Acts 26 - ASII LAKDAP Bible (BSI)

Paul Raq Agripa Rung Maq Akhum Tiichhii Wanto

¹ Kiijiishe, Agripa raq Paul ma, “Ümchaü ümniiraq ümkhum tiikhe wan bomchong mimai,” nguta aming she kuqto. Krai mren, Paul raq ajaq ka ra na do raüta akhiishe bomhoto:

² “Hokham we Agripa lei! Jehudinok raq i dü na khü akha ümchuwa nyan tlaq kiiwa ümman na chaplata, i khum ara tiichhii wan miitu ümchaü ranaiq akhing lap tiikang arka, ngi ma kopan jonghea nguta tiima tiikang.

³ Ara jamkhano ngutiikang ngukla, ümniiriika Jehudinok raq tsangshiq kamasham thungtri ka atsin maq lang raüta sitlo nguta asap haü. Kiimaq tsangshiq liipan na kra lang wan tlaq thung alai lamphan na seng raüta, pahea riikhii riilea sitlaq bom khupo thun kriimin wiita tiitho tiipha asaphaü siisaq. Riita arkha maq, ümchaü ngi raq ümniima tiipaiqnea wan ka, naq tsutsakiq maq, ngi raq i khum tiichhii bom chong tiikang bomtsi ara taiwan haü jaq ahea miraq nguta tiitai tiikang.

⁴ “Riita, ija, Jehudinok wiita raq, ngi arka noseji miiphü Jehudinok kamasham thungtri raü ka pinthum atsin maq sham lata lang wanti we nguta asap. Tsangshiq tarü raq sapshat, ngi raq i rilung arka, apha na naishiq hiq maq tri raü tu thun ka atsin maq lang wan lata jonglu wan kang. Kra jai miishe hali, Jerusalem na siwan lata jonglu wan kang.

⁵ Ngi ka nashiq nok raq Shiikeawe lamphan na tri raütu thü tlaq kra atsin pinthum maq lang wanti we, Phorisinok phung wa maiqwe ashi dea, nguta siti we riikang. Tsangshiq raq ngi ka nose ji miiphü asap. Tsangshiq raq chong i dea nguta tiima raü jiika, ngi raq i rilung arka jamkho siwan kang, kra hakhi mikuqlot.

⁶ Kiimaq, ümchaü ranaiq ngi arjaq rung na tiichap tlaq arka, Shiikeawe raq natitiim ma phanshi kongphiq mikuq wanha nguta kiqkham raüpot khakuq wantaq, kra kongphiq ka milap wan ha dongdii she nguta, ranphan lalata, sitiikang arkha niishe tiichaptlo.

⁷ Ara kiqkham kongphiq arka ranaishishi milap wan rong i dongdii nguta ranphan raüta, nashiq nok maiqphan phanroqshi ri phannai raq Shiikeawe ka ranaiq rawa shomnoq wantlo. O, Chaü lei! Ümchaü ranaiq ngi rung na tiichap wan tlaq arka, ara ranphan wan tiikang arkha na Jehudinok raq ngi ka tiishuttlo.

⁸ Riita, Jehudinok singmung maiqse lei, ümchaü namshiq arjaq thung tlanti raq, Shiikeawe raq maiqse ka amaa wa tiidong wan tlo dea nguta bomchong kiima kamwanlot man ka jamkhii riito?

⁹ “Ngi raq dongdii min tiima wankang, Najareth hiqti we Jesuq lamphan wantibi thun ka wiita shiithen baiq hajaq nguta kai shiikut chaq wan kang.

¹⁰ Ngi raq Jesuq jai phan wanti maiqsetiim thun shiithen baiq wan jaqsham ka Jerusalem na shampha wan kang. Lata, ngi raq ramwe jongbi jaq wa arang lap wan lata, Shiikeawe sengi maiq pahea phaqtek mong na dungdung she shaq baiq wan kang. Kiimaq tsangshiq ka tsea baiq miitu kha tantaq akhing ranaiq niimin, mungmaiqse rai tri ka ngi riimin pong wan dam kang.

¹¹ Ngi raq tsangshiq ka akhing pahea, sinagok thun maq tsat wan kang. Lata tsangshiq raq Jesuq ma kamtsantsii thü tlaq, tsangshiq kamtsantsii kra, tiipan baiq miitu, tiiphiip miijiip longliiq wan kang. Ngi ka tsangshiq ma, i tsankhiq ninlot mangshe kha maq, tsangshiq ka pongmung chela thun na saülili she tiikot trot jowan lata, tsangshiq pahea tiichamchao wan kang.

