Acts 22 - ASII LAKDAP Bible (BSI)

¹ “I phan i maq Israilnok singmung maiqse phukhu welabi lei, ngi raq namshiq man na ngi ka shut mang nguta, i khum tiikhe bom ka chongpha shaq, namshiq raq tiitsang tai ronglaq!”

² Kiijiishe, tsangshiq raq apaiq ka, Jehudi bom maq bom kra tairaüta, tsangshiq ka phanshi akaiq lin hali she sang wan nongto. Krai mren, Paul riimin bomchong ka tiipit mak maq akha bom phahoto:

³ “Ngi ka Jehudi phan. Ngi rawü chhi chang hiqshong ka Silisia wang na Tarsas chela. Shatmaq, ngi jonglu wan chang hiqshong ka ara Jerusalem chela ara. Kiimaq ngi ma shra jong we Gamaliel raq natitiim Thungtri ka atsin maq jamkhii lang wan chang wa, kra wiita kunkun shrin kuqto. Kiimaq ümchaü namshiq raq khum kiinong kuq lanta, Shiikeawe jaqsham tlan kiikhiisii hali, ngi riimin, i khum ka wiita kiinong kuq lata, Shiikeawe jaq sham ka sham wan kang.

⁴ Ngi raq ara ümchaü riichong tiikai Lamjong ara phan wantibi maiqse angu thun arka longliiq lata, tsangshiq miisaq tiithum wan lili tiitsat baiq kang. Kiimaq ngi raq tsangshiq ka jechak maiqwe wiita lap lata, phaqtek mong na shaq baiq wan kang.

⁵ Ara ngi raq bom chong tiikang arka tengto dea nguta, Ramwe Ajong Pinthum we nai Jehudinok Rung welabi tarü raq asap. Tsangshiq raq nashiq nok Damaskas chela na siti welabi ma, lak waiq raüta, i jaq na tiiho wanto. Krai mren, ngi ka ara chongtiikai Lamjong ara phan wantibi maiqse angu thun kra Damaskas chela wa lap wa lata, tsangshiq ka kharü maq khaho lata, ara Jerusalem chela na hitho ma nguta, kiimaq tsangshiq ka Rung welabi raq kharü maq kha raüta mitiichamchao laq nguta, tsangshiq lap wa kiina wawan kang.

Apaiq Phung Na Shang Wan Bom Chongto

⁶ “Kra akhing na, ngi ka lam na awarai riikang. Kiimaq Damaskas chela na asaü wan nini she riikang. Kiimaq rashe ka ranaiq shethung shekham bala she riito. Kra liipan bala niili she, tiihanghiiq miili, ngi tro na ra wa walüli chhai henghea langlang ashi ka chhai raito.

⁷ Kiijiishe ngi ka, hiq na tiidearok she dea wan kang. Kiimaq ngi raq maiq bom ashi, ngi ma akha chongto taikang, ‘Saul, Saul! Ümniiraq ngi ka jamkhano tiichamchao tlaü?’

⁸ Kiijiishe, ‘Tatiwe, ümniika ka juwa?’ nguta ngi raq maiq bomtlaq kriiwe ma waikang. Kiijiishe apaiq raq treto, ‘Ngi ka Najareth hiqti Jesuq, ümniiraq tiichamchao tlaü we ahata,’ nguta apaiq raq i bom ka treto.

⁹ Kiitiikaq, ngi rai wadamti kongtibi raq walüli chhairai taq kriika chhito. Shatmaq, ngi rai riibom damtaq bomtsi ka tsangshiq raq taimak dea riito.

¹⁰ Kiijiishe, ‘Tatiwe, riita ümchaü ngi raq jamlai phan jaq sham chang she wa?’ nguta ngi raq apaiq ma bom ka wai nong kang. Kiijiishe Tati we raq ngi ma, ‘Tiidolaq. Laüta Damaskas chela na walaq. Shiikeawe raq ümnaq miitu jamlai phan jaqsham kaiwa wa tiihong tha kuq wantaq, kra thun ka, kra miishetiq wiita ümniima michong kuq,’ nguta ngi ma bom ka chongkuqto.

