Acts 25 - ASII LAKDAP Bible (BSI)

Paul Raq Akha Ka Roman Hokham Rung Na Shokto

¹ Wanghupti we Phestas ka kra wang na saükili maq ranaiq tsam siraütli Sisiria maq Jerusalem na wato.

² Kiijaq ramwe jongbi nai Jehudinok welabi raq Paul dü na kha ma pahea asi nguta, apaiq ma shokto. Tsangshiq raq

³ Phestas ma Paul ka Jerusalem na tiiwa raüjaq ahea nguta bom ka thuto. Paul ka tiiwa raüla apaiq ka lam wiili tsea baiq ma nguta tsangshiq raq ahukse maq reraü ka ashun wishe riito. Kriikha maq tsangshiq raq bom ka kiikha thuto.

⁴ Kiijiishe, Phestas raq, “Paul ka Sisiria na phaqtek na tiishaq shatli sitlo. Kiimaq ngi min kiina jaqloli mijangki ha.

⁵ Riita, namshiq phong wa welabi ka Sisiria na ngi rai adam kilanta, kriiwe raq khü akha tangtaq asi dea jiika, mantut na mirphoki han na,” nguta tsangshiq bom ka treto.

⁶ Phestas ka Jerusalem na ra tiichat sha raroqshi tin wa hali haithü nong raüta, Sisiria niishe jangho nongto. Raüta anap ranaiq miili she, apaiq ka rung na nga raüta, Paul ka tiishea wa miitu phenlabi ma aming kuqto.

⁷ Riita, Paul ka rung na saüki kiita, Jerusalem wa akiti Jehudinok ka apaiq tro na chap raüta, Paul ma asiq areng kha pahea tü nyanto. Tsangshiq raq apaiq ma khü akha ümchu wa nyantaq kra thun kriika, tsangshiq raq ngohea dea nguta jamlai saqseng hakhi min tiichhi kuq lot mak taü maq nyanto.

⁸ Shatmaq, Paul raq apaiq khum tiichhii bom ka akhiishe chongpha hoto, “Ngi raq Jehudinok Thungtri min jin mang. Shomjam min tiisheshi mang. Kiimaq Roman Hokham we miimin abi jam min bom mang.”

⁹ Shatmaq Phestas raq Jehudinok tsan ka tiibi romak. Kiimaq apaiq raq tsangshiq ka apaiq lopti ma thü wan ruq roli riito. Kriikha maq, apaiq raq Paul ma waito, “Riita ümniika Jerusalem na walaüta arthun kha nyan tlaq ara i rung na riipho wa miwa haü sha?”

¹⁰ Kiijiishe, Paul raq treto, “Ngi arka Roman Hokham we Rung na chap tiikang. Kra rung kiijiitiq i kha ara pho chang. Ara jamkhano ngutiikang ngukla, ngi raq Jehudinok ma jamlai min shutphit mang dea. Arka ümniiriimin asap haü.

¹¹ Kiimaq ngi raq thungtri ka shiithen kang dea jiika, kiimaq kriikha miitu ngi ka atsai chang dea jiika, ngi ka atsai miitu ka hai mang. Kiiwa hangki hajaq nguta tiipaiqnea mang. Shatmaq, tsangshiq raq i dü na jamlai kha thun wa arot akiq nyan tlaq, kriikha na jiila, ngi ka jurmin tsangshiq jaqkhon mong na tükuqlot mak. Ngi raq i kha arka Roman Hokham we rung niishe shok tiikang.”

¹² Kiijiishe Phestas raq apaiq khrumti phowebi rai kongkhu riiwaiso raütiishe, Paul ma, “Ümniiraq Roman Hokham we ma shoklaü krai mren, ümkha ka Roman Hokham we phana walaütiitiq riipho wakiq” ngutiishe chongkuqto.

Paul Ka Hokham Agripa Rung Na Chapto

¹³ Kiimaq ashaqpuq sijai niishe Hokham we Agripa nai Barnis ka Sisiria na Phestas saüwa kiita apaiq taokai kito.

¹⁴ Tsangshiq ka kiijaq ratrok miishi sijai niishe, Phestas raq Hokham we ma Paul kha ka akha phanchan kuqto. “Arjaq maiq weshi Phelisk raq phaqtek na ashaq thü asi.

¹⁵ Kiimaq ngi ka Jerusalem na wakangta, ramwe jongbi nai welabi raq apaiq dü na kha pahea asi nguta nyanto. Kiimaq apaiq ka atsea baiq chang nguta ngi ma khatan bomchong tiitai kuqto.

