Acts 24 - ASII LAKDAP Bible (BSI)

Jehudinok Raq Paul Ma Kha Nyanto

¹ Kiimaq rabiingi sijai niishe, Ramwe Ajong Pinthum we Ananias ka welabi maiq wiijam, kiimaq phowe ashi Tartulas kra sheaho raüta, Sisiria niishe kihoto. Tsangshiq ka wanghupti we Phelisk rung na chap raüta Paul dü na kha asi nguta nyanto.

² Kiijiishe Paul ka rung na tiichapto. Kiimaq Tartulas raq Paul ma arthun kha ara nyanto: “Mungtu Ajong Pinthum we lei, rilung alu maq silaq! Ümniika phaqchi ajong maiqse. Se ano aheawiq maq rüm wanti we. Ümwokhong na naishiq ka rawii luhea she khusang rakhang maq siwan tiikai. Kiimaq naimung ara ahea maq rüm miitu akhek thungtri anye tri tiiq wan tlaü. Laüta mung ka tiijong luwan miitu, jaqsham ahea pahea sham wan tlaü.

³ Naishiq mungmaiqse barapti raq phanrap lam na, arthun jaqsham ahea sham tlaü arka ahea dea nguta tao wan ruq tao wan tiikai. Kiimaq arthun jaqsham wan tlaü ara miitu naishiq raq ümniima pinthum kechutum tiikai.

⁴ Riita, ümchaü min, ngi raq ümnaq akhing ka alu lam wan mang. Li jiimin, naishiq raq atoqse maq, ara jamlai mra wa ümman na tiitai ke wan ro tiikai, arka ümniiraq mangchan laüta taikuq haü jiidea ahea nguta tiipaiqnea tiikai.

⁵ Naishiq raq arwe arka mungshuk shaqti pinthum haisi chang ashi chhi tiikai. Apaiq raq mangjong tlotli na, Jehudinok phan liipan na, tatso wiinyi pahea tiibrak shaq wantlo chhi tiikai. Kiimaq apaiq arka, Najareth hiqti we phung wa lamsheati wela ashi.

⁶ Kiimaq, apaiq raq Jerusalem wa asii Shomjam kiimin atiishe baiq danto. Kriiwa naishiq raq apaiq ka laphokai. Naishiq raq apaiq ka tri maq kha phoke nguta tiimakai.

⁷ Shatmaq phentuwe Lisias ka kirata ningkun maq apaiq ka naishiq jaq wa nyeawanto.

⁸ Raütiishe Lisias raq apaiq ma kha nyanti bi ka ümman na chap ratlo nguta aming kuqto. Riita, ija, ümchaü min, ümniiraq arwe ma bom ka wai haü jiila, ara naishiq raq apaiq ma kha nyan tiikai thun arka, asi dea nguta misap haü.”

⁹ Krai mren she, Jehudinok riimin, Tartulas bom kra tiijorot raütiishe, apaiq dü na kra chong wantaq kha thun ka asi dea ngutiishe, apaiq jai na bom ka rong rang rang she, Paul ma kha ka nyanto.

Paul Raq Phelisk Rung Maq Akhum Tiichhii Wanto

¹⁰ Kiijiishe, wanghupti we raq Paul ma akhum tiikhe wan bomchong miitu akhing kuqto. Krai mren, Paul raq akhum tiichhii bom ka akhiishe chong pha hoto, “Tuwe jong lei, ümniiraq armung arka rawii luhea she peng wan laü nguta, ngi raq asap ha. Kriikha maq ngi ka ümman na chap lata, i khum ara tiichhii wan ka chochikhiq miishe chap tiikang.

¹¹ Riita, ara ngi ma kha nyan tlaq bomtsi arka, ümniiraq konchon laüta, sapsaq li misap haü. Ngi ka ümnap ümjitiq dongdii, ümchaü raroqshi ri ranaiq nai tin li, Jerusalem na Shiikeawe shomnoq wa wakang.

¹² Kra akhing na, Jehudinok raq ngi ka, Shomjam mong na jurai riikhiilea min chhi mak dea. Kiimaq tsangshiq raq ngi ka, sinagok thun na kilata lo, chela mong na khumlata mungmaiqse kra shukshaq lata, tatso niq kiimin chhi mak dea.

¹³ Kiimaq tsangshiq raq ümchaü, i dü na kha ümchuwa asi nguta nyan rat tlaq, kra thun kiimin, tsangshiq raq ümman na saqseng hakhi min tiichhi kuq wan lot mak.

¹⁴ O, riita bom poshi kla tengto dea. Naititiim Shiikeawe ka, ngi raq kriidea Shiikeawe shomnoq chang Lamjong kaü nguta, chong tlaq kra lam kra phan phan miidea, shomnoq tiikang. Kra lam phan ka tsangshiq raq lamjiq nguta ngutlo. Shatmaq, ngi riimin la Mosheq Thungtri na awaiq thü nai shammibi lakdap thun na awaiqthü tengteng bomtsi kiima kam tiikang.

