Acts 27 - ASII LAKDAP Bible (BSI)

Paul Ka Rom Na Shea Wanto

¹ Riita naishiq ka Rom na wachang she nguta bomshat wantaq krai mren, tsangshiq raq Paul nai phaqtek na siti maiq shumwi kong wiijamti ka phentuwe Julias jaq na kiinong kuqto. Julias ka “Hokham we Rejiment” phentu pengti phong wa siihiip weshi riito.

² Naishiq ka Adramittiam chela wa aki laijong ashi ka Asia wang na laitoq wa chang chela thun kiina wawanti tiijeje kiijaq düwan kai. Laita wawan kai. Mesidonia wang wa Thesalonia chela na siti Aristarkas min naishiq rai adam na wawan damto.

³ Kiimaq napjai ranaiq naishiq ka Sidon chela na saü wan kai. Julias ka Paul ma mangchan asi riito. Krai mren, Paul ma jamlai phan wa rong raa tlaq, kra akongtitiim raq mikhrum kuq laq ngo maq, Paul ka akongtitiim rai riihum nai riibom riinyiim, ahai asea lam miili shea wanto.

⁴ Laita, naishiq ka Sidon chela maq hali tiido wan nongkai. Shatmaq, rahai wa ka naishiq walam nü maq hai wan tlaq kriikha maq, laijong jiiq wan ka atongrea riihoto. Kriikha miishe, naishiq ka khamjong mong hiq Saipras wang khamwiiq rahai tiiwong shat win binjü kiimaq jiiq wankai.

⁵ Naishiq raq Silisia wang khamwiiq binjü nai Pamphilia wang khamjong wiiq binjü tiithi khamjong mong maq jiiq wan laita wawankai. Ara wangnai wiiq ara lea wan laitiishe sanha, Lisia wang na khamjong kii na atei, Maira chela kiiniishe saü wan kai.

⁶ Maira chela na, naishiq shea wanti we siihiip we raq, Alekjendria chela maq awa laijong ashi ka Itali wang na wati riihumto. Kriikha miishe, naishiq wachang laijong maq satki laita, Alekjendria wa awati laijong niishe tiinga wanto.

⁷ Rahai wa ka henghea kha maq, naishiq raq rablai ngi ka, chaosusu se maq jiiq wankai. Kiimaq ngila ngu raü khamjong kii na atei wan Nida chela tiithi khamjong wiiq kiina saü wan kai. Rahai ka henghea kha maq, naishiq ka kra nü tiinyi niika jiiq wan lot mai she riikai. Kriikha miishe naishiq ka khamjong mong hiq Kret wang raq rahai tiiwong tlaq siim nünü kiina riita, khamjong mong na hiqkü ashi ashaüki Kep Salomi ngutlaq kra siim lam miishe jiiq wan kai.

⁸ Naishiq ka khamjong kii riishe she tho miili laijong ka laa maq jiiq wan wan wawan laita, Seph Tru chela ngutlaq kiiniishe saü wan kai. Kra chela ka Lasea chela tho na riito.

⁹ Naishiq ka kiijaq rahiq aluwiq khing raikai. Khamjong lam maq laijong jiiq wan miika haisi chang jonghea she riito. Kra akhing ka rawii thum wan nini she riito. Ngarai Tiidii wan Poi kiimin alea wan wishe riito. Kriikha maq Paul raq tsangshiq ma akha nguta tsii chongkuqto.

¹⁰ “Maiqwetiim, nashiq raq ümchaü armiimin laijong ka jiiq wan ruq li la wawan hai jiila, nashiq ma haisi chang jonghea asi miraq. Nashiq hup asam laijong na howan tiikai thun arka wiita mithen. Kiimaq laijong armin athen miraq. Kra thaq na nashiq miisaq khlaq chang min asi miraq,” nguta tsii ka chongkuqto.

¹¹ Shatmaq phentuwe ka laijong jiiqti we kepten we nai laijong tatiwe raq achong bom kli taito. Paul raq achong bom ka taimak dea.

