tsangshiq raq mak maq michhi wa, tsangshiq raq ni maq mitai wa, tsangshiq sung atsii ka tsangrakrak maq misap wan wa. Raüta tsangshiq ka ngi phana miwa wan wa, kiimaq ngi raq tsangshiq tsisi ka, wiita mitiihea kuq wanha chang wa, raüta tsangshiq ka, hansang maq singa wan chang wa,’ ” nguta Shiikeawe raq chongtlo.

²⁸ Kiimaq Paul raq abom ka, “Riita ümchaü sanha namshiq raq arshe sap wan ronglaq. Shiikeawe tiichhii wan tsütsa ahea kriika, Pongnok phan maiqse miishe michong kuq wan. Tsangshiq raq tsütsa ahea kra mitai!” ngutiishe abom chong kra shatto.

²⁹ Paul raq ara ngojai she, Jehudinok ka tsangshiq liipan na tatso wiinyi lam miishe wawanto.

³⁰ Rawii wiinai na saüli, Paul ka jam ashi na amaq kuq raüta sito. Kiimaq apaiq rai riihumkaiti maiq ümchuwa kitlaq kriika apaiq raq khoqriiq shishiiq maq tao lili riito.

³¹ Raüta apaiq raq tarü ma, Shiikeawe Mungtan bom ka trahokuqto kiimaq Tati Jesuq Khristo tsütsa kra achaq awaq maq nai jamlai tiibanbi min ahü maq shrinkuqto.