Acts 23 - ASII LAKDAP Bible (BSI)

¹ Krai mren, Paul riimin Rung na ngati welabi pha nü na tiqtiq lii raüta, apaiq khum tiikhe wan bom ka akha bompha hoto, “I phan i maq Jehudinok singmung maiqse lei! Shiikeawe maklii na i rilung arka ümchaü ranaiq niitaq saüli i tsan i tsii khangriri maq siwan tiikang.”

² Kiijiishe Ramwe Ajong Pinthum we Ananias raq Paul tho na chapti bi ma, Paul ka anübok na riisiiq tsat ronglaq nguta aming kuqto.

³ Kiijiishe Paul raq, “Shiikeawe riitiq ümniika mitsat kiiphaü! Ümniika rong alü phan maq tlü moqrea je khetuk ashi ikha sitlaü! Ümniika arjaq i kha arka Thungtri maq riikhaqli phoke nguta nga tlaü. Shatmaq, ngi ka khahü na tiitsat laüta thungtri ka jin tlaü!” nguta apaiq ma bom ka tiijangto.

⁴ Kiijiishe, kiijaq Paul tho na chapti maiq ahinti riishe, “Ümniiraq Shiikeawe Ramwe Ajong Pinthum we ka jaram wa shummii tlaü!” nguta Paul ka sonto.

⁵ Kiijiishe, Paul raq treto, “I phan i maq Israilnok. Ngi raq apaiq ka Ramwe Ajong Pinthum we nguta sapmang. Asii Bomtsi na, ‘Namshiq raq namwela ma bom abi naq bom rongkiq,’ ” nguta chongtlo.

⁶ Kiijiishe, Paul raq kra Rung ma nga wanti welabi phong niika maiq wiijam ka Sadusinok, kiimaq wiijam ka Phorisinok kra chhito. Kra chhi raütiishe, apaiq raq Rung na ngatibi welabi ma hong raüta, agi lam miishe tri ka akhiishe phoqto, “I phan i maq Israilnok lei! Ngi ka Phorisinok phung wa. Kiimaq i we kiimin Phorisinok phung wa. Riita, ngi ümchaü arjaq Rung na chap tiikang arka, maiq ka amaa wa adong mirwan nong nguta ranphan lata sitiikang kamtsantsii bomtsi kra kha na Rung welabi raq tiichaptlan!”

⁷ Riita, apaiq raq ara bomtsi ara chongri li she Rung welabi, Phorisinok nai Sadusinok liipan niishe riitso hoto. Krai mren, phowebi ka kongnai niishe riiphea kito.

⁸ (Sadusinok riika, maiq ka amaa wa dong mak she nguta kamtlo. Kiimaq rasetiim nai wenyi ngutlaq kiimin ahü nguta kamtlo. Shatmaq Phorisinok riika, ara phantsam wiita ka tengteng asi dea, nguta kamtlo.)

⁹ Krai mren she, tsangshiq riikhii tatso gisii trang wan tlaq kriika henghea riiwan wan she heng wanto. Kiimaq Thungtri shrinketibi phong wa, maiq welabi wiijamti Phorisinok phungti ka chap raütiishe, achaq awaq maq latlat she, tri ka akha ngutiishe riikhii wanto: “Naishiq raq lii kai jaq arwe dü na kha ka jam min ahü chhi mai! Jursap, apaiq ma ngohea dea wenyi riilo, riimak la, rase riidea wa bom asa ka chongkuqla riila!”

¹⁰ Krai mren she, tsangshiq tatso liipan na bom riikhii rai wantaq kriika, henghea riiwan wan she heng wanto. Kra chhi raütiishe, siihiipjong we ka, athi makjaq kharong khoti riijiiq la, tsangshiq raq Paul ka tsat nyat baiqjiiq la ngutiishe, ahai she riito. Kriikha miishe, apaiq raq phenlanok ma, tsangshiq phong na kiraüta Paul ka peruk mong jam kiijiishe shea wan tlo ronglaq nguta aming kuqto.