¹² Kiijaq laijong khing chang tru ka ralii na khingwa miika abi. Kriikha maq maiq apako riika, khamjong mong maq lealea wawan raüta laijong khingwa chang Phonisk tru na saü wan tlo haijaq ahea miraq nguta tiimato. Mairaü la ralii bala ka kiijaq khing wan haijaq nguta tiimato. Phonisk chela ka Kret wang na lai khing wa chang tru ashi. Phonisk chela na rahai walam ka shemai nü nai shenyap nü maq kiimaq shekhu nai shenyap nü wiiq maq hai raüta saütlo.

Sammoktra Jü Maq Rathaiq Wa

¹³ Seph Tru na khetiikai bala rahai haise shemai nü maq haipha wanto. Kra rahai saü wan kiita lai jiiqti wetiim raq tiima ka tsangshiq raq Phonisk tru nü na jiiq wan nguta tiimataq kra miwalot rong i sham nguta tiimato. Krai mren, tsangshiq raq laijong shiikhing chang jinkhaiq bu thun kra, kham mong wa laijong na hali dothü nongto. Rathaiq rahai wan raüjaq laijong ka khamjong mong na tsuqbaiq wan jiiq nguta honkam shatmaq Kret wang wiiq khamjong kiikii tiinapnap miili jiiq wanto.

¹⁴ Shatmaq tiido pha wan raü niili she, “Shekhu nü nai shedong nü” rahai wa ngutlaq kra, Kret wang thaq maq shekhu nü nai shedong nü maq riita shemai nü niishe thaü wanto.

¹⁵ Kra rathaiq rahai henghea saü wantaq kra raq laijong ka naishiq wachang Phonisk tru nü na jiiq wanlot mak she thaübaiq wanto. Kriikha miishe rathaiq raq ümnü niiwa thu wan tlaq, kiinü niili she rahai ma atiithu wan nguli li she thaq baiqto.

¹⁶ Naishiq ka khamjong hiq aranse Kauda nguta kra shemai nü siim maq jiiq wan laita, rathaiq rahai walam kiiwa phanshi se tiiwong lap wan kai. Kriiba maq, naishiq raq laijong na ho tlaq lairanse ashi ka, laisiim na raü maq apaq kha kiiwa samhea tiihea kha thü nongkai.

¹⁷ Tsangshiq raq kra laise ka laijong thaq na raü maq ban raüta dohitto. Raüta raü maq trotam maq tep laijong krai tiinapshat na tiipaq khabaiqto. Tsangshiq ka khamjongre na Libia mung kiina rahai raq laijong ka thu wan raüjaq, kra Libia wang khamjong kii binjü na kham mong na kumtsai phii haisi chang pahea asi. Kiijaq laijong ka tiithaü raiki jiiq nguta haito. Kriikha maq, tsangshiq raq laijong thaq na laijong tiikhum chang khea achan kiimin tiisat lambaiqto. Raüta rahai raq ümnüno thu wan tlaq, kiinü na, rahai raq athuthu niili she laijong ka tiiche wanto.

¹⁸ Rathaiq wantlaq kriika thaiqbiti she, thaiq wan ruq lishe thaiq wanto. Asang wan ngutiika ahü she. Kriikha miishe, kiimaq anap ranaiq miishe sanha, tsangshiq raq laijong na piikii hupsam thun kra wiijam jü mong niishe tiidong khot baiqto.

¹⁹ Kiimaq napjai ranaiq miishe ka tsangshiq raq kra laijong miirii wiijam, khea thum kaü, kra chan chang raükom thun, kiimaq kham chong thun kriishe laijong mong wa tiichhii khotbaiq wan nongto.

²⁰ Rathaiq rahai heng wan ka rahiq luhea she, ranaiq rawa heng wan ruq lishe heng wanto. Ranaiq na rashe makpo kiimin chhi mai she kiimaq rawa na raiqsaiq sham kiimin chhimai she riikai. Kiimaq rathaiq wa ka henghea riiwan riiwan lishe heng wanto. Kriikha miishe, naishiq ka lunlot mai she sham nguta tsiim jüshushu she riikai.