¹⁶ Shatmaq, ngi raq tsangshiq ma, naishiq Roman thungtri maq kha tangti we ka apaiq ma kha nyantibi rai mantut na tiinga raüta akhum tiichhii wan miitu akhing kuq raüta kha phokehü hü miika, ajaqti ma tiishaü kuqmai phan nguta bom ka chongkuq kang.

¹⁷ Krai mren, tsangshiq ka ajaq ngi phana kha riiphokai kito. Raüta ngi raq tsangshiq saüjai maq anap miili she rung na ngalata Paul ka rung na tiichap kang.

¹⁸ Apaiq ngengtibi ka chap raüta apaiq ma kha nyanto. Ngi raq tiima ka tsangshiq raq apaiq dü na kha abi ati asi nguta minyan sham nguta tiima kang. Shatmaq tsangshiq raq apaiq ma ngi raq tiima kang phan abi khü akha ka nyan mak dea.

¹⁹ Riita ngi raq chhi ka, tsangshiq nai arwe liipan na riikhiilea rai tlaq bomkhupo ka tsangshiq raq Shiikeawe shomnoq wan lamphan bomchong kra khuthaq na seng raüta, kiimaq maiq weshi Jesuq ngutliiwe ka atsai arki wa, shatmaq Paul ngiika, kriiwe ka amaa wa atra dong wan nongto nguta chongtlaq kra kha niili riikhii lea raitlo chhi tiikang.

²⁰ Ngi ka riikhaqli maq phoke chang lamlu min lam ka chhi mang dea. Jamkhano ngukla, bomkhu bommai ri samhea taimang shaqli. Kriikha maq, ngi raq Paul nangnga apaiq kha ka Jerusalem na wa raüta riipho wa mimai sha nguta waikang.

²¹ Shatmaq Paul raq apaiq kha ka Roman Hokham we rung niishe shokto. Kriikha miishe ngi raq apaiq ka Hokham we phana mitiishea wan ha shaq wiiwii, apaiq ka phaqtek niili phenlabi ma tiikhe chang nguta ngi raq aming kuqkang.”

²² Kiijiishe, Agripa raq, “Ngi raq i ni maq arwe bom ka tairo tiikang,” nguta Phestas bom ka treto. “Ikhla ümniiraq apaiq nü wa anap ranaiq tiq tailaq,” nguta Phestas raq treto.

Paul Ka Agripa Nai Barnis Rung Na Chapto

²³ Kiimaq napjai ranaiq niishe Agripa nai Barnis ka hokham miirii achhai anyii maq tiimiikhiiq raüta, phentujongbi nai mung welabi raq kai anato jonghea maq ngongthun chang rung khok jonghea ashi kiina tao wanto. Kiijiishe Phestas raq Paul ka rung na tiishea wa miitu aming kuqto. Krai mren, Paul ka shea wa raüta rung na tiichapto.

²⁴ Kiijiishe, Phestas raq bom ka akhiishe phoq phahoto, “Hokham we Agripa nai mungmaiqse ajong alabi ümchuwa arjaq adam na thung tiikai: Namshiq tarü raq achhihan, arwe ara khuthaq na Jehudinok wiita raq, arjaq nai Jerusalem maq ngi ma arwe dü na kha asi nguta shokto. Tsangshiq raq apaiq ka atra si raa mak she dongdii nguta manson kiqsü agilülü gitrangto.

²⁵ Shatmaq ngi raq apaiq kha ka pho wan kang, lata lii wan kang. Shatmaq, apaiq dü na apaiq miisaq thumli chang khü akha ka jam min ahü chhi wan mang dea. Kiimaq apaiq raq maiqmii nü maq apaiq kha ka Roman Hokham we rung niishe shokto. Krai mren, ngi riimin apaiq ka Hokham we phana tiiwa chang ngutiishe tri ka shat kang she.

²⁶ Shatmaq, ngi raq apaiq miitu Hokham we ma arphan kha na tiiwa tiikang nguta riikhaqli kha raü tiichhike chang ka ahü. Kriikha maq, ngi raq ümchaü apaiq ka namshiq mungmaiqse man na, kiimaq akhek ka Hokham we Agripa ümnaq man na tiichap tiikang! Apaiq kha ka akha phoke jai shetiq, ngi raq tri raü ka tiiku lata awaiq wan chang misi sham nguta tiima tiikang.

²⁷ Ara jamkhano chongtiikang ngukla, maiq ashi ka apaiq kha ka riikhaqli tiichhike hü maq, kharü maq kha raüta Hokham we phana tiiwa ka tri na ang mak mirsham nguta ngi raq tak tiikang.”