¹¹ Kra rawa na Tatiwe ka Paul rai adam chapto. Raüta, apaiq ma, “Ümniika naqhaikiq! Ümniiraq arjaq Jerusalem na i ruk i kiimwe ma jamkho jawan laü, kiikhiisii hali, Rom chela niimin hakhi kewa raa tlo,” nguta ningkun shoqke bom hali chongkuqto.

Paul Tsea Baiq Ma Rehuk Haito

¹² Kiimaq napjai ranaiq niishe ka, Jehudinok phong wa maiq wiijamti ka adam na hali ngato. Raüta tsangshiq raq Paul ka tsea baiq ma nguta bom ka kiqshi maq rito. Tsangshiq raq Paul ka tsatbaiq wan mak shaq wiiwii, ralang khamsang kokshi dongdii min nü na thü mai nguta tiitum tiita raüta kiqkhamto.

¹³ Kra rehuk hai wanti kong ka maiq weroqblai pat raq kiqshi maq ri raüta, reraü ka shunto.

¹⁴ Kra rilot raütiishe, tsangshiq ka ramwe jongbi nai welabi phana waraüta, bom ka akha ngutiishe chongto, “Naishiq ka adam na reraüshi maq Paul ka tsatmai wiiwii, ralang khamsang kokshi min nyang mai nguta tiitum wankai she.

¹⁵ Riita, ümchaü min, namshiq ajong alabi nai Rung welabi raq, Paul mra ka samhea tiishangrii nong ma nguta tiimanhii lanta, Roman phentujong we kiima Paul ka Rung na tiisheaho nonglaq nguta bom ka tiichong wa nong rongkiq. Shatmaq, naishiq ka lam na tiipaü laita kheshat mirhai. Laita, Paul ka arjaq misaü ho shaq liipan wiili mitsat baiq kai,” nguta tsangshiq welabi ma bom ka tiitaito.

¹⁶ Shatmaq, Paul ma ashea nyungse, maiqwe se ashi kriiraq, tsangshiq raq rehuk shun wantaq kra tsütsa ka heratto. Raüta, apaiq ka peruk mong jam kiijaq waraüta, Paul ma kra bom tho ka tiihe chongkuq wato.

¹⁷ Kiijiishe Paul raq kiiwa phentubi wa weshi ka hea raüta, “Ara norii we ara siihiipjong we phana shea wan rong laq. Apaiq raq siihiipjong we ma tsütsa tiitai chang asi,” nguta tsangshiq ma bom ka tiitaito.

¹⁸ Krai mren she, siihiip we raq apaiq ka siihiipjong we phana shea wan raüta, “Phaqtek mong na siti we Paul raq ngi hea raüta chongto, ara norii we ara ümnaq phana shea wanlaq, apaiq raq ümniima tsütsa tiitai chang bom asi ngu wa,” nguta tsütsa ka tiitaito.

¹⁹ Kiijiishe, siihiipjong we raq norii we ka, ajaq maq hitho raüta, apaiq laqlaqse pong na sheahoto. Raüta, “Ümniiraq ngi ma jamlai tsütsa chong chang wa?” nguta waito.

²⁰ Kiijiishe, apaiq raq treto, “Jehudinok mung welabi thun ka kiq ari wishe. Anap ranaiq ümniima tsangshiq raq Paul ka Rung na tiiki nonglaq, mung welabi raq Paul ma bom ka samhea tiitsang rii wai nong ma nguta tiimanhii raüta, ümniima bom ka mitiichong wa.

²¹ Shatmaq, siihiipjong we lei, ümniiraq tsangshiq bom ka naq taikiq. Jamkhano ngukla, Paul tsea baiq ma nguta, lam na rehuk hai raüta atiipaü maiq ka weroqblai pat raq kheshat miraq. Tsangshiq raq Paul ka tsatmai wiiwii, khamsang kokshi min nyang mai nguta japhak maq riihan raüta tiitumto. Riita ümchaü tsangshiq ka Paul tseabaiq ma nguta khekham miishe khe tlo. Kiimaq ümniiraq apaiq tiikai kra kheli she sitlo,” nguta norii we raq siihiipjong we ma tsütsa ka tiitaito.