²¹ Maiq thun ka rahiq luhea she dung min simak amang maq lea wan jai she, Paul raq tsangshiq tarü ma tsaido jido bom ka akhiishe chongkuqto, “Maiqwetiim, namshiq raq i bom ira tai han jaq, lanta Kret wang maq jiiq wan maili ngu raü jiika, ahea riichang wa. Ira taihan jiika, nashiq raq atinkhan chamchao ka riihum mai chang. Kiimaq atinkhan ka sumrum mai chang.

²² Riikli min, ümchaü ngi chongpha! Namshiq raq tsaiji ka naq tran rongkiq. Namshiq phong wa jumin tsai man miraq. Ara laijong ara lamlamli mithen.

²³ Ara jamkhano chongtiikang ngukla, ümwa rawa ngi raq shomnoq tiikang Shiikeawe rase ashi ka ngi phana kito. Kiimaq ngi ma bom ka akha chongkuqto,

²⁴ ‘Paul, ümnaq naqhaikiq! Ümniika Roman Hokham we man na chap wa raa dongdii. Kiimaq Shiikeawe raq ümniima lungwiitsii jonghea thütlo. Kriikha maq, ümniirai laijong na maiq ümchuwa wadam tlaq thun ka, wiitarü tiikhup wongkuq wanto she,’ nguta ngi ma chongkuqto.

²⁵ Riita, maiq wiitiim lei! Ara chongtiikang arai mren, tsaiji tiijong rong laq. Ngi raq Shiikeawe ma kamtiikang, ngi ma jamkho chongkuqtaq kra phanphan mihong wan.

²⁶ Kiitiina rahai raq nashiq arka khamjong kii hiq maiqhiq bashi ra na mitsuq baiq wan,” nguta Paul raq bom ka chongkuqto.

²⁷ Riita, naishiq ka Mediterenian sammoktra jü thaq na rathaiq rahai raq tiiphü cherai wan li miika, waroqshi ri wablai she riito. Kra rawa wathung wakham na, lai jiiqtibi raq naishiq ka takii tho na saü wan tiikai she sham nguta tiima raüta, bashi na hem wan wan miishe laijong ka jiiq wanto.

²⁸ Krai mren, tsangshiq raq raülo na jinpo ka paq raüta, khamtsaü ka thito. Kra thi wan kiita, khamtsaü ka tlam roqnai riito. Kiimaq heashi hali wanong raüta khamtsaü ka tlam roqshi ri tlam biingi she riito.

²⁹ Kriikha maq tsangshiq ka athi laijong ka khamjong mong na longkaü jongheahea sitlaq kiijaq tiithaü rai wa jiiq nguta ahai she riito. Kra kha miishe, tsangshiq raq laijong jai nü siim na apaq khathü laijong shiikhing chang jinkongbu khaiqtu blai kra khamjong mong niishe tiisat baiqto. Raüta laijong ka tiikhing raüta, ra tiiwü tlo ma nguta achu jaü maq kheto.

³⁰ Kra lot jai she, laijong jiiqtibi thun ka, ahukse maq laijong mong wa juho lai nguta danto. Tsangshiq raq laijong siim tiinap na apaq kha lairanse ashi kra kham na tiisat diito. Raüta laijongkhu nü na laijong shiikhing chang jinkongkhaiqbu thun abi kriimin kham mong na tiisat nonglai nguta tiiman raüta juho danto.

³¹ Shatmaq, kra chhi raüta Paul raq phentujong we nai phenlabi ma chongto, “Ara laijong jiiqtinok ka ara laijong mong na nga mak la ngu raü jiika, namshiq thun ka achhun miriirong i nguta akhiismin naq tiima rongkiq.”

³² Kra tsii chongkuqtaq krai mren, phenlabi raq kra lairanse paq chang raü thun kra dok-hi dok-hi chum baiqto. Raüta lairanse kriika jü mong niishe tiiche baiqto.

³³ Ranap rawü tsuprup tsupriiq niishe, Paul raq tsangshiq tarü ma tsaiji doke bom ka akhiishe chongkuqto: “Ümchaü ranaiq ariiraq raroqshi ri rablai she, tsaija chhunja chapa raq atsai lam miili, namshiq ka jam min phaqsiq man, amang miili lea rai wan lan.