Paul Raq Apaiq Phung Na Shang Wan Bom Chongto

¹² “Riita, ija, ngi ka ara bom chong tiikang Jesuq ma kamwanti maiqse thun kra lap wa miitu, ramwe jongbi raq ngi ma arang akuq lak kra howan lata, Damaskas chela niishe wawan kang.

¹³ Chaü lei, ngi ka kiitiikaq lam na awarai riikang. Rashe ka ranaiq shethung shekham bala riito. Kiijaq ngi raq ra maq atli rawüli henghea, rashekii chhai nam miimin henghea ka ngi nai i kongtitiim ngi rai wadamti tro niishe chhairaito kra chikang.

¹⁴ Kra chhairai ka henghea pinthum riito. Kra chhi laita naishiq tarü ka hiq na rirang she riwan kai. Kiimaq kra akhing na ngi ma Hibrunok bom maq abomdam ra wa maiq bom ashi ka akha taikang, ‘Saul, Saul! Ümniiraq ngi ka jaram wa tiichamchao rat ho laü? Minsaü pongwe raq, atijong we piq khu na ahok maq hap raüta, apaiq hokli tiimi tlaq ikha, ümniiraq ngi tiichamchao angu, ümniili khoti chamchao rai tlaü.’

¹⁵ Kra tai latiishe ngi raq, ‘Tatiwe, ümniika juwa?’ nguta waikang. Kiijiishe, ‘Ngi ka Jesuq, ümniiraq tiichamchao tlaü we ahata,’ ngutiishe Tatiwe raq i bom ka treto.

¹⁶ ‘Shatmaq, ümchaü sanha, ümniika tiidolaq! Laüta chap laq. Ngi raq ümchaü ranaiq, ümniika i kiimwe ma shongkai miitu, ngi ümniiphana i sham tiichhikai kikang. Ümchaü ranaiq ngi ümniirai sham riichhi kang akhing na ümniiraq ngi jonglu ka jamkho chhi laü, kiimaq arjai miimin ngi raq ümniima ngi jonglu kra jamkho mitiichhi kuq kang, kriithun ka ümniiraq nanok miishe michong kuq wan haü.

¹⁷ Ngi raq ümniika Israilnok mungmaiqse ma kiimaq Pongnok phan mungmaiqse phana i bomtsi ara chongke wa miitu she shong tiikang. Tsangshiq raq ümniika tseata wan miitu, thiikho ümchuwa thu wan tlaq, kra mong wa tiikhup wongkuq wan shat mirkang.

¹⁸ Ümniiraq tsangshiq mak ka mitiipiiq kuq wan haü. Kiimaq tsangshiq ka ranyaq nyang mong wa rawü lam phan niishe mishun shea wan haü. Kiimaq tsangshiq ka Thupkaü Thawe jaqkhon mong wa, Shiikeawe wokhong niishe mishun shea wan haü. Krai mren, tsangshiq raq ngi ma kamtsantsii thü tlaq kra lii miishetiq, tsangshiq ngarai ka midii kuq wan. Raüta tsangshiq ka Shiikeawe sengi maiqsetiim rai she shongnga wan dam miitu tsangshiq ma chapchang ngachang she mitiihong thaq kuq wan.’

Paul Raq Traho Jaqsham Wantaq Kra Chongto

¹⁹ “O ajong Hokham we Agripa lei, riita ara chong tiikang arai mren, ngi ma ramungtan maq riisham bomchong aming akuq wan kriika, ngi raq phaqchii nichii maq lang wan kang.

²⁰ Ngi raq mungmaiqse ma, namshiq ngarai ka tiidii wan tlo ronglaq. Lanta, Shiikeawe puk na nyap wan tlo ronglaq, lanta tsantsii klai wan kai she nguta, maiqse raq mak maq chhi tai wan li chang, namshiq jaqsham kaiwa ahea awa kra shamlam wan lili lantiishe, rilung jaqsham nai namshiq chapnai nga maq tiichhi kuq wan ronglaq, nguta tsangshiq ma traho bom chongkuq wan kang. Ngi raq ara traho bomchong ke wan jaqsham arka, apha na Damaskas na tra hokuq wan kang. Lata Jerusalem niishe tra hokuq wan kang. Kra jai miishe, Judia wang tlotli niishe tra hokuq wan kang. Kiimaq Pongnok phan maiqse miishe tra hokuq wankang.