¹¹ Walüli chhai rai henghea kra raq chaq rea kha maq, i makpo ka achuk she riikito. Kriikha maq, ngi raq jam min chhi mang she riikang. Kriikha miishe, i kongtibi raq ngi ka i jaq maq hit raütiishe, Damaskas chela niishe shea wanto.

¹² “Kra chela na maiq weshi asi riito. Apaiq mang ka Ananias. Apaiq ka tsantsii kuq raüta Shiikeawe shomnoq wanti we. Kiimaq nashiq Jehudinok Thungtri ka tsapkapkap maq lang wanti we. Kiimaq kiijaq siti Jehudinok tarü raq apaiq ka pinthum shreng wantlo.

¹³ Kra akhing na, apaiq ka i phana kito. Raüta i tho na chap raüta, ngi rai akha bomdamto, ‘Phuno we Saul, ümmak ka tiipiiq laq. Laüta liilaq!’ Apaiq raq kra bom wantaq krai mren she, kra liipan niili, i mak ka heasaq piiqkito. Krai mren, ngi raq apaiq ka chhikang.

¹⁴ Kiijiishe, Ananias raq ngi ma bom ka akha chongto, ‘Natitiim Shiikeawe raq ümniika apaiq tiima tsantsii kra khon wan miitu tsea wanto. Kiimaq apaiq Tingting dise krai sham riichhi miitu, kiimaq apaiq raq ümniima pumsii maq, bom chongkuq tlaq kra taiwan miitu she tsea wanto.

¹⁵ Riita ija, ümchaü armiiphat she sanha, ümniiraq jamlai phan wa chhi laü, kiimaq jamlai phan wa tai laü, kra thun ka maiqse angu wiitarü ma chongke wan miitu she, ümniika apaiq rukwe kiimwe miishe mija wan haü.

¹⁶ Riita, ija, ümchaü min, jaram she wa mikhesiq haü? Tiido liina. Chaplaq. Laüta kham ka lam laq. Kiimaq apaiq jaq wa achu jaü laq. Laüta, ümngarai thun ka tiihe tlo liishe,’ nguta Paul raq tsangshiq ma bom ka chongkuqto.

Apaiq Ka Pongnok Phan Ma Trahoke Miitu Shongto

¹⁷ “Krai mren she, ngi ka Jerusalem na hali jangho nong kang. Kiimaq ngi ka Shomjam mong na achu jaü kai nguta kikang. Ngi ka achu jaürea akhing na,

¹⁸ ngi raq riisham mak maq Tatiwe ka chhikang. Apaiq raq ni ma bom ka akha chongto, ‘Jaqlo tiije laq. Laüta, Jerusalem wa ahin na wawan tlo laq. Ümniiraq ngi miitu hakhi kuq tlaü kriika, nokwe raq lang mak miraq.’

¹⁹ Kiijiishe ngi raq Tatiwe bom ka akha trekang, ‘Tatiwe, tsangshiq riili ngi ka sinagok thun na walata, ümniima kamti maiqse angu thun kra lapho lata, tsangshiq ka ninta tiitseati we nguta tsangshiq raq sapshat.

²⁰ Kiimaq, tsangshiq raq ümruk ümkiim we Stephen tiijai raübaiqtaq akhing ranaiq na, ngi min tsangshiq rai pong dam lata asi riikang ihata. Ngi riimin riikhaqli dea tsat baiqto nguta tsangshiq rai kiqshi maq pong wan damti we riikang ihata. Kiimaq apaiq tsea baiq wantibi matwe kong samtong jong khea phong kra lii wanti we ka ngi riikang ihata,’ nguta Tatiwe bom ka trekang.

²¹ Shatmaq, Tatiwe raq ngi ka, ‘Tiido laq. Walaq. Ngi raq ümniika maiq mung ahin luhea na siti Pongnok phan maiqse ma tsütsa ahea kra chongke wa she mitiiwa kang,’ ” nguta Tatiwe raq ngi ma bom ka chongkuqto.