¹⁵ Riita, ümchaü arjaq rung na nga tlaqti thun raq, tsangshiq raq maiqse angu wiita, maiqhea maiqbi kunli, ranaiqshi akhing na, amaa wa adong mirwan nong nguta, Shiikeawe ma kam tlo. Riita, ara tsangshiq raq kam tlaq kra miika, ngi riimin kam tiikang.

¹⁶ Riita, ara kam tiikang arai mren, ngi raq, i tsan i tsii ka khangriri hea maq, ranaiqtek Shiikeawe man na nai maiqse man na, athuk atsom maq shiiting shrai lata siwan miitu shiikut chaq tiikang.

¹⁷ “Riita, ngi ka wiitsam wiiblai tin she, wanhiq na sirai wa jai miishe, naishiq nok miitsan miijan maiqsetiim ma kechang kongphiq kampho archom kra kewa nai Shiikeawe ma honglu kewa nguta Jerusalem na wakang.

¹⁸ Riita, ngi raq i khum tiisii mrochhi poi ka aklo lot wan wi niishe, tsangshiq raq ngi ka Shomjam mong na chhito. Kra akhing na, ngi rai mungmaiqse ka jumin ahü riito. Kiimaq kiijaq tatso wiinyi brakshaq jam min ahü riito.

¹⁹ Shatmaq, Asia wang wa aki Jehudinok maiq wiijamti kli, kra akhing na kiijaq asi riito. Tsangshiq riiwe ka, ümchaü ranaiq na arjaq, ümman na chap raüta, ngi raq jamlai phan mrong mra wa tang kang kra chong chang.

²⁰ Kiimaq riimak la, ümchaü arwetiim ngi shoktibi raq, tsangshiq maiqmii raq michong wan liina. Ngi ka Jehudinok Rung Jong na tiichap wantaq ranaiq na, tsangshiq raq i dü na jamlai phan mrong mra wa humta.

²¹ Kra ranaiq ngi raq tsangshiq phowebi ma ara bomtsi arli agilülü lata chongkuq kang: ‘Ümchaü ranaiq namshiq raq ngi nangnga ajiq we nguta tiishut tlan arka, ngi raq maiqse ka amaa wa adong mirwan nong nguta kam tiikang kamtsantsii thü tiikang kra kha pho tlan jo’ nguta chong kuq kang.”

²² Kra tai raütiishe Phelisk raq ara chong tlaq kamasham Lamphan tsütsa arka bomkhu bommai wiita asap kha maq, kra ranaiq khapho ka, “Ara namshiq kha arka siihiipjong we Lisias kra saüki raütiq mipho kuqkang,” ngutli she, jai na thü baiqto.

²³ Raüta, apaiq raq Paul liiti phentuwe kiima, Paul ka phenlabi ma tiikheshat maq thülaq nguta aming kuqto. Shatmaq, apaiq ka aje na tiimeshi khumshiim ka naq tiiwinkiq. Kiimaq apaiq ma akhek anaq jamlai phan wa rongra tlaq, kra thun kra khrum liiko kewanti, apaiq kongtibi watlaq kriika naq tangtakiq nguta bom ka chongkuqto.

Phelisk Nai Drusila Raq Paul Traho Taito

²⁴ Kiimaq ranaiq tsam blai si raütiishe, Phelisk ka tsang-nyung Jehudi shea Drusila rai kito. Raüta, apaiq raq Paul ka tiiheawa raüta, Paul raq Khristo Jesuq ma kamwan lamphan bom chongke kra taito.

²⁵ Shatmaq Paul raq apaiq rai riibom lam maq, kechu rilung, stiq skhaq rilung, kiimaq jai na saüho tlaq Phangthum Khapho Ranaiq wa bom thun kra phanchan chongkuq wan lili riitlo. Kriikha maq, Phelisk ka ahaisi min asi riito. Kriikha maq, “Ümniika ümchaü atiido wan mimai. Ngi raq ümtiikiiwa akhing milap ha kiitiikiitiq mitiihea nong kang” nguta chong kuqto.

²⁶ Kiimaq apaiq tsan mong niika, Paul raq apaiq ma kampho tsiiqlap siinai ikuq, nguta tiima kiimin asi riito. Kriikha maq, apaiq raq Paul ka akhing khing na, tiihea wa lili raüta, apaiq rai riibom dam lili riito.

²⁷ Kiimaq wiinai sijai niishe, Wanghupti we Phelisk ka Porsias Phestas riishe laito. Jehudinok raq apaiq kiidea ahea nguta mingu laq nguta tiima raüta, Phelisk raq Paul ka phaqtek mong niili thübaiq thüto.