²¹ Riita, ara chongtiikang traho bom chongke wan jaqsham arkha na tiina, Jehudinok raq ngi ka Jerusalem Shomjam mong wa lapho taq. Raüta atsea baiq nguta dantaq. Tsangshiq raq ngi lap taq arka, ngi raq traho bom chongke maiqhiq pahea barap binrii na khum wan kangta, lapto.

²² Shatmaq, ümchaü ranaiq niitaq, Shiikeawe raq ngi ka khrum kuwan tlo. Krai mren, ngi raq ümchaü ranaiq min, arjaq namshiq ajong alabi, kiimaq wepuq wese mungmaiqse tarü man na, hakhi kuq tiikang ara. Riita, ümchaü ranaiq arjaq mungphong na jamlai bom wa chongkuq tiikang arsii li, ümsiimaq pat achat na, teiwe shammibi nai Mosheq riimin ranaiqshi akhing na ara bomtsi ara mihongtha wan dongdii nguta chong kuqthüto.

²³ Tsangshiq riimin: Khristo ngutlaq kriika ka pinthum chamchao wan chang dongdii miraq, nguta chongthüto. Raüta apaiq ka mitsai. Raüta apaiq ka tarü thaq na apha shaqshaq amaa wa dong wanti we miraq. Kiimaq Jehudinok ma nai Pongnok phan maiqse ma tiichhii wan rawii lam phan kra chongke wanti we miraq nguta chongkuq thüto.”

Agripa Ka Kamwan Raüjaq Nguta Chongto

²⁴ Paul raq apaiq khum tiikhe wan traho bom chongke wan kra chhi raütiishe, Phestas ka hong raütiishe, agi rai lam maq, “Paul ümnaq ara angi she riiki laü! Ümphaqchi jong riishe, ümniika angi ma tiija hoto!” nguta Paul ma bomto.

²⁵ Kiijiishe, Paul raq Phestas bom ka akha treto, “Mungtu Jongwe lei! Ngi ka ngi mang. Ngi raq jamlai wa chong tiikang, arka tengteng bomtsi chong tiikang.

²⁶ Ajong Hokham we Agripa lei! Ngi raq ümman na bom chong ka kholam kholiiq lata, i tsan mong na jamlai phan kankop wan min ahü maq, bom tiikang. Ara jamkhano akha bom wan tiikang ngukla, ara chongtiikang mra pin wantaq thun arka, ümniiriimin kunli asap haü siisaq. Ara chong tiikang thun mra pin taq kriika shokshaüno wa bom ka riimak.

²⁷ Ajong Hokham we Agripa lei, ümniiraq shammibi bomchong kra miika kam tlaü sha? Ngi raq tiima wan kla, ümniiriimin kam tlaü ahiq nguta tiima tiikang!”

²⁸ Kra tairaütiishe, Agripa raq, “Riita ara jaqlose liipan niili, ümniiraq ngi ka Khristan maiqse ma mitiija wan lot ha ngutiisha tiima tlaü?” nguta Paul bom ka treto.

²⁹ Kiijiishe, Paul raq, “Jaqlose liipan niili lo; luhea sijai niishetiq lo; ngi raq Shiikeawe jaq wa achu jaü kla, ümnaq nai maiq abiti ümchuwa, ümchaü ranaiq arjaq, i bomchong tai wanti thun tarü arka, ngi akha siisaq jawan han jaq nguta tsin ngin tiikang. Shatmaq, namshiq min ngi akhiisii hali shumraü kharü maq kha haü jaq nguta ngo nang kla riimak!”

³⁰ Kra tailot raütli she, Hokham we, Wanghupti we, kiimaq Barnis kiimaq mungmaiqse abi thun thungtaq kra tiido rang she tiido wanto.

³¹ Kiimaq kra rung maq tiido wan raütiishe, tsangshiq nai tsangshiq liipan na bom ka, “Arwe raq apaiq tsaili chang nai apaiq ka phaqtek na shaqli chang kha ka tang wan mak dea,” ngutiishe bom ka riichongto.

³² Kiimaq Agripa raq Phestas ma, “Apaiq raq akha arka Roman Hokham we rung na shok mak dea ngu raü jiika, apaiq ka armiili tiidong baiq wan chang wa shatmaq ahata,” nguta bom ka chongto.