²² Mungmaiqse raq Paul bomchong ka ara bomtsi chongtaq arjaq saüli li tiitsang taito. Shatmaq, ara jai miishe sanha, tsangshiq ka agilülü she hali, khot arot pan baiq nam nam she hali, “Arwe ara tiiwa baiq tlo ronglaq! Sebaiq tlo ronglaq! Apaiq ka atra si thek mak she!” ngutiishe gitrang wan nongto.

²³ Tsangshiq ka agilülü she gitrang wanto. Kiimaq tsangshiq dü na khea asam kra thun kiimin, chaiham chaihea chai baiq raütiishe, tsangshiq ka khutaü maitaü she phetrang wanto. Kiimaq hiq wa botkhulai kra hin raüta, ra na wan trang liishe, botkhuk li khuk wa trang li she, phetrang wanto.

²⁴ Kra mungmaiqse brak shaq wan trang kra chhi raütiishe, Roman phentujong we raq, apaiq phenlabi ma, Paul ka peruk mong jam kiina hit wan tlo ronglaq, ngutiishe aming ka kuqto. Raüta, Jehudinok raq apaiq ma atinkhan khiq chang nai wesang ma jatlii chang kha ka Paul raq jamlai phan khü akha wa tangtaq kra tiidong khot wan miitu she, apaiq raq Paul ka chunpo-nyam chongwai miishe ninta tsat ronglaq ngutiishe, aming kuqto.

²⁵ Shatmaq, tsangshiq raq apaiq ka jin raü maq tep kha raüta, chunpo-nyam chongwai maq atseaho she angu na, Paul raq phentuwe apaiq tho na chap raü we kiima, “Riita ümniiraq Roman Hokham sengi nokti we ka, apaiq khü akha ka jamlai wa, kra kongkhu pho hü maq, akha tsea thung ka asi sha?” ngutiishe apaiq raq siihiip we ma bom ka waito.

²⁶ Kra tairaütiishe siihiip we ka siihiipjong we phana wa raüta, “Ümniiraq ara jamlai wa riiholaü? Kriiwe ka Roman Hokham sengi nokti we ngu tlaq kata!” ngutiishe bom ka siihiip we ma chongto.

²⁷ Kra tairaütiishe, siihiipjong we ka Paul phana ki raüta, “Ngi ma riikhaqli chong laq, ümniika Roman Hokham sengi nokti we dea sha?” ngutiishe bom ka tiitsang waito. “Üm,” nguta Paul raq apaiq bom ka treto.

²⁸ Kiijiishe, siihiipjong we raq, “Ngi riika Roman Hokham sengi nokti we ma jawan miitu, i khu liiq chang phumram kham ri miitu amaq kampho ka pahea kuq lata rikang,” nguta Paul ma chongto. Kiijiishe, Paul raq, “Shatmaq, ngi ka i nyung pukdong Roman Hokham sengi nokti we dongdii adong ha,” nguta apaiq bom ka treto.

²⁹ Kra taiwi raütiishe, Paul ma bom wai lai nguta chaptaq phenla wetiim thun kiimin jai na tiisot rang she tiitong rang riito. Riita siihiipjong we kiimin apaiq raq Paul ka Roman Hokham sengi nokti we shatmaq, jinraü kharü maq tiikharat kai nguta tiima raüta, ahai she riito.

Paul Ka Rungjong Na Tiichapto

³⁰ Phentujong we raq Jehudinok raq Paul ma jamlai phan khü akha wa nyan tlaq kra riikhaqli tiishang rii ro riito. Kriikha miishe, apaiq raq anap ranaiq miishe, Paul khachang jinraü kharü thun kra atiidii she riibaiqto. Raüta, Jehudinok Rungjong kra nga wan miitu ramwe jongbi thun ma ngongthun ronglaq nguta aming kuqto. Raüta apaiq raq Paul ka Rung na tiichapto.