³⁴ Ngi chongpha tai ronglaq. Ümchaü namshiq tarü raq phanshi ra phaqsiq ronglaq. Amang miili ka ningkun ahü, lunlot man mirhan. Namkhu bin loshi min dea mak miraq. Naqhai rongkiq,” nguta Paul raq tsangshiq ma tsii ka chongkuqto.

³⁵ Ara bom chongke jai she, Paul raq winsii thop wiijam ka lam raüta, tsangshiq tarü makki na, Shiikeawe ma kechutum achu jaüto. Raüta winsii ka tsangshiq ma tiiphan kuqto. Kiimaq tsangshiq raq winsii phu ka sham rang raütiishe phaq wito.

³⁶ Krai mren, tsangshiq tarü ka tsaiji ajong she riito. Kiimaq wiitarü raq winsii ka phan chhuq chhuq kaq phaqto.

³⁷ Kra laijong na ngati maiq naishiq tarü ka 276 riito.

³⁸ Wiitarü raq hongli chhaq phaqsea lot jai she, laijong tiichhii ma nguta tsangshiq raq bunwong thong thun kra jü mong niishe wiita tiidea baiqto.

Lai Ka Thento

³⁹ Riita rawü khang niishe, lai jiiqtibi raq khamjong jü reko ka chhito. Shatmaq, kra tareko tiichhi tlaq hiq mang ka tsangshiq raq sapmak riito. Shatmaq, tiina tsangshiq raq jüreko na jüjong kumtsai phii ka asi chhito. Riita mai raüla kra kumtsai phii takii kiina laijong ka jiiq wan raüta, phii na tiiphataq laijong ka tiikhing baiq wan chang, nguta tiimato.

⁴⁰ Krai mren she, tsangshiq raq laijong shiikhing chang jinkong khaiqbu paq chang raü thun ka chum baiqto. Raüta jinkong khaiqbu thun ka jü mong niishe tiisang baiqto. Kiimaq hali tsangshiq raq laijong jiiq chang shamthukii thun, laijong jai nü na paq tlaq kra paq chang raü kriishe diibaiqto. Kra lot raütiishe, tsangshiq raq laijong thaq na chan chang kheathum kaü kriishe laikhu nü kiijaq tiikha chanto. Kriika rahai raq khea na tiithaü raüta, laijong ka khaki nü na tiiche wan miitu chanto. Krai mren she, naishiq ka takii nü na che wan kai.

⁴¹ Shatmaq, kra ache wan lam maq tareko nü na awarai niili she, laijong ka khamjong mong na kumtsai kin ashi asi kiijaq tiithaü rai wato. Raüta laikhu nü ka kumtsai kin na tiiphataq she tiishong wato. Atiimeshi min maimak she tiishong wato. Kra liipan bala niili she hali, laijongmai nü ka khamjong tso blun khamtso watlaq kra raq tiibunlak hali she thaübaiq nongto.

⁴² Kiijiishe phenlanok raq maiq shumwibi thun sitlaq kriika, tareko na wai wan raüta aju riiho jiiq nguta tiima raüta, wiita atsea baiq chang nguta danto.

⁴³ Shatmaq, phentujong we raq, Paul ka tsatjiiq nguta apaiq tiichhii kewan miitu, phenlabi ma shumwi kong ka atsea raa mak nguta tiiwinto. Kra rii na, apaiq raq maiq ümchu riiwa jüwai atsin, kriiti thun ka kongkhu laijong maq kham na doq rong laq; lanta tareko kiina wai wan tlo ronglaq nguta aming kuqto.

⁴⁴ Kra jai niishetiq, maiq abiti thun riika, pepen na riiwiiq raü tlo, kiimaq lai phan laiphu pan kham na cherai wan tlaq kiijaq, jaq maq alap lap, kiijaq riiwiiq raüta tareko nü kiina wai wan ronglaq nguta aming kuqto. Krai mren she, ara chongtiikai ara phanphan, naishiq tarü ka tareko niishe khu asang maq waiwan kai.