²² Kiijiishe, siihiipjong we raq, “Ümniiraq ara bomtsi ara ngi ma tiitai laü nguta ju miimin naq chongkiq jo,” nguta apaiq ma bom ka athang riito. Raüta apaiq raq norii we ka atsise miishe tlat baiqto.

Paul Ka Wanghupti We Phelisk Rung Na Tiikito

²³ Kiijiishe siihiipjong we raq, apaiq phentu wenai ka hea raüta thaüto: “Sisiria na kai miitu phenlabi shinai tiijeli ronglaq. Kra tiitsuq ma kumrang thaq na chaoti phenlabi weroq miishi kiimaq liiq nai ja apiq shamti phenlabi shinai tiije ronglaq. Lanta athi raji nari tiikaü na tiido ronglaq.

²⁴ Kiimaq Paul chaoho chang kumrang kaütiim ri tiije kuq ronglaq. Lanta tung alam maq jam min ngusiq mak maq khusang maq apaiq ka Wanghupti we Phelisk phana sheaho ronglaq,” nguta aming kuqto.

²⁵ Raüta siihiipjong we raq lak ashi akha waiq raüta tiihoho damto:

²⁶ “Ngi klaudias Lisias raq Mungtu jong wanghuptiwe Phelisk ma. Rilung alu maq silaq.

²⁷ Jehudinok raq arwe ara lapho raüta atsea baiq dan she riito. Ngi raq apaiq ka Roman Hokham sengi nokti we nguta tailata phenlabi shea lata, tsangshiq jaqkhon mong wa tiichhii wan kang.

²⁸ Tsangshiq raq apaiq ma jamlai khü akha wa nyan tlaq kra tiitsangrii miitu tsangshiq nok Rung na sheaho kang.

²⁹ Riita, ngi raq liiwan kangta apaiq tsai chang, lo kiimaq apaiq ka phaqtek mong na shaqli chang lo khü akha ka apaiq dü na ahü chhi mang. Tsangshiq raq apaiq dü na kha asi nguta nyan tlaq kriika, tsangshiq nok thung alai wa bomtsi tri khuthaq wa bom kli chhikang.

³⁰ Kiimaq ngi raq apaiq tsea baiq miitu rehuk mat raü ka ashun wishe nguta bom ka tai lata, tlothit li she, ngi raq apaiq ka ümniiphana tiikai chang nguta thapthi kang. Kiimaq ngi raq apaiq shoktibi kiimiimin tsangshiq ka ümniiphana kiraütiitiq mirpho tsiimki laq nguta chongkuq kang.”

³¹ Krai mren she, phenlanok raq tsangshiq siihiipjong we aming kuqtaq kra phanphan kloto. Tsangshiq raq Paul ka kra rawali Antipartis hiq na saüli sheahoto.

³² Kriimaq napjai ka hok maq khumti phenlanok ka Peruk mong kem niishe jang wan nongto. Kiimaq Paul ka kumrang thaq na chaoti phenlanok miishe tiishea hoto.

³³ Riita tsangshiq raq Paul ka Sisiria na tiisaü sheahoto. Kiimaq lak alamho kiimin Wanghupti we jaq na kuq hoto. Kiimaq Paul kiimin apaiq arang niishe kuq thüto.

³⁴ Wanghupti we raq lak ka phatto. Raüta apaiq ka ümra hongti wa nguta Paul ma waito. Riita apaiq raq Paul ka Silisia hongti nguta sap raütiishe

³⁵ apaiq raq, “Ngi raq ümkha ka ümshoktinok kra saüho raütiq mipho kuq kang,” nguta chongkuqto. Raütiishe apaiq raq Paul ka Wanghupti we sichang anyung chong jam na phenlabi raq kheshat maq tiisi ronglaq nguta aming